၂.၈.၁။ ဝတ္ထုတဳလပိုဉ်ဒဗ္ဗ ကောန်သၟိၚ်မလ္လ
380) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် တဳလပိုဉ်ဒဗ္ဗမဒှ်ကောန်သၟိၚ်မလ္လ နူၜံၚ်သၠးတိတ်ကၠုၚ် မၞုံအယာံမာတ်ထပှ်သၞာံဏီဂှ် သ္ပကေတ်ဇၞောဝ်မတ် အရဟတ္တဖိုလ်တုဲရ၊ တဳလပိုဉ်ဒဗ္ဗဂှ် ဓရ်သာဝကကွးဂမၠိုၚ် မထေက်ကဵုအာစိုပ်အိုတ်သီုဂှ် အာစိုပ်အတိုၚ်လၟေၚ်တုဲရ၊ ကုတဳလပိုဉ်ဒဗ္ဗဂှ် ကိစ္စကေၚ်ကာခမဳ မမိက်ကဵုမွဲမွဲ ဟွံမွဲကဵုပွမဒးသ္ပကြဴရ၊ ဓရ်မဂပ်ဝ်သ္ပလဝ်တုဲလေဝ် ဟွံမွဲကဵုပွမဒးထပ်ဇၞော်ပၟဝ်ရ။ ပ္ဍဲအခိၚ်ဂှ် ပြာပ်အာဌာန်သ္ၚိတ်ဇြတုဲ ဃောသတၚ်တန်တဴဒၟံၚ် (ညးမွဲဓဝ်) ဂှ် “အဲ နူၜံၚ်သၠးတိတ်တုဲ မၞုံအယာံမာတ်ထပှ်သၞာံဏီဂှ် သ္ပကေတ်ဇၞောဝ်မတ် အရဟတ္တဖိုလ်တုဲရ၊ ဓရ်ကွးသာဝကဂမၠိုၚ် မထေက်ကဵုအာစိုပ်အိုတ်သီုဂှ် (အဲ) အာစိုပ်အတိုၚ်လၟေၚ်တုဲရ၊ ကိစ္စကေၚ်ကာခမဳ မမိက်ကဵုမွဲမွဲ ဟွံမွဲကဵုပွမဒးသ္ပကြဴ ကုအဲရ၊ ဓရ်မဂပ်ဝ်သ္ပလဝ်တုဲလေဝ် ဟွံမွဲကဵုပွမဒးထပ်ဇၞော်ပၟဝ်ရ၊ အဲ မုဂွံကၠောန်သ္ပ ကေၚ်ကာဇၞော်သၟတ်သၚ်ညိဂှ်ရော?” ရဴဝွံ ကသပ်စိုတ်ဒှ် ကုတဳလပိုဉ်ဒဗ္ဗ ကောန်သၟိၚ်မလ္လရ။ ပ္ဍဲအခိၚ်ဂှ် “အဲ သၞာသတိက် သၞာဒၟံၚ်သၚ်လေဝ် သ္ဂောံလးပညပ်ကဵုမ္ဂး ပိဏ္ဍပါတ်ဂမၠိုၚ်လေဝ် သ္ဂောံစၞောန်ထ္ၜးကဵုမ္ဂး ခိုဟ်သန်ရ” ရဴဝွံ ကသပ်ဒှ် ကုတဳလပိုဉ်ဒဗ္ဗ ကောန်သၟိၚ်မလ္လရ။ ပ္ဍဲအခိၚ်ဂှ် တဳလပိုဉ်ဒဗ္ဗကောန်သၟိၚ်မလ္လ ပ္ဍဲအခိၚ်သဝ်တ္ၚဲ ဒၠိုက်ကတဵုနူဌာန်သတိတ်သတၚ်ဒၟံၚ် (ညးမွဲဓဝ်) တုဲ ပ္ၚောံပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞာဲမွဲရ၊ ဂဇအ်ဒၟံၚ်ပ္ဍဲဒၞါဲမွဲတုဲ တဳလပိုဉ်ဒဗ္ဗ ကောန်သၟိၚ်မလ္လဂှ်— “ယွံကျာ်မၞုံပိုဉ် ပြာပ်အာဌာန်သ္ၚိတ်ဇြတုဲ ဃောသတၚ်တန်တဴဒၟံၚ် (ညးမွဲဓဝ်) ဂှ် “အဲနူၜံၚ်သၠးတိတ်တုဲ မၞုံအယာံမာတ်ထပှ်သၞာံဏီဂှ် သ္ပကေတ်ဇၞောဝ်မတ် အရဟတ္တဖိုလ်တုဲရ၊ ဓရ်ကွးသာဝကဂမၠိုၚ် မထေက်ကဵုအာစိုပ်အိုတ်သီုဂှ် (အဲ) အာစိုပ်အတိုၚ်လၟေၚ်တုဲရ၊ ကိစ္စကေၚ်ကာခမဳ မမိက်ကဵုမွဲမွဲ ဟွံမွဲကဵုပွမဒးသ္ပကြဴ ကုအဲရ၊ ဓရ်မဂပ်ဝ်သ္ပလဝ်တုဲလေဝ် ဟွံမွဲကဵုပွမဒးထပ်ဇၞော်ပၟဝ်ရ၊ အဲ မုဂွံကၠောန်သ္ပ ကေၚ်ကာဇၞော်သၟတ်သၚ်ညိဂှ်ရော?” ရဴဝွံ ကသပ်စိုတ်ဒှ်ကၠုၚ်ရ။ “ယွံကျာ်မၞုံပိုဉ် ကုအဲဍိက်ဂှ် ‘အဲ သၞာသတိက် သၞာဒၟံၚ်သၚ်လေဝ် သ္ဂောံလးပညပ်ကဵုမ္ဂး ပိဏ္ဍပါတ်ဂမၠိုၚ်လေဝ် သ္ဂောံစၞောန်ထ္ၜးကဵုမ္ဂး ခိုဟ်သန်ရ’ ရဴဝွံ ကသပ်ဒှ်ရ။ ယွံကျာ်မၞုံပိုဉ် အဲဍိက်နွံပၟိက်သၞာသတိက် သၞာဒၟံၚ်သၚ်လေဝ် တၞဟ်နလးပညပ်ကီု ပိဏ္ဍပါတ်ဂမၠိုၚ်လေဝ် တၞဟ်နစၞောန်ထ္ၜးကီုရ” ရဴဝွံ (ဂရၚ်ပတီရ)။ ယွံဒဗ္ဗ ခိုဟ်သန်ရ ခိုဟ်သန်ရ၊ ယွံဒဗ္ဗ ယဝ်ဒှ်သာ်ဂှ်မ္ဂး တၠအဲ သၞာသတိက် သၞာဒၟံၚ်သၚ်လေဝ် ဩဝ်လးပညပ်ညိ၊ ပိဏ္ဍပါတ်ဂမၠိုၚ်လေဝ် ဩဝ်စၞောန်ထ္ၜးညိ” ရဴဝွံ (ကဵုအခေါၚ်ရ)။ “ခိုဟ်သန်ရ ယွံကျာ်မၞုံပိုဉ်” ရဴဝွံ တဳလပိုဉ်ဒဗ္ဗ ကောန်သၟိၚ်မလ္လ ကလေၚ်ဂရၚ်ပတီ ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး ဟီုတွံဂလာန်ဓရ်တုဲ— “ယွံခမဳတအ် ယဝ်ဒှ်သာ်ဂှ်မ္ဂး သၚ် ဩဝ်သၟိတ်ပတိုန်ဒဗ္ဗ မဒှ်ကောန်သၟိၚ်မလ္လ ရဴဝွံမ္ဂး ညးလးပညပ် သၞာသတိက် သၞာဒၟံၚ်ကီု ရဴဝွံမ္ဂး ညးစၞောန်ထ္ၜး ပိဏ္ဍပါတ်ကီုညိ”။ ယွံခမဳတအ် ရဴဝွံဟေၚ် ဂပ်ဝ်သၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ်ဒဗ္ဗ ကောန်သၟိၚ်မလ္လရ၊ အာတ်ပါန်အခေါၚ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
