၄.၃.၃။ ဘေသဇ္ဇသိက္ခာပိုဒ်
618) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ပိလိန္ဒဝစ္ဆ မိက်ကၠောန်သ္ပလိုဏ်ဂိုဟ်တုဲ ကဵုသအးဇ္ၚး ၚးတးဒၟံၚ်ဗပါတ်ဒဵု ပ္ဍဲဍုၚ်ရာဇဂြိုဟ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဇရေၚ် တဳလပိုဉ် ပိလိန္ဒဝစ္ဆတုဲ လ္ၚောဝ်သ္ပဝတ်ဗွဲမရှေ်သှေ်ရဴဂဴတုဲမ္ဂး ဂဇအ်ဒၟံၚ် ပ္ဍဲဒၞါဲမွဲတုဲ— “ယွံတဳလပိုဉ် တဳလပိုဉ် ကဵုကၠောန်သ္ပဒၟံၚ် မုအရာမွဲဂှ်ရော?” ရဴဝွံ ဂရၚ်ပတီ တဳလပိုဉ်ပိလိန္ဒဝစ္ဆရ။ ယွံမရာဇ် မိက်ကၠောန်သ္ပလိုဏ်ဂိုဟ်တုဲ ကဵုသအးဇ္ၚး ၚးတးဒၟံၚ် ဗပါတ်ဒဵုရ ရဴဝွံ (သ္ဂးရ)။ ယွံတဳလပိုဉ် ကုတဳလပိုဉ်ဂှ် နွံပၟိက်ကဵုပၟၚ်အာရှာမ်ဟာ ရဴဝွံ (ဂရၚ်ပတီရ)။ ယွံမရာဇ် တဳလမၞုံပိုဉ်ကျာ်တြဲ ဟဂပ်ဝ်ကဵုအခေါၚ် ပၟၚ်အာရှာမ်ဏီရ ရဴဝွံ (သ္ဂးရ)။ ယဝ်ဒှ်သာ်ဂှ်မ္ဂး ဂရၚ်ပတီ သၟာန်တဳလမၞုံပိုဉ်ကျာ်တြဲတုဲ ဩဝ်ဟီုလဴ (ဟိုတ်) ဂှ် ကုအဲဍိက်ညိ ရဴဝွံ (ဂရၚ်ပတီရ)။ “ခိုဟ်သန်ရ ယွံမရာဇ်” ရဴဝွံ တဳလပိုဉ်ပိလိန္ဒဝစ္ဆ ကလေၚ်ပလန်ဂလာန် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။ ဗွဲကြဴနူဂှ် နကဵုဂလာန်ဓရ် တဳလပိုဉ်ပိလိန္ဒဝစ္ဆ ကဵုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ကဵုတီညာတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေတ်သကာ ကဵုမြဟ်မြာတုဲရ၊ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် နကဵုဂလာန်ဓရ် တဳလပိုဉ်ပိလိန္ဒဝစ္ဆ ဂပ်ဝ်ကဵုတီညာတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေတ်သကာတုဲ ကဵုမြဟ်မြာတုဲမ္ဂး လ္ၚောဝ်သ္ပဝတ် တဳလပိုဉ် ပိလိန္ဒဝစ္ဆတုဲ သ္ပရှေ်သှေ်ရဴဂဴကၠာ ပါဲစ္ဍးအာရ။
619) ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆဂှ် “ယွံကျာ်မၞုံပိုဉ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မိက်ကဵုဒါန်ပၟၚ်အာရှာမ်ရ၊ ယွံကျာ်မၞုံပိုဉ် အဲဍိက် ပသာ်သ္ဂောံဒ္ဂေတ်သ္ပဂှ်ရော?” ရဴဝွံ ဗလးဏာကလုတ် ကဵုဂရၚ်ပတီ တဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ကဵုအခေါၚ်ပၟၚ် အာရှာမ်ရ” ရဴဝွံ သ္ဂးကဵုခမဳဂမၠိုၚ်ရ။ မရနုက်ကဵုၜါဝါလေဝ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဇရေၚ် တဳလပိုဉ်ပိလိန္ဒဝစ္ဆတုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ် ပ္ဍဲဒၞါဲမွဲတုဲ−”ယွံတဳလပိုဉ် တဳလမၞုံပိုဉ်ကျာ်တြဲ ဂပ်ဝ်ကဵုအခေါၚ် ပၟအာရှာမ်တုဲရဟာ” ရဴဝွံ (ဂရၚ်ပတီရ)။ ယွံမရာဇ် ဂပ်ဝ်ကဵုအခေါၚ်တုဲရ ရဴဝွံ (သ္ဂးရ)။ ယဝ်ဒှ်သာ်ဂှ်မ္ဂး ကဵုဒါန်ပၟၚ်အာရှာမ် ကုတဳလပိုဉ်ရ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိသ တၠညးမဂဓရး ဒုၚ်ဝန်ကဵုဒါန် ပၟၚ်အာရှာမ် တဳလပိုဉ်ပိလိန္ဒဝစ္ဆတုဲ ပ္ဍဲကြဴ ဝိုတ်ဝုဲအာသတိဒှ်တုဲ လအ်လမှဂွံတိုန်သတိတုဲ− “ယွံသကအ် ယြဴပၟၚ်အာရှာမ် အဲ ဂပ်ဝ်ဒုၚ်လဝ်ဝန် သွက်တဳလပိုဉ်တုဲရ၊ ပၟၚ်အာရှာမ်ဂှ် ဂပ်ဝ်ကဵုဒါန်တုဲရဟာ” ရဴဝွံ သၟာန်အမာတ်ဇၞော် မရၚ်တၠုၚ် ကမၠောန်ကေၚ်ကာအိုတ်သီုမွဲရ။ ယွံမရာဇ် ဟဂပ်ဝ်ကဵုဒါန် ကုတဳလပိုဉ်ဏီရ ရဴဝွံ (ဂရၚ်ပတီရ)။ ယွံသကအ် နူတ္ၚဲဝွံ (ကလေၚ်ရိုဟ်မ္ဂး) တ္ၚဲမဒုၚ်လဝ်ဝန်ဂှ် လအ်အာဗၞတ်လလအ်လဵုဂှ်ရော? ရဴဝွံ (သၟာန်တုန်ဂှ်)— ပ္ဍဲအခိၚ်ဂှ် အမာတ်ဇၞော်ဂှ် ရိုဟ်လၟိဟ်ဗ္တမ်ဂမၠိုၚ်တုဲ “ယွံသၟိၚ်မပြဲ ဂွံအာမသုန်ကၠံတ္ၚဲတုဲရ” ရဴဝွံ ဂရၚ်ပတီ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။ ယွံသကအ် ယဝ်ဒှ်သာ်ဂှ်မ္ဂး ဩဝ်ကဵုဒါန် ပၟၚ်အာရှာမ်ဂမၠိုၚ်မသုန်ကၠံ ကုတဳလပိုဉ်ညိ ရဴဝွံ (ကဵုအသမ်ရ)။ “ခိုဟ်သန်ရ ယွံသၟိၚ်မပြဲ” ရဴဝွံ အမာတ်ဇၞော်ဂှ် ဒုၚ်ဝန် ကုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲ ကဵုဒါန်ပၟၚ်အာရှာမ်ဂမၠိုၚ်မသုန်ကၠံ ကုတဳလပိုဉ်ပိလိန္ဒဝစ္ဆရ၊ တန်ဒှ်အာကွာန်တၞဟ်ခြာမွဲရ၊ ကွာန်ဂှ် ကွာန်ပၟၚ်အာရှာမ်သၟတ်ရဴဝွံကီု ကွာန်ပိလိန္ဒသၟတ် ရဴဝွံကို ကော်ခဴအိုတ်ရ။
620) ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ ဒှ်ခမဳ ပြာပ်စဴသ္ၚိပ္ဍဲကွာန်သၟတ်ဂှ်ရ၊ ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာတုဲ တၞဟ်နသွက်ပိဏ္ဍပါတ် လုပ်အာကွာန်ပိလိန္ဒသၟတ်ရ၊ ပ္ဍဲအခိၚ်ဂှ် ပ္ဍဲကွာန်ဂှ် ပေါဲသဘၚ်ဒှ်ဒၟံၚ်ရ၊ သၟတ်ဗြဴဂမၠိုၚ် ကျိုၚ်ကျဝ်ဖျေအ်ဖျောန် ဝက်စရှ်ပကဴသဴဂမၠိုၚ်တုဲ ဝေၚ်ဂြိုၚ်ကတိုၚ်ကမှ်အိုတ်ရ၊ ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ အတိုၚ်လၟေၚ်လၟေၚ် ဂေတ်ဂ္ၚေၚ်တၞဟ်နသွက်ပိဏ္ဍပါတ် ပ္ဍဲကွာန်ပိလိန္ဒသၟတ်မ္ဂး ပြာပ်စိုပ်အာ သ္ၚိပၟၚ်အာရှာမ်မွဲတၠတုဲ ဂဇအ်ဒၟံၚ် ပ္ဍဲဒၞါဲမဂပ်ဝ် လးပညပ်လဝ်ရ။ ပ္ဍဲအခိၚ်ဂှ် ကောန်ဝုတ် ဗြဴပၟၚ်အာရှာမ်ဂှ် ညာတ်သၟတ်ဗြဴသအာၚ်ဂမၠိုၚ် မကျိုၚ်ကျဝ်ဖျေအ်ဖျောန် ဝက်စရှ်လဝ်ပကဴသဴတုဲ “ဩဝ်ကဵုပကဴ ကုအဲအိုတ်ညိ၊ ဩဝ်ကဵုကယျိုၚ်ကယျဝ် ကုအဲအိုတ်ညိ” ရဴဝွံ (သ္ဂးတုဲ) လရိုအ်ယာံဒၟံၚ်ရ၊ ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆဂှ်− “သၟတ်ကောန်ၚာ်ဗြဴဝွံ မုဟိုတ် လရိုအ်ယာံဒၟံၚ်ဂှ်ရော?” ရဴဝွံ သၟာန်ဗြဴပၟၚ်အာရှာမ်ဂှ်ရ။ ယွံတဳလပိုဉ် သၟတ်ကောန်ၚာ်ဗြဴဝွံ ညာတ်သၟတ်ဗြဴသအာၚ်ဂမၠိုၚ် မကျိုၚ်ကျဝ်ဖျေအ်ဖျောန် ဝက်စရှ်လဝ်ပကဴသဴတုဲ “ဩဝ်ကဵုပကဴ ကုအဲအိုတ်ညိ၊ သြဝ်ကဵုကယျိုၚ်ကယျဝ် ကုအဲအိုတ်ညိ” ရဴဝွံ (သ္ဂးတုဲ) လရိုအ်ယာံဒၟံၚ်ရ၊ ကုပိုဲဍိက်တအ်ညးဂမၠိုၚ် တၠဒဒိုဒ်ဂှ် သာလဵု ပကဴဂွံနွံဂှ်ရော? သာ်လဵု ကယျိုၚ်ကယျဝ်ဂွံနွံရော? ရဴဝွံ ဂရၚ်ပတီရ။ ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ ဂိုၚ်ကေတ်ကဝး (ဂွေန်) ချောဲမွဲတုဲ “ကဝး (ဂွေန်) ချောဲဝွံ ဩဝ်သၠိုက်စုၚ် ပ္ဍဲက္ဍိုပ်သၟတ်ကောန်ၚာ်ဗြဴဂှ်ညိ” ရဴဝွံ သ္ဂးကဵုဗြဴပၟၚ်အာရှာမ်ဂှ်ရ။ ပ္ဍဲအခိၚ်ဂှ် ဗြဴပၟၚ်အာရှာမ်ဂှ် သၠိုက်စုတ် ကဝး (ဂွေန်) ချောဲ ပ္ဍဲက္ဍိုပ်သၟတ်ကောန်ၚာ်ဗြဴဂှ်ရ၊ ကဝးချောဂှ် ဒှ်အာကဝးပကဴထဝ် မကျေဝ်ဂေါဝ်လောန် မထေက်ကဵုဗဵုလ္ၚောဝ် မကဵုစိုတ်ဇြုၚ်ကေဝ်မာန်ရ၊ ကဝးပကဴထဝ်သာ်ဂှ် ပ္ဍဲအပ္ဍဲနန်သၟိၚ်လေဝ် ဟွံမွဲရ။ မၞိဟ်ဂမၠိုၚ် “ယွံသၟိၚ်မပြဲ ပ္ဍဲသ္ၚိပၟၚ်အာရှာမ်မၞုံယၟုဝွံ ကဝးပကဴထဝ် မကျေဝ်ဂေါဝ်လောန် မထေက်ကဵုဗဵုလ္ၚောဝ် မကဵုစိုတ်ဇြုၚ်ကေဝ်မာန် (နွံဒၟံၚ်ရ)၊ ကဝးပကဴထဝ်သာ်ဂှ် ပ္ဍဲအပ္ဍဲနန်သၟိၚ်မပြဲလေဝ် ဟွံမွဲရ၊ ကုညးတၠဒဒိုက်ဂှ် နူလဵု (ဂွံကလိဂွံမာန်ဂှ်ရော?)