၅.၁.၂.၁။ ပွံက်ဩမသဝါဒသိက္ခာပိုဒ်

15) ပွမဟီုတ္ၜေဟ်လက် ညံၚ်ဂွံဂိသကေဝ် မ္ဂးဂှ် ဟီုတ္ၜေဟ်လက် ညံၚ်ဂွံဂိသကေဝ် နအကာဲအရာဂမၠိုၚ်စှ်သာ် ဗွဲဂကူဇာတ်ကီု ဗွဲယၟုကီု ဗွဲတၞောဝ်ဒတောဝ်ကီု ဗွဲပွကမၠောန်ကေၚ်ကာကီု ဗွဲကွတ်ပညာကီု ဗွဲယဲဘဲကီု ဗွဲလွေဟ်ဗီုပြၚ်သဏ္ဌာန်ကီု ဗွဲကိလေသပွမကၠိခ္ဍက်ကီု ဗွဲအာပတ်ကီု ဗွဲမတ္ၜေဟ်လက် မယုတ်သဝ်ကီုရ။

ဂကူဇာတ် မ္ဂးဂှ် ဂကူဇာတ်မယုတ် ဂကူဇာတ်မပြဲ ရဴဝွံ နွံၜါဂကူရ။

ဂကူဇာတ်မယုတ် မ္ဂးဂှ် ဂကူဇာတ်ဒေါၚ်စၞာ ဂကူဇာတ်သၟာဓဇဲ (သၟာချာ၊ သၟာနှာ) ဂကူဇာတ်လၟတမ္ၚာ ဂကူဇာတ်သၟာစၞာံ ဂကူဇာတ်ထောံဇရပ္ကဴဂမၠိုၚ်ရ။ ဣဝွံတုန် ဂကူဇာတ်မယုတ် မ္ဂးရ။

ဂကူဇာတ်မပြဲ မ္ဂးဂှ် ဂကူဇာတ်သၟိၚ် ဂကူဇာတ်ဗဗၞးရ၊ ဣဝွံတုန် ဂကူဇာတ်မပြဲ မ္ဂးရ။

ယၟု မ္ဂးဂှ် ယၟုမယုတ် ယၟုမပြဲ ရဴဝွံ နွံၜါဂကူအိုတ်ရ။

ယၟုမယုတ် မ္ဂးဂှ် ယၟုၝကတောဝ်ဂၠိၚ် ယၟုၝကတောဝ်ကၟေက် ယၟုၝကတောဝ်ခ္ဍမ် ယၟုၝကတောဝ်ဇၞော်လှဲ ယၟုၝဇၞော် (ဂလိုၚ်) ဂကူ၊ သအာၚ်နူဂှ် ယၟုမဂပ်ဝ်တီဗွဲမယုတ် ယၟုမဂပ်ဝ်သ္ပထေၚ်သောဲ ယၟုမဂပ်ဝ်က္ဍုဟ်မၠေံ ယၟုမဂပ်ဝ်ဓလီုဍိုက် ယၟုမဟဂပ်ဝ်သ္ပအဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် ယၟုမယုတ်ရောၚ်။

ယၟုမပြဲ မ္ဂးဂှ် ယၟုမစပ်ကဵုကျာ် ယၟုမစပ်ကဵုဓရ် ယၟုမစပ်ကဵုသၚ်၊ သအာၚ်နူဂှ် ယၟုမဟဂပ်ဝ်တီဗွဲမယုတ် ယၟုမဟဂပ်ဝ်သ္ပထေၚ်သောဲ ယၟုမဟဂပ်ဝ်က္ဍုဟ်မၠေံ ယၟုမဟဂပ်ဝ်ဓလီုဍိုက် ယၟုမဂပ်ဝ်သ္ပအဲပရဲ ပ္ဍဲဇနပိုဒ်ဂမၠိၚ်ဂှ်ဂှ်ရောၚ်၊ ဣဝွံတုန် ယၟုမပြဲရောၚ်။ တၞောဝ်ဒတောဝ် မ္ဂးဂှ် တၞောဝ်ဒတောဝ်မယုတ် တၞောဝ်ဒတောဝ်မပြဲ ရဴဝွံ နွံၜါဂကူရ။

တၞောဝ်ဒတောဝ်မယုတ် မ္ဂးဂှ် တၞောဝ်ဒတောဝ်ကောသိယ တၞောဝ်ဒတောဝ်ဘာရဒွါဇ၊ သအာၚ်နူဂှ် တၞောဝ်ဒတောဝ်မဂပ်ဝ်တီ ဗွဲမယုတ် တၞောဝ်ဒတောဝ်မဂပ်ဝ်သ္ပထေၚ်သောဲ တၞောဝ်ဒတောဝ်မဂပ်ဝ်က္ဍုဟ်မၠေံ တၞောဝ်ဒတောဝ်မဂပ်ဝ်ဓလီုဍိုက် တၞောဝ်ဒတောဝ်မဟဂပ်ဝ်သ္ပအဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် တၞောဝ်ဒတောဝ် မယုတ်ရေၚ်။

