၄.၂.၃။ ဒွေဘာဂသိက္ခာပိုဒ်

552) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ ပွမဖအောဝ်ကဵုခၞံ သၞာသောန်တသော်သဵု မဒှ်သာ်ဒမျိုၚ်သက်သက်ရ” ရဴဝွံ ခမဳဆဗ္ဗဂ္ဂဳဂမၠိုၚ်ဂှ် ပ္ဍဲလအိတ်တၞုၚ်တေံ စုတ်ကၠေံတသော်သဵုသာ်ဗု မဒှ်ဗၞတ်ညိနာၚ်ဟေၚ်တုဲ အတိုၚ်သာ်ဒမျိုၚ်သာ်ဂှ်ဟေၚ် ကဵုခၞံသၞာသောန်တသော်သဵုအိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပ္ဍဲလအိတ်တၞုၚ်တေံ စုတ်ကၠေံတသော်သဵုသာ်ဗု မဒှ်ဗၞတ်ညိနာၚ်ဟေၚ်တုဲ အတိုၚ်သော်ဒမျိုၚ်သာ်ဂှ်ဟေၚ် သကဵုခၞံသၞာသောန် တသော်သဵုအိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်ရတုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞဂတအ်ညးဂမၠိုၚ် ပ္ဍဲလအိတ်တၞုၚ်တေံ စုတ်ကၠေံတသော်သဵုသာ်ဗု မဒှ်ဗၞတ်ညိနာၚ်ဟေၚ်တုဲ အတိုၚ်သာ်ဒမျိုၚ်သာ်ဂှ်ဟေၚ် သကဵုခၞံသၞာသောန် တသော်သဵုအိုတ်ရဟီုဂှ် ဍာံပြဟာ” ရဴဝွံစၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) တဳလပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်)တအ် မုဟိုတ် မၞးတအ်ညးဂမၠိုၚ် ပ္ဍဲလအိတ်တၞုၚ်တေံ စုတ်ကၠေံတသော်သဵုသာ်ဗု မဒှ်ဗၞတ်ညိနာၚ်ဟေၚ်တုဲ အတိုၚ်သာ်ဒမျိုၚ်သာ်ဂှ်ဟေၚ် သကဵုခၞံသၞာသောန် တသော်သဵုအိုတ်ဂှ်ရော? ယွံတြုံမလ္ၚုသၟး(နူမဂ်ဖိုလ်)တအ် (ပွမၞးတပ်ညးဂမၠိုၚ်သ္ပဒး)ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်အိုတ်ညိ။

553) ခမဳ မမိက်ကဵုခၞံ သၞာသောန်တၟိဂှ် သ္ဒးစုတ် တသော်သဵုဂမၠိုၚ် မဒှ်သာ်ဒမျိုၚ်သက်သက် ၜါသွက်ဂမၠိုၚ်ရ၊ သ္ဒးစုတ် တသော်သဵုသာ်ဗု မွဲသွက်မရနုက်ကဵုပိ တသော်သဵုသၠုဲ မွဲသွက်မရနုက်ကဵုပန်ရ၊ ခမဳဂှ် သီုဟွံစုတ်တသော်သဵုသာ်ဒမျိုၚ်သက်သက် ၜါသွက်ဂမၠိုၚ် တသော်သဵုသာ်ဗု မွဲသွက်မရနုက်ကဵုပိ တသော်သဵုသၠုဲ မွဲသွက်မရနုက်ကဵုပန်တုဲ ကဵုခၞံသၞာသောန်တၟိမ္ဂး၊ (ကုခမဳဂှ်) ဒးအာပတ် နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။