381) “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ သၚ်သၟိတ်ပတိုန်တဳလပိုဉ်ဒဗ္ဗ ကောန်သၟိၚ်မလ္လရဴဝွံမ္ဂး ညးလးပညပ်သၞာသတိက် သၞာဒၟံၚ်ကီု ရဴဝွံမ္ဂး ညးစၞောန်ထ္ၜး ပိဏ္ဍပါတ်ကီုရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်သၟိတ်ပတိုန်တဳလပိုဉ်ဒဗ္ဗ ကောန်သၟိၚ်မလ္လ ရဴဝွံမ္ဂး ညးလးပညပ်သၞာသတိက် သၞာဒၟံၚ်ကီု ရဴဝွံမ္ဂး ညးစၞောန်ထ္ၜးပိဏ္ဍပါတ်ကီုရ၊ ယြဴကုတဳလပိုဉ်မွဲ မၞုံကဵုပွမသ္ဍိုက် ပွမသၟိတ်ပတိုန် တဳလပိုဉ်ဒဗ္ဗကောန်သၟိၚ်မလ္လ ရဴဝွံမ္ဂး ညးလးပညပ် သၞာသတိက် သၞာဒၟံၚ်ကီု ရဴဝွံမ္ဂး ညးစၞောန်ထ္ၜး ပိဏ္ဍပါတ်ကီုရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ်ဂပ်ဝ်သၟိတ်ပတိုန် တဳလပိုဉ်ဒဗ္ဗ ကောန်သၟိၚ်မလ္လ ရဴဝွံမ္ဂး ညးလးပညပ်သၞာသတိက် သၞာဒၟံၚ်ကီု ရဴဝွံမ္ဂး ညးစၞောန်ထ္ၜး ပိဏ္ဍပါတ်ကီုတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
382) တဳလပိုဉ်ဒဗ္ဗ မကလိဂွံသၟိတ်တုဲဂှ် ကုခမဳဂမၠိုၚ်မၞုံကဵုသဘဴတုပ်သၟဟ်ဂှ် လးပညပ်ကဵု သၞာသတိက် သၞာဒၟံၚ် မွဲဂကောံဓဝ်ရ၊ ယြဴခမဳဂမၠိုၚ် ပကၚ်ရၚ်သုတ်အိုတ်ရ၊ “ခမဳဂမၠိုၚ်ဂှ် ကြက်ဖ္ဍောတ်သုတ်သၟဟ်သၟန် ကေုာံရၚ်သကအ်အိုတ်ရ” ရဴဝွံ လးပညပ်ကဵုသၞာသတိက် သၞာဒၟံၚ် ကုခမဳဂမၠိုၚ် မွဲဂကောံဓဝ်ရ။ ယြဴခမဳဂမၠိုၚ် ပကၚ်ရၚ်ဝိနယ်အိုတ်ရ၊ “ခမဳဂမၠိုၚ်ဂှ် ကြက်သ္ဂုတ်သွာတ်ဝိနယ် ကေုာံရၚ်သကအ်အိုတ်ရ” ရဴဝွံ လးပညပ်ကဵုသၞာသတိက် သၞာဒၟံၚ် ကုခမဳဂမၠိုၚ်ဂှ်မွဲဂကောံဓဝ်ရ။ ယြဴခမဳဂမၠိုၚ် ဒှ်ဓမ္မကထိက အ္စာတွံဓရ်အိုတ်ရ၊ “ခမဳဂမၠိုၚ်ဂှ် ကြက်သရီုသဳကၠဳဓရ်ကေုာံရၚ်သကအ်အိုတ်ရ” ရဴဝွံ လးပညပ်ကဵုသၞာသတိက် သၞာဒၟံၚ် ကုခမဳဂမၠိုၚ်ဂှ် မွဲဂကောံဓဝ်ရ။ ယြဴခမဳဂမၠိုၚ် မၞုံအလေံ လုပ်စၛာန်အိုတ်ရ၊ “ခမဳဂမၠိုၚ်ဂှ် ကြက်စာ်စ္ဍးနူဒွံလုက်စုက် (ပထုဲ) ကေုာံရၚ်သကအ်အိုတ်ရ” ရဴဝွံ လးပညပ်ကဵုသၞာသတိက် သၞာဒၟံၚ် ကုခမဳဂမၠိုၚ်ဂှ် မွဲဂကောံဓဝ်ရ။ ယြဴခမဳဂမၠိုၚ် မၞုံအလေံဟီုဂလာန်ဒစဵုဒစးကဵု (မဂ်ဖိုလ်) အိုတ်ရ၊ မၞုံကဵုဒ္ဂေတ်လ္ၚတ်ပွမခိုၚ်ဗိုန်ဗတ်ခိုၚ်ကၠိုက် ခန္ဓဇကုဂမၠိုၚ်ဒှ်တုဲ ပဒတဴအိုတ်ရ၊ “တဳလပိုဉ်ဂမၠိုၚ်ဝွံ နပွမမိပ်လဟိၚ်ဝွံလေဝ် ကြက်ပဒတဴအိုတ်ရ” ရဴဝွံ လးပညပ်ကဵု သၞာသတိက် သၞာဒၟံၚ် ကုခမဳဂမၠိုၚ်ဂှ် မွဲဂကောံဓဝ်ရ။ ယြဴခမဳဂမၠိုၚ် ကၠုၚ်တဴပ္ဍဲဟွံသေၚ်ကဵုအခိၚ်အိုတ်ရ၊ “ကုခမဳဂမၠိုၚ်ဂှ်လေဝ် လုပ်စၛာန်မၞုံအာရီုတေဇောကသိုဏ်တုဲ နကဵုလျးအရံၚ်ဂှ်ဟေၚ် လးပညပ်ကဵု သၞာသတိက် သၞာဒၟံၚ်ရ။ ဗွဲစၟတ်တုန် ခမဳဂမၠိုၚ် “ပိုဲညးဂမၠိုၚ် ကြက်ဗဵုရံၚ် ဣဒ္ဓိကြဳဇှ်ပါဋိဟာ တဳလပိုဉ်ဒဗ္ဗကောန်သၟိၚ်မလ္လအိုတ်ရ” ရဴဝွံ သၟးသၟး (မးမး) ကၠုၚ်ပ္ဍဲဟွံသေၚ်ကဵုအခိၚ်အိုတ်ရ၊ ခမဳဂမၠိုၚ်ဂှ် ပြာပ်အာဇရေၚ် တဳလပိုဉ်ဒဗ္ဗ ကောန်သၟိၚ်မလ္လတုဲ “ယွံကောန်တၠဒဗ္ဗ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ်ညိ” ရဴဝွံ သ္ဂးအိုတ်ရ။ တဳလပိုဉ်ဒဗ္ဗ ကောန်သၟိၚ်မလ္လဂှ် “တဳလပိုဉ်ဂမၠိုၚ် မုရဴပ္ဍဲဌာန်မွဲ နွံပၟိက်အိုတ်ဂှ်ရော? မုရဴပ္ဍဲဌာန်မွဲ သ္ဂောံလးပညပ်ကဵုဂှ်ရော?” ရဴဝွံ သ္ဂးကဵုခမဳဂမၠိုၚ်ဂှ်ရ။ ခမဳဂမၠိုၚ်ဂှ် သၟးသၟး (မးမး) စၞောန်ထ္ၜး ပ္ဍဲဌာန်ဇမ္ၚောဲအိုတ်ရ၊ “ယွံကောန်တၠဒဗ္ဗ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲဒဵုဂိဇ္ဇကုဋ်ညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ခြော်ဇြဟ်စောရပပါတညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲထီုတၟံမစံက် သကဲဒဵုဣသိဂိလိညိ၊ ယွံကောန်တၠ ဩဝ်လးပညပ်ကဵုသၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲဂိုဟ်တၞံဆုသြေၚ် သကဲဒဵုဝေဘာရညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲခၠိုၚ်သပ္ပသောဏ္ဍိက