၂.၉။ ဒုတိယဒုဋ္ဌဒေါသသိက္ခာပိုဒ်
391) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ခမဳမေတ္တိယဘူမဇကဂမၠိုၚ် စှေ်ကၠုၚ်နူဒဵုဂိဇ္ၛကုဋ်အိုတ်မ္ဂး သ္ဂောံညာတ်ကေတ်ဗ္ၜေအ်ကၟတ် မဒ္ဂေတ်သ္ပဗွဲမပၠန်ဂတးပ္ဍဲဗ္ၜေအ်ၝောံအိုတ်ရ၊ ညာတ်တုဲမ္ဂး “ယွံကောန်တၠတအ် လၟုဟ်ဝွံ ဗ္ၜေအ်ကၟက်ဝွံသ္ပဒဗ္ဗကောန်သၟိၚ်မလ္လအိုတ်ရ၊ ဗ္ၜေအ်ၝောံဝွံ သ္ပခမဳဗြဴမေတ္တိယာအိုတ်ရ၊ ပိုဲညးဂမၠိုၚ် ရဴဝွံဟေၚ်ကော်ခဴအိုတ်ရ၊ ယွံကောန်တၠတအ် ပိုဲညးဂမၠိုၚ်ပ္ဍဲကိုပ်ကၠာတေံ နမမိၚ်ရမျာၚ်ဟီုဂှ် စောတ်စောဲကၠုၚ် ဒဗ္ဗကောန်သၟိၚ်မလ္လအိုတ်ရ၊ ပ္ဍဲအခိၚ်လၟုဟ်ဝွံတုန် ပိုဲညးဂမၠိုၚ်အလဵုဇကုသ္ဂောံညာတ်ကေတ် ဒ္ဂေတ်သ္ပဗွဲမပၠန်ဂတး ပ္ဍဲခမဳဗြဴမေတ္တိယာအိုတ်ရ” ရဴဝွံ ဟီုသ္ဂးအိုတ်ရ၊ ခမဳမေတ္တိယဘူမဇကဂမၠိုၚ်ဂှ် ဗ္ၜေအ်ကၟက်ဂှ် ခုတ်ထောံယၟုဒဗ္ဗ ကောန်သၟိၚ်မလ္လအိုတ်ရ၊ ဗ္ၜေအ်ၝောံဂှ် ခုတ်ထောံယၟုခမဳဗြဴမေတ္တိယာအိုတ်ရ၊ ခမဳမေတ္တယဘူမဇကဂမၠိုၚ်ဂှ် “ယွံကောန်တၠတအ် ပိုဲညးဂမၠိုၚ် ပ္ဍဲကိုပ်ကၠာတေံ နမမိၚ်ရမျာၚ်ဟီုဂှ် စောတ်စောဲကၠုၚ် ဒဗ္ဗကောန်သၟိၚ်မလ္လအိုတ်ရ၊ ပ္ဍဲအခိၚ်လၟုဟ်ဝွံတုန် ပိုဲညးဂမၠိုၚ် အလဵုဇကုသ္ဂောံညာတ်ကေတ် ဒ္ဂေတ်သ္ပဗွဲမပၠန်ဂတး ပ္ဍဲခမဳဗြဴမေတ္တိယာအိုတ်ရ” ရဴဝွံ ဟီုသ္ဂးကဵု ခမဳဂမၠိုၚ်အိုတ်ရ။ ခမဳဂမၠိုၚ်ဂှ် “ယွံကောန်တၠတအ် လ္ပဟီု ရဴဝွံအိုတ်ညိ၊ တဳလပိုဉ်ဒဗ္ဗ ကောန်သၟိၚ်မလ္လကြက်ဟွံသ္ပ ရဴဝွံရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး— ယွံဒဗ္ဗအတိုၚ်ခမဳဂမၠိုၚ်ဝွံဟီုဂှ် တၠအဲ သ္ပဒးကမၠောန် ပွမပလီုပလာ်မၞုံသဘဴရဴဝွံရဂှ် ဂွံသတိ (သမ္တီ) ဒးဟာ” ရဴဝွံ စၟဳစၟတ်သၟာန်သၟုက်တဳလပိုဉ်ဒဗ္ဗ ကောန်သၟိၚ်မလ္လရ။ ယွံတဳလမၞုံပိုဉ် အတိုၚ်တဳလမၞုံပိုဉ်ကျာ်တြဲ တီတဴ အဲဍိက်ဟေၚ်ရ ရဴဝွံ (ဂရၚ်ပတီရ)။ မရနုက်ကဵုၜါလေဝ် ။ ပ ။ မရနုက်ကဵုပိဝါလေဝ် ယွံဒဗ္ဗ အတိုၚ်ခမဳဂမၠိုၚ်ဝွံဟီုဂှ် တၠအဲ သ္ပဒးကမၠောန် ပွမပလီုပလာ် မၞုံသဘဴရဴဝွံရဂှ် ဂွံသတိ (သမ္တီ) ဒးဟာ” ရဴဝွံ (သ္ဂးရ)။ ယွံတဳလမၞုံပိုဉ် အတိုၚ်တဳလမၞုံပိုဉ်ကျာ်တြဲ တီတဴအဲဍိက်ဟေၚ်ရ ရဴဝွံ (ဂရၚ်ပတီရ)။ ယွံဒဗ္ဗ တၠပညာဂမၠိုၚ် ဟွံခၠေဝ်သှ် ရဴဝွံအိုတ်ရ။ (ဟွံသေၚ်ကလး ရဴဝွံအိုတ်ရ)၊ တၠအဲယဝ်ဂပ်ဝ်သ္ပဒးမ္ဂး၊ ဂပ်ဝ်သ္ပဒးရ ရဴဝွံ ဩဝ်ဂရၚ်ပတီညိ၊ တၠအဲ ယဝ်ဟဂပ်ဝ်သ္ပဒးမ္ဂး၊ ဟဂပ်ဝ်သ္ပရ ရဴဝွံ ဩဝ်ဂရၚ်ပတီညိ ရဴဝွံ (သ္ဂးရ)။ ယွံတဳလမၞုံပိုဉ် အဲဍိက်သ္ပတမ်နူ ၜံၚ်သၠးတိတ်တုဲ နအယာံမာတ် တိတ်လ္ပအ်ညာတ်လေဝ် သွိုန်ဗပိုန်သိပ်ဂၠိပ်ဒး ဒ္ဂေတ်မေထုန်ရဂှ် ဟွံတီရ၊ အဲဍိက်မၚုဟ်ဒၟံၚ်ဂှ် မုသ္ဇက်သ္ဂးနွံဏီဂှ်ရော? ရဴဝွံ (ဂရၚ်ပတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် ယဝ်ဒှ်သာ်ဂှ်မ္ဂး ဩဝ်သၟာန်စၟဳစၟတ် ခမဳဂမၠိုၚ်ဝွံ အိုတ်ညိ” ရဴဝွံ သ္ဂးကဵုခမဳဂမၠိုၚ်တုဲ ဒၠိုက်ကတဵုနူဒၞါဲတုဲ က္ညလုပ်အာဘာရ။ ပ္ဍဲအခိၚ်ဂှ် ခမဳဂမၠိုၚ်သၟာန်စၟဳစၟတ် ခမဳမေတ္တိယဘူမဇကဂမၠိုၚ်အိုတ်ရ။ ခမဳဂမၠိုၚ် ဂပ်ဝ်စၟဳစၟတ်သၟာန်သၟုက်အိုတ်မ္ဂး ခမဳမေတ္တိယာဘူမဇကဂမၠိုၚ်ဂှ် ဂရၚ်ပတီဟီုလဴဟိုတ်ပရူပရာဝွံ ကုခမဳဂမၠိုၚ်အိုတ်ရ။ ယွံကောန်တၠတအ် မၞးတအ်ညးဂမၠိုၚ် ဂိုၚ်ကေတ်ဟိုတ်မြော်မွဲသအာၚ် မဗာန်ခြပ်ကေုာံသိက္ခာပိုဒ်တုဲမ္ဂး စောတ်စောဲပလီုပလာ်တဴ တဳလပိုဉ်ဒဗ္ဗ ကောန်သၟိၚ်မလ္လ နကဵုအာပတ်ပါရာဇ်အိုတ်ဟာ ရဴဝွံ (သၟာန်သၟုက်အိုတ်ရ)။ ဍာံပြရ ယွံကောန်တၠတအ် ရဴဝွံ (ဟီုသ္ဂးအိုတ်ရ)။ ခမဳပၟိက်အောန်ဂမၠိုၚ်ဂှ် “ခမဳမေတ္တိယဘူမဇကဂမၠိုၚ် ဂိုၚ်ကေတ်ဟိုတ်မြော်မွဲသအာၚ်မဗာန်ခြပ် ကေုာံသိက္ခာပိုဒ်တုဲမ္ဂး မုဟိုတ် စောတ်စောဲပလီုပလာ် တဳလပိုဉ်ဒဗ္ဗ ကောန်သၟိၚ်မလ္လ နအာပတ်ပါရာဇ်အိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳမေတ္တိယဘူမဇကဂမၠိုၚ် နဟိုတ်ဂမၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ဂိုၚ်ကေတ် ဟိုတ်မြော်မွဲသအာၚ် မဗာန်ခြပ်ကေုာံသိက္ခာပိုဒ်တုဲမ္ဂး စောတ်စောဲပလီုပလာ် ဒဗ္ဗကောန်သၟိၚ်မလ္လ နအာပတ်ပါရာဇ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် ဂိုၚ်ကေတ် ဟိုတ်မြော်မွဲသအာၚ်မဗာန်ခြပ်ကေုာံသိက္ခာပိုဒ်တုဲမ္ဂး မုဟိုတ် စောတ်စောဲပလီုပလာ် ဒဗ္ဗကောန်သၟိၚ်မလ္လ နအာပတ်ပါရာဇ်အိုတ်ဂှ်ရော? ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
392) ယြဴခမဳမွဲ မၞုံကဵုစိုတ်ဒေါသ မဂပ်ဝ်ပ္ဍဵုပ္ဍိုက် မမိက်ပလီုပလာ်ဒှ်တုဲ ဟွံသ္ဍိုက်မၠိုက်ဒှ်တုဲ ဂိုၚ်ကေတ်ဟိုတ်မြော်မွဲသအာၚ် မဗာန်ခြပ်ကေုာံသိက္ခာပိုဒ်တုဲမ္ဂး ‘ကဵုခမဳဂှ် တသိုတ်အာနူဒ္ဂေတ်မပြဲဝွံမာန်ရ’ ချပ်ရဴဝွံတုဲ စောတ်စောဲပလီုပလာ် နအာပတ်ပါရာဇ်မ္ဂး၊ ပ္ဍဲကြဴနူစောတ်စောဲပလီုပလာ်တုဲဂှ် (ညးသအာၚ်ဂမၠိုၚ်) ဂပ်ဝ်သၟာန်စၟဳစၟတ်တုဲကီုလေဝ် သီုမဟဂပ်ဝ်သၟာန်စၟဳစၟတ်ကီုလဝ် အဓိကိုရ်ဂှ် ဆက်စပ်ကေုာံဝတ္ထုသအာၚ်လေဝ် ဒှ်မ္ဂး၊ ဂိုၚ်ကေတ်ဟိုတ်မြော်မွဲသအာၚ်မဗာန်ခြပ် ကေုာံသိက္ခာပိုဒ်လေဝ် ဒှ်မ္ဂး၊ ခမဳမစောတ်စောဲဂှ်လေဝ် ဒုၚ်ဝန်ဒုဟ်မ္ဂး၊ (ကုခမဳဂှ်) ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးသိက္ခာပိုဒ်ဝွံအိုတ် ရဴဝွံ သ္ဂးရ)။