တၞောဝ်ဒတောဝ်မပြဲ မ္ဂးဂှ် တၞောဝ်ဒတောဝ်ဂေါတမ တၞောဝ်ဒတောဝ်မောဂ္ဂလ္လာန တၞောဝ်ဒတောဝ်ကစ္စာန တၞောဝ်ဒတောဝ်ဝါသိဋ္ဌ၊ သအာၚ်နူဂှ် တၞောဝ်ဒတောဝ်မဟဂပ်ဝ်တီ ဗွဲမယုတ် တၞောဝ်ဒတောဝ်မဟဂပ်ဝ်သ္ပထေၚ်သောဲ တၞောဝ်ဒတောဝ်မဟဂပ်ဝ်က္ဍုဟ်မၠေံ တၞောဝ်ဒတောဝ်မဟဂပ်ဝ်ဓလီုဍိုက် တၞောဝ်ဒတောဝ် မဂပ်ဝ်သ္ပအဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် တၞောဝ်ဒတောဝ် မပြဲရောၚ်။

ပွကမၠောန်ကေၚ်ကာ မ္ဂးဂှ် ပွကမၠောန်ကေၚ်ကာမယုတ် ပွကမၠောန်ကေၚ်ကာမပြဲ ရဴဝွံ နွံၜါဂကူရ။

ပွကမၠောန်ကေၚ်ကာမယုတ် မ္ဂးဂှ် ကမၠောန်ကေၚ်ကာပၟၚ်ဟၚ်စာတ် ကမၠောန်ကေၚ်ကာထောံဇရပ္ကဴ၊ သအာၚ်နူဂှ် ကမၠောန်ကေၚ်ကာမဂပ်ဝ်တီ ဗွဲမယုတ် ကမၠောန်ကေၚ်ကာ ပဂပ်ဝ်သ္ပထေၚ်သောဲ ကမၠောန်ကေၚ်ကာမဂပ်ဝ်က္ဍုဟ်မၠေံ ကမၠောန်ကေၚ်ကာမဂပ်ဝ်ဓလီုဍိုက် ကမၠောန်ကေၚ်ကာမဟဂပ်ဝ်သ္ပအဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် ကမၠောန်ကေၚ်ကာမယုတ်ရောၚ်။

ပွကမၠောန်ကေၚ်ကာမပြဲ မ္ဂးဂှ် ကမၠောန်ကေၚ်ကာပွမထဲတိဇိက်ဗ္ၚ ကမၠောန်ကေၚ်ကာပွမကူသာန်ဗၞိက် ကမၠောန်ကေၚ်ကာပွမလွဳပြေၚ်ဂၠဴ၊ သအာၚ်နူဂှ် ကမၠောန်ကေၚ်ကာမဟဂပ်ဝ်တီဗွဲမယုတ် ကမၠောန်ကေၚ်ကာမဟဂပ်ဝ်သ္ပ ထေၚ်သောဲ ကမၠောန်ကေၚ်ကာမဟဂပ်ဝ်က္ဍုဟ်မၠေံ ကမၠောန်ကေၚ်ကာမဟဂပ်ဝ်ဓလီုဍိုက် ကမၠောန်ကေၚ်ကာမဂပ်ဝ်သ္ပ အဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် ကမၠောန်ကေၚ်ကာ မပြဲရောၚ်။

ကွတ်ပညာ မ္ဂးဂှ် ကွတ်ပညာမယုတ် ကွတ်ပညာမပြဲ ရဴဝွံ နွံၜါဂကူရ။

ကွတ်ပညာမယုတ် မ္ဂးဂှ် ကွတ်သၟာဗပေဝ် ကွတ်သၟာလၟာန်နုၚ် ကွတ်သၟာယန်သေဝ် (သၟာတုတ်တုတ်) ကွတ်သၟာစၞာံ ကွတ်သၟာဆတ္တာ (သၟာခေပ်သော်)၊ သအာၚ်နူဂှ် ကွတ်မဂပ်ဝ်တီဗွဲမယုတ် ကွတ်မဂပ်ဝ်သ္ပထေၚ်သောဲ ကွတ်မဂပ်ဝ်က္ဍုဟ်မၠေံ ကွတ်မဂပ်ဝ်ဓလီုဍိုက် ကွတ်မဟဂပ်ဝ်သ္ပအဲပရဲ ပ္ဍဲဇနပိုဒ်ဂမၠိုၚ်ဂှ်ဂှ်ရောၚ်၊ ဣဝွံတုန် ကွတ်မယုတ်ရောၚ်။

