၅.၁.၁။ မုသာဝါဒသိက္ခာပိုဒ်

ယွံတၠဇမၠိၚ်အာယုက်တအ် အာပတ်ပဲါစိုတ်ဂမၠိုၚ် ဒ္စိတ်စှော်ၜါဝွံ အာစိုပ်ဒဒှ် ဂပ်ဝ်စၞောန်ထ္ၜး ဗွဲသရုပ်အိုတ်ရ။

1) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဟတ္ထက ကောန်သၟိၚ်သာကျဝၚ် လေပ်ဟီုသ္ဂးကေတ်မာန်ရ။ ခမဳဟတ္ထကဂှ် အခိၚ်ဟီုသ္ဂးဂလာန် ကေုာံတဳဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရ၊ ဒုၚ်ဝန်တုဲမှ ပဲါကၠေံရ၊ ဟီုဂြောပ်ဗ္ဒန်ဟိုတ်မွဲသအာၚ် နဟိုတ်မွဲသအာၚ်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ချိၚ်ဖာပ်လဝ်တုဲမှ ကဵုဆောတ်ယောၚ်လီုအာရ။

တဳဂမၠိုၚ် “မုဟိုတ် ခမဳဟတ္ထက ကောန်သၟိၚ်သာကျဝၚ် အခိၚ်ဟီုသ္ဂးဂလာန် ကေုာံပိုဲညးဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရော? ဒုၚ်ဝန်တုဲမှ ပဲါကၠေံရော? ဟီုဂြောပ်ဗ္ဒန်ဟိုတ်မွဲသအာၚ် နဟိုတ်မွဲသအာၚ်ရော? ဟီုသ္ဂးဂလာန်ဟွံဍာံစၟတ် သီုကဵုမတီတဴရော? ချိၚ်ဖာပ်လဝ်တုဲမှ ကဵုဆောတ်ယောၚ်လီုအာရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။

ခမဳဂမၠိုၚ် သ္ဂောံမိၚ်ကေတ် ဂလာန်တဳဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ပြာပ်အာဇရေၚ်ခမဳဟတ္ထက ကောန်သၟိၚ်သာကျဝၚ်တုဲမ္ဂး “ယွံကောန်တၠဟတ္ထက တၠအဲ အခိၚ်ဟီုသ္ဂးဂလာန် ကေုာံတဳဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရ၊ ဒုၚ်ဝန်တုဲမှ ပဲါကၠေံရ၊ ဟီုဂြောပ်ဗ္ဒန် ဟိုတ်မွဲသအာၚ် နဟိုတ်မွဲသအာၚ်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ချိၚ်ဖာပ်လဝ်တုဲမှ ကဵုဆောတ်ယောၚ်လီုလာ်အာရ ဟီုဂှ် ဍာံပြဟာ” ရဴဝွံ သၟာန်သၟုက် ခမဳဟတ္ထက ကောန်သၟိၚ်သာကျဝၚ်အိုတ်ရ။ ယွံကောန်တၠတအ် နနဲလဵုဟွံဟီု ဂပ်ဝ်သ္ဒးဇၞးကေတ် တဳဂမၠိုၚ်အိုတ်ရ၊ ဟွံထေက်ကဵု ကဵုဇၞး ကုတဳဂမၠိုၚ်ဂှ်ရ ရဴဝွံ (သ္ဂးရ)။

ခမဳပၟိက်အောန်ဂမၠိုၚ်ဂှ် “မုဟိုတ် ခမဳဟတ္ထက ကောန်သၟိၚ်သာကျဝၚ် အခိၚ်ဟီုသ္ဂးဂလာန် ကေုာံတဳဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရော? ဒုၚ်ဝန်တုဲမှ ပဲါကၠေံရော? ဟီုဂြောပ်ဗ္ဒန်ဟိုတ်မွဲသအာၚ် နဟိုတ်မွဲသအာၚ်ရော? ဟီုသ္ဂးဂလာန်ဟွံဍာံစၟတ် သီုကဵုမတီတဴရော? ချိၚ်ဖာပ်လဝ်တုဲမှ ကဵုဆောတ်ယောၚ်လီုအာရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဟတ္ထက နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး —

“ယွံဟတ္ထက တၠအဲ အခိၚ်ဟီုသ္ဂးဂလာန် ကေုာံတဳဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရ၊ ဒုၚ်ဝန်တုဲမှ ပဲါကၠေံရ၊ ဟီုဂြောပ်ဗ္ဒန်ဟိုတ်မွဲသအာၚ် နဟိုတ်မွဲသအာၚ်ရ၊ ဟီုသ္ဂးဂလာန်ဟွံဍာံစၟတ် သီုကဵုမတီတဴရ၊ ချိၚ်ဖာပ်လဝ်တုဲမှ ကဵုဆောတ်ယောၚ်လီုလာ်အာရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဟတ္ထက ကောန်သၟိၚ်သာကျဝၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ အခိၚ်ဟီုသ္ဂးဂလာန် ကေုာံတဳဂမၠိုၚ်မွဲစွံဂှ် ပဲါကၠေံတုဲမှ ဒုၚ်ဝန်ရော? ဒုၚ်ဝန်တုဲမှ ပဲါကၠေံရော? ဟီုဂြောပ်ဗ္ဒန်ဟိုတ်မွဲသအာၚ် နဟိုတ်မွဲသအာၚ်ရော? ဟီုသ္ဂးဂလာန်ဟွံဍာံစၟတ် သီုကဵုမတီတဴရော? ချိၚ်ဖာပ်လဝ်တုဲမှ ကဵုဆောတ်ယောၚ်လီုအာရော? (ပွတၠအဲသ္ပဒး)ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ 2) “ဟိုတ်နူပွမဟီုဂလာန် မဆောတ်ယောၚ် သီုကဵုမတီတဴ ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။