၅.၂.၄.၁။ ပွံက်ပဌမသေနာသနသိက္ခာပိုဒ်
111) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဂြပ်သၚ် မ္ဂးဂှ် ဂြပ်မဂပ်ဝ်ကဵုလဝ်ဒါန် ဂြပ်မဂပ်ဝ်သၠးပွးလဝ် ကုသၚ်ရောၚ်။ ဇံက်ခါတ် မ္ဂးဂှ် ဇံၚ်မၞုံကဵုၝောံမပြိုက်စုတ်လဝ်ပ္ဍဲဇိုၚ် ဇံၚ်မၞုံကဵုၝောံကေုာံဇိုၚ်မွဲဗ္စပ်ဓဝ် ဇံၚ်မၞုံကဵုဇိုၚ်မတ္ၚံက်ညံၚ်ရဴၚာၚ်ဂတာမ် ဇံၚ်မၞုံကဵုဇိုၚ်မပြိုက်စုတ်လဝ်ပ္ဍဲၝောံ ရဴဝွံ ဇံၚ်မၞုံပန်ဂကူဂမၠိုၚ်ရ။ ခတဵုဒလာဲ မ္ဂးဂှ် ခတဵုဒလာဲမၞုံကဵုၝောံမပြိုက်စုတ်လဝ်ပ္ဍဲဇိုၚ် ခတဵုဒလာဲမၞုံကဵုၝောံကေုာံဇိုၚ်မွဲဗ္စပ်ဓဝ် ခတဵုဒလာဲမၞုံကဵုဇိုၚ်မတ္ၚံက်ညံၚ်ရဴၚာၚ်ဂတာမ် ခတဵုဒလာဲမၞုံကဵုဇိုၚ်မပြိုက်စုတ်လဝ်ပ္ဍဲၝောံ ရဴဝွံ ခတဵုဒလာမၞုံပန်ဂကူဂမၠိုၚ်။ ဖုန် မ္ဂးဂှ် ဖုန်မၞုံကဵုစၞ (ပြိုက်ဗပေၚ်) လဝ်တသော်သတ် ဖုန်မၞုံကဵုစၞ (ပြိုက်ဗပေၚ်) လဝ်ယာတ် ဖုန်မၞုံကဵုစၞ (ပြိုက်ဗပေၚ်) လဝ်ကာန် ဖုန်မၞုံကဵုစၞ (ပြိုက်ဗပေၚ်) လဝ်ချောဲကၟတ် ဖုန်မၞုံကဵုစၞ (ပြိုက်ဗပေၚ်လဝ်) လဝ်သၠဆု ရဴဝွံ ဖုန်မၞုံမသုန်ဂကူဂမၠိုၚ်ရ။ ကောပ်ကာဲဒေဲါ (သကဝ်) မ္ဂးဂှ် ကောပ်ကာဲဒေဲါကၠောန်သ္ပလဝ်နကဵုကာန် ကောပ်ကာဲဒေဲါကၠောန်သ္ပလဝ် နကဵုကၟတ်ဥသဳ ကောပ်ကာဲဒေဲါကၠောန်သ္ပလဝ်နကဵုကၟတ်ဇပူ ကောပ်ကာဲဒေဲါကၠောန်သ္ပလဝ်နကဵုကၟတ်စာဗဲ (ကောပ်ကာဲဒေဲါ (သကဝ်) သီုဖအိုတ်ဂှ်) ခ္ဍပ်ပၠုပ်ပ္ဍဲအပ္ဍဲတုဲ ဇိၚ်ဒက်လဝ်ရ။ လးတုဲ မ္ဂးဂှ် အလဵုဇကု လးတုဲ။ ဖအောဝ်ကဵုလးတုဲ မ္ဂးဂှ် ဖအောဝ်ကဵုညးသအာၚ်လးတုဲ။ ဖအောဝ်ကဵုညးဟွံသေၚ်ကဵုခမဳ လးမ္ဂး၊ ဒှ်လျိုၚ် ခမဳဖအောဝ်စကာရ။ ဖအောဝ်ကဵုခမဳ လးမ္ဂး၊ ဒှ်လျိုၚ် ခမဳလးရ။ ပဲါစ္ဍးအာမ္ဂး မပ္တံကဵုဇံၚ်ခတဵုသၚ်ဂှ် ဟွံလပှ်သီဂိုၚ်ဒေပ်မ္ဂး မ္ဂးဂှ် အလဵုဇကု ဟွံလပှ်သီဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီဂိုၚ်ဒေပ်မ္ဂး မ္ဂးဂှ် ဟွံဖအောဝ်ကဵုညးသအာၚ် လပှ်သီဂိုၚ်ဒေပ်မ္ဂး။ ဟွံဂရၚ်ပတီတုဲလေဝ် ပဲါစ္ဍးအာမ္ဂး မ္ဂးဂှ် သီုဟွံဂရၚ်ပတီလဴဗ္စ ခမဳကီု သာမဏဳကီု ပၟၚ်အာရှာမ်ကီုတုဲ ကုခမဳ မကဵုကလိလောန်အာ မွဲကၠဟ်တၟတ် တြုံမၞုံဇြဟတ်တဲလဒေါဝ်ဂှ် ဒးအာပတ်ပဲါစိုတ်ရ။
