၅.၂.၁.၁။ ပွံက်ဘူတဂါမသိက္ခာပိုဒ်
91) ဂကောံမဗဳဇ တၞးဆုချောဲကၟတ် ဃောမဇၞော်မောဝ်တဴ ဇၞော်မောဝ်တုဲ မ္ဂးဂှ် မဗဳဇရိုဟ် မဗဳဇတၞံ မဗဳဇတၚ် မဗဳဇကၞုၚ်ကၟဝ် မဗဳဇမ မရနုက်ကဵုမသုန် ရဴဝွံ မဗဳဇ နွံမသုန်ဂကူရ။ မဗဳဇရိုဟ် မ္ဂးဂှ် မိတ် လ္ဂဝ် ထၞ ဍိုပ်သဴ ဓိဝိုဟ် ခတိုအ်ဏဳ ကၟတ်ဥသဳ ဓမိတ်ဇၞော်ရောၚ်၊ သအာၚ်နူဂှ် တၞံဂမၠိုၚ် မကတဵုဒှ်ပ္ဍဲရိုဟ် စတ်တဵုရိုဟ် မကၠုတ်ကၟဝ်တိုန် ဗွဲမဒးရး နွံအိုတ်ရ၊ သီုဖအိုတ်ဂှ် မဗဳဇရိုဟ်မ္ဂးရ။ မဗဳဇလၟဳတၞမ် မ္ဂးဂှ် တၞံဇြဲမှာဘုတ် တၞံဇြဲသုမ် တၞံဇြဲတောန် တၞံဝိဍာ် တၞံဆုမ္ၚဵုဒဵု (တၞံဆုပ္ၚာ-ထေၚ်ကေတ်ရ)၊ တၞံဇြဲက္ၜိုၚ်ရောၚ်၊ သအာၚ်နူဂှ် တၞံဂမၠိုၚ် မကတဵုဒှ်ပ္ဍဲလၟဳတၞံတၞာၚ်ဗာၚ် စတ်တဵုတၞာၚ်ဗာၚ်တုဲ မကၠုတ်ကၟဝ်တိုန်ဗွဲမဒးရး နွံအိုတ်ရ၊ သီုဖအိုတ်ဂှ် မဗဳဇလၟဳတၞံမ္ဂးရ။ မဗဳဇတၚ် မ္ဂးဂှ် တၞံက္ၜဴ တၞံဒုန် တၞံကပိုဟ်ရောၚ်၊ သအာၚ်နူဂှ် တၞံဂမၠိုၚ် မကတဵုဒှ်ပ္ဍဲတၚ် စတ်တဵုတၚ်တုဲ မကၠုတ်ကၟဝ်တိုန်ဗွဲမဒးရး နွံအိုတ်ရ၊ သီုဖအိုတ်ဂှ် မဗဳဇတၚ်မ္ဂးရ။ မဗဳဇကၞုၚ်ကၟဝ် မ္ဂးဂှ် တၞံဝါၚ်ဗတာၚ် တၞံဝါၚ်ဒြာဲ (ဝါၚ်ဂြိုပ်) တၞံဍိုပ်ဍုၚ် (ဝါၚ်ဂလာ) ရောၚ်၊ သအာၚ်နူဂှ် တၞံဂမၠိုၚ် မကတဵုဒှ်ပ္ဍဲကၞုၚ်ကၟဝ် စတ်တဵုကၞုၚ်ကၟဝ်တုဲ မကၠုတ်ကၟဝ်တိုန်ဗွဲမဒးရးနွံအိုတ်ရ၊ သီုဖအိုတ်ဂှ် မဗဳဇကၞုၚ်ကၟဝ်မ္ဂးရ။ မဗဳဇမ မ္ဂးဂှ် ဩောံၜဲရောၚ်၊ သအာၚ်နူဂှ် တၞံဂမၠိုၚ် မကတဵုဒှ်ပ္ဍဲမ ဂြာတ်တဵုမတုဲ မကၠုတ်ကၟဝ်တိုန်ဗွဲမဒးရး နွံအိုတ်ရ၊ သီုဖအိုတ်ဂှ် မဗဳဇမမ္ဂးရ။
92) ပ္ဍဲမဗဳဇ မၞုံကဵုစၟတ်သမ္တီမဗဳဇဒှ်တုဲ ကုတ်ကီု ဖအောဝ်ကဵုကုတ်ကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ပါ်ဗကးကီု ဖျိန်ကီု ဖအောဝ်ကဵုဖျိန်ကီုမ္ဂး၊ ဒးအာပတ်ပဲါစိုတ်ရ။ ပ္ဍဲမဗဳဇ မၞုံကဵုသၠေဟ်ပၟာဒှ်တုဲ ကုတ်ကီု ဖအောဝ်ကဵုကုတ်ကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ပါ်ဗကးကီု ဖျိန်ကီု ဖအောဝ်ကဵုဖျိန်ကီုမ္ဂး၊ ဒးအာပတ်ဒုက္ကဋ်ရ။ ပ္ဍဲမဗဳဇ မၞုံကဵုစၟတ်သမ္တီမဗဳဇဟွံသေၚ်ဒှ်တုဲ ကုတ်ကီု ဖအောဝ်ကဵုကုတ်ကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ဗကးကီု ဖျိန် ဖအောဝ်ကဵုဖျိန်ကီုမ္ဂး၊ ဟွံဒးအာပတ်ရ။ ပ္ဍဲမဗဳဇဟွံသေၚ်ဂှ် မၞုံကဵုစၟတ်သမ္တီမဗဳဇမ္ဂး ဒးအာပတ်ဒုက္ကဋ်ရ။ ပ္ဍဲမဗဳဇဟွံသေၚ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်။ ပ္ဍဲမဗဳဇဟွံသေၚ်ဂှ် မၞုံကဵုစၟတ်သမ္တီမဗဳဇဟွံသေၚ်မ္ဂး၊ ဟွံဒးအာပတ်ရ။
93) “ဩဝ်တီဝတ် မဗဳဇဝွံညိ၊ ဩဝ်ကဵုမဗဳဇဝွံညိ၊ ဩဝ်ရေၚ်တၠုၚ်နၚ် မဗဳဇဝွံညိ၊ နွံပၟိက် နကဵုမဗဳဇ၊ ဩဝ်သ္ပ မဗဳဇဝွံ ညံၚ်သ္ဂောံဂပ်ဝ်ညိ” ရဴဝွံ ဟီုသ္ဂးမ္ဂး၊ ဟွံဒးအာပတ်ရ၊ ကုခမဳ ဟွံမွဲကဵုစေတနာ ခမဳဝိုတ်အာသတိတုဲသ္ပဒးအာ ခမဳဟွံတီ ခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ဘူတဂါမသိက္ခာပိုဒ် ပဌမတုဲရ။
