၅.၂.၅။ ဒုတိယသေနာသနသိက္ခာပိုဒ်
114) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳသတ္တရသဝဂ္ဂဳဂမၠိုၚ် ဒှ်မိတ်သဟာဲ သကအ်ပွံၚ်အိုတ်ရ။ ခမဳဂမၠိုၚ်ဂှ် အခိၚ်ပဒတဴလေဝ် ပဒတဴမွဲစွံဟေၚ်အိုတ်ရ၊ အခိၚ်စ္ဍးအာလေဝ် စ္ဍးအာမွဲစွံအိုတ်ရ။ ခမဳဂမၠိုၚ်ဂှ် လးလဝ်သၞာသတိက်သၞာဒၟံၚ် ပ္ဍဲဘာသၚ်မွဲဘာမဟွံပြာကဋ်တုဲ စ္ဍးအာအိုတ်မ္ဂး ဟွံလပှ်သီဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရ၊ ဟွံဖအောဝ်ကဵုလပှ်သီဂိုၚ်ဒေပ်အိုတ်ရ၊ ဟွံဂရၚ်ပတီတုဲလေဝ် ပဲါစ္ဍးအာအိုတ်ရ၊ ဂြုန်ဂမၠိုၚ် ကိတ်သၞာသတိက်သၞာဒၟံၚ်အိုတ်ရ။ ခမဳပၟိက်အောန်ဂမၠိုၚ်ဂှ်“ မုဟိုတ် ခမဳသတ္တရသဝဂ္ဂဳဂမၠိုၚ် လးလဝ်သၞာသတိက်သၞာဒၟံၚ် ပ္ဍဲဘာသၚ်တုဲ ပဲါစ္ဍးအာမ္ဂး ဟွံလပှ်သီဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရော? ဟွံဖအောဝ်ကဵုလပှ်သီုဂိုၚ်ဒေပ်အိုတ်ရော? ဟွံဂရၚ်ပတီတုဲလေဝ် ပဲါစ္ဍးအာအိုတ်ရော? ဂြုန်ဂမၠိုၚ် ကိတ်သၞာသတိက်သၞာဒၟံၚ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳသတ္တရသဝဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳသတ္တရသဝဂ္ဂဳဂမၠိုၚ် လးလဝ်သၞာသတိက်သၞာဒၟံၚ် ပ္ဍဲဘာသၚ်တုဲ စ္ဍးအာအိုတ်မ္ဂး ဟွံလပှ်သီုဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရ၊ ဟွံဖအောဝ်လပှ်သီုဂိုၚ်ဒေပ်အိုတ်ရ၊ ဟွံဂရၚ်ပတီတုဲ ပဲါစ္ဍးအာအိုတ်ရ၊ ဂြုန်ဂမၠိုၚ် ကိတ်သၞာသတိက်သၞာဒၟံၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် လးသၞာသတိက်သၞာဒၟံၚ် ပ္ဍဲဘာသၚ်တုဲ ပဲါစ္ဍးအာမ္ဂး ဟွံလပှ်သီုဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရော? ဟွံဖအောၚ်ကဵုလပှ်သီုဂိုၚ်ဒေပ်အိုတ်ရော? ဟွံဂရၚ်ပတီတုဲလေဝ် ပဲါစ္ဍးအာအိုတ်ရော? ဂြုန်ဂမၠိုန် ကိတ်သၞာသတိက်သၞာဒၟံၚ်အိုတ်ရ၊ ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
115) “ယြဴခမဳမွဲ လးလဝ် သၞာသတိက်သၞာဒၟံၚ် ပ္ဍဲဘာသၚ်တုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး သၞာသတိက်သၞာဒၟံၚ်ဂှ် ဟွံလပှ်သီုဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