112) ပ္ဍဲဂြပ်သၚ်ပိုၚ် မၞုံကဵုစၟတ်သမ္တီဂြပ်သၚ်ပိုၚ်ဒှ်တုဲ ပ္ဍဲအမှဲအကး လးတုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး ဂြပ်ဂှ် ဟွံလပှ်သီဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ ပ္ဍဲဂြပ်သၚ်ပိုၚ် မၞုံကဵုသၠေဟ်ပၟာဒှ်တုဲ ။ ပ ။ ပ္ဍဲဂြပ်သၚ်ပိုၚ် မၞုံကဵုစၟတ်သမ္တီဂြပ်ပူဂိုလ်ပိုၚ် ဒှ်တုဲ ပ္ဍဲအမှဲအကး လးတုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး ဂြပ်ဂှ် ဟွံလပှ်သီဂိုၚ်ဒေပ်မ္ဂး ဟွံဖအောဝ်ကဵု လပှ်သီဂိုၚ်ဒေပ်မ္ဂး၊ ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ပဲါစိုတ်ရ။ သၞာလးယာတ်ကီု သၞာလးလတူကီု သၞးလးတိကီု သၞာလးကောပ်ကာဲဒေဲါ (သကဝ်) ကီု သၞာလးစၞာံဒကုတ်ကီု ကဝးဇုက်ဇိုတ်ဇိုၚ်ကီု ခတဵုဒလာဲဂတဵုသတှေ်ကီု ပ္ဍဲအမှဲအကး လးတုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး မပ္တံကဵုသၞာဂှ် ဟွံလပှ်သီဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီဂိုၚ်ဒေပ်မ္ဂး ဟွံဂရၚ်ပတီတုဲလေဝ် ပဲါစ္ဍးအာမ္ဂး၊ ဒးအာပတ်ဒုက္ကဋ်ရ။ ပ္ဍဲဂြပ်ပူဂိုလ် မၞုံကဵုစၟတ်သမ္တီဂြပ်သၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲဂြပ်ပူဂိုလ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ဂြပ်ပူဂိုလ် ပ္ဍဲအရာမၞုံကဵုစၟတ်သမ္တီဂြပ်ပူဂိုလ်ဂှ် ဒှ်ဂြပ်ပူဂိုလ်သအာၚ်မ္ဂး ဒးအာပတ်ဒုက္ကဋ်ရ။ ဒှ်ဂြပ်ဇကုပိုၚ်မ္ဂး၊ ဟွံဒးအာပတ်ရ။ 113) လပှ်သီဂိုၚ်ဒေပ်တုဲ အာမ္ဂး၊ ဖအောဝ်ကဵုလပှ်သီဂိုၚ်ဒေပ်တုဲ အာမ္ဂး၊ ပရိုက်ဘဲကတဵုဒှ်ကၠုၚ်တုဲ သီုဟွံလပှ်သီဂိုၚ်ဒေပ် အာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။
