၄.၃.၅.၁။ ပွံက်စဳဝရအစ္ဆိန္ဒနသိက္ခာပိုဒ်

636) ပ္ဍဲအခိၚ်တဳလမၞုံပိုဉ်ကျာ် မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်ဇိၚ်သ္ၚာ အာတ်တဴတောဝ် ဗွဲမဂၠိုၚ်အိုတ်ရ၊ ဇိၚ်သ္ၚာတုဲဟေၚ် တောဝ်ဗွဲမဂၠိုၚ် သှေ်သၞေဟ်ဒၟံၚ်ဏီရ၊ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ယွံကောန်တၠတအ် လၟုဟ် ပိုဲညးဂမၠိုၚ် တောဝ်မွဲသအာၚ်လေဝ် အာတ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ရ” ရဴဝွံ ကသပ်ဒှ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် တောဝ်မွဲသအာၚ်လေဝ် အာတ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ရ၊ ဇိၚ်သ္ၚာတုဲလေဝ် တောတ်ဗွဲမဂၠိုၚ် သှေ်သၟေဟ်ဒၟံၚ်ဏီရ၊ မရနုက်ကဵုၜါဝါလေဝ် ခမဳဆဗ္ဗဂ္ဂဳဂမၠိုၚ် တောဝ်မွဲသအာၚ်လေဝ် အာတ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ရ၊ ဇိၚ်သ္ၚာတုဲလေဝ် တောဝ်ဗွဲမဂၠိုၚ်သှေ်သၟေဟ်ဒၟံၚ်ပၠန်ရ၊ မရနုက်ကဵုပိၜါလေဝ် ခမဳဆဗ္ဗဂ္ဂဳဂမၠိုၚ် တောဝ်မွဲသအာၚ်လေဝ် အာတ်တုဲ ဖအောဝ်ကဵုသၟာယန်သေဝ် (သၟတ်တုတ်တုတ်) ဂမၠိုၚ် တုတ်သ္ၚာအိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် အလဵုဇကုအာတ်တောဝ်တုဲ ဖအောဝ်ကဵုသၟာန်ယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် အလဵုဇကု အာတ်တောဝ်တုဲ ဖအောဝ်ကဵုသၟာန်ယန်တေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် အလဵုဇကု အာတ်တောဝ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မုဟိုတ် မၞးတအ်ညးဂမၠိုၚ် အလဵုဇကု အာတ်တောဝ်တုဲ ဖအောဝ်ကဵုသၟာယန်သေဝ် (သၟာတုတ်တုတ်) ဂမၠိုၚ် တုတ်သ္ၚာအိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်အိုတ်ညိ။

637) ယြဴခမဳမွဲ အလဵုဇကု အာတ်တောဝ်တုဲ ဖအောဝ်ကဵုသၟာယန်တေဝ် (သၟာတုတ်တုတ်) ဂမၠိုၚ် တုတ်သ္ၚာမ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။