၅.၁.၂။ ဩမသဝါဒသိက္ခာပိုဒ်
12) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ကယျာန်ဓဝါတ် မွဲဟာန်ကေုာံ ခမဳမသ္ဍိုက်ဆာန်သၞေံသၞဴသဳလဂမၠိုၚ်အိုတ်မ္ဂး ထပက်လှိုဟ်ဗၞုဟ်ပါၚ် ခမဳမသ္ဍိုက်ဆာန်သၞေံသၞဴ သဳလဂမၠိုၚ်အိုတ်ရ၊ ဗွဲဂကူဇာတ်ကီု ဗွဲယၟုကီု ဗွဲတၞောဝ်ဒတောဝ်ကီု ဗွဲပွကမၠောန်ကေၚ်ကာကီု ဗွဲကွတ်ပညာကီု ဗွဲယဲဘဲကီု ဗွဲလွေဟ်ဗီုပြၚ်သဏ္ဌာန်ကီု ဗွဲကိလေသပွမကၠိခ္ဍက်ကီု ဗွဲအာပတ်ကီု ဗွဲမတ္ၜေဟ်လက်မယုတ်သဝ်ကီု တ္ၜေဟ်လက်အိုတ်ရ၊ ပျုတ်ဗ္ဒေက်အိုတ်ရ။
ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် ကယျာန်ဓဝါတ် မွဲဟာန်ကေုာံ ခမဳ မသ္ဍိုက်ဆာန်သၞေံသၞဴသဳလဂမၠိုၚ်အိုတ်မ္ဂး မုဟိုတ် ထပက်လှိုဟ်ဗၞုဟ်ပါၚ် ခမဳမသ္ဍိုက်ဆာန်သၞေံသၞဴ သဳလဂမၠိုၚ်အိုတ်ရော? ဗွဲဂကူဇာတ်ကီု ဗွဲယၟုကီု ဗွဲတၞောဝ်ဒတောဝ်ကီု ဗွဲပွကမၠောန်ကေၚ်ကာကီု ဗွဲကွတ်ပညာကီု ဗွဲယဲဘဲကီု ဗွဲလွေဟ်ဗီုပြၚ်သဏ္ဌာန်ကီု ဗွဲကိလေသ ပွမကၠိခ္ဍက်ကီု ဗွဲအာပတ်ကီု ဗွဲမတ္ၜေဟ်လက်မယုတ်သဝ်ကီု တ္ၜေဟ်လက်အိုတ်ရော? ပျုတ်ဗ္ဒေက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ်ဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ကယျာန်ဓဝါတ် မွဲဟာန်ကေုာံခမဳမသ္ဍိုက်ဆာန် သၞေံသၞဴသဳလဂမၠိုၚ်အိုတ်မ္ဂး ထပက်လှိုဟ်ဗၞုဟ်ပါၚ် ခမဳမသ္ဍိုက်ဆာန်သၞေံသၞဴသဳလဂမၠိုၚ်အိုတ်ရ၊ ဗွဲဂကူဇာတ်ကီု ။ ပ ။ ဗွဲမတ္ၜေဟ်လက်မယုတ်သဝ်ကီု တ္ၜေဟ်လက်အိုတ်ရ၊ ပျုတ်ဗ္ဒေက်အိုတ်ရ ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် ကယျာန်ဓဝါတ် မွဲဟာန်ကေုာံ ခမဳမသ္ဍိုက်ဆာန်သၞေံသၞဴသဳလ ဂမၠိုၚ်အိုတ်မ္ဂး မုဟိုတ်ထပက်လှိုဟ်ဗၞုဟ်ပါၚ် ခမဳမသ္ဍိုက်ဆာန်သၞေံသၞဴသဳလဂမၠိုၚ်အိုတ်ရော? ဗွဲဂကူဇာတ်ကီု ။ ပ ။ ဗွဲမတ္ၜေဟ်လက်မယုတ်သဝ်ကီု တ္ၜေဟ်လက်အိုတ်ရော? ပျုတ်ဗ္ဒေက်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။ 13) ယွံခမဳတအ် ကေၚ်ဒှ်ကၠုၚ်ကိုပ်ကၠာတေံတုန် ပ္ဍဲဍုၚ်တက္ကသိုလ် ကုဗဗၞးမွဲဂှ် ဂၠဴကြိုအ်မၞုံယၟုနန္ဒိ၀ိလာသ နွံမွဲရ၊ ပ္ဍဲအခိၚ်ဂှ် ဂၠဴကြိုအ်နန္ဒိဝိလာသဂှ် “ယွံဗဗၞး တၠအဲ ဩဝ်အာညိ၊ ဂၠဴကြိုအ်အဲဂှ် ကြက်ကဵုဂေတ်တဴ (ဓဇက်ဏာ) ကွဳကၠံ မဖ္ဍိုက်လဝ်လျိုၚ်ပေၚ်ပေၚ် မဒက်လဝ် ဗွဲဗ္စပ်မာန်ရ” ရဴဝွံ ဩဝ်သ္ပတဴ ပွမဝေၚ်လံၚ်ကသာပ်လ္ၚီ ကေုာံသေဌဳညိ ရဴဝွံ သ္ဂးကဵုဗဗၞးဂှ်ရ။
ယွံခမဳတအ် ပ္ဍဲအခိၚ်ဂှ် ဗဗၞးဂှ် ဂၠဴကြိုအ်အဲဂှ် ကြက်ကဵုဂေတ်တဴ (ဓဇက်ဏာ) ကွဳကၠံ မဖ္ဍိုက်လဝ်လျိုၚ်ပေၚ်ပေၚ် မဒက်လဝ်ဗွဲဗ္စပ်ဓဝ်မာန်ရ ရဴဝွံ သ္ပတဴ ပွမလံၚ်ဝေၚ်ကသာပ်လ္ၚီ ကေုာံသေဌဳရ။ ပ္ဍဲကြဴနူဂှ် ဗဗၞးဂှ် ဒက်ကၠေံကွဳကၠံ ဗွဲမဗိုန်ဗတ်တုဲ ဗ္ဂန်စုတ်ဂၠဴကြိုအ်နန္ဒိဝိလာသတုဲမ္ဂး “ယွံဂၠဴမတ္ၚံက်စၞာဲ ဩဝ်အာညိ၊ ယွံဂၠဴမတ္ၚံက်စၞာဲ ဩဝ်ရုန်ဂစာန်ညိ” ရဴဝွံ သ္ဂးရ။
ယွံခမဳတအ် ပ္ဍဲအခိၚ်ဂှ် ဂၠဴကြိုအ်နန္ဒိဝိလာသဂှ် ဒတူလိုၚ်ဒၟံၚ် ပ္ဍဲဒၞဲါဗ္ဂန်လဝ်ဂှ်ဟေၚ်ရ၊ ဗဗၞးဂှ်လေဝ် ဟိုတ်နူကျအာ ကသာပ်လ္ၚီဂှ်ရ ၚုၚ်ၚဇြဟောံဒၟံၚ်ရ။ ပ္ဍဲအခိၚ်ဂှ် ဂၠဴကြိုအ်နန္ဒိဝိလာသဂှ် “ယွံဗဗၞး မုဟိုတ် တၠအဲ ၚုၚ်ၚဇြဟောံဒၟံၚ်ရော?” ရဴဝွံ သ္ဂးကဵုဗဗၞးဂှ်ရ။ ယွံဂၠဴကြိုအ် တၠအဲ ဟိုတ်နူအဲကျအာ ကသာပ်လ္ၚီဂှ်ရ ၚုၚ်ၚဇြဟောံဒၟံၚ်ရ ရဴဝွံ သ္ဂးရ။ ယွံဗဗၞး အဲမဟွံတ္ၚံက်စၞာဲဂှ် မုဟိုတ် တၠအဲဟီုသ္ဂး တ္ၚံက်စၞာဲရော? ယွံဗဗၞး တၠအဲ ဩဝ်အာညိ၊ “ဂၠဴကြိုအ်အဲဂှ် ကြက်ကဵုဂေတ်တဴ (ဓဇက်ဏာ) ကွဳကၠံ မဖ္ဍိုက်လဝ်လျိုၚ်ပေၚ်ပေၚ် မဒက်လဝ်ဗွဲဗ္စပ်မာန်ရ” ရဴဝွံ ဩဝ်သ္ပတဴ ပွမဝေၚ်လံၚ်ကသာပ်ၜါလ္ၚီ ကေုာံသေဌဳညိ၊ “အဲမဟွံတ္ၚံက်စၞာဲဂှ်လေဝ် တ္ၚံက်စၞာဲရ” ရဴဝွံ လ္ပဟီုညိ ရဴဝွံ သ္ဂးရ။
