၅.၁.၅။ သဟသေယျသိက္ခာပိုဒ်
49) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲ ‘အဂ္ဂါဠဝစေတဳ’ ဇရေၚ်ဍုၚ်အာဠဝဳဂှ် ဥပးတြုံဂမၠိုၚ် တၞဟ်နကလၚ်ပၚ်မှိၚ်ဓရ် ပ္ၚောံကၠုၚ်အာရှာမ်ဘာအိုတ်ရ၊ အခိၚ်တွံဓရ်တုဲဂှ် ခမဳထေရ်ဇၞော်ဂမၠိုၚ် က္ညစဴအာဘာဒၟံၚ်ဇကုတအ်အိုတ်ရ၊ ခမဳသၟတ်ဂမၠိုၚ်တုန် ပ္ဍဲဇြပ်တွံဓရ်ဂှ်ဟေၚ် သီုမၞုံကဵုသတိမတိတ်ဗၠး သီုဟွံမွဲကဵုပညာမဗ္စာရဏာ ယာတ်ဟွံကာတ်ဗာန်ပ္ဍဲဇကုတုဲ သီုမကၟုက်ကၟဝ် သီုမဂအဳဒၟံၚ်ညံၚ်ရမျာၚ်ခ္ဍာ်ဂှ် တိက်ဒၟံၚ်ကေုာံဥပးတြုံဂမၠိုၚ်မွဲစွံအိုတ်ရ။ ဥပးတြုံဂမၠိုၚ် တဳလပိုဉ်ခိုဟ်ဆာဲဂမၠိုၚ် သီုမၞုံကဵုသတိမတိတ်ဗၠး သီုဟွံမွဲကဵုပညာမဗ္စာရဏာ ယာတ်ဟွံကာတ်ဗာန် ပ္ဍဲဇကုတုဲ သီုမကၟုက်ကၟဝ် သီုမဂအဳဒၟံၚ်ညံၚ်ရမျာၚ်ခ္ဍာ်ဂှ် မုဟိုတ်တိက်ဒၟံၚ်အိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်ဥပးတြုံဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် မုဟိုတ် သ္ဂောံတိက်မွဲစွံ ကေုာံညးဟွံသေၚ်ကဵုခမဳအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဂမၠိုၚ် တိက်မွဲစွံ ကေုာံညးဟွံသေၚ်ကဵုခမဳအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ် မုဟိုတ် သ္ဂောံတိက်မွဲစွံ ကေုာံညးဟွံသေၚ်ကဵုခမဳအိုတ်ရော? ယွံခမဳတအ် (ပွမၞးတအ် ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴခမဳမွဲ သ္ပတဴပွမတိက်မွဲစွံ ကေုာံညးဟွံသေၚ်ကဵုခမဳမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
50) ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်အာဠဝဳ ဗၞတ်မမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဍုၚ်ကောသမ္ဗဳရ၊ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်ကောသမ္ဗဳရ၊ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဘာဗဒရိကာရာမ် (ဘာကၠအ်ဗ္ဒရ်) ဇရေၚ်ဍုၚ်ကောသမ္ဗဳဂှ်ရ။ ခမဳဂမၠိုၚ်ဂှ် “ယွံကောန်တၠရာဟုလ ‘တိက်မွဲစွံ ကေုာံညးဟွံသေၚ်ကဵုခမဳ ဟွံဂွံ’ ရဴဝွံ တဳလမၞုံပိုဉ်ကျာ်တြဲ ပညပ်လဝ်သိက္ခာပိုဒ်ရ၊ ယွံကောန်တၠရာဟုလ ဩဝ်တီကေတ် ဒၞါဲသွက်ဂွံတိက်ညိ” ရဴဝွံ ဟီုသ္ဂးကဵုတဳလပိုဉ်ရာဟုလအိုတ်ရ။ ပ္ဍဲအခိၚ်ဂှ် တဳလပိုဉ်ရာဟုလ ဟွံကလိဂွံဒၞါဲသွက်ဂွံတိက်ဒှ်တုဲ တိက်ဒၟံၚ် ပ္ဍဲဝစ္စကုဋဳ ဒၞါဲသၠးတရဴဇၞော်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ဂယးဗ္တမ်ဂှ် ဒၠိုက်ကတဵုတုဲ ပြာပ်အာဝစ္စကုဋဳတုဲမ္ဂး ခအေမ်ရ၊ တဳလပိုဉ်ရာဟုလလေဝ် ခအေမ်တိုန်ရ။ ပ္ဍဲဒၞါဲဝွံ ညးလဵုနွံရော? ရဴဝွံ (သၟာန်တိုန်ဂှ်)။ ယွံတဳလမၞုံပိုဉ် အဲဍိက်ရာဟုလ ရဴဝွံ (ဂရၚ်ပတီရ)။ ယွံကောန်တၠရာဟုလ တၠအဲ မုဟိုတ် သ္ဂောံပဒတဴဒၟံၚ်ပ္ဍဲဒၞါဲဝွံရော? ရဴဝွံ (အခိၚ်သၟာန်တိုန်ဂှ်)။ ပ္ဍဲအခိၚ်ဂှ် တဳလပိုဉ်ရာဟုလ ဂရၚ်ပတီတိုန် ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ဟီုတွံဂလာန်ဓရ်တုဲ− ယွံခမဳတအ် ကဵုအခေါၚ်တၞဟ်နသ္ပ ပွမတိက်မွဲစွံ ကေုာံညးဟွံသေၚ်ကဵုခမဳ လုကဴၜါဗ္တမ် ပိဗ္တမ်ရ ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
51) “ယြဴခမဳမွဲ လုကဴမလောန်အာၜါဗ္တမ် ပိဗ္တမ် သ္ပတဴ ပွမတိက်မွဲစွံ (ပ္ဍဲဘာမၞုံကဵုမွဲစၟဳမွဲဗ္ဒၚ်) ကေုာံညးဟွံသေၚ်ကဵုခမဳမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)
