၄.၃.၂။ ဥုနပဥ္စစဗန္ဓနသိက္ခာပိုဒ်
609) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဥ်တြဴပြကာ သ္ပဒတဴတန်ဒၟံၚ် ပ္ဍဲဘာနိဂြောဓာရာမ် ဇရေၚ်ဍုၚ်ကပ္ပိလဝှ် သက္ကရးဂှ် သၟာလၟာန်နုၚ်မွဲဂှ် “ကုတဳလပိုဉ်ဂမၠိုၚ် မၞုံပၟိက်ကဵုဗဗေၚ်ဂှ် အဲဍိက် (ဘိက်နိမန်) နကဵုဗဗေၚ်ရ” ရဴဝွံ ဘိက်နိမန်ခမဳဂမၠိုၚ်ရ၊ ပ္ဍဲအခိၚ်ဂှ် ခမဳဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် အာတ်တဴ ဗဗေၚ်ဂမၠိုၚ် ဗွဲမဂၠိုၚ်အိုတ်ရ၊ ခမဳမၞုံကဵုဗဗေၚ် မဍောတ်ဂမၠိုၚ် အာတ်တဴ ဗဗေၚ်မဇၞော်ဂမၠိုၚ်အိုတ်ရ၊ ခမဳမၞုံကဵုဗဗေၚ်မဇၞော်ဂမၠိုၚ် အာတ်တဴဗဗေၚ်မဍောတ်ဂမၠိုၚ်အိုတ်ရ။ ပ္ဍဲအခိၚ်ဂှ် သၟာလၟာန်နုၚ်ဂှ် သွက်ခမဳဂမၠိုၚ်ဂှ် သ္ဒးကၠောန်ခၞံကဵုဗဗေၚ်ဂမၠိုၚ် ဗွဲမဂၠိုၚ်ဒှ်တုဲ တၞဟ်နကၠောန်ခၞံ ကပေါတ်နုၚ်ထၟာဲခရော်ပ္ၚာန် ဆေၚ်စပ်ကဵုသွံရာန်သအာၚ်ဂှ် ဟွံသၟဟ်ရထရ၊ အလဵုဇကုလေဝ် ဟွံယိုပ်ယာပ်ရ၊ ကောန်သမ္ဘာညးဂှ်ဂမၠိုၚ်လေဝ် ဍောၚ်ၜိုတ်အိုတ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ်အာတ်တဴ ဗဗေၚ်ဂမၠိုၚ် ဗွဲမဂၠိုၚ်အိုတ်ဂှ်ရော? သၟာသၟာန်နုၚ်ဝွံ သွက်ခမဳဂမၠိုၚ်ဝွံ သ္ဒးကၠောန်ခၞံကဵုဗဗေၚ်ဂမၠိုၚ် ဗွဲမဂၠိုၚ်ဒှ်တုဲ တၞဟ်နကၠောန်ခၞံ ကပေါတ်နုၚ်ထၟာဲခရော်ပ္ၚာန် ဆေၚ်စပ်ကဵုသွံရာန်သအာၚ်ဂှ် ဟွံသၟဟ်ထရရ၊ အလဵုဇကုလေဝ် ဟွံယိုပ်ယာပ်ရ၊ ကောန်သမ္ဘာညးဂှ်ဂမၠိုၚ်လေဝ် ဍောၚ်ၜိုတ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ် သ္ဂောံအာတ်တဴဗဗေၚ်ဂမၠိုၚ် ဗွဲမဂၠိုၚ်အိုတ်ဂှ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သီုဟွံတီဗၞတ်ဗ္ၜတ်အိုတ်ဂှ် အာတ်တဴဗဗေၚ်ဂမၠိုၚ် ဗွဲမဂၠိုၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် သီုဟွံတီဗၞတ်ဗ္ၜတ်အိုတ်ဂှ် အာတ်တဴဗဗေၚ်ဂမၠိုၚ် ဗွဲမဂၠိုၚ်အိုတ်ဂှ်ရော? ယွံခမဳတအ် (ပွမၞးတအ်ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲပ္ဍဲကြဴ ဟီုတွံဂလာန်ဓရ်တုဲ “ယွံခမဳတအ် ဟဂပ်ဝ်အာတ်ဗဗေၚ်ရ၊ ကုခမဳမအာတ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
610) ပ္ဍဲအခိၚ်ဂှ် ဗဗေၚ်ခမဳမွဲဇကုဂှ် ဒကးအာရ၊ ခမဳဂှ် တဳလမၞုံပိုဉ်ကျာ်တြဲ ပါဲကၠေံပွမအာတ်ဗဗေၚ်ရ ရဴဝွံ ဒှ် ‘သံသယကုက္ကုစ္စ’ ပွမချပ်သၠေဟ်ပၟာတုဲ ဟွံအာတ်ရ၊ ဂေတ်ဂ္ၚေၚ်တၞဟ်နပိဏ္ဍပါတ် နကဵုတဲဂမၠိုၚ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ် ညံၚ်ရဴတဳဂမၠိုၚ်ကီု ဂေတ်ဂ္ၚေၚ်တၞဟ်နပိဏ္ဍပါတ် နကဵုတဲဂမၠိုၚ်အိုတ်ဂှ်ရော?’’ ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ကုခမဳ မၞုံကဵုဗဗေၚ်ကၠေံလေၚ်အာကီု ကုခမဳမၞုံကဵုဗဗေၚ်ဒကးအာကီု တၞဟ်နအာတ်ဗဗေၚ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
611) ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ကုခမဳ မၞုံကဵုဗဗေၚ်ကၠေံလေၚ်အာကီု ကုခမဳမၞုံကဵုဗဗေၚ် ဒကးအာကီု တၞဟ်နအာတ်ဗဗေၚ်ဂှ်” တဳလမၞုံပိုဉ်ကျာ်တြဲ ကဵုအခေါၚ်ရ ရဴဝွံ နမဒကးအာဗၞတ်ညိနာၚ်ကီု နမကရောန်အာဗၞတ်ညိနာၚ်ကီု နမအယာံမာတ်မခရက်ဒးကီု အာတ်တဴဗဗေေၚ်ဂမၠိုၚ် ဗွဲမဂၠိုၚ်အိုတ်ရ။ ပ္ဍဲအခိၚ်ဂှ် သၟာသၟာန်နုၚ်ဂှ် သွက်ခမဳဂမၠိုၚ်ဂှ် တုပ်သၟဟ်ကိုပ်ကၠာဟေၚ် သ္ဒးကၠောန်ခၞံကဵုဗဗေၚ်ဂမၠိုၚ် ဗွဲမဂၠိုၚ်ဒှ်တုဲ တၞဟ်နကၠောန်ခၞံ ကပေါတ်နုက်ထၟာဲခရော်ပ္ၚာန် ဆေၚ်စပ်ကဵုသွံရာန်သအာၚ်ဂှ် ဟွံသၟဟ်ရထရ၊ အလဵုဇကုလေဝ် ဟွံယိုပ်ယာပ်ရ၊ ကောန်သမ္ဘာညးဂှ်ဂမၠိုၚ်လေဝ် ဍောၚ်ၜိုတ်အိုတ်ရ။ မၞိဟ်ဂမၠိုၚ် တုဟ်သၟဟ်ကိုပ်ကၠာဟေၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ် သီုဟွံတီဗၞတ်ဗ္ၜတ်အိုတ်ဂှ် မုဟိုတ် အာတ်တဴဗဗေၚ်ဂမၠိုၚ် ဗွဲမဂၠိုၚ်အိုတ်ဂှ်ရော? သၟာသၟာန်နုၚ်ဝွံ သွက်ခမဳဂမၠိုၚ်ဝွံ သ္ဒးကၠောန်ခၞံကဵုဗဗေၚ်ဂမၠိုၚ် ဗွဲမဂၠိုၚ်ဒှ်တုဲ တၞဟ်နကၠောန်ခၞံကပေါတ်နုၚ်ထၟာဲ ခရော်ပ္ၚာန် ဆေၚ်စပ်ကဵုသွံရာန်သအာၚ်ဂှ် ဟွံသၟဟ်ရထရ၊ အလဵုဇကလေဝ် ဟွံယိုပ်ယာပ်ရ၊ ကောန်သမ္ဘာညးဂှ်ဂမၠိုၚ်လေဝ် ဍောၚ်ၜိုတ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် နမဒကးအာဗၞတ်ညိနာၚ်ကီု နမကရောန်အာဗၞတ်ညိနာၚ်ကဋ္ဌီု နမအယာံမာတ်မခရက်ဒးကီု မုဟိုတ် သ္ဂောံအာတ်တဴ ဗဗေၚ်ဂမၠိုၚ် ဗွဲမဂၠိုၚ်အိုတ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာတွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် နမဒကးအာဗၞတ်ညိနာၚ်ကီု မမကရောန်အာဗၞတ်ညိနာၚ်ကီု နမအယာံမာတ် မခရက်ဒးကီု အာတ်တဴဗဗေၚ်ဂမပိုၚ် ဗွဲမဂၠိုၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတံညးဂမၠိုၚ်ဂှ် နမဒကးအာဗၞတ်ညိနာၚ်ကီု နမကရောန်အာဗၞတ်ညိနာၚ်ကီု နမအာယာံမာတ်မခရက်ဒးကီု မုဟိုတ် အာတ်တဴဗဗေၚ်ဂမၠိုၚ် ဗွဲမဂၠိုၚ်အိုတ်ဂှ်ရော? ယွံတြုံမလ္ၚသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
612) ယြဴခမဳမွဲ သီုမၞုံကဵုဗဗေၚ် မသုန်ဒွက်မယုက်ဒေက်ဂှ် အာတ်ဗဗေၚ်တၟိ မွဲသအာၚ်မ္ဂး၊ ဒးအာပတ် နိဿဂ္ဂိပါဲစိုတ်ရ၊ ခမဳဂှ်သ္ဒးသၠးကၠေံ ဗဗေၚ်ဂှ် ပ္ဍဲပရိသာတ်ခမဳရ၊ ပ္ဍဲပရိသာတ်ခမဳဂှ် ဗဗေၚ်ဒှ်လအိတ်အိုတ်ဂှ် ‘ယွံခမဳ ဗဗေၚ်ဝွံ စဵုကဵုဒကးအာတၠအဲ သ္ဒးပကၚ်ရၚ်ရ’ ရဴဝွံ သ္ဂးတုဲ သ္ဒးကဵုကုခမဳဂှ်ရ၊ ဣဝွံတုန် ဒ္ဂေတ်ဝတ် ပ္ဍဲအရာအာတ်ဗဗေၚ်ဂှ်ရောၚ် ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