ဂြိုပ်ကြက်ဇြၚ်ညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲလဂေါဝ် (စောဝ်) ဂေါတမကညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲလဂေါဝ်တပေါဒညိ၊ ယွံကောန်တၠ ဩဝ်လးပညပ်ကဵုသၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲအာရှာမ်တပေါဒါညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲဥဒျာန်ကြက်သဝ်ဇဳဝကညိ၊ ယွံကောန်တၠ ဩဝ်လးပညပ်ကဵု သၞာသတိက် သၞာဒၟံၚ် ကုပိုဲညးဂမၠိုၚ် ပ္ဍဲဂြိုပ်မဒ္ဒကုစ္ဆိညိ” ရဴဝွံ (စၞောန်ထ္ၜးပ္ဍဲဌာန်ဇမ္ၚောဲအိုတ်ရ)။ ကုခမဳဂမၠိုၚ်ဂှ် တဳလပိုဉ်ဒဗ္ဗ လုပ်စၛာန် မၞုံအာရီုတေဇောကသိုဏ်တုဲ နကဵုလပိုဟ်တဲမဂဵုခၠၚ်ဂှ် အာတဴနူဂတနူဂတရ။ ခမဳဂမၠိုၚ်ဂှ်လေဝ် နကဵုလျးအရံၚ်ဂှ်ဟေၚ် ဗက်အာလက္ကရဴ နူလက္ကရဴ တဳလပိုဉ်ဒဗ္ဗ ကောန်သၟိၚ်မလ္လအိုတ်ရ၊ တဳလပိုဉ်ဒဗ္ဗ ကောန်သၟိၚ်မလ္လဂှ် “ဣဝွံတုန် ဇံၚ်ခါတ်ရောၚ်၊ ဣဝွံတုန် ဂတဵုဒလာဲခုၚ်ဇမၠိုၚ်ရောၚ်၊ ဣဝွံတုန် ဖုန်ရောၚ်၊ ဣဝွံတုန် ဂၞဳရောၚ်၊ ဣဝွံတုန် ဌာန်သၠးတရဴဇၞော်ရောၚ်၊ ဣဝွံတုန် ဌာန်သၠးပဿဴ အာတရဴသၟတ်ရောၚ်၊ ဣဝွံတုန် ဍာ်သုၚ်ရောၚ်၊ ဣဝွံတုန် ဍာ်ရပ်စပ်ရောၚ်၊ ဣဝွံတုန် လေံဒစုန်ရောၚ်၊ ဣဝွံတုန် ကတိကဝတ်သၚ် မစွံပတန်လဝ် (နမပ္တံ) ပ္ဍဲအခိၚ်ဝွံ သ္ဒးလုပ်ရ၊ ပ္ဍဲအခိၚ်ဝွံ သ္ဒးတိတ်ရရောၚ်” ရဴဝွံ ဟီုသ္ဂးတုဲ လးပညပ်ကဵု သၞာသတိက် သၞာဒၟံၚ် ကုခမဳဂမၠိုၚ်ဂှ်ရ။ တဳလပိုဉ်ဒဗ္ဗ ကောန်သၟိၚ်မလ္လ လးပညပ်ကဵု သၞာသတိက်သၞာဒၟံၚ် ကုခမဳဂမၠိုၚ်ဂှ်တုဲမ္ဂး ကလေၚ်က္ညစဴအာ ဘာဝေဠုဝန်ဟေၚ်ရ။
383) ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ် ညးသၟတ်လေဝ် ဒှ်အိုတ်ရ၊ ပိုဉ်ကမ်လေဝ်အောန်အိုတ်ရ၊ သၞာသတိက် သၞာဒၟံၚ် မယုတ်ပြေအ်ဂမၠိုၚ်ကီု ပိဏ္ဍပါတ်မယုတ်ပြေအ်ဂမၠိုၚ်ကီု ဂြပ်သၚ်ဂှ် အာစိုပ်ကုခမဳဂမၠိုၚ်ဂှ်အိုတ်ရ။ ပ္ဍဲအခိၚ်ဂှ် ပ္ဍဲဍုၚ်ရာဇဂြိုဟ် မၞိဟ်ဂမၠိုၚ် (မၞုံပၟိက်တၞဟ်နကဵုဒါန်) ပိဏ္ဍပါတ်မဂပ်ဝ်ပြုပြေၚ်စဳရေၚ်လဝ် ဗွဲတၟေၚ်ကီု ကၠေဟ်သွဟ်ကီု ကၠေၚ်ကီု သွပွေက်ကီု ကုခမဳဂမၠိုၚ် မဒှ်ထေရ်အိုတ်ရ၊ ကုခမဳမေတ္တိယဘူမဇကဂမၠိုၚ်တုန် ကဵုဒါန်ပုၚ်ကၞောန်သ္ၚု မၞုံမရနုက်ကဵုၜါခရော်မ္ဂး ဍာ်သမ် မဒှ်အတိုၚ်ပကတိ အတိုၚ်မဖျိန်လၟိုန်အိုတ်ရ။ ခမဳမေတ္တိယဘူမဇကဂမၠိုၚ်ဂှ် ကဵုပိုဉ်တုဲပ္ဍဲကြဴ ပါဲစ္ဍးကၠုၚ် နူဇြပ်ကဵုပိုဉ်တုဲအိုတ်မ္ဂး “ယွံကောန်တၠတအ် ပ္ဍဲဇြပ်ကဵုပိုဉ် မုအရာမွဲ ဒှ်တဴကုမၞးတအ်ညးဂမၠိုၚ်ဂှ်ရော? ယွံကောန်တၠတအ် ပ္ဍဲဇြပ်ကဵုပိုဉ် မုအရာမွဲ ဒှ်တဴ ကုမၞးတအ်ညးဂမၠိုၚ်ဂှ်ရော?” ရဴဝွံ သၟာန်ခမဳဂမၠိုၚ် မဒှ်ထေရ်အိုတ်ရ၊ မှာထေရ်လ္ၚဵုဂမၠိုၚ် “ယွံကောန်တၠတအ် ကုပိုဲညးဂမၠိုၚ် (ဂွံ) ကၠေၚ်သွဟ်ဒှ်ရ၊ ကၠေၚ်ဒှ်ရ၊ သွပွေက်ဒှ်ရ” ရဴဝွံ သ္ဂးတဴအိုတ်ရ၊ ခမဳမေတ္တိယဘူမဇကဂမၠိုၚ်တုန် “ယွံကောန်တၠတအ် ကုပိုဲညးဂမၠိုၚ် မမိက်ကဵုမွဲမွဲ ဟွံတၟေၚ်ဒှ်ရ၊ ပုၚ်ကၞောန်သ္ၚု မၞုံမရနုက်ကဵုၜါခရော်မ္ဂး ဍာ်သမ်မဒှ်အတိုၚ်ပကတိ အတိုၚ်မဖျိန်လၟိုန် ဒှ်ရ” ရဴဝွံ သ္ဂးအိုတ်ရ။ ပ္ဍဲအခိၚ်ဂှ် ဒကာကလျာဏဘတ္တိကဂှ် ကဵုဒါန်စတုက္ကဘတ် နိစ္စဘတ် ကုသၚ်ရ၊ ဒကာဂှ် ပ္ဍဲဇြပ်ကဵုပိုဉ် တန်တဴဒၟံၚ်ပ္ဍဲဇရေၚ် မွဲဟာန်ကေုာံကောန်သမ္ဘာတုဲ ကၠောန်ၜိုတ်ဥပကာရ၊ သၟာန်တဴခမဳလ္ၚဵုဂမၠိုၚ် နကဵုပိဏ္ဍပါတ်အိုတ်ရ၊ သၟာန်တဴခမဳလ္ၚဵုဂမၠိုၚ် နကဵုအမာဲသွအိုတ်ရ၊ သၟာန်တဴခမဳလ္ၚဵုဂမၠိုၚ် နကဵုကၠေၚ်အိုတ်ရ၊ သၟာန်တဴခမဳလ္ၚဵုဂမၠိုၚ် နကဵုသွပွေက်အိုတ်ရ။ ပ္ဍဲအခိၚ်ဂှ် ပ္ဍဲတ္ၚဲယး တၞဟ်န (သွက်ဂွံသ္ပပြဘိုဂ်) ပိဏ္ဍပါတ် ဒကာကလျာဏဘတ္တိကဂှ် ဂပ်ဝ်စၞောန်ထ္ၜး ကုခမဳမေတ္တိယဘူမဇကဂမၠိုၚ်ရ။ ပ္ဍဲအခိၚ်ဂှ် သမ္ၚေဟ်ကလျာဏဘတ္တိကဂှ်ပြာပ်အာ အာရှာမ် နကဵုကိစ္စကေၚ်ကာ မမိက်ကဵုမွဲမွဲရ။ ဒကာဂှ် ပြာပ်အာဇရေၚ် တဳလပိုဉ်ဒဗ္ဗ ကောန်သၟိၚ်မလ္လတုဲ လ္ၚောဝ်သ္ပဝတ်တဳလပိုဉ်ဒဗ္ဗ ကောန်သၟိၚ်မလ္လတုဲမ္ဂး ဂဇအ်ဒၟံၚ်ပ္ဍဲဒၞါဲမွဲရ၊ ဒကာကလျာဏဘတ္တိက မဂဇအ်ဒၟံၚ် ပ္ဍဲဒၞါဲမွဲတုဲဂှ် နကဵုဂလာန်ဓရ် တဳလပိုဉ်ဒဗ္ဗကောန်သၟိၚ်မလ္လ ကဵုတီညာတ် (ဒတုဲမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ) ကဵုသကေက်သကာတုဲ ကဵုမြဟ်မြာတုဲဒှ်တုဲ (ဒကာကလျာဏဘတ္တိက)— “ယွံတဳလပိုဉ် ပ္ဍဲတ္ၚဲယး တၞဟ်န (သွက်ဂွံသ္ပပြဘိုဂ်) ပ္ဍဲသ္ၚိအဲဍိက်တအ် ဂပ်ဝ်စၞောန်ထ္ၜးပိဏ္ဍပါတ် ကုခမဳလဵုဂှ်ရော?” ရဴဝွံ ဂရၚ်ပတီ တဳလပိုဉ်ဒဗ္ဗ ကောန်သၟိၚ်မလ္လရ။ ယွံဒကာ ပ္ဍဲတ္ၚဲယး တၞဟ်န (သွက်ဂွံသ္ပပြဘိုဂ်) ပ္ဍဲသ္ၚိမၞးတအ်ညးဂမၠိုၚ် ဂပ်ဝ်စၞောန်ထ္ၜးပိဏ္ဍပါတ် ကုခမဳ မေတ္တိယဘူမဇကဂမၠိုၚ်တုဲရ ရဴဝွံ (သ္ဂးရ)။ ပ္ဍဲအခိၚ်ဂှ် ဒကာကလျာဏဘတ္တိက ဟွံမိပ်စိုတ်ဒှ်အာရ၊ “မုဟိုတ် ခမဳယုတ်ဂမၠိုၚ် ကြက်သ္ဂောံပြဘိုဂ် ပ္ဍဲသ္ၚိပိုဲတအ်ညးဂမၠိုၚ်ဂှ်ရော?” ရဴဝွံ စဴအာသ္ၚိတုဲ “ဟာဲဍိက်ဗြဴ ပ္ဍဲတ္ၚဲယး ယြဴခမဳဂမၠိုၚ် ကြက်ကၠုၚ်တဴ တၞဟ်နပိဏ္ဍပါတ်အိုတ်ရ၊ ခမဳမကၠုၚ်ကဵုပိုဉ်ဂမၠိုၚ်ဂှ် လးကဵုသၞာပ္ဍဲပါၚ်မုက်တြၚ်တုဲ ဩဝ်ကၠောန်ၜိုတ် နကဵုပုၚ်ကၞောန်သ္ၚု မၞုံမရနုက်ကဵုၜါခရော်မ္ဂး ဍာ်သမ်ဂှ်ညိ” ရဴဝွံ ဖအောဝ်စကာဍိက်ဗြဴရ၊ ယွံတၠနာဲ ခိုဟ်သန်ရ ရဴဝွံ ဍိက်ဗြဴဂှ် ကလေၚ်သ္ဂးကဵု ဒကာကလျာဏဘတ္တိကရ။ ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ် “ယွံကောန်တၠတအ် နူတနေံဏအ် ဂပ်ဝ်စၞောန်ထ္ၜးလဝ်ပိဏ္ဍပါတ် ဒကာကလျာဏဘတ္တိက