၅.၁.၆.၁။ ပွံက်ဒုတိယသဟသေယျသိက္ခာပိုဒ်

57) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မာတုဂါမ မ္ဂးဂှ် ဗြဴမၞိဟ်ရောၚ်၊ လကိုဟ် (ဒေဝတဴ) ဗြဴ ဟွံသေၚ်၊ ပြိုတ်ဗြဴ ဟွံသေၚ်၊ တိရစ္ဆာန်ဗြဴဟွံသေၚ်၊ ဗွဲတွဵုမယုတ် ကောန်ၚာ်ဗြဴ မၜံၚ်သၠးတိတတ် တ္ၚဲဝွံရောၚ်။ ပ္ဍဲမၞိဟ်ဗြဴအဝယ်ဇၞော်ဂှ် သ္ဇက်ဟီုဟၟဲဟေၚ်ရ။ မွဲစွံ မ္ဂးဂှ် မွဲဂကောံဓဝ်။ ဒၞါဲသတိက်ဒၞါဲဒၟံၚ် မ္ဂးဂှ် ဘာဒၞါဲသတိက်ဒၞါဲဒၟံၚ် မၞုံကဵုစၟဳအလုံအိုတ်သီု မၞုံကဵုအစဵုအဗိုၚ် (ဗ္ဒၚ်) အလုံအိုတ်သီု မၞုံကဵုစၟဳဗွဲမဂၠိုၚ် မၞုံကဵုအစဵုအဗိုၚ် (ဗ္ဒၚ်) ဗွဲမဂၠိုၚ်ရောၚ်။ သ္ပတဴ ပွမတိက် မ္ဂးဂှ် ပ္ဍဲအခိၚ်တ္ၚဲပၠိုတ် မာတုဂါမ်တိက်တဴ ခမဳဂှ် တိက်မ္ဂး၊ ဒးအာပတ်ပါဲစိုတ်ရ။ ခမဳဂှ် တိက်တဴ မာတုဂါမ်ဂှ် တိက်မ္ဂး၊ ဒးအာပတ်ပါဲစိုတ်ရ။ သီုညးၜါတၠလေဝ်တိက်အိုတ်မ္ဂး ဒးအာပတ်ပါဲစိုတ်ရ။ ကတဵုတုဲ ဂၠိုၚ်ဂၠိုၚ်ကဵုအလန် တိက်အိုတ်မ္ဂး ဒးအာပတ်ပါဲစိုတ်ရ။

58) မာတုဂါမ်ဂှ် မၞုံကဵုစၟတ်သမ္တီ မာတုဂါမ်ဒှ်တုဲ တိက်မွဲစွံမ္ဂး၊ ဒးအာပတ်ပါဲစိုတ်ရ။ မာတုဂါမ်ဂှ် မၞုံကဵုသၠေဟ်ပၟာဒှ်တုဲ တိက်မွဲစွံမ္ဂး၊ ဒးအာပတ်ပါဲစိုတ်ရ။ မာတုဂါမ်ဂှ် မၞုံကဵုစၟတ်သမ္တီ မာတုဂါမ် ဟွံသေၚ်ဒှ်တုဲ တိက်မွဲစွံမ္ဂး ဒးအာပတ်ပါဲစိုတ်ရ။ (တိက်မွဲစွံ) ပ္ဍဲဘာမၞုံကဵုစၟဳကွက် အစဵုအဗိုၚ်ကွက်မ္ဂး ဒးအာပတ်ဒုက္ကဋ်ရ။ တိက်မွဲစွံကေုာံလကိုဟ် (ဒေဝတဴ) ဗြဴကီု ကေုာံပြိုတ်ဗြဴကီု ကေုာံခမၞုဲဗြဴကီု ကေုာံတိရစ္ဆာန်ဗြဴကီုမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီမာတုဂါမ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီ မာတုဂါမ်ဟွံသေၚ်မ္ဂး ဟွံဒးအာပတ်ရ။

59) ပ္ဍဲဒၞါဲမၞုံကဵုစၟဳအလုံအိုတ်သီုတုဲ ဟွံမွဲကဵုအစဵအဗိုၚ် (ဗ္ဒၚ်) အလုံအိုတ်သီု ဒၞါဲမၞုံကဵုအစဵုအဗိုၚ် (ဗ္ဒၚ်) အလုံအိုတ်သီုတုဲ ဟွံမွဲကဵုစၟဳ အလုံအိုတ်သီု ဒၞါဲဟွံမွဲကဵုစၟဳဗွဲမဂၠိုၚ်တုဲ ဟွံမွဲကဵုအစဵုအဗိုၚ် (ဗ္ဒၚ်) ဗွဲမဂၠိုၚ်ဂှ် ဟွံဒးအာတ်ရ။ မာတုဂါမ် တိက်ဒၟံၚ်တုဲ ခမဳဂှ် ဂဇအ်ဒၟံၚ်မ္ဂး၊ ခမဳဂှ် တိက်ဒၟံၚ်တုဲ မာတုဂါမ်ဂှ် ဂဇအ်ဒၟံၚ်မ္ဂး သီုညးၜါတၠလေဝ် ဂဇအ်ဒၟံၚ်အိုတ်မ္ဂး ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဒုတိယသဟသေယျသိက္ခာပိုဒ် ဆဋ္ဌတုဲရ။