၅.၁.၄။ ပဒသောဓမ္မသိက္ခာပိုဒ်

44) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ဖျေံပတိုန်ပြိုၚ်ပိုဒ်ဓရ် ကုဥပးတြုံဂမၠိုၚ်အိုတ်ရ၊ ဥပးတြုံဂမၠိုၚ် ဟွံ ရှေ်သှေ်ရဴဂဴ ပ္ဍဲခမဳဂမၠိုၚ်အိုတ်ရ၊ ဟွံဇအ်သဝ်အောပ်မာအိုတ်ရ၊ ဟွံမွဲကဵုပွမဂယိုၚ်လမျီုတုပ်သၟဟ်ဂမၠိုၚ်ဒှ်တုဲ ပဒတဴအိုတ်ရ။ ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် မုဟိုတ် ဖျေံပတိုန်ပြိုၚ်ပိုဒ်ဓရ် ကုဥပးတြုံဂမၠိုၚ်အိုတ်ရော? ဥပးတြုံဂမၠိုၚ် ဟွံရှေ်သှေ်ရဴဂဴ ပ္ဍဲခမဳဂမၠိုၚ်အိုတ်ရ၊ ဟွံဇအ်သဝ်အောပ်မာအိုတ်ရ၊ ဟွံမွဲကဵုပွမဂယိုၚ်လမျီုတုပ်သၟဟ်ဂမၠိုၚ်ဒှ်တုဲ ပဒတဴအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ဖျေံပတိုန်ပြိုၚ်ပိုဒ်ဓရ် ကုဥပးတြုံဂမၠိုၚ်အိုတ်ရ၊ ဥပးတြုံဂမၠိုၚ် ဟွံရှေ်သှေ်ရဴဂဴ ပ္ဍဲခမဳဂမၠိုၚ်အိုတ်ရ၊ ဟွံဇအ်သဝ်အောပ်မာအိုတ်ရ၊ ဟွံမွဲကဵုပွမဂယိုၚ်လမျီုတုပ်သၟဟ်ဂမၠိုၚ်ဒှ်တုဲ ပဒတဴအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဖျေံပတိုန်ပိုဒ်ဓရ် ကုဥပးတြုံဂမၠိုၚ်အိုတ်ရော? ဥပးတြုံဂမၠိုၚ် ဟွံရှေ်သှေ်ရဴဂဴ ပ္ဍဲခမဳဂမၠိုၚ်အိုတ်ရ၊ ဟွံဇအ်သဝ်အောပ်မာအိုတ်ရ၊ ဟွံမွဲကဵုပွမ ဂယိုၚ်လမျီု တုပ်သၟဟ်ဂမၠိုၚ်ဒှ်တုဲ ပဒတဴအိုတ်ရ၊ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ် ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုးညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

45) “ယြဴခမဳမွဲ ဖျေံပတိုန်ပြိုၚ်ပိုဒ်ဓရ် ကုညးဟွံသေၚ်ကဵုခမဳမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။