ကုပိုဲညးဂမၠိုၚ်တုဲရ၊ ပ္ဍဲတ္ၚဲယး ဒကာကလျာဏဘတ္တိက တန်တဴဒၟံၚ်ပ္ဍဲဇရေၚ် မွဲဟာန်ကေုာံကောန်သမ္ဘာတုဲ ကြက်ကၠောန်ၜိုတ် ပိုဲညးဂမၠိုၚ်ရ၊ သၟာန်တဴခမဳလ္ၚဵုဂမၠိုၚ် နကဵုပိဏ္ဍပါတ်အိုတ်ရ၊ သၟာန်တဴခမဳလ္ၚဵုဂမၠိုၚ် နကဵုအမာဲသွအိုတ်ရ၊ သၟာန်တဴခမဳဂမၠိုၚ် နကဵုကၠေၚ်အိုတ်ရ၊ သၟာန်တဴခမဳဂမၠိုၚ် နကဵသွပွေက်အိုတ်ရ” ရဴဝွံ ခမဳမေတ္တိယဘူမဇကဂမၠိုၚ်ဂှ် နပွမမိပ်စိုတ်ဂှ်ဟေၚ် ပ္ဍဲဗ္တမ်ဟွံတိက် အတိုၚ်ပၟိက်စိုတ် (တိက်ဟွံမာန်) အိုတ်ရ၊ ပ္ဍဲကြဴနူဂှ် ခမဳမေတ္တိယဘူမဇကဂမၠိုၚ် ပ္ဍဲအခိၚ်နူဂယး ရုၚ်လတက်ပဠေဝ်သ္ၚာတုဲ မိန်ဂိုၚ်ကေတ် ဗဗေၚ်သ္ၚာတုဲမ္ဂး ပြာပ်စဴအာသ္ၚိ ဒကာကလျဏဘတ္တိကအိုတ်ရ။ ဍိက်ဗြဴဂှ် ညာတ်အာ ခမဳမေတ္တိယဘူမဇကဂမၠိုၚ် မက္ညကၠုၚ်ဒၟံၚ် နူဇမ္ၚောဲရ၊ ညာတ်တုဲမ္ဂး လးပညပ်ကဵုသၞာ ပ္ဍဲပါၚ်မုက်တြၚ်တုဲ “ယွံတဳလပိုဉ်တအ် ဩဝ်ဂဇအ်အိုတ်ညိ” ရဴဝွံ ဂရၚ်ပတီ ခမဳမေတ္တိယဘူမဇကဂမၠိုၚ်ရ။ ပ္ဍဲအခိၚ်ဂှ် ကုခမဳမေတ္တိယဘူမဇကဂမၠိုၚ်ဂှ် “ဨကန္တ ပိဏ္ဍပါတ် ဟွံစိုပ်ဒတုဲ (ဟွံစိန်ဝုန်) ဏီဒှ်တုဲ ကဵုပိုဲညးဂမၠိုၚ် ဂဇအ်ဒၟံၚ် ပ္ဍဲပါၚ်မုက်တြၚ်အိုတ်ရ” ရဴဝွံ ဗှ်ဗၞုဟ်ထေၚ်တဴရ။ ပ္ဍဲအခိၚ်ဂှ် ဍိက်ဗြဴဂှ် “ယွံတဳလပိုဉ်တအ် ဩဝ်ပြဘိုဂ်ကဵုပိုဉ်အိုတ်ညိ” ရဴဝွံ နကဵုပုၚ်ကၞောန်သ္ၚု မၞုံကဵုမရနုက်ကဵုၜါခရော်မ္ဂးဍာ်သမ် (ဗဂိန်ကဵုရ)။ ယွံဒေံဗြဴ ပိုဲညးဂမၠိုၚ်တုန် ညးမၞုံကဵုနစ္စဘတ်ဂမၠိုၚ်ရ ရဴဝွံ (သ္ဂးရ)။ ယွံတဳလပိုဉ်တအ် တီဒၟံၚ်ရ၊ ဒှ်ညးမၞုံနိစ္စဘတ်အိုတ်ရ၊ ၜိုန်ဂှ် နူတနေံတေံဟေၚ် “ဟာဲဍိက်ဗြဴ ပ္ဍဲတ္ၚဲယး ယြဴခမဳဂမၠိုၚ် ကြက်ကၠုၚ်တဴ တၞဟ်နပိဏ္ဍပါတ်အိုတ်ရ၊ ခမဳမကၠုၚ်ကဵုပိုဉ်ဂမၠိုၚ်ဂှ် လးကဵုသၞာ ပ္ဍဲပါၚ်တြၚ်တုဲ ဩဝ်ကၠောန်ၜိုန်နကဵုပုၚ်ကၞောန်သ္ၚု မၞုံမရနုