၅.၂.၁၀။ သပ္ပါဏကသိက္ခာပိုဒ်

139) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲအဂ္ဂါဠဝစေတဳ ဇရေၚ်ဍုၚ်အာဠဝဳဂှ် ခမဳကောန်ဍုၚ်အာဠဝဳဂမၠိုၚ် ကၠောန်သ္ပကေၚ်ကာတၟိအိုတ်မ္ဂး သီုကဵုမတီတဴ ဍာ်မၞုံကဵုစၟဂှ် ကိုဟ်ချာဲလေဝ်ကိုဟ်ချာဲစုတ် ပ္ဍဲချောဲကီု ပ္ဍဲတိကီုအိုတ်ရ၊ ဖအောဝ်လေဝ်ဖအောဝ်ကဵုကိုဟ်ချာဲစုတ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳကောန်ဍုၚ်အာဠဝဳဂမၠိုၚ် သီုကဵုမတီတဴ ဍာ်မၞုံကဵုစၟဂှ် ကိုဟ်ချာဲလေဝ်ကိုဟ်ချာဲစုတ် ပ္ဍဲချောဲကီု ပ္ဍဲတိကီုအိုတ်ရော? ဖအောဝ်လေဝ်ဖအောဝ်ကဵု ကိုဟ်ချာဲစုတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳကောန်ဍုၚ်အာဠဝဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ်မၞးတအ်ညးဂမၠိုၚ် သီုကဵုမတီတဴ ဍာ်မၞုံကဵုစၟဂှ် ကိုဟ်ချာဲစုတ် ပ္ဍဲချောဲကီု ပ္ဍဲတိကီုအိုတ်ရ၊ ဖအောဝ်ကဵု ကိုဟ်ချာဲစုတ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သီုကဵုမတီတဴ ဍာ်မၞုံကဵုစၟဂှ် ကိုဟ်ချာဲလေဝ်ကိုဟ်ချာဲစုတ် ပ္ဍဲချောဲကီု ပ္ဍဲတိကီုအိုတ်ရော? ဖအောဝ်လေဝ်ဖအောဝ်ကဵုကိုဟ်ချာဲစုတ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

140) “ယြဴခမဳမွဲ သီုကဵုမတီတဴ ဍာ်မၞုံကဵုစၟဂှ် ကိုဟ်ချာဲလေဝ် ကိုဟ်ချာဲစုတ် ပ္ဍဲချောဲကီု ပ္ဍဲတိကီုမ္ဂး၊ ဖအောဝ်လေဝ်ဖအောဝ်ကဵုကိုဟ်ချာဲစုတ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။