၅.၁.၇။ ဓမ္မဒေသနသိက္ခာပိုဒ်
60) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဲပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥဒါယဳ ဒှ်ခမဳမလေပ်ပြာပ်စဴသ္ၚိ (ခမဳအ္စာ) ပ္ဍဲဍုၚ်သာရဝှ်ရ ပြာပ်စဴသ္ၚိဂမၠိုၚ် ဗွဲမရဂၠိုၚ်ရ။ ပ္ဍဲအခိၚ်ဂှ် တဳလပိုဉ်ဥဒါယဳ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ ပြာပ်စဴအာသ္ၚိမွဲ သ္ၚိရ၊ ပ္ဍဲအခိၚ်ဂှ် တၠသ္ၚိဗြဴဂှ် ဂဇအ်ဒၟံၚ်ပ္ဍဲပါၚ်တြၚ်သ္ၚိရ၊ ကောန်ခအှ် တၠသ္ၚိဗြဴဂှ်တုန် ဂဇအ်ဒၟံၚ် ပ္ဍဲပါၚ်တြၚ်ဂၠမ်သတိက်ရ၊ ပ္ဍဲကြဴနူဂှ် တဳလပိုဉ်ဥဒါယဳ ပြာပ်အာဇရေၚ်တၠသ္ၚိဗြဴတုဲမ္ဂး ပကာတ်လဝ်တအ်ကတောဝ်တၠသ္ၚိဗြဴတုဲ တွံဓရ်ရ။ ပ္ဍဲအခိၚ်ဂှ် “ပသာ်ရော? ခမဳဂှ် ဒှ်တြုံသကဲ (တြုံဍောတ်) တၠသ္ၚိဗြဴအဲဟာ၊ ဆဂှ်ဟွံသေၚ်မ္ဂး ဟီုဂရိုၚ်စရဵုဟာ” ရဴဝွံ ကသပ်ဒှ် ကုကောန်ခအှ်ဗြဴရ။ ပ္ဍဲအခိၚ်ဂှ် တဳလပိုဉ်ဥဒါယဳ ပကာတ်လဝ်တမ်ကတောဝ် တၠသ္ၚိဗြဴတုဲ တွံဓရ်တုဲမ္ဂး ပြာပ်အာဇရေၚ်ကောန်ခအှ်ဗြဴတုဲ ပကာတ်လဝ်တမ်ကတောဝ် ကောန်ခအှ်ဗြဴတုဲ တွံဓရ်ရ။ ပ္ဍဲအခိၚ်ဂှ် “ပသာ်ရော? ခမဳဂှ် ဒှ်တြုံသကဲ (တြုံဍောတ်) ကောန်ခအှ်ဗြဴအဲဟာ၊ ဆဂှ်ဟွံသေၚ်မ္ဂး ဟီုဂရိုၚ်စရဵုဟာ” ရဴဝွံ ကသပ်ဒှ် ကုတၠသ္ၚိဗြဴရ။ ပ္ဍဲကြဴနူဂှ် တဳလပိုဉ်ဥဒါယဳ ပကာတ်လဝ်တမ်ကတောဝ် ကောန်ခအှ်ဗြဴတုဲ တွံဓရ်တုဲမ္ဂး ကက္လေၚ်က္ညစဴအာရ။ ပ္ဍဲအခိၚ်ဂှ် တၠသ္ၚိဗြဴဂှ် “ဟာဲကောန်ခအှ်ဗြဴ ခမဳဂှ် မုရဴဂလာန်မွဲ ဟီုသ္ဂးကဵုတၠအဲရော?” ရဴဝွံ သၟာန်ကောန်ခအှ်ဗြဴရ။ ယွံနာဲဗြဴ တွံကဵုဓရ် ကုအဲရ၊ တၠအဲနာဲဗြဴတုန် မုရဴဂလာန်မွဲဟီုသ္ဂးရော? ရဴဝွံ (က္လေၚ်သၟာန်ရ)။ ကုအဲလေဝ် တွံကဵုဓရ်ရ။ ဗြဴဂမၠိုၚ်ဂှ် “မုဟိုတ် တဳလပိုဉ်ဥဒါယဳ ပကာတ်လဝ်တမ်ကတောဝ်တုဲ သ္ဂောံတွံဓရ်ရော? ဗၠးဗၠးၜးၜး ကၠးဖ္ဍး တၟးဇးတၟးဇး ထေက်ကဵုသ္ဒးတွံဓရ်ရ ဟွံသေၚ်ဟာ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိက်ကေတ် ဂလာန်ဗြဴဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ၊ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥဒါယဳ တွံဓရ် ကုမာတုဂါမ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥဒါယဳ နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဥဒါယဳ တၠအဲ တွံဓရ် ကုမာတုဂါမ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ တွံဓရ် ကုမာတုဂါမ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴခမဳမွဲ တွံဓရ် ကုမာတုဂါမ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