ကွတ်ပညာမပြဲ မ္ဂးဂှ် ကွတ်ပွမရိုဟ်ခ္ဍပ်တဲ ကွတ်ပွမရိုဟ်နဂၞန် ကွတ်ချူလိခ်၊ သအာၚ်နူဂှ် ကွတ်မဂပ်ဝ်တီ ဗွဲမယုတ် ကွတ်မဟဂပ်ဝ်သ္ပထေၚ်သောဲ ကွတ်မဂပ်ဝ်က္ဍုဟ်မၠေံ ကွတ်မဟဂပ်ဝ်ဓလီုဍိုက် ကွတ်မဂပ်ဝ်သ္ပအဲပရဲ ပ္ဍဲဇနပိုဒ် ဂမၠိုၚ်ဂှ်ဂှ်ရောၚ်၊ ဣဝွံတုန် ကွတ်မပြဲရောၚ်။

ယဲ ဂမၠိုၚ်အိုတ်သီုဂှ် ယုတ်အိုတ်ရ၊ ၜိုန်ဂှ် ယဲမလေပ်ကဵုသမျာ (တရဴသၟတ်) မတုပ်သၟဟ် ကေုာံဍာ်သာဲဇွောဝ်စှေ် (ယဲသမျာဍာတ်) ဂှ် ပြဲရ။

လွေဟ်ဗီုပြၚ်သဏ္ဌာန် မ္ဂးဂှ် လွေဟ်ဗီုပြၚ်သဏ္ဌာန်မယုတ် လွေဟ်ဗီုပြၚ်သဏ္ဌာန်မပြဲ ရဴဝွံ နွံၜါဂကူရ။

လွေဟ်ဗီုပြၚ်သဏ္ဌာန်မယုတ် မ္ဂးဂှ် ပွမသၠုၚ်လောန် ပွမသဝ်လောန် ပွမလမ္စံက်လောန် ပွမဗုလောန်ရောၚ်၊ ဣဝွံတုန် လွေဟ်ဗီုပြၚ်သဏ္ဌာန်မယုတ်ရောၚ်။

လွေဟ်ဗီုပြၚ်သဏ္ဌာန်မပြဲ မ္ဂးဂှ် ပွမဟွံသၠုၚ်လောန် ပွမဟွံသဝ်လောန် ပွမဟွံလမ္စံက်လောန် ပွမဟွံဗုလောန်ရောၚ်၊ ဣဝွံတုန် လွေဟ်ဗီုပြၚ်သဏ္ဌာန်မပြဲရောၚ်။

ကိလေသ ပွမကၠိခ္ဍက်ဂမၠိုၚ်အိုတ်သီုဂှ် ယုတ်အိုတ်ရ။

အာပတ် ဂမၠိုၚ်အိုတ်သီုဂှ် ယုတ်အိုတ်ရ၊ ၜိုန်ဂှ် သောတာပတ္တိသမာပတ်ဂှ် ပြဲရ။

ပွမတ္ၜေဟ်လက် မ္ဂးဂှ် ပွမတ္ၜေဟ်လက်မယုတ် ပွမတ္ၜေဟ်လက်မပြဲ ရဴဝွံ နွံၜါဂကူရ။

ပွမတ္ၜေဟ်လက်မယုတ် မ္ဂးဂှ် တၠအဲ ဒှ်အုဋ္ဌ်ရ၊ ဒှ်ဗ္ၜေအ်သဵုရ၊ ဒှ်ဂၠဴရ၊ ဒှ်ချးရ၊ ဒှ်သတ်တိရစ္ဆာန်ရ၊ ဒှ်သတ်နရက်ရ၊ လအာဂတိခိုဟ်ဆာဲ ဟွံမွဲကုတၠအဲရ၊ လအာဂတိဟွံခိုဟ်ဆာဲဟေၚ် တၠအဲ ထေက်ကဵုနွံပၟိက်ရ ရဴဝွံကီု (ပွမတ္ၜေဟ်လက်) နကဵုယအက္ခရ် ဘအက္ခရ်ကီု နကဵုနိမိတ်တြုံ နိမိတ်ဗြဴကီုရ၊ ဣဝွံတုန် ပွမတ္ၜေဟ်လက်မယုတ်ရောၚ်။

ပွမတ္ၜေဟ်လက်မပြဲ မ္ဂးဂှ် တၠအဲ ဒှ်ညးမၞုံကဵုဉာဏ်ပညာရ၊ ဒှ်ညးဍိုဟ်ကေက်စဳကၠးရ။ ဒှ်ညးမၞုံကဵုပညာကေက် သကာရ၊ ဒှ်ညးလမိၚ်လညာတ်ဂၠိုၚ်ရ၊ ဒှ်ပူဂိုလ်တွံဓရ်ရ၊ လအာဂတိဟွံခိုဟ်ဆာဲ ဟွံမွဲကုတၠအဲရ၊ လအာဂတိခိုဟ်ဆာဲဟေၚ် တၠအဲ ထေက်ကဵုနွံပၟိက်ရ (ပွမတ္ၜေဟ်လက်) ရဴဝွံရ၊ ဣဝွံတုန် ပွမတ္ၜေဟ်လက်မပြဲရောၚ်။