၅.၂.၄။ ပဌမသေနာသနသိက္ခာပိုဒ်
108) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ် အခိၚ်ဥတုမုဟ်ကျာ လးလဝ်သၞာသတိက်သၞာဒၟံၚ် ပ္ဍဲအမှဲအကးတုဲ သီုကဵုဇကုဂမ္တဴတဴအိုတ်ဂှ် ‘သီုမဖအၚ်ဒၟံၚ်တ္ၚဲအိုတ်ဂှ်’ အခိၚ်ဂရၚ်ပတီတိုန် အခိၚ်အခါဂှ် ပဲါစ္ဍးအာအိုတ်မ္ဂး ဟွံလပှ်သီဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရ၊ ဟွံဖအောဝ်ကဵုလပှ်သီဂိုၚ်ဒေပ်အိုတ်ရ၊ ဟွံဂရၚ်ပတီလေဝ် ပဲါစ္ဍးအိုတ်ရ၊ သၞာသတိက်သၞာဒၟံၚ်ဂှ် ဍေက် (ဗြဲလတိုပ်) ရ။ ခမဳပၟိက်အောန်ဂမၠိုၚ် “မုဟိုတ် ခမဳဂမၠိုၚ် လးလဝ်သၞာသတိက်သၞာဒၟံၚ် ပ္ဍဲအမှဲအကးတုဲ ပဲါစ္ဍးအာမ္ဂး ဟွံလပှ်သီဂိုၚ်ဒေပ် သၞာသတိက်သၞာဒၟံၚ်ဂှ်အိုတ်ရော? ဟွံဖအောဝ်ကဵုလပှ်သီဂိုၚ်ဒေပ်အိုတ်ရော? ဟွံဂရၚ်ပတီတုဲလေဝ် ပဲါစ္ဍးအာအိုတ်ရော? သၞာသတိက်သၞာဒၟံၚ်ဂှ် ဍေက် (ဗြဲလတိုပ်) ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚိ ပ္ဍဲအမှဲအကး ။ ပ ။ ဟွံဂရၚ်ပတီတုဲလေဝ် ပဲါစ္ဍးအာအိုတ်ရ ဟီုဂှ် ဍာံပြဟာ” ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
109) “ယြဴခမဳမွဲ ဇံၚ်ခါတ်ကီု ခတဵုဒလာဲခုၚ်ဇမၠိၚ်ကီု ဖုန်ကီု ကောပ်ကာဲဒေဲါ (ဂတဵုထၟိက်) ကီု (သကဝ်၊နှာ-လေဝ်ဂး) မဒှ်ဂြပ်သၚ်ဂှ် ပ္ဍဲအမှဲအကး လးတုဲကီု ဖအောဝ်ကဵုလးတုဲကီု ပဲါစ္ဍးအာမ္ဂး မပ္တံကဵုဇံၚ်ခတဵုသၚ်ဂှ် ဟွံလပှ်သီဂိုၚ်ဒေပ်မ္ဂး၊ ဟွံဖအောဝ်ကဵုလပှ်သီဂိုၚ်ဒေပ်မ္ဂး ဟွံဂရၚ်ပတီတုဲလေဝ် ပဲါစ္ဍးအာမ္ဂး (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
110) ပ္ဍဲအခိၚ်ဂှ် ခမဳဂမၠိုၚ် ပဒတဴ ပ္ဍဲအမှဲအကးတုဲ ပြဟ်ပြဟ်ဟေၚ် ကလေၚ်ရၚ်တၠုၚ် သၞာသတိက်သၞာဒၟံၚ်အိုတ်ရ ‘သီဂိုၚ်ဒေပ်အိုတ်ရ’။ တဳလမၞုံပိုဉ်ကျာ်တြဲ သ္ဂောံညာတ်ကေတ်ခမဳဂမၠိုၚ် ကလေၚ်ရၚ်တၠုၚ်ဒၟံၚ် သၞာသတိက်သၞာဒၟံၚ် ပြဟ်ပြဟ်ဟေၚ်မ္ဂး ဟိုတ်နူဟိုတ်အရာဝွံ တွံကဵုဂလာန်ဓရ်တုဲ “ယွံခမဳတအ် ပ္ဍဲကၞာထးကီု ပ္ဍဲသၟဝ်တမ်ဆုကီု မဂပ်ဝ် သမ္တီဂး ဟွံဍေက် (ဗြဲလတိုပ်) ပ္ဍဲဌာန် ခ္ဍာ် လၞၚ်အသိမ်ဂမၠိုၚ် ဟွံကၞေအ်စုတ်တရဴဇၞော်ကီု လုကဴဒ္စာံဂိတုဂမၠိုၚ် တၞဟ်နစွံလဝ် သၞာသတိက်သၞာဒၟံၚ်ဂှ် ကဵုအခေါၚ်ရ”ရဴဝွံ သ္ဂးကဵုခမဳဂမၠိုၚ်ရ။