61) ပ္ဍဲအခိၚ်ဂှ် ဥပးဗြဴဂမၠိုၚ် ဂဗညာတ်ဒးခမဳဂမၠိုၚ်မ္ဂး “ယွံတဳလပိုဉ်တအ် အာတ်ပါန်အခေါၚ်ရ၊ ဩဝ်တွံဓရ်အိုတ်ညိ” ရဴဝွံ ဂရၚ်ပတီအိုတ်ရ။ ယွံဒေံဗြဴ တၞဟ်နတွံဓရ်ကုမာတုဂါမ်ဂှ် ဟွံဂပ်ဝ်ရ ရဴဝွံ (ဟီုသ္ဂးအိုတ်ရ)။ ယွံတဳလပိုဉ်တအ် အာတ်ပါန်အခေါၚ်ရ၊ နဂလာန်မသုန်ပါၚ်တြဴပါၚ်ဂမၠိုၚ် ဩဝ်တွံဓရ် အိုတ်ညိ၊ နဗၞတ်ဝွံ တၞဟ်နတီကေတ်ဓရ် သၟဟ်ရထ ရဴဝွံ (ဂရၚ်ပတီအိုတ်ရ)။ “ယွံဒေံဗြဴတအ် တၞဟ်နတွံဓရ် ကုမာတုဂါမ်ဂှ် ဟွံဂပ်ဝ်ရ ရဴဝွံ (ဟီုသ္ဂးတုဲ) မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံတွံဓရ်အိုတ်ရ။ ဥပးဗြဴဂမၠိုၚ် “မုဟိုတ်တဳလပိုဉ်ဂမၠိုၚ် ပိုဲညးဂမၠိုၚ် သီုမဂပ်ဝ်အာတ်ပါန်အခေါၚ်ဖအောဝ်ဗတိုက်ဂမၠိုၚ်ဂှ် ဟွံတွံဓရ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိက်ကေတ် ဂလာန်ဥပးဗြဴဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် နဂလာန်ဂမၠိုၚ်မသုၚ်ပါၚ်, တြဴပါၚ် တၞဟ်နတွံဓရ် ကုမာတုဂါမ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်အိုတ်ညိ။ “ယြဴခမဳမွဲ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် တွံဓရ် ကုမာတုဂါမ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
62) ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “နဂလာန်ဂမၠိုၚ် မသုန်ပါၚ်, တြဴပါၚ် တၞဟ်နတွံဓရ်ကုမာတုဂါမ်ဂှ် တဳလမၞုံပိုဉ်ကျာ်တြဲ ကဵုအခေါၚ်ရ” ရဴဝွံ သကဵုတြုံ မဟွံတီဟွံစဳကၠး ပဒတဴဒၟံၚ်ပ္ဍဲဇရေၚ်တုဲ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် တွံဓရ် ကုမာတုဂါမ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သကဵုတြုံမဟွံတီဟွံစဳကၠး ပဒတဴဒၟံၚ်ပ္ဍဲဇရေၚ်တုဲ နဂလာန်ဂမၠိုၚ် လောန်လတူမသုၚ်ပါၚ်, တြဴပါၚ် တွံဓရ် ကုမာတုဂါမ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သကဵုတြုံမဟွံတီဟွံစဳကၠး ပဒတဴဒၟံၚ်ပ္ဍဲဇရေၚ်တုဲ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် တွံဓရ် ကုမာတုဂါမ်အိုတ်ရဟီုဂှ် ဍာံပြဟာ?” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သကဵုတြုံမဟွံတီစဳကၠး ပဒတဴဒၟံၚ် ပ္ဍဲဇရေၚ်တုဲ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် တွံဓရ် ကုမာတုဂါမ်အိုတ်ရော?” ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
63) “ယြဴခမဳမွဲ ဝေၚ်ကၠေံမၞိဟ်တြုံမတီစဳကၠးတုဲ နဂလာန်ဂမၠိုၚ် မလောန်လတူမသုန်ပါၚ်, တြဴပါၚ် တွံဓရ် ကုမာတုဂါမ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
