၅.၁.၁၀။ ပထဝဳခဏသိက္ခာပိုဒ်

84) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဲပြကာ သ္ပဒတဴတန်ဒၟံၚ် ပ္ဍဲအဂ္ဂါဠဝစေတဳ ဇရေၚ်ဍုၚ်အာဠဝဳဂှ် ခမဳကောန်ဍုၚ်အာဠဝဳဂမၠိုၚ် ကၠောန်သ္ပကေၚ်ကာတၟိအိုတ်မ္ဂး အလဵုဇကုလေဝ် ခါဲကတဵုတိအိုတ်ရ၊ ညးသအာၚ်ဂမၠိုၚ်လေဝ် ဖအောဝ်ကဵုခါဲကတဵုအိုတ်ရ။ မၞိဟ်ဂမၠိုၚ်ဂှ် “မုဟိုတ် ခမဳဂမၠိုၚ်မဒှ်တၞောဝ်ကျာ် ကောန်သၟိၚ်သာကျဝၚ် အလဵုဇကုလေဝ်ခါဲကတဵုတိဇၞောန်အိုတ်ရော? ညးအာၚ်ဂမၠိုၚ်လေဝ် ဖအောဝ်ကဵုခါဲကတဵုအိုတ်ရော? ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် ရာန်သကိုတ်တဴ လမျီုမၞုံကဵုဣန္ဒြဳမွဲအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်ဟီုဂရိုဟ်အိုတ်ရ၊ ပျုတ်ဗ္ဒေတ်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳကောန်ဍုၚ်အာဠဝဳဂမၠိုၚ် အလဵုဇကုလေဝ်ခါဲကတဵုတိဇၞောန်အိုတ်ရော? ညးအာၚ်ဂမၠိုၚ်လေဝ် ဖအောဝ်ကဵုခါဲကတဵုအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် အလဵုဇကုလေဝ်ခါဲကတဵုတိဇၞောန်အိုတ်ရ၊ ညးအာၚ်ဂမၠိုၚ်လေဝ် ဖအောဝ်ကဵုခါဲကတဵုအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် အလဵုဇကုလေဝ် ခါဲကတဵုတိဇၞော်အိုတ်ရော? ညးသအာၚ်ဂမၠိုၚ်လေဝ် ဖအောဝ်ကဵုခါဲကတဵုအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် မၞိဟ်ဂမၠိုၚ် ပ္ဍဲတိဇၞော်ဂှ် သမ္တီထေၚ်ကေတ် မၞုံကဵုလမျီုအိုတ်ရ၊ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 85) ယြဴခမဳမွဲ ခါဲလေဝ်ခါဲတိမ္ဂး၊ ဖအောဝ်လေဝ်ဖအောဝ်ကဵုခါဲမ္ဂး (ကုခမဳဂှ်) ဒးအာပတ်ပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။