၅.၂.၆။ အနုပခဇ္ဇသိက္ခာပိုဒ်

119) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် သ္ပဂဗုဓ် (ပၠံၚ်ကေတ်) သၞာသတိက်သၞာဒၟံၚ်မပြဲဂမၠိုၚ်အိုတ်ရ၊ ကဵုခမဳထေရ်ဇၞော်ဂမၠိုၚ် ဒၠိုက်ကတဵုအိုတ်ရ။ ပ္ဍဲအခိၚ်ဂှ် “မုရဴနဟိုတ်ဥပါယ်မွဲ လုကဴမွဲဝသ်ပိဂိတု ပိုဲညးဂမၠိုၚ် သ္ဂောံပဒတဴ ပ္ဍဲဘာဝွံဟေၚ်အိုတ်ရော?” ရဴဝွံ ကသပ်ဒှ် ကုခမဳ ဆဗ္ဗဂ္ဂဳဂမၠိုၚ်ရ။ ပ္ဍဲကြဴနူဂှ် ခမဳဆဗ္ဗဂ္ဂဳဂမၠိုၚ် “ခမဳ မက္ဍန်ဂြက် (ကြေပ်ဂြက်) ဂှ် ကြက်ပဲါစ္ဍးအာရ” ရဴဝွံ ဃရိတ်ခတ် (ၜေတ်ဓရေတ်) ခမဳထေရ်ဇၞော်ဂမၠိုၚ် တိက်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ဃရိတ်ခတ် (ၜေတ်ဓရေတ်) ခမဳထေရ်ဇၞော်ဂမၠိုၚ်တုဲ တိက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ဃရိတ်ခတ် (ၜေတ်ဓရေတ်) ခမဳထေရ်ဇၞော်ဂမၠိုၚ်တုဲ တိက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဃရိတ်ခတ် (ၜေတ်ဓရေတ်) ခမဳထေရ်ဇၞော်ဂမၠိုၚ်တုဲ တိက်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုက်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

120) “ယြဴခမဳမွဲ သီုကဵုမတီတဴ ခမဳမပြာပ်ကၠုၚ်စိုပ် ဗွဲကိုပ်ကၠာ ပ္ဍဲဘာသၚ်ဃရိတ်ခတ်တုဲ ‘ယြဴကုခမဳမွဲ ကြက်က္ဍန်ဂြက်ကြေပ်ဂြက်ရ၊ ခမဳဂှ် ကြက်စ္ဍးအာရ’ ရဴဝွံ သီုဟွံမွဲကဵုဟိုတ်မွဲသအာၚ် သ္ပဟိုတ်ကဵုပွမမိက်ကဵုစာ်စ္ဍးအာဟေၚ်တုဲ သ္ပတဴပွမတိက်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။