၅.၁.၉.၁။ ပွံက်ဒုဋ္ဌုလ္လာရောစနသိက္ခာပိုဒ်

80) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳ မ္ဂးဂှ် ခမဳမွဲသအာၚ်။ အာပတ်မရုန်မဵု မ္ဂးဂှ် ပါရာဇ်န် သံဃာဒိသေသ်စှ်ပိဂမၠိုၚ်ရောၚ်။ ညးဟွံသေၚ်ကဵုခမဳ မ္ဂးဂှ် ပါဲကၠေံ ခမဳတြုံ ခမဳဗြဴတုဲ ညးသှေ်သၟေဟ်ဂှ် ညးဟွံသေၚ်ကဵုခမဳမ္ဂးရ။ ဟီုလဴဗ္စ မ္ဂးဂှ် ဟီုလဴဗ္စ ကုညးဗြဴကီု ကုညးတြုံကီု ကုခရှ်ကီု ကုခမဳကီုမ္ဂး။ သီုဟွံကလိဂွံသၟိတ်ခမဳဂမၠိုၚ် မ္ဂးဂှ် ပါဲကၠေံ သၟိတ်ခမဳဂမၠိုၚ်တုဲ။ သမ္မုတိခမဳဂမၠိုၚ် မၞုံကဵုအပိုၚ်အခြာအာပတ်တုဲ ဟွံမွဲကဵုအပိုၚ်အခြာဂကူ ‘ဒကာ’ နွံရ။ သမ္မုတိခမဳဂမၠိုၚ် မၞုံကဵုအပိုၚ်အခြာဂကူ ‘ဒကာ’ တုဲ ဟွံမွဲကဵုအပိုၚ်အခြာအာပတ် နွံရ။ သမ္မုတိခမဳဂမၠိုၚ် အပိုၚ်အခြာအာပတ်လေဝ်နွံ အပိုၚ်အခြာဂကူလေဝ်နွံဂှ် နွံရ။ သမ္မုတိခမဳဂမၠိုၚ် အပိုၚ်အခြာအာပတ်လေဝ်ဟွံမွဲ အပိုၚ်အခြာဂကူလေဝ်ဟွံမွဲဂှ် နွံရ။ အပိုၚ်အခြာအာပတ် မ္ဂးဂှ် ‘နအာပတ်ဂမၠိုၚ်ဗၞတ်ဝွံ ဂပ်ဝ်ဟီုလဴဗ္စရ” ရဴဝွံ ပွမပိုၚ်ခြာသမ္တီစွံလဝ် အာပတ်ဂမၠိုၚ်ရောၚ်။ အပိုၚ်အခြာဂကူ မ္ဂးဂှ် “ပ္ဍဲဂကူဂမၠိုၚ်ဗၞတ်ဝွံ ဂပ်ဝ်ဟီုလဴဗ္စရ” ရဴဝွံ ပွမပိုၚ်ခြာသမ္တီစွံလဝ် ဂကူဂမၠိုၚ်ရောၚ်။ အပိုၚ်အခြာအာပတ်လေဝ်နွံ အပိုၚ်အခြာဂကူလေဝ်နွံ မ္ဂးဂှ် “နအာပတ်ဂမၠိုၚ်ဗၞတ်ဝွံ ပ္ဍဲဂကူဂမၠိုၚ်ဗၞတ်ဝွံ ဂပ်ဝ်ဟီုလဴဗ္စရ” ရဴဝွံ အာပတ်ဂမၠိုၚ်လေဝ် ပွမပိုၚ်ခြာသမ္တီစွံလဝ် ဂကူဂမၠိုၚ်လေဝ် ပွမပိုၚ်ခြာသမ္တီစွံလဝ်ရောၚ်။ အပိုၚ်အခြာအာပတ်လေဝ်ဟွံမွဲ အပိုၚ်အခြာဂကူလေဝ်ဟွံမွဲ မ္ဂးဂှ် “နအာပတ်ဂမၠိုၚ်ဗၞတ်ဝွံ ပ္ဍဲဂကူဂမၠိုၚ်ဗၞတ်ဝွံ ဂပ်ဝ်ဟီုလဴဗ္စရ” ရဴဝွံ အာပတ်ဂမၠိုၚ်လေဝ် ပွမဟွံပိုၚ်ခြာလဝ် ဂကူဂမၠိုၚ်လေဝ် ပွမဟွံပိုၚ်ခြာလဝ်ရောၚ်။


81) ပ္ဍဲအရာမၞုံကဵုအပိုၚ်အခြာအာပတ်ဂှ် ပါဲကၠေံအာပတ်ဂမၠိုၚ် မဂပ်ဝ်ပိုၚ်ခြာစွံလဝ်တုဲ ဟီုလဴဗ္စ နအာပတ်ဂမၠိုၚ်မွဲသအာၚ်မ္ဂး၊ ဒးအာပတ်ပါဲစိုတ်ရ။ ပ္ဍဲအရာမၞုံကဵုအပိုၚ်အခြာဂကူဂှ် ပါဲကၠေံဂကူဂမၠိုၚ် မဂပ်ဝ်ပိုၚ်ခြာစွံလဝ်တုဲ ဟီုလဴဗ္စပ္ဍဲဂကူဂမၠိုၚ်မွဲသအာၚ်မ္ဂး ဒးအာပတ်ပါဲစိုတ်ရ။ ပ္ဍဲအရာအပိုၚ်အခြာအာပတ်လေဝ်နွံ အပိုၚ်အခြာဂကူလေဝ်နွံဂှ် ပါဲကၠေံအာပတ်ဂမၠိုၚ်မဂပ်ဝ်ပိုၚ်ခြာစွံလဝ် ဂကူဂမၠိုၚ် မဂပ်ဝ်ပိုၚ်ခြာစွံလဝ်တုဲ ဟီုလဴဗ္စ နအာပတ်ဂမၠိုၚ်မွဲသအာၚ် ပ္ဍဲဂကူဂမၠိုၚ် မွဲသအာၚ်မ္ဂး ဒးအာပတ်ပါဲစိုတ်ရ။ ပ္ဍဲအရာအပိုၚ်အခြာအာပတ်လေဝ်ဟွံမွဲ အပိုၚ်အခြာဂကူလေဝ်ဟွံမွဲဂှ်ဟွံဒးအာပတ်ရ။


82) ပ္ဍဲအာပတ်မရုန်မဵုဂှ် မၞုံကဵုစၟတ်သမ္တီ အာပတ်မရုန်မဵုဒှ်တုဲ ဟီုလဴဗ္စ ကုညးဟွံသေၚ်ကဵုခမဳမ္ဂး ဝေၚ်ကၠေံသမ္မုတိခမဳဂမၠိုၚ်တုဲ ဒးအာပတ်ပါဲစိုတ်ရ။ ပ္ဍဲအာပတ်မရုန်မဵုဂှ် မၞုံကဵုသၠေဟ်ပၟာဒှ်တုဲ ဟီုလဴဗ္စ ကုညးဟွံသေၚ်ကဵုခမဳမ္ဂး ဝေၚ်ကၠေံသမ္မုတိခမဳဂမၠိုၚ်တုဲ ဒးအာပတ်ပါဲစိုတ်ရ။ ပ္ဍဲအာပတ်မရုန်မဵုဂှ် မၞုံကဵုစၟတ်သမ္တီ အာပတ်ဟွံရုန်မဵုဒှ်တုဲ ဟီုလဴဗ္စ ကုညးဟွံသေၚ်ကဵုခမဳမ္ဂး ဝေၚ်ကၠေံ သမ္မုတိခမဳဂမၠိုၚ်တုဲ ဒးအာပတ်ပါဲစိုတ်ရ။ ဟီုလဴဗ္စ အာပတ်ဟွံရုန်မဵုမ္ဂး ဒးအာပတ်ဒုက္ကဋ်ရ။ ဟီုလဴဗ္စ ပွမကလိလောန်မဟွံရုန်မဵု ပွမကလိလောန်ဟွံရုန်မဵု သာမဏဳမ္ဂး ဒးအာပတ်ဒုက္ကဋ်ရ။ အာပတ်မဟွံရုန်မဵုဂှ် မၞုံကဵုစၟတ်သမ္တီ အာပတ်မရုန်မဵုမ္ဂး ဒးအာပတ်ဒုက္ကဋ်ရ။ ပ္ဍဲအာပတ်မဟွံရုန်မဵုဂှ် မၞုံကဵုသၠေဟ်မ္ဂး ဒးအာပတ်ဒုက္ကဋ်ရ။ ပ္ဍဲအာပတ်မဟွံရုန်မဵုဂှ် မၞုံကဵုစၟတ်သမ္တီ အာပတ်မဟွံရုန်မဵုမ္ဂး ဒးအာပတ်ဒုက္ကဋ်ရ။


83) ဟီုလဴဗ္စ ဝတ္ထု (ပွမဗလးသုက်) တုဲ ဟွံဟီုလဴဗ္စအာပတ်ကီု ဟီုလဴဗ္စအာပတ် (သံဃာဒိသေသ်) တုဲ ဟွံဟီုလဴဗ္စဝတ္ထုကီု ဟွံဒးအာပတ်ရ၊ ကုခမဳမကလိဂွံသၟိတ် ခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ဒုဋ္ဌုလ္လာရောစနသိက္ခာပိုဒ် နဝမတုဲရ။