၄.၁.၄။ ပုရာဏစဳဝရ သိက္ခာပိုဒ်
503) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဋ္ဌဳ ဇရေၚ်ဍုၚ်သာရဝှ်ဂှ် သမ္ဘာတြေမ် တဳလပိုဉ်ဥဒါယဳ သ္ပခမဳ ပ္ဍဲဇရေၚ်ခမဳဗြဴဂမၠိုၚ်ရ၊ ခမဳဗြဴဂှ် ကၠုၚ်ဇရေၚ် တဳလပိုဉ်ဥဒါယဳ ဟွံပိုတ်ရ၊ တဳလပိုဉ်ဥဒါယဳလေဝ် အာဇရေၚ်ခမဳဗြဴဂှ် ဟွံပိုတ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳ သ္ပကိစ္စကဵုပိုဉ် ပ္ဍဲဇရေၚ်ခမဳဗြဴဂှ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳ ပ္ဍဲအခိၚ်နူဂယး သၠောံရုၚ်လတက်ပလေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာတုဲ ပြာပ်အာဇရေၚ် ခမဳဗြဴဂှ်တုဲ ဓမံက်ထ္ၜးလဝ် အၚ်္ဂဇာတ် ပ္ဍဲဂတခမဳဗြဴဂှ်တုဲ ဒၟံၚ်ပ္ဍဲသၞာရ၊ ခမဳဗြဴဂှ်လေဝ် ဓမံက်ထ္ၜးလဝ် အၚ်္ဂဇာတ် ပ္ဍဲဂတတဳလပိုဉ်ဥဒါယဳတုဲ ဂဇအ်ဒၟံၚ်ပ္ဍဲသၞာရ၊ ပ္ဍဲအခိၚ်ဂှ် တဳလပိုဉ်ဥဒါယဳ မၞုံစိုတ်မထၞေန်စပ် သကာတ်လောန်ဒှ်တုဲ သ္ၚေဝ်ရံၚ်ပစေအ် (ပစၚ်) လဝ် အၚ်္ဂဇာတ် ခမဳဗြဴဂှ်ရ၊ သုက် တဳလပိုဉ်ဥဒါယဳ ဗလးတိတ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳဂှ် “ယွံဒေံဗြဴ ဩဝ်အာညိ ဩဝ်ရၚ်တၠုၚ်နၚ်ဍာ်ညိ၊ ကြက်ကြာတ်ကြဴသပိုၚ်ရ” ရဴဝွံ သ္ဂးကဵု ခမဳဗြဴဂှ်ရ၊ “ယွံတဳလပိုဉ် ဩဝ်ကေတ်နၚ်ညိ၊ အဲဍိက်ဗြဴဟေၚ် ကြက်လပိုက်ကြာတ်ကြဴရ” ရဴဝွံ (သ္ဂးတုဲ ဂိုၚ်ကေတ်သပိုၚ်တုဲမ္ဂး) သုက်လ္ၚဵုဂှ် ထ္ၜေတ်ဇြောတ်ကေတ် နပါၚ်ရ၊ လ္ၚဵုဂှ် စုတ်ပ္ဍဲအၚ်္ဂဇာတ်ရ၊ ခမဳဗြဴဂှ် နသုက်ဂှ် ဂိုၚ်ကေတ်ဂၠမ်ဂဝ် (ပဋိသန္ဓိ)ရ။ ခမဳဗြဴဂမၠိုၚ်ဂှ် “ခမဳဗြဴဝွံ ဒ္ဂေတ်တဴဒ္ဂေတ်မေထုန် မဟွံပြဲတုဲ မၞုံကဵုဂၠမ်ဂဝ်ရ” ရဴဝွံ ဟီုသ္ဂးအိုတ်ရ၊ “ယွံနာဲဗြဴတအ် အဲဍိက် ဟွံဒ္ဂေတ်တဴဒ္ဂေတ်မေထုန် မဟွံပြဲရ” ရဴဝွံ ဟီုလဴကဵု ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴဂမၠိုၚ်ဂှ် “တဳလပိုဉ်ဥဒါယဳ မုဟိုတ်ဖအောဝ်ကဵုလပိုက်ကြာတ်ကြဴသ္ၚာတြေမ် ကုခမဳဗြဴဂှ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် ဂရၚ်ပတီ ဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳပၟိက်အောန်ဂမၠိုၚ်ဂှ် “တဳလပိုဉ်ဥဒါယဳ မုဟိုတ်ဖအောဝ်ကဵု လပိုက်ကြာတ်ကြဴ သ္ၚာတြေမ် ကုခမဳဗြဴဂှ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဟီုဂရိုဟ်တၚ်ဒုဟ် တဳလပိုဉ်ဥဒါယဳ နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ “ယွံဥဒါယဳ တၠအဲ ဖအောဝ်ကဵုလပိုက်ကြာတ်ကြဴ သ္ၚာတြေမ် ကုခမဳဗြဴရဟီုဂှ် ဍာံပြမံၚ်ရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံဥဒါယဳ ဒှ်ကလောမသ ကေုာံတၠအဲဟာ ၊ ဟွံဒှ်ကလောမသဟာ ရဴဝွံ (သၟာန်တိုန်ဂှ်) ယွံကျာ်မၞုံပိုဉ် ဟွံဒှ်ကလောမသရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) တြုံဟွံသေၚ်ကဵုကလောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု မၞုံကဵုလျုၚ်သ္ဍိုက်ကီု ဟွံမွဲကဵုလျုၚ်သ္ဍိုက်ကီု ဒဒက်တဴဗြဴ ဟွံသေၚ်ကဵုကလောမသဂှ် တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) တၠအဲဂှ် ဖအောဝ်ကဵုလပိုက်ကြာတ်ကြဴ သ္ၚာတြေမ် ကုခမဳဗြဴ ဟွံသေၚ်ကဵုကလောမသရသွံ၊ ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
504) ယြဴခမဳမွဲ ကုခမဳဗြဴ ဟွံသေၚ်ကဵုကလောမသ လပိုက်ကြာတ်ကြဴလေဝ် ကဵုလပိုက်ကြာတ်ကြဴသ္ၚာတြေမ်မ္ဂး၊ ဖျောန်လေဝ် ကဵုဖျောန်မ္ဂး၊ တက်ဒါတ်လေဝ် ကဵုတက်ဒါတ်မ္ဂး၊ (ကုခမဳဂှ်) ဒးအာပတ်နိဿဂ္ဂိပဲါစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
