၅.၂.၅.၁။ ပွံက်ဒုတိယသေနာသနသိက္ခာပိုဒ်
116) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္ထိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဂြပ်သင် မ္ဂးဂှ် ဘာမဂပ်ဝ်ကဵုလဝ်ဒါန် မဂပ်ဝ်သၠးပွးလဝ် ကုသၚ်ရောၚ်။ သၞာသတိက်သၞာဒၟံၚ် မ္ဂးဂှ် ဖုန် သၞာလးယာတ် သၞာလးလတူ သၞာလးတိ သၞာလးကောပ်ကာဲဒေဲါ(သကဝ်) သၞာလးစၞာံဒကုတ် သၞာနသဳဒိုန် သၞာလးတိက် သၞာလးချောဲ သၞာလးသၠဆုရောၚ်။ လးတုဲ မ္ဂးဂှ် အလဵုဇကု လးတုဲ။ ဖအောဝ်ကဵုလးတုဲ မ္ဂးဂှ် ဖအောဝ်ကဵုညးသအာၚ်လးတုဲ။ ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီဂိုၚ်ဒေပ် မ္ဂးဂှ် အလဵုဇကု ဟွံလပှ်သီဂိုၚ်ဒေပ်မ္ဂး။ ဟွံဖအောဝ်ကဵုလပှ်သီဂိုၚ်ဒေပ်မ္ဂး မ္ဂးဂှ် ဟွံဖအောဝ်ကဵုညးသအာၚ် လပှ်သီဂိုၚ်ဒေပ်မ္ဂ။ ဟွံဂရၚ်ပတီတုဲလေဝ် ပဲါစ္ဍးအာမ္ဂး မ္ဂးဂှ် သီုဟွံဂရၚ်ပတီလဴဗ္စ ခမဳကီု သာမဏီကီု ပၟၚ်အာရှာမ်ကီုတုဲ ပ္ဍဲအရှာမ်ဘာမၞုံကဵုဒပ် ကုခမဳ မကလိလောန်အာဒပ်ဂှ် ဒးအာပတ်ပဲါစိုတ်ရ။ ပ္ဍဲအာရှာမ်ဘာမဟွံမွဲကဵုဒပ် ကုခမဳ မကလိလောန်အာဥပစာဘာဂှ် ဒးအာပတ်ပဲါစိုတ်ရ။ ပ္ဍဲဂြပ်သၚ် မၞုံကဵုစၟတ်သမ္တီဂြပ်သၚ်ဒှ်တုဲ လးလဝ်သၞာသတိက်သၞာဒၟံၚ်တုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီုဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲဂြၚ်သၚ် မၞုံကဵုသၠေဟ်ပၟာဒှ်တုဲ လးလဝ် သၞာသတိက်သၞာဒၟံၚ်တုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီုဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲဂြပ်သၚ် မၞုံကဵုစၟတ်သမ္တီ ဂြပ်ပူဂိုလ်ဒှ်တုဲ လးလဝ်သၞာသတိက်သၞာဒၟံၚ်တုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီုဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ပဲါစိုတ်ရ။
117) ပ္ဍဲဥပစာဘာကီု ပ္ဍဲဇြပ်ကောံဓရီုကီု ပ္ဍဲကၞာထးကီု ပ္ဍဲသၟဝ်တမ်ဆုကီု လးလဝ်သၞာသတိက်သၞာဒၟံၚ်တုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီုဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ဒုက္ကဋ်ရ။ ပ္ဍဲဘာကီု ပ္ဍဲဥပစာဘာကီု ပ္ဍဲဇြပ်ကောံဓရီုကီု ပ္ဍဲကၞာထးကီု ပ္ဍဲသၟဝ်တမ်ဆုကီု လးလဝ်ဇံၚ်ခတဵုတုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး ဇံၚ်ခတဵုဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီုဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ဒုက္ကဋ်ရ။ ပ္ဍဲဂြပ်ပူဂိုလ် မၞုံကဵုစၟတ်သမ္တီဂြပ်သၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲဂြပ်ပူဂိုလ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ဂြပ်ပူဂိုလ် ပ္ဍဲအရာမၞုံကဵုစၟတ်သမ္တီဂြပ်ပူဂိုလ်ဂှ် ဒှ်ဂြပ်ပူဂိုလ်သအာၚ်မ္ဂး ဒးအာပတ်ဒုက္ကဋ်ရ။ ဒှ်ဂြပ်ဇကုအပိုၚ်မ္ဂး၊ ဟွံဒးအာပတ်ရ။
118) လပှ်သီုဂိုၚ်ဒေပ်တုဲ အာမ္ဂး၊ ဖအောဝ်ကဵုလပှ်သီုဂိုၚ်ဒေပ်တုဲ အာမ္ဂး၊ ဂရၚ်ပတီတုဲ အာမ္ဂး၊ ဂဗုဓ်ပလာဲပထုဲ မမိက်ကဵုမွဲမွဲနွံမ္ဂး၊(ကလေၚ်စဴကၠုၚ်တ္ၚဲဏအ်တုဲ လပှ်သီုဂိုၚ်ဒေပ်ဏောဝ် ရဴဝွံ) အာသီုမၞုံကဵုသ္ၚေဝ်မဲတုဲ တန်တဴဒၟံၚ် ပ္ဍဲဌာန်မအာစိုပ်ဂှ် (သီုမမိက်ဆက်တရဴ) တုဲ (ဗလးနၚ်ညးမမိက်ကဵုမွဲမွဲတုဲ) ဂရၚ်ပတီမ္ဂး၊ ဘဲမမိက်ကဵုမွဲမွဲနွံမ္ဂး ‘ကလေၚ်စဴကၠုၚ်ဟွံမာန်မ္ဂး’၊ ပရိုက်ဘဲ ကတဵုဒှ်ကၠုၚ်တုဲ သီုဟွံလပှ်သီဂိုၚ်ဒေပ် အာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ဒုတိယသေနာသနသိက္ခာပိုဒ် ပဉ္စမတုဲရ။