၊ ဗွဲမုချ ကြက်ကၠတ်နၚ်ဒှ်ရ” ရဴဝွံ ဂရၚ်ပတီ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးအိုတ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ကဵုအာကၠေၚ်ဒက် ဂကူပၟၚ်အာရှာမ်ဂှ်ရ၊ မရနုက်ကဵုၜါဝါလေဝ် တဳလပိုဉ်ပိလိန္ဒဝစ္ဆ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာတုဲ တၞဟ်နသွက်ပိဏ္ဍပါတ် လုပ်အာကွာန်ပိလိန္ဒသၟတ်ရ၊ တဳလပိုဉ်ပိလိန္ဒဝစ္ဆ အတိုၚ်လၟေၚ်လၟေၚ် ဂေတ်ဂ္ၚေၚ်တၞဟ်နသွက်ပိဏ္ဍပါတ် ပ္ဍဲကွာန်ပိလိန္ဒသၟတ်မ္ဂး ပြာပ်စိုပ်အာ ဇရေၚ်သ္ၚိပၟၚ်အာရှာမ်ဂှ်တုဲ− “ဂကူပၟၚ်အာရှာမ်ဝွံ မုဌာန်မွဲ အာတဴဂှ်ရော?” ရဴဝွံ သၟာန်သ္ၚိဇရေၚ်ဂမၠိုၚ်ရ။ ယွံတဳလပိုဉ် ဟိုတ်နူဟိုတ်ကဝးပကဴထဝ်ဂှ် သၟိၚ်ဨကရာဇ် ဂပ်ဝ်ကဵုကၠေၚ်ဒက်ဏာရ ရဴဝွံ (ဂရၚ်ပတီအိုတ်ရ)။
621) ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ ပြာပ်အာသ္ၚိနန်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲ ဂဇအ်ဒၟံၚ် ပ္ဍဲဒၞါဲမဂပ်ဝ်လးပညပ်လဝ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဇရေၚ် တဳလပိုဉ်ပိလိန္ဒဝစ္ဆတုဲ လ္ၚောဝ်သ္ပဝတ် တဳလပိုဉ်ပိလိန္ဒဝစ္ဆတုဲမ္ဂး ဂဇအ်ဒၟံၚ် ပ္ဍဲဒၞါဲမွဲရ၊ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး မဂဇအ်ဒၟံၚ်ပ္ဍဲဒၞါဲမွဲတုဲ− “ယွံမရာဇ် မုဟိုတ် ဂပ်ဝ်ကဵုကၠေၚ်ဒက် ဂကူပၟၚ်အာရှာမ်ဂှ်ရော?” ရဴဝွံ တဳလပိုဉ်ပိလိန္ဒဝစ္ဆ သၟာန်တိုန်ရ။ ယွံတဳလပိုဉ် ပ္ဍဲသ္ၚိပၟၚ်အာရှာမ်ဂှ် ကဝးပကဴထဝ် မကျေဝ်ဂေါဝ်လောန် မထေက်ကဵုဗဵုသ္ၚေဝ် မကဵုစိုတ်ဇြုၚ်ကေဝ်မာန် နွံဒၟံၚ်ရ၊ ကဝးပကဴထဝ်သာ်ဂှ် ပ္ဍဲအပ္ဍဲနန် ပိုဲဍိက်တအ်လေဝ် ဟွံမွဲရ၊ ကုညးတၠဒဒိုက်ဂှ် နူလဵု (ဂွံကလိဂွံမာန်ဂှ်ရော?)၊ ဗွဲမုချ ကြက်ကၠတ်နၚ်ဒှ်ရ” ရဴဝွံ ဂရၚ်ပတီရ။ ပ္ဍဲအခိၚ်ဂှ် တဳလပိုဉ်ပိလိန္ဒဝစ္ဆ သ္ပအဓိဋ္ဌာန် ရဴဝွံမ္ဂး ပြာသာဒ်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ဩဝ်ကဵုဒှ်ထဝ်ညိရ၊ ပြာသာဒ်ဂှ် ဒှ်အာပြာသာဒ် မတုဲတဴနကဵုထဝ်အိုတ်သီုရ။ ယွံမရာဇ် ထဝ်မဂၠိုၚ်ဂၠၚ်လောန်ဝွံ တၠအဲ ကလိဂွံနူလဵုဂှ်ရော? ရဴဝွံ (သၟာန်) ရ။ တီကၠးရ၊ ယွံတဳလပိုဉ် ကြဳဇှ်အာနုဘဴတဳလပိုဉ်ရ ရဴဝွံ (သ္ဂးတုဲ) ကဵုသှ်ဗလးဂကူပၟၚ်အာရှာမ်ဂှ်ရ။ မၞိဟ်ဂမၠိုၚ် ပ္ဍဲပရိသာတ်မဒှ်မွဲဟာန်ကေုာံသၟိၚ် တဳလပိုဉ်ပိလိန္ဒဝစ္ဆ ထ္ၜးတဴဣဒ္ဓိပါဋိဟာ မဒှ်ဓရ်ၛာန်မဂ်ဖိုလ် မပြဲလောန်လတူဓရ် ကုသလကမ္မပထစှ် မဒှ်ဂြပ်မၞိဟ်ဂမၠိုၚ်ရဂး ရဴဝွံ သ္ဍိုက်မၠိုက်မိပ်စိုတ်အိုဟ်တၟိုဟ်အိုတ်တုဲ လျုၚ်ဇြုၚ်သ္ဍိုက်လောန်အိုတ်တုဲ ကဵုဒါန်ဂဥုဲဂမၠိုၚ်မသုန်သာ် ကုတဳလပိုဉ်လပိလိန္ဒဝစ္ဆအိုတ်ရ။ ဂဥုဲမသုန်သာ်မ္ဂးဂှ် ညးဍေံဂှ်ရော? ကၠေၚ်သွဟ် ကၠေၚ်တၟိ ကၠေၚ် ဍာ်သာဲ တၚ်လာဲဂမၠိုၚ်ရ။ ဗွဲပကတိလေဝ် တဳလပိုဉ်ပိလိန္ဒဝစ္ဆ မၞုံအလေံကလိဂွံ ဂဥုဲဂမၠိုၚ်မသုန်သာ်ရ၊ ရိုဟ်မကလိဂွံ ရိုဟ်မကလိဂွံဂှ် သၠးထောံ ကုပရိသာတ်ရ။ မၞိဟ်ဂမၠိုၚ် မဂေတ်ဂၞေၚ် ဒေသစာရိတ် လၟေၚ်ဘာဂှ် ညာတ်ဒးအိုတ်တုဲ “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံ သၟဟ်ညံၚ်ရဴသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးကီု မၞုံကဵုဟၚ်ဇရာံ အပ္ဍဲအိုတ်” ရဴဝွဴ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် သ္ဂောံပတိတ်ဇြဟတ် တၞဟ်နပစ္စယ်ဂၠိုၚ် ရဴဝွံအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ပတိတ်ဇြဟတ် တၞဟ်နပစ္စယ်ဂၠိုၚ် ရဴဝွံအိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ပတိတ်ဇြဟတ် တၞဟ်နပစ္စယ်ဂၠိုၚ်ရဴဝွံအိုတ်ဂှ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်အိုတ်ညိ။
622) ယြဴဂဥုဲဂမၠိုၚ် မဒှ်စၞကၠောန်စမွဲ ကတဵုဒှ်ကၠုၚ် ကုခမဳမဂိယဲဂမၠိုၚ်အိုတ်ရ၊ ဂဥုဲဂမၠိုၚ်ဂှ် ညးဍေံအိုတ်ဂှ်ရော? ကၠေၚ်သွဟ်၊ ကၠေၚ်တၟိ၊ ကၠေၚ်၊ ဍာ်သာဲ တၚ်လာဲ ဂမၠိုၚ်ရောၚ်။ ဒုၚ်ဗဂိုန်လဝ်ဂဥုဲဂမၠိုၚ်တုဲ လုကဴကာလအပိုၚ်အခြာထပှ်တ္ၚဲ သ္ပဟိုတ်ပွမတိုပ်ဒေပ်လဝ်တုဲ သ္ဒးသ္ပပြဘိုဂ်ရ။ ကုခမဳ မကဵုကလိလောန်အာ ထပှ်တ္ၚဲဂှ် ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
