၅.၂.၁။ ဘူတဂါမသိက္ခာပိုဒ်
89) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲအဂ္ဂါဠဝစေတဳ ဇရေၚ်ဍုၚ်အာဠဝဳဂှ် ခမဳကောန်ဍုၚ်အာဠဝဳဂမၠိုၚ် ကၠောန်သ္ပကေၚ်ကာတၟိအိုတ်မ္ဂး အလဵုဇကုလေဝ် ကုတ်တၞံဆုအိုတ်ရ၊ ညးသအာၚ်ဂမၠိုၚ်လေဝ် ဖအောဝ်ကဵုကုတ်အိုတ်ရ။ ခမဳကောန်ဍုၚ်အာဠဝဳမွဲဇကုလေဝ် ကုတ်တဴတၞံဆုမ္ဂး ဒေဝတဴဗြဴ မအုပ်ဓုပ်ပိုၚ်ပြဳတၞံဆုဂှ်တုဲ ပဒတဴဒၟံၚ်ဂှ် “ယွံတဳလပိုဉ် သၟိက်သိုၚ်ခၞံလွဳမာန်ဇကုတုဲ လ္ပကုတ်ထောံလွဳမာန်အဲဍိက်ညိ” ရဴဝွံ သ္ဂးကဵုခမဳဂှ်ရ ခမဳဂှ် ဟွံကလၚ်ကေတ် (ဂလာန်ဒေဝတဴဗြဴဂှ်) တုဲ ကုတ်ဒၟံၚ်အတိုၚ်ကုတ်လၟိုန်မ္ဂး ကုတ်ဒးအာ သ္ပါတဲကောန်ၚာ် ဒေဝတဴဗြဴဂှ်ရ။ ပ္ဍဲအခိၚ်ဂှ် “အဲသ္ဂောံပြိုက်ဂစိုတ်ထောံခမဳဝွံ ပ္ဍဲဒၞဲါဝွံဟေၚ်မ္ဂး ခိုဟ်သန်ရ”ရဴဝွံ ကသပ်ဒှ် ကုဒေဝတဴဗြဴဂှ်ရ။ ပ္ဍဲကြဴနူဂှ် “အဲ ပွပပြိုက်ဂစိုတ်ထောံခမဳဝွံ ပ္ဍဲဒၞဲါဝွံဟေၚ်ဂှ် ဟွံထေက်ရ၊ ဗွဲစၟတ်တုန် သ္ဂောံဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲမ္ဂး ခိုဟ်သန်ရ” ရဴဝွံ ကသပ်ဒှ် ကုဒေဝတဴဗြဴဂှ်ရ။ ပ္ဍဲအခိၚ်ဂှ် ဒေဝတဴဗြဴဂှ် ပြာပ်အာဇရေၚ်တဳလမၞုံပိုဉ်ကျာ်တြဲတုဲမ္ဂး ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ယွံဒေဝတဴဗြဴ ခိုဟ်သန်၊ ခိုဟ်သန်ရ၊ ယွံဒေဝတဴဗြဴ တၠအဲပွမဟွံပြိုက်ဂစိုတ်ထောံခမဳဂှ် ခိုဟ်သန်ကွေံရ၊ ယွံဒေဝတဴဗြဴ တၠအဲ ယဝ်ပြိုက်ဂစိုတ်ဒးခမဳဂှ်မ္ဂးပွသရာံပါပ် ဇၞော်မောဝ်အာ ကုတၠအဲရ၊ ယွံဒေဝတဴဗြဴ တၠအဲ ဩဝ်အာညိ၊ တၞံဆု မၞုံပ္ဍဲဌာန်မၞုံယၟုဝွံ လ္ၚုသုန် (နူဒေဝတဴညးအုပ်ဓုပ်ပိုၚ်ပြဳ) ရ၊ သွနဿယဲဗ္ဒာဲကဵုတၞံဆုဂှ်တုဲ ဩဝ်ပဒတဴညိ ရဴဝွံ သ္ဂးရ။ မၞိဟ်ဂမၠိုၚ်ဂှ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် အလဵုဇကုလေဝ်ကုတ်တဴတၞံဆုအိုတ်ရော? ညးသအာၚ်ဂမၠိုၚ်လေဝ် ဖအောဝ်ကဵုကုတ်အိုတ်ရော? ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် မုဟိုတ် ရာန်သတိုက်တဴ လမျီုမၞုံကဵုဣန္ဒြဳမွဲအိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳကောန်ဍုၚ်အာဠဝဳဂမၠိုၚ် အလဵုဇကုလေဝ် ကုတ်တဴတၞံဆုအိုတ်ရော? ညးသအာၚ်ဂမၠိုၚ်လေဝ် ဖအောဝ်ကဵုကုတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် အလဵုဇကုလေဝ်ကုတ်တဴတၞံဆုအိုတ်ရ၊ ညးသအာၚ်ဂမၠိုၚ်လေဝ် ဖအောဝ်ကဵုကုတ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠတြဴပြာကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် အလဵုဇကုလေဝ် ကုတ်တဴတၞံဆုအိုတ်ရော? ညးသအာၚ်ဂမၠိုၚ်လေဝ် ဖအောဝ်ကဵုကုတ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် မၞိဟ်ဂမၠိုၚ် ပ္ဍဲတၞံဆုဂှ် သမ္တီထေၚ်ကေတ် မၞုံကဵုလမျီုအိုတ်ရ၊ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမ ကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်အိုတ်ညိ။
90) ဟိုတ်နူပွမပလီုပလာ်ကုတ်ဗာ်ကၠေံ ဂကောံမဗဳဇတၞံချောဲကၟတ် ဃောမဇၞော်မောဝ်တဴ ဇၞော်မောဝ်တုဲ ဒးအာပတ်ပဲါစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
