၅.၁.၉။ ဒုဋ္ဌုလ္လာရောစနသိက္ခာပိုဒ်

78) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ကတဵုဒှ်သေက်ဇဵု ကေုာံခမဳဆဗ္ဗဂ္ဂဳဂမၠိုၚ်ရ။ တဳလပိုဉ်ဥပနန္ဒဂှ် အာစိုပ်အာပတ်ပွမတိတ်ဍာ်သုက် မဒှ်မွဲဟာန်ကေုာံစေတနာတုဲအာတ်သၚ် အာပတ်ဂှ်ရ၊ သၚ်ကဵုပြဝးအာပတ်ဂှ် ကုတဳလပိုဉ်ဥပနန္ဒရ။ ပ္ဍဲအခိၚ်ဂှ် အပ္ဍဲဍုၚ်သာရဝှ် ပ္ဍဲဂကောံမဟွံပြာကဋ်မွဲဂှ် သံဃဘတ်နွံရ၊ တဳလပိုဉ်ဥပနန္ဒဂှ် ဒှ်ဒၟံၚ်ဃောဒ္ဂေတ်လ္ၚတ်ပြဝးတုဲ ပ္ဍဲဇြပ်ကဵုပိုဉ်ဂှ် သ္ဒးဂဇအ်ဒၟံၚ် ပ္ဍဲသၞာလအိတ်မုဟ်အိုတ်ရ။ ခမဳဆဗ္ဗဂ္ဂဳဂမၠိုၚ် “ယွံဥပးတအ် တဳလပိုဉ်ဥပနန္ဒ ကောန်သၟိၚ်သာကျဝၚ် မၞးတအ်ညးဂမၠိုၚ် မဂပ်ဝ်ထိုၚ်သး မလေပ်ပြာပ်စဴသ္ၚိဂှ် ယြဴနတဲမွဲဟေၚ် သ္ပပြဘိုဂ်ပိဏ္ဍပါတ်မၞုံကဵုဓရ်သဒ္ဓါလျုၚ်တုဲ မဂပ်ဝ်ကဵုဒါန်ရ၊ နတဲဂှ်ဟေၚ် သ္ပလွဳပရာတုဲ ဗလးပတိတ်ဍာ်သုက်ရ၊ တဳလပိုဉ်ဥပနန္ဒဂှ် အာစိုပ်အာပတ် ပွမပတိတ်ဍာ်သုက် မဒှ်မွဲဟာန်ကေုာံစေတနာတုဲ အာတ်သၚ် ပြဝးအာပတ်ဂှ်ရ၊ သၚ်ကဵုပြဝးအာပတ်ဂှ် ကုတဳလပိုဉ်ဥပနန္ဒရ၊ တဳလပိုဉ်ဥပနန္ဒဂှ် ဟိုတ်မဒးဒ္ဂေတ်လ္ၚတ်ပြဝးဂှ်ရ သ္ဒးဂဇအ်ဒၟံၚ်ပ္ဍဲသၞာလအိတ်မုဟ်အိုတ်ရ” ရဴဝွံ ဟီုသ္ဂးကဵုဥပးဂမၠိုၚ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သ္ဂောံဟီုလဴဗ္စ အာပတ်မရုန်မဵုခမဳ ကုညးဟွံသေၚ်ကဵုခမဳအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် မၞးတအ်ညးဂမၠိုၚ် ဟီုလဴဗ္စ အာပတ်မရုန်မဵု ခမဳ ကုညးဟွံသေၚ်ကဵု ခမဳအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သ္ဂောံဟီုလဴဗ္စ အာပတ်မရုန်မဵု ခမဳ ကုညးဟွံသေၚ်ကဵု ခမဳအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 79) ယြဴခမဳမွဲ သီုဟွံကလိဂွံသၟိတ်ခမဳဂမၠိုၚ် ဟီုလဴဗ္စ အာပတ်မရုန်မဵု ခမဳ ကုညးဟွံသေၚ်ကဵုခမဳမ္ဂး (ကုခမဳဂှ်) ဒးအာပတ်ပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။