၅.၂.၂။ အညဝါဒကသိက္ခာပိုဒ်
94) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဃောသိတာရာမ် ဇရေၚ်ကောသမ္ဗဳဂှ် တဳလပိုဉ်ဆန္န ဒ္ဂေတ်သ္ပတဴအရာဟွံထေက်ကဵုဒ္ဂေတ်သ္ပတုဲ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် “ မုရဴညးမွဲ ဒးအာပတ်ရော? ပသာ်ဒးအာပတ်ရော? မုရဴဟိုတ်နူဟိုတ်မွဲ ဒးအာပတ်ရော? မုရဴနအကာဲအရာမွဲ ဒးအာပတ်ရော? ဟီုသ္ဂးကဵုညးလဵုအိုတ်ရော? ဟီုသ္ဂးတဴ မုမွဲအိုတ်ရော?” ရဴဝွံ ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဆန္နဂှ် အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် မုရဴညးမွဲ ဒးအာပတ်ရော? ပသာ် ဒးအာပတ်ရော? မုရဴဟိုတ်နူဟိုတ်မွဲ ဒးအာပတ်ရော? မုရဴနအကာဲအရာမွဲ ဒးအာပတ်ရော? ဟီုသ္ဂးကဵုညးလဵုအိုတ်ရော? ဟီုသ္ဂးတဴ မုမွဲအိုတ်ရော ရဴဝွံ မုဟိုတ် ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဆန္န တၠအဲ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် “မုရဴညးမွဲ ဒးအာပတ်ရော? ပသာ် ဒးအာပတ်ရော? မုရဴဟိုတ်နူဟိုတ်မွဲ ဒးအာပတ်ရော? မုရဴနအကာဲအရာမွဲ ဒးအာပတ်ရော? ဟီုသ္ဂးကဵုညးလဵုအိုတ်ရော? ဟီုသ္ဂးတဴ မုမွဲအိုတ်ရော?” ရဴဝွံ ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာတြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် “မုရဴညးမွဲ ဒးအာပတ်ရော? ပသာ် ဒးအာပတ်ရော? မုရဴဟိုတ်နူဟိုတ်မွဲ ဒးအာပတ်ရော? မုရဴနအကာဲအရာ ဒးအာပတ်ရော? ဟီုသ္ဂးကဵုညးလဵုအိုတ်ရော? ဟီုသ္ဂးတဴ မုမွဲအိုတ်ရော?” ရဴဝွံ မုဟိုတ် ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။ ယွံခမဳတအ် ဒှ်သာ်ဂှ်မ္ဂး သၚ် ဩဝ်ပတိုန် အညဝါဒကကမ် ကုခမဳဆန္နညိ ‘ဩဝ်ကဵုတန်တဴ ပ္ဍဲဒဒှ်ညးမလေပ်ဟီုဂလာန် မသအာၚ်နူဂလာန်မသၟာန်ညိ’။ ယွံခမဳတအ် အတိုၚ်ကြက်သ္ဂးဂတဝွံ ဂပ်ပ်ပတိုန်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
95) “ယွံတဳလပိုဉ်တအ် သၚ် ဩတ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဝွံ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး သၚ် ပတိုန် အညဝါဒကကမ် ကုခမဳဆန္နရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ပလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဝွံ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်ရ၊ သၚ် ပတိုန်အညဝါဒကကမ် ကုခမဳဆန္နရ၊ ‘ကဵုတန်တဴ ပ္ဍဲဒဒှ်မလေပ်ဟီုဂလာန်မသအာၚ် နူဂလာန်မသၟာန်ရ၊ ယြဴကုတဳလပိုဉ်မွဲ သ္ဍိုက်မၠိုက်ပွမပတိုန်အညဝါဒကကမ် ကုခမဳဆန္နရ’၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵု ပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်ပတိုန်အညဝါဒကကမ် ကုခမဳဆန္နတုဲရ၊ ကုသၚ်ဂှ် မၞုံကဵညပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် တဳလပိုဉ်ဆန္န နဟိုတ်မဂၠိုၚ်တုဲမ္ဂး ပွမဇြိုၚ်ကဵုသွက်ဂွံလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ဟိုတ်နူပွမဟီုဂလာန် မသအာၚ်နူဂလာန်မသၟာန် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဒးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
96) ပ္ဍဲအခိၚ်ဂှ် တဳလပိုဉ်ခမဳဆန္န အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် “ဟီုဂြောပ်ဗ္ဒန်ဟိုတ်မွဲသအာၚ် နကဵုဟိုတ်မွဲသအာၚ်မ္ဂး ဒးအာပတ်ရ”ရဴဝွံ သ္ပပၠုပ်စိုတ်တုဲ သီုမဒၟံၚ်တဴသ္ၚိတ်သ္ၚိတ်ဂှ် ပြိုက်ဖ္ဍောၚ်သၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဆန္နဂှ် အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ် ဒၟံၚ်တဴသ္ၚိတ်သ္ၚိတ်တုဲ မုဟိုတ် သ္ဂောံပြိုက်ဖ္ဍောၚ်သၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဆန္န တၠအဲ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ်ဂှ် ဒၟံၚ်တဴသ္ၚိတ်သ္ၚိတ်တုဲ ပြိုက်ဖ္ဍောၚ်သၚ်ရ ဟီုဂှ် ဍာံပြဟာ”ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ် ဒၟံၚ်သ္ၚိတ်သ္ၚိတ်တုဲ မုဟိုတ်သ္ဂောံပြိုက်ဖ္ဍောၚ်သၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး)ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ် တုဲမ္ဂး သ္ဂးကဵုခမဳဂမၠိုၚ်ရ။ ယွံခမဳတအ် ဒှ်သာ်ဂှ်မ္ဂး သၚ် ဩဝ်ပတိုန် ဝိဟေသကကမ် ကုခမဳဆန္နညိ ‘ဩဝ်ကဵုတန်တဴ ပ္ဍဲဒဒှ်ညးမလေပ်ပြိုက်ဖ္ဍောၚ်ညိ’။ ယွံခမဳတအ် အတိုၚ်ကြက်သ္ဂးဂတဝွံ ဂပ်ဝ်ပတိုန်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
97) “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဝွံ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ် နပွမဒၟံၚ်ထောံသ္ၚိတ်သ္ၚိတ်ဂှ် ပြိုက်ဖ္ဍောၚ်သၚ်ရ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ သၚ် ပတိုန်ဝိဟေသကကမ် ကုခမဳဆန္န၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဝွံ အခိၚ်သၟာန်သၟုက်စၟဳစၟတ် နကဵုအာပတ် ပ္ဍဲလဒေါဝ်သၚ် နပွမဒၟံၚ်ထောံသ္ၚိတ်သ္ၚိတ်ဂှ် ပြိုက်ဖ္ဍောၚ်သၚ်ရ၊ သၚ် ပတိုန်ဝိဟေသကကမ် ကုခမဳဆန္နရ၊ ကဵုတန်တဴ ပ္ဍဲဒဒှ်ညးမလေပ်ပြိုက်ဖ္ဍောၚ်ရ၊ ယြဴကုတဳလပိုဉ်မွဲ သ္ဍိုက်မၠိုက်ပွမပတိုန်ဝိဟေသကကမ် ကုခမဳဆန္နရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ။ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်ပတိုန်ဝိဟေသကကမ် ကုခမဳဆန္နတုဲရ၊ ကုသၚ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ ” ရဴဝွံ (သ္ဒးကဵုတီရ)။ ပ္ဍဲအခိၚ်ဂှ် တဳလပိုဉ်ကျာ်တြဲ ဟီုဂရိုဟ်တၚ်ဒုဟ် တဳလပိုည်ဆန္န နဟိုတ်မဂၠိုၚ်တုဲမ္ဂး ပွမဇြိုၚ်ကဵုသွက်ဂွံလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
98) “ဟိုတ်နူပွမဟီုဂလာန် မသအာၚ်နူဂလာန်မသၟာန် ဟိုတ်နူပွမပြိုက်ဖ္ဍောၚ်သၚ် နပွမဒၟံၚ်ထောံသ္ၚိတ်သ္ၚိတ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
