၅.၁.၁၀.၁။ ပွံက်ပထဝဳခဏသိက္ခာပိုဒ်

86) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ တိ မ္ဂးဂှ် တိစၟတ် တိပတောံ ရဴဝွံ မၞုံၜါဂကူအိုတ်ရ။ တိစၟတ် မ္ဂးဂှ် ခၞိက်တိသက်သက် တိကမၠေတ်သက်သက် တိမၞုံကဵုတၟံညိနာၚ် တိမၞုံကဵုကြေဟ်ညိနာၚ် တိမၞုံကဵုကဝေက်ညိနာၚ် တိမၞုံကဵုဝါန်ညိနာၚ် တိမၞုံကဵုဗ္တဳညိနာၚ် တိမၞုံကဵုခၞိက်တိဂမၠိုၚ် တိမၞုံကဵုတိကမၠေတ်မဂၠိုၚ်ရောၚ်၊ တိဟွံတူပၟတ်လေဝ် ဂပ်ဝ်ကော်ခဴဂးတိစၟတ်ရ။ ဗွဝ်ခၞိက်တိ ဗွဝ်တိမၠေတ် မဍေက်ဍာဲဗြဲမွဲဝါတုဲ မလောန်လတူပန်ဂိတုလေဝ် ဂပ်ဝ်ကော်ခဴဂးတိစၟတ်ရ။ တိပတောံ မ္ဂးဂှ် တၟံသက်သက် ကြေဟ်သက်သက် ကဝေက်သက်သက် ဝါန်သက်သက် ဗ္တဳသက်သက် တိမၞုံကဵုခၞိက်တိညိနာၚ် တိမၞုံကဵုတိကမၠေတ်ညိနာၚ် တိမၞုံကဵုတၟအ်မဂၠိုၚ် တိမၞုံကဵုကြေဟ်မဂၠိုၚ် တိမၞုံကဵုကဝေက်မဂၠိုၚ် တိမၞုံကဵုဝါန်မဂၠိုၚ် တိမၞုံကဵုဗ္တဳမဂၠိုၚ် တိမတူပၟတ်လေဝ်ဂပ်ဝ်ကော်ခဴဂးတိပတောံရ။ ဗွဝ်ခၞိက်တိ ဗွဝ်တိကမၠေတ် မဍေက်ဍာဲဗြဲမွဲဝါတုဲ မယုတ်ဒေက်သၟဝ်ပန်ဂိတုလေဝ် ဂပ်ဝ်ကော်ခဴဂးတိပတောံရ။ ခါဲ မ္ဂးဂှ် အလဵုဇကု ခါဲမ္ဂး၊ ဒးအာပတ်ပါဲစိုတ်ရ။ ဖအောဝ်ကဵုခါဲ မ္ဂးဂှ် ဖအောဝ်ကဵုညးသအာၚ် ခါဲမ္ဂး၊ ဒးအာပတ်ပါဲစိုတ်ရ။ သီုမဂပ်ဝ်ဖအောဝ်စကာဗၞတ်မွဲဝါဂှ် ခါဲတဴ ဗွဲမဂၠိုၚ်ကဵုဝါမ္ဂး ဒးအာပတ်ပါဲစိုတ်ရ။ 87) ပ္ဍဲတိဇၞော် မၞုံကဵုစၟတ်သမ္တီတိဇၞော်ဒှ်တုဲ ခါဲကီု ဖအောဝ်ကဵုခါဲကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ပါ်ဗကးကီု စံၚ်ဗဂဵုပၟတ်ကီု ဖအောဝ်ကဵုစံၚ်ဗဂဵုပၟတ်ကီု ဒးအာပတ်ပါဲစိုတ်ရ။ ပ္ဍဲတိဇၞော် မၞုံကဵုသၠေဟ်ပၟာဒှ်တုဲ ခါဲကီု ဖအောဝ်ကဵုခါဲကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ပါ်ဗကးကီု စံၚ်ဗဂဵုပၟတ်ကီု ဖအောဝ်ကဵုစံၚ်ဗဂဵုပၟတ်ကီု ဒးအာပတ်ဒုက္ကဋ်ရ။ ပ္ဍဲတိဇၞော် မၞုံကဵုစၟတ်သမ္တီတိဇၞော်ဟွံသေၚ်ဒှ်တုဲ ခါဲကီု ဖအောဝ်ကဵုခါဲကီု ပလီုပလာ်ပါ်ဗကးကီု ဖအောဝ်ကဵုပလီုပလာ်ပါ်ဗကးကီု စံၚ်ဗဂဵုပၟတ်ကီု ဖအောဝ်ကဵုစံၚ်ဗဂဵုပၟတ်ကီု ဟွံဒးအာပတ်ရ။ ပ္ဍဲတိဇၞော်ဟွံသေၚ်ဂှ် မၞုံကဵုစၟတ်သမ္တီတိဇၞော်မ္ဂး၊ ဒးအာပတ်ဒုက္ကဋ်ရ။ ပ္ဍဲတိဇၞော်ဟွံသေၚ်ဂှ် မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲတိဇၞော်ဟွံသေၚ်ဂှ် မၞုံကဵုစၟတ်သမ္တီတိဇၞော်ဟွံသေၚ်မ္ဂး ဟွံဒးအာပတ်ရ။ 88) “ဩဝ်တီဝတ် တိဝွံညိ၊ ဩဝ်ကဵုတိဝွံညိ၊ ဩဝ်ရၚ်တၠုၚ်နၚ် တိဝွံညိ၊ နွံပၟိက်နကဵုတိဝွံရ၊ ဩဝ်သ္ပ တိဝွံ ညံၚ်သ္ဂောံဂပ်ဝ်ညိ” ရဴဝွံ ဟီုသ္ဂးမ္ဂး၊ ဟွံဒးအာပတ်ရ။ သီုဟွံမွဲကဵုစေတနာ ခါဲဒးမ္ဂး၊ ဝိုတ်အာသတိတုဲ ခါဲဒးမ္ဂး ဟွံဒးအာပတ်ရ။ ကုခမဳဟွံတီ ခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ပထဝဳခဏသိက္ခာပိုဒ် ဒသမတုဲရ။ မုသာဝါဒဝဂ် ပဌမတုဲရ။