၅.၁.၆။ ဒုတိယသဟသေယျသိက္ခာပိုဒ်
55) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်အနုရုဒ္ဓ က္ညအာဍုၚ်သာရဝှ်မ္ဂး အခိၚ်သဝ်တ္ၚဲ စိုပ်အာကွာန်မွဲ ပ္ဍဲဇနပိုဒ်လုပ်လၟိဟ်ကောသလရးရ။ ပ္ဍဲအခိၚ်ဂှ် ပ္ဍဲကွာန်ဂှ် ညးဗြဴမွဲဂှ် ကၠောန်သ္ပစွံလဝ် သ္ၚိသွက်ကၟုဲဇူဒီုရ၊ ပ္ဍဲအခိၚ်ဂှ် တဳလပိုဉ်အနုရုဒ္ဓ ပြာပ်အာဇရေၚ်ဗြဴဂှ်တုဲမ္ဂး “ယွံဒေံဗြဴ ယဝ်ဟွံဇြိုၚ်စိုတ်မ္ဂး၊ သၟိက်ပဒတဴ ပ္ဍဲသ္ၚိသွက်ကၟုဲဇူဒီု ဗၞတ်မွဲဗ္တမ်ရ” ရဴဝွံ ဟီုသ္ဂးကဵုဗြဴဂှ်ရ။ ယွံတဳလပိုဉ် ဩဝ်ပဒတဴညိ ရဴဝွံ (ဂရၚ်ပတီရ)။ ညးကွာ်တရဴသအာၚ်ဂမၠိုၚ်လေဝ် ပြာပ်အာဇရေၚ်ဗြဴဂှ်တုဲမ္ဂး “ယွံနာဲဗြဴ ယဝ်ဟွံဇြိုၚ်စိုတ်မ္ဂး၊ ကဵုဂွံပဒတဴ ပ္ဍဲသ္ၚိသွက်ကၟုဲဇူဒီု ဗၞတ်မွဲဗ္တမ်အိုတ်ညိ” ရဴဝွံ ဟီုသ္ဂးကဵုဗြဴဂှ်အိုတ်ရ။ ယွံကောန်နာဲတအ် ခမဳဝွံ က္ညကၠုၚ်စိုပ် ဗွဲကိုပ်ကၠာရ။ ခမဳဂှ် ကဵုအခေါၚ်မ္ဂး ဩဝ်ပဒတဴအိုတ်ညိ ရဴဝွံ (သ္ဂးရ)။ ပ္ဍဲအခိၚ်ဂှ် ညးကွာ်တရဴသအာၚ်ဂမၠိုၚ် ပြာပ်အာဇရေၚ်တဳလပိုဉ်အနုရုဒ္ဓတုဲ “ယွံတဳလပိုဉ် ယဝ်ဟွံဇြိုၚ်စိုတ်ကုတဳလပိုဉ်မ္ဂး၊ ကဵုဂွံပဒတဴ ပ္ဍဲသ္ၚိသွက်ကၟုဲဇူဒီု ဗၞတ်မွဲဗ္တမ်အိုတ်ညိ” ရဴဝွံ ဟီုသ္ဂးကဵုတဳလပိုဉ်အနုရုဒ္ဓအိုတ်ရ။ ယွံဒကာတအ် ဩဝ်ပဒတဴအိုတ်ညိ ရဴဝွံ (သ္ဂးရ)။ ပ္ဍဲအခိၚ်ဂှ် ဗြဴဂှ် မွဲဒမြိပ်ကေုာံပွမညာတ်ဒး တဳလပိုဉ်အနုရုဒ္ဓ စိုတ်ထၞေန်စပ်ဒှ်ဒၟံၚ်ရ၊ ပ္ဍဲအခိၚ်ဂှ် ဗြဴဂှ် ပြာပ်အာဇရေၚ်တဳလပိုဉ်အနုရုဒ္ဓတုဲ “ယွံတဳလပိုဉ် တဳလပိုဉ်ဂှ် ဟိုတ်မတ္ၜန်တ္ၜောဲနှဴရဴ ကေုာံမၞိဟ်ဂမၠိုၚ်ဝွံရ ကြက်သ္ဂောံပဒတဴ ဗွဲတသိုခ်ဟွံသေၚ်ရ၊ ယွံတဳလပိုဉ် အာတ်ပါန်အခေါၚ်ရ၊ အဲဍိက် လးပဠေဝ်လဝ်ကဵုဇံၚ်ခါတ် တဳလပိုဉ် ပ္ဍဲအပ္ဍဲသ္ၚိရ” ရဴဝွံ ဂရၚ်ပတီ တဳလပိုဉ်အနုရုဒ္ဓရ။ တဳလပိုဉ်အနုရုဒ္ဓ နမဒၟံၚ်သ္ၚိတ်သ္ၚိတ်ဂှ် ဒုၚ်ထောံတဲရ။ ပ္ဍဲအခိၚ်ဂှ် ဗြဴဂှ် လးပဠေဝ်ကဵုဇံၚ်ခါတ် တဳလပိုဉ်အနုရုဒ္ဓ ပ္ဍဲအပ္ဍဲသ္ၚိတုဲ ဗိုက်လတက်ကျိုၚ်ကျဝ်ကေတ် ကယျိုၚ်ကယျဝ်ယာတ်ဗွိုက်လတက်ဗွဲမဒးရးတုဲမ္ဂး သီုမကဵုပ္ဍးတၟာဲတဴ နကဵုသၟူမြမောဝ် မပ္ဍးတၟာဲဂမၠိုၚ် ပြာပ်အာဇရေၚ်တဳလပိုဉ်အနုရုဒ္ဓတုဲ “ယွံတဳလပိုဉ် တဳလပိုဉ်ဂှ် ရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ခိုဟ်ရ၊ ထေက်ကဵုလျုၚ်ဇြုၚ်သ္ဍိုက်ခိုဟ်ရ၊ အဲဍိက်ဗြဴလေဝ် ရုပ်သာ်ကျေဝ်ဂေါဝ်ရ၊ ထေက်ကဵုဗဵုသ္ၚေဝ်ခိုဟ်ရ၊ ထေက်ကဵုလျုၚ်ဇြုၚ်သ္ဍိုၚ်ခိုဟ်ရ၊ ယွံတဳလပိုဉ် အာတ်ပါန်အခေါၚ်ရ၊ အဲဍိက်ဗြဴ သၟိက်ဂွံဒှ်သမ္ဘာတဳလပိုဉ်ရ” ရဴဝွံ ဂရၚ်ပတီ တဳလပိုဉ်အနုရုဒ္ဓရ။ အခိၚ်ဂရၚ်ပတီတိုန်ရဴဝွံဂှ် တဳလပိုဉ်အနုရုဒ္ဓ ဒၟံၚ်ထောံကၞပ်သ္ၚောံရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ဗြဴဂှ် “ယွံတဳလပိုဉ် တဳလပိုဉ်ဂှ် ရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ခိုဟ်ရ၊ ထေက်ကဵုလျုၚ်ဇြုၚ်သ္ဍိုက်ခိုဟ်ရ၊ အဲဍိက်ဗြဴလေဝ် ရုပ်သာ်ကျေဝ်ဂေါဝ်ရ၊ ထေက်ကဵုဗဵုသ္ၚေဝ်ခိုဟ်ရ၊ ထေက်ကဵုလျုၚ်ဇြုၚ်သ္ဍိုက်ခိုဟ်ရ၊ ယွံတဳလပိုဉ် အာတ်ပါန်အခေါၚ်ရ၊ တဳလပိုဉ် ဩဝ်သီထၜေါဝ်ဒုၚ်ဂိုၚ်ကေတ် အဲဍိက်ဗြဴ ကေုာံဂြပ်ရတ်အိုတ်သီုညိ” ရဴဝွံ ဂရၚ်ပတီ တဳလပိုဉ်အနုရုဒ္ဓရ။ မရနုက်ကဵုပိဝါလေဝ် တဳလပိုဉ်အနုရုဒ္ဓ ဒၟံၚ်ထောံကၞပ်သ္ၚောံရ။ ပ္ဍဲအခိၚ်ဂှ် ဗြဴဂှ် သၠောတ်ထောံကၠေံယာတ်ဂၞိန်တုဲ နူဂတတဳလပိုဉ်အနုရုဒ္ဓ ကွာ်လေဝ်ကွာ်စၚ်္ကြမ်ရ၊ ဒတူလေဝ်ဒတူရ၊ ဂဇအ်လေဝ်ဂဇအ်ရ၊ တိက်လေဝ်တိက်ရ၊ ပ္ဍဲအခိၚ်ဂှ် တဳလပိုဉ်အနုရုဒ္ဓ ဖျေံကၠေံဣန္ဒြဳဂမၠိုၚ် (မပ္တမ်ကဵုမတ်) သၟဝ်တုဲ သ္ၚေဝ်လေဝ်ဟွံသ္ၚေဝ်ရံၚ် ဗြဴဂှ်ရ၊ အရေဝ်လေဝ်ဟွံဟီု (ပဒတဴဒၟံၚ်ရ)။ ပ္ဍဲအခိၚ်ဂှ် ဗြဴဂှ် “ယွံသကအ်တအ် ထေက်ကဵုဒးအမ်သဝ်ကွေံသွံ၊ ယွံသကအ်တအ် ဟွံကေၚ်ဒှ်မွဲလှေ်ဂှ် ဒှ်ကၠုၚ်ရသွံ၊ မၞိဟ်ဂမၠိုၚ်မဂၠိုၚ် ဗလးပလံၚ်နၚ် နဂြပ်ရတ်ကဵုကၠံကဵုလ္ၚီတုဲ အာတ်တဴအဲအိုတ်ရ၊ (သၟာန်သၟုက်အိုတ်ရ)၊ ခမဳဝွံတုန် အလဵုဇကုအဲ သီုအာတ်ပါန်အခေါၚ်ဂှ် ဟွံမွဲပၟိက် သွက်ဂွံသီထၜေါဝ်ဒုၚ်ဂိုၚ်ကေတ် အဲကေုာံဂြပ်ရတ်အိုတ်သီုရ” ရဴဝွံ ဟီုသ္ဂးတုဲ ဟဵုဗိုက်ဂၞိန်တုဲမ္ဂး အောပ်မာဖျေံ ပ္ဍဲဒၠးဇိုၚ်တဳလပိုဉ်အနုရုဒ္ဓဂမၠိုၚ် နကဵုက္ဍိုပ်တုဲ “ယွံတဳလပိုဉ် အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက် ဒုဟ်ဓလီုဍိုက် ဒးအဲဍိက်ဗြဴတုဲရ၊ အဲဍိက်ဗြဴ သ္ပဒးပွဟွံဗဗွဲရဴဝွံရ၊ ယွံတဳလပိုဉ် တဳလပိုဉ်ဂှ် တၞဟ်နသ္ၚဳလလမ်မၚ်မွဲ ပ္ဍဲကာလကြဴ ဒုဟ်အဲဍိက်ဂှ် ဗွဲအစောံဒုဟ် ဩဝ်အေၚ်ဒုၚ်ညိကျာ် ရဴဝွံ ဂရၚ်ပတီ တဳလပိုဉ်အနုရုဒ္ဓရ။ ယွံဒေံဗြဴ ခိုဟ်သန်ရ၊ အတိုၚ်မဒိုဟ်ဓီု အတိုၚ်မဝိဝိၚ် အတိုၚ်ဟွံဍိုဟ်ကေက် ဒုဟ်ဓလီုဍိုက်ဒး တၠအဲရ၊ တၠအဲ သ္ပဒးပွဟွံဗဗွဲရဴဝွံရ၊ ယွံဒေံဗြဴ တၠအဲဂှ် ယြဴဟိုတ်နူဟိုတ်မွဲ တီညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ဟိုတ်ဂှ်ရ ဒုဟ်တၠအဲဂှ် ပိုဲညးဂမၠိုၚ် ဒုၚ်တဲအိုတ်ရ။ ယွံဒေံဗြဴ ယြဴညးမွဲ တီညာတ်ကေတ်ဒုဟ် ဗွဲအစောံဒုဟ်တုဲ ဇအုဲဇဗကၠေံ ဗွဲမဗဗွဲကဵုဓရ်ရ၊ ပ္ဍဲကာလကြဴလေဝ် အာစိုပ်ပွမသ္ၚဳလလမ်မၚ်မွဲရ၊ ပွမအာစိုပ်သ္ၚဳလလမ်မၚ်မွဲဝွံ ဒှ်ဟိုတ်ပွမဇၞော်မောဝ်တဴတက် ပ္ဍဲသာသနာ ဒၠောံဗတောန်ကျာ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ဗြဴဂှ် နမလောန်ၜက်အာဗ္တမ်ဂှ် အလဵုဇကု ကၠောန်ၜိုတ်ဥပကာ တဳလပိုဉ်အနုရုဒ္ဓ နကဵုစၞအာဟာရ ဘောဇိုန်မပြဲပြဲ စဵုကဵုတရိုပ်စိုတ် စဵုကဵုဒးဆေဝ်တာပဒေါံကၠေံတုဲ အခိၚ်ကဵုပိုဉ်တုဲ ပါဲကၠေံတဲနူဗဗေၚ်တုဲဂှ် လ္ၚောဝ်သ္ပဝတ် တဳလပိုဉ်အနုရုဒ္ဓတုဲ ဂဇအ်ဒၟံၚ်ပ္ဍဲဒၞါဲမွဲရ။ ဗြဴမဂဇအ်ဒၟံၚ် ပ္ဍဲဒၞါဲမွဲတုဲဂှ် နကဵုဂလာန်ဓရ် တဳလပိုဉ်အနုရုဒ္ဓ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် ဗြဴဂှ် နကဵုဂလာန်ဓရ် တဳလပိုဉ်အနုရုဒ္ဓ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ— “ယွံတဳလပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလပိုဉ် ဗွဲဥပမာမ္ဂးတုန် ဝတ္ထုဗကပ်စွံလဝ်ဂှ် သၟဟ်ညံၚ်ရဴဂတးလ္ၚာကဵုကီု ဝတ္ထုဂြောပ်ဗ္ဒန်လဝ်ဂှ် သၟဟ်ညံၚ်ရဴပံက်ထ္ၜးကဵုကီု ကုညးမတ်ဂေတ်တၠိၚ်ဂၠံၚ်ဂှ် သၟဟ်ညံၚ်ရဴဟီုလဴကဵုဂၠံၚ်ဍာန် ဍာံစၟတ်ကီု “ညးမၞုံကဵုမတ်မညာတ်ဂမၠိုၚ်ဂှ် ကြက်ဂွံညာတ်ကေတ် ရုပ်သာ်ဂမၠိုၚ်အိုတ်ရ” ရဴဝွံ ပ္ဍဲတိုက်ဒမၠုဂှ် သၟဟ်ညံၚ်ရဴစံၚ်ဗဂဵုကဵု ပၟတ်ကၠေၚ်သ္ဍဴကီု တုပ်သၟဟ်သာ်ဂှ်ဟေၚ်ရ တဳလပိုဉ်အနုရုဒ္ဓဂှ် နကဵုဟိုတ်တၞဟ်တၞဟ် တွံထ္ၜးကဵုဓရ်ရ၊ ယွံတဳလပိုဉ် ပိုဲဍိက်ဗြဴဂှ် ပြာပ်ခစသ္ပစ္ၜုဲစ္ၜော်ကဵုကျာ်တြဲရ၊ ဓရ်ဂှ်လေဝ် ပြာပ်ခစသ္ပစ္ၜုဲစ္ၜော်ရ၊ သၚ်ဂှ်လေဝ် ပြာပ်ခစသ္ပစ္ၜုဲစ္ၜော်ရ၊ တဳလပိုဉ်အနုရုဒ္ဓဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု အဲဍိက်ဗြဴဂှ် ဥပးဗြဴပြာပ်ခစသ္ပစ္ၜုဲစ္ၜော် ရဴဝွံ ဩဝ်ဂိုၚ်သမ္တီလဝ်ညိ ရဴဝွံ ဂရၚ်ပတီ တဳလပိုဉ်အနုရုဒ္ဓရ။ ပ္ဍဲအခိၚ်ဂှ် တဳလပိုဉ်အနုရုဒ္ဓ က္ညအာဍုၚ်သာရဝှ်တုဲ ဟီုလဴထ္ၜး ဟိုတ်ပရူပရာဝွံ ကုခမဳဂမၠိုၚ်ရ၊ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်အနုရုဒ္ဓ သ္ဂောံတိက်မွဲစွံ ကေုာံမာတုဂါမ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်အနုရုဒ္ဓ နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံအနုရုဒ္ဓ တၠအဲ တိက်မွဲစွံ ကေုာံမာတုဂါမ် ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံအနုရုဒ္ဓ တၠအဲ မုဟိုတ် သ္ဂောံတိက်မွဲစွံ ကေုာံမာတုဂါမ်ရော? ယွံအနုရုဒ္ဓ (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
56) “ယြဴခမဳမွဲ သ္ပတဴ ပွမတိက်မွဲစွံ ကေုာံမာတုဂါမ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ် ရဴဝွံ သ္ဂးရ)။
