၅.၂.၃။ ဥဇ္ၛာပနကသိက္ခာပိုဒ်
103) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် တဳလပိုဉ်ဒဗ္ဗ မဒှ်ကောန်သၟိၚ်မလ္လ ဘာသၞာသတိက် သၞာဒၟံၚ်သၚ်လေဝ် လးပညပ်ရ၊ ပိဏ္ဍပါတ်ဂမၠိုၚ်လေဝ် စၞောန်ထ္ၜးရ။ ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ် ညးသၟတ်လေဝ်ဒှ်အိုတ်ရ၊ ပိုဉ်ကမ်လေဝ်အောန်အိုတ်ရ၊ ဘာသၞာသတိက်သၞာဒၟံၚ် မယုတ်ပရေအ်ဂမၠိုၚ်ကီု ပိဏ္ဍပါတ်မယုတ်ပရေအ်ဂမၠိုၚ်ကီု ဂြပ်သၚ်ဂှ် အာစိုပ်ကုခမဳဂမၠိုၚ်ဂှ်အိုတ်ရ။ ခမဳမေတ္တိယဘူမဇကဂမၠိုၚ်ဂှ် “ဒဗ္ဗမဒှ်ကောန်သၟိၚ်မလ္လ နမသ္ဍိုက်ဆာန် (ဗက်စဆန္ဒာဂတိတုဲ) လးပညပ်တဴ ဘာသၞာသတိက်သၞာဒၟံၚ်ရ၊ နမသ္ဍိုက်ဆာန် (ဗက်စဆန္ဒာဂတိတုဲ) စၞောန်ထ္ၜးတဴပိဏ္ဍပါတ်ဂမၠိုၚ်ရ” ရဴဝွံ ကဵုခမဳဂမၠိုၚ်ဟီုဂရိုဟ် တဳလပိုဉ်ဒဗ္ဗ မဒှ်ကောန်သၟိၚ်မလ္လအိုတ်ရ။ ခမဳပၟိက်အောန်ဂမၠိုၚ် “မုဟိုတ် ခမဳမေတ္တိယဘူမဇကဂမၠိုၚ် သကဵုခမဳဂမၠိုၚ်ဟီုဂရိုဟ် တဳလပိုဉ်ဒဗ္ဗ မဒှ်ကောန်သၟိၚ်မလ္လအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သကဵုခမဳဂမၠိုၚ်ဟီုဂရိုဟ် ဒဗ္ဗမဒှ် ကောန်သၟိၚ်မလ္လအိုတ်ရ ဟီုဂှ် ဍာံပြဟာ”ရဴဝွံ စၟဳစၟတ်သၟာန်သၟုက်ရ။ ဍာံပြဟာ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သကဵုခမဳဂမၠိုၚ်ဟီုဂရိုဟ် ဒဗ္ဗမဒှ်ကောန်သၟိၚ်မလ္လအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဟိုတ်နူပွမကဵုဟီုဂရိုဟ် (ခမဳ) ဒးအာပတ်ပဲါစိုတ်ရ” ရဴဝွံ (ဩဝ်စၞန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
104) ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ် “တဳလမၞုံပိုဉ်ကျာ်တြဲ ပဲါကၠေံ ပွမကဵုဟီုဂရိုဟ်ခမဳရ” “နဗၞတ်ဝွံ ခမဳဂမၠိုၚ် ကြက်မိၚ်ကေတ်မာန်အိုတ်ရ” ရဴဝွံ “တဳလပိုဉ်ဒဗ္ဗ မဒှ် ကောန်သၟိၚ်မလ္လ နမသ္ဍိုက်ဆာန် (ဗက်စဆန္ဒာဂတိတုဲ) လးပညပ်တဴ ဘာသၞာသတိက်သၞာဒၟံၚ်ရ၊ နမသ္ဍိုက်ဆာန် (ဗက်စဆန္ဒာဂတိတုဲ) စၞောန်ထ္ၜးတဴ ပိဏ္ဍပါတ်ဂမၠိုၚ်ရ” ရဴဝွံ ဟီုပျုတ်ဗ္ဒေက် တဳလပိုဉ်ဒဗ္ဗ မဒှ်ကောန်သၟိၚ်မလ္လ ပ္ဍဲဇရေၚ်ခမဳဂမၠိုၚ်အိုတ်ရ။ (အတိုၚ်ပါဠိနွံ သောဿန္တိ-ကၠာဲလဝ်ရ၊) ခမဳပၟိက်အောန်ဂမၠိုၚ်ဂှ် “မုဟိုတ် ခမဳမေတ္တိယဘူမဇကဂမၠိုၚ် ဟီုပျုတ်ဗ္ဒေက် တဳလပိုဉ်ဒဗ္ဗ မဒှ်ကောန်သၟိၚ်မလ္လအိုတ်ရော?” ရဴဝွံ ဟီုဂရိုဟ်အိုတ်ရ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ၊ “ယွံခမဳတအ် မၞးတအ်ညးဂမၠိုၚ် ဟီုပျုတ်ဗ္ဒေက် ဒဗ္ဗမဒှ်ကောန်သၟိၚ်မလ္လအိုတ်ရ ဟီုဂှ် ဍာံပြဟာ”ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်ဟီုပျုတ်ဗ္ဒေက် ဒဗ္ဗမဒှ်ကောန်သၟိၚ်မလ္လအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
105) “ဟိုတ်နူပွမကဵုဟီုဂရိုဟ် (ခမဳ) ဟိုတ်နူပွမပျုတ်ဗ္ဒေက် (ခမဳ) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