ယွံခမဳတအ် ပ္ဍဲအခိၚ်ဂှ် ဗဗၞးဂှ် “ဂၠဴကြိုအ်အဲဂှ် ကြက်ကဵုဂေတ်တဴ (ဓဇက်ဏာ) ကွဳကၠံ မဖ္ဍိုက်လဝ်လျိုၚ်ပေၚ်ပေၚ် မဒက်လဝ်မွဲဗ္စပ်ဓဝ်မာန်ရ” ရဴဝွံ သ္ပတဴ ပွမဝေၚ်လံၚ်ကသာပ်ၜါလ္ၚီ ကေုာံသေဌဳရ။ ယွံခမဳတအ် ပ္ဍဲအခိၚ်ဂှ် ဗဗၞးဂှ် ဒက်ကၠေံကွဳကၠံ မဖ္ဍိုက်လဝ်လျိုၚ်ပေၚ်ပေၚ် ဗွဲမဗိုန်ဗတ်တုဲ ဗ္ဂန်စုတ်ဂၠဴကြိုအ်နန္ဒိဝိလာသတုဲမ္ဂး “ယွံဂၠဴမခိုဟ်ဆာဲ ဩဝ်အာညိ၊ ယွံဂၠဴမထၟိက် ဩဝ်ရုန်ဂစာန်ညိ” ရဴဝွံ သ္ဂးရ။ ယွံခမဳတအ် ပ္ဍဲအခိၚ်ဂှ် ဂၠဴကြိုအ်နန္ဒိဝိလာသဂှ် ကဵုဂေတ်တဴ (ဓဇက်ဏာ) ကွဳကၠံ မဖ္ဍိုက်လဝ်လျိုၚ်ပေၚ်ပေၚ် မဒက်လဝ်မွဲဗ္စပ်ဓဝ်ရ။ ဂလာန်မထေက်ကဵုသ္ဍိုက်မၠိုက်ဟေၚ် သ္ဒးဟီုသ္ဂးရ၊ ဂလာန်ဟွံထေက်ကဵု သ္ဍိုက်မၠိုက်ဂှ် လဆောဝ်လဆောဝ်လေဝ် (ဆလအ်လေဝ်) ဟွံထေက်ကဵုဟီုသ္ဂးရ၊ (ဂၠဴကြိုအ်နန္ဒိဝိလာသဂှ်) လျိုၚ် (ကွဳကၠံ) မဇြိုၚ် ဗဗၞးမဟီုသ္ဂး ထေက်ကဵုသ္ဍိုက်မၠိုက်ဂှ်လေဝ် ရၚ်တၠုၚ်ဓဇက်ဏာမာန်ရ၊ ဂြပ်ရတ်လေဝ် ကဵုဗဗၞးဂှ် ကလိဂွံတုဲရ၊ ဟိုတ်သာ်ဂှ်လေဝ် မိပ်စိုတ်အိုဟ်တၟိုဟ်ရ။
ယွံခမဳတအ် ပ္ဍဲအခိၚ်အဃောဒှ် တိရစ္ဆာန်ဂၠဴတေံဟေၚ် အဲကျာ် ဟွံသ္ဍိုက်မၠိုက်ကၠုၚ် ပွမတ္ၜေဟ်လက် ပွမပျုတ်ဗ္ဒေက်ရ၊ ပ္ဍဲအခိၚ်လၟုဟ်တုန် ပသာ်သ္ဂောံသ္ဍိုက်မၠိုက် ပွမတ္ၜေဟ်လက် ပွမပျုတ်ဗ္ဒေက်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။
ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
14) “ဟိုတ်နူပွမဟီုတ္ၜေဟ်လက် ညံၚ်ဂွံဂိသကေဝ် ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
