၅.၁.၃။ ပေသုညသိက္ခာပိုဒ်
36) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ရၚ်တၠုၚ်ပလံၚ်ဏာ ဂလာန်ဗျဵုအလက်အကြာ ဇရေၚ်ခမဳဂမၠိုၚ် မကတဵုဒှ်သေၚ်ဇဵု ကယျာန်ဓဝါတ် မအာစိုပ်ဝါဒ ပါ်ခြအိုတ်ရ။ ကလၚ်ကေတ်ဂလာန် ခမဳဝွံတုဲ ညံၚ်ဂွံပါ်ဒကးအာ ကေုာံခမဳဝွံ ဟီုသ္ဂးကဵုခမဳဂှ်အိုတ်ရ၊ ကလၚ်ကေတ်ဂလာန် ခမဳဂှ်တုဲ ညံၚ်ဂွံပါ်ဒကးအာ ကေုာံခမဳဂှ် ဟီုသ္ဂးကဵုခမဳဝွံအိုတ်ရ၊ ဟိုတ်ပွမဟီုသ္ဂးသာ်ဂှ် ပွမသေက်ဇဵုဂမၠိုၚ် မဟွံကတဵုဒှ်ဏီလေဝ် ကတဵုဒှ်ကၠုၚ်အိုတ်ရ၊ ပွမသေက်ဇဵုဂမၠိုၚ် မကတဵုဒှ်တုဲလေဝ် လောန်ဗၞတ်ဗ္ၜတ် အာစိုပ်ပွမဇၞော်မောဝ်လှဲလးအိုတ်ရ။ ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် မုဟိုတ် ရၚ်တၠုၚ်ပလံၚ်ဏာ ဂလာန်ဗျဵုအလက်အကြာ ဇရေၚ်ခမဳဂမၠိုၚ် မကတဵုဒှ်သေက်ဇဵု ကယျာန်ဓဝါတ် မအာစိုပ်ဝါဒပါ်ခြာအိုတ်? ကလၚ်ကေတ်ဂလာန် ခမဳဝွံတုဲ ညံၚ်ဂွံပါ်ဒကးအာ ကေုာံခမဳဝွံ ဟီုသ္ဂးကဵုခမဳဂှ်အိုတ်ရော? ကလၚ်ကေတ်ဂလာန် ခမဳဂှ်တုဲ ညံၚ်ဂွံပါ်ဒကးအာ ကေုာံခမဳဂှ် ဟီုသ္ဂးကဵုခမဳဝွံအိုတ်ရော? ဟိုတ်ပွမဟီုသ္ဂးသာ်ဂှ် ပွမသေက်ဇဵုဂမၠိုၚ် မဟွံကတဵုဒှ်ဏီလေဝ် ကတဵုဒှ်ကၠုၚ်အိုတ်ရ၊ ပွမသေက်ဇဵုဂမၠိုၚ် မကတဵုဒှ်တုဲလေဝ် လောန်ဗၞတ်ဗ္ၜတ် အာစိုပ်ပွမဇၞော်မောဝ်လှဲလးအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ရၚ်တၠုၚ်ပလံၚ်ဏာ ဂလာန်ဗျဵုအလက်အကြာ ဇရေၚ်ခမဳဂမၠိုၚ် မကတဵုဒှ်သေက်ဇဵု ကယျာန်ဓဝါတ် မအာစိုပ်ဝါဒပါ်ခြာအိုတ်ရ၊ ကလၚ်ကေတ်ဂလာန် ခမဳဝွံတုဲ ညံၚ်ဂွံပါ်ဒကးအာ ကေုာံခမဳဝွံ ဟီုသ္ဂးကဵုခမဳဂှ်အိုတ်ရ၊ ကလၚ်ကေတ်ဂလာန် ခမဳဂှ်တုဲ ညံၚ်ဂွံပါ်ဒကးအာ ကေုာံခမဳဂှ် ဟီုသ္ဂးကဵု ခမဳဝွံအိုတ်ရ၊ ဟိုတ်ပွမဟီုသ္ဂးသာ်ဂှ် ပွမသေက်ဇဵုဂမၠိုၚ် မဟွံကတဵုဒှ်ဏီလေဝ် ကတဵုဒှ်ကၠုၚ်အိုတ်ရ၊ ပွမသေက်ဇဵုဂမၠိုၚ် မကတဵုဒှ်တုဲလေဝ် လောန်ဗၞတ်ဗ္ၜတ် အာစိုပ်ပွမဇၞော်မောဝ်လှဲလးအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ရၚ်တၠုၚ်ပလံၚ်ဏာ ဂလာန်ဗျဵုအလက်အကြာ ဇရေၚ်ခမဳဂမၠိုၚ် မကတဵုဒှ်သေက်ဇဵု ကယျာန်ဓဝါတ် မအာစိုပ်ဝါဒပါ်ခြာအိုတ်ရော? ကလၚ်ကေတ် ဂလာန်ခမဳဝွံတုဲ ညံၚ်ဂွံပါ်ဒကးအာ ကေုာံခမဳဝွံ ဟီုသ္ဂးကဵုခမဳဂှ်အိုတ်ရော? ကလၚ်ကေတ် ဂလာန်ခမဳဂှ်တုဲ ညံၚ်ဂွံပါ်ဒကးအာ ကေုာံခမဳဂှ် ဟီုသ္ဂးကဵုခမဳဝွံအိုတ်ရော? ဟိုတ်ပွမဟီုသ္ဂးသာ်ဂှ် ပွမသေက်ဇဵုဂမၠိုၚ် မဟွံကတဵုဒှ်ဏီလေဝ် ကတဵုဒှ်ကၠုၚ်အိုတ်ရ၊ ပွမသေက်ဇဵုဂမၠိုၚ် မကတဵုဒှ်တုဲလေဝ် လောန်ဗၞတ်ဗ္ၜတ် အာစိုပ်ပွမဇၞော်မောဝ်လှဲလးအိုတ်ရ၊ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
37) “ဟိုတ်နူပွမဟီုသ္ဂးဂလာန် မဗျဵုအလက်အကြာ ကုခမဳဂမၠိုၚ် ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
