၅.၁.၇.၁။ ပွံက်ဓမ္မဒေသနသိက္ခာပိုဒ်
64) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မာတုဂါမ် မ္ဂးဂှ် ဗြဴမၞိဟ်ရောၚ်၊ လကိုဟ် (ဒေဝတဴ) ဗြဴဟွံသေၚ်၊ ပြိုတ်ဗြဴ ဟွံသေၚ်၊ တိရစ္ဆာန်ဗြဴ ဟွံသေၚ်၊ မၞိဟ်ဗြဴ မသၟဟ်စောံ တၞဟ်နတိကၠိုဟ်ခၠၚ် ဂလာန်ခိုဟ် ဂလာန်ဟွံခိုဟ် ဂလာန်ရုန်မဵု ဂလာန်ဟွံရုန်မဵုရောၚ်။ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် မ္ဂးဂှ် နဂလာန်ဂမၠိုၚ် မလောန်လတူမသုန်ပါၚ်, တြဴပါၚ်။ ဓရ် မ္ဂးဂှ် ဓရ်ကျာ်တွံ ဓရ်သာဝကတွံ ဓရ်ရသိတွံ ဓရ်ဒေဝတဴတွံ ဓရ်မစပ်ကေုာံအဋ္ဌကထာ ဓရ်မစပ်ကေုာံပါဠိရောၚ်။ တွံ မ္ဂးဂှ် တွံ နပိုဒ်မ္ဂး၊ ဇၟာပ်ပိုဒ် ဇၟာပ်ပိုဒ် ဒးအာပတ်ပါဲစိုတ်ရ။ တွံ နအက္ခရ်မ္ဂး ဇၟာပ်အက္ခရ် ဇၟာပ်အက္ခရ် ဒးအာပတ်ပါဲစိုတ်ရ။ ဝေၚ်ကၠေံ မၞိဟ်တြုံမတီစဳကၠးတုဲ မ္ဂးဂှ် ပါဲထောံကၠေံမၞိဟ်တြုံမတဳစဳကၠးတုဲ။ မၞိဟ်တြုံမတီစဳကၠး မ္ဂးဂှ် မၞိဟ်တြုံ မသၟဟ်စောံ တၞဟ်နတီကၠိုဟ်ခၠၚ် ဂလာန်ခိုဟ် ဂလာန်ဟွံခိုဟ် ဂလာန်ရုန်မဵု ဂလာန်ဟွံရုန်မဵုရောၚ်။
65) မာတုဂါမ်ဂှ် မၞုံကဵုစၟတ်သမ္တီ မာတုဂါမ်ဒှ်တုဲ ဝေၚ်ကၠေံမၞိဟ်တြုံမတီစဳကၠးတုဲ တွံဓရ်နဂလာန်ဂမၠိုၚ် မလောန်လတူမသုန်ပါၚ်, တြဴပါၚ်မ္ဂး၊ ဒးအာပတ်ပါဲစိုတ်ရ။ မာတုဂါမ်ဂှ် မၞုံကဵုသၠေဟ်ပၟာဒှ်တုဲ ဝေၚ်ကၠေံမၞိဟ်တြုံမတီစဳကၠးတုဲ တွံဓရ် နဂလာန်ဂမၠိုၚ် မလောန်လတူမသုန်ပါၚ်, တြဴပါၚ်မ္ဂး၊ ဒးအာပတ်ပါဲစိုတ်ရ။ မာတုဂါမ်ဂှ် မၞုံကဵုစၟတ်သမ္တီမာတုဂါမ် ဟွံသေၚ်ဒှ်တုဲ ဝေၚ်ကၠေံမၞိဟ်တြုံမတီစဳကၠးတုဲ တွံဓရ် နဂလာန်ဂမၠိုၚ် မလောန်လတူမသုန်ပါၚ်,တြဴပါၚ်မ္ဂး ဒးအာပတ်ပါဲစိုတ်ရ။ ဝေၚ်ကၠေံမၞိဟ်တြုံ မတီစဳကၠးတုဲ တွံဓရ် ကုလကိုဟ် (ဒေဝတဴ) ဗြဴကီု၊ ကုပြိုတ်ဗြဴကီု၊ ကုခမၞုဲဗြဴကီုကေုာံ တိရစ္ဆာန်ဗြဴ မပတောံလဝ်ရုပ်မၞိဟ်ကီု နဂလာန်ဂမၠိုၚ် မလောန်လတူမသုန်ပါၚ်, တြဴပါၚ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီမာတုဂါမ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ် မၞုံကဵုစၟတ်သမ္တီ မာတုဂါမ်ဟွံသေၚ်မ္ဂး ဟွံဒးအာပတ်ရ။
66) မၞိဟ်တြုံမတီစဳကၠး နွံဒၟံၚ်ဗ္ဒာဲဂှ်တုဲ တွံဓရ်မ္ဂး၊ တွံဓရ် နဂလာန်ဂမၠိုၚ် မသုန်ပါၚ်, တြဲပါၚ်မ္ဂး၊ တွံဓရ် နဂလာန်ဂမၠိုၚ် မယုတ်ဒေက်သၟဝ်မသုန်ပါၚ်, တြဲပါၚ်မ္ဂး၊ ဒၠိုက်ကတဵုတုဲ မွဲလှေ်ပၠန်ကလေၚ်ဂဇအ်တုဲ တွံဓရ်မ္ဂး၊ တွံဓရ် ကုမာတုဂါမ် မဒၠိုက်ကတဵုတုဲ ကလေၚ်ဂဇအ်မွဲလှေ်ပၠန်မ္ဂး၊ တွံဓရ် ကုမာတုဂါမ်မွဲသအာၚ်မ္ဂး၊ သၟာန်တဴ ဂလာန်သၟာန်ပုစ္ဆာမ္ဂး၊ သှ်ကဵု ဂလာန်သၟာန်ပုစ္ဆာမ္ဂး၊ ဟီုသ္ဂးဒၟံၚ် တၞဟ်နဖဵုညးသအာၚ်ဂှ် မာတုဂါမ် ကလၚ်တဴမ္ဂး၊ ဟွံဒးအာပတ်ရ။ ကုခမဳကြအ်ဥမ္မတ်၊ ခမဳကလိလောန်ကၠာတဲဂှ် ဟွံဒးအာပတ်ရ။ ဓမ္မဒေသနာသိက္ခာပိုဒ် သတ္တမတုဲရ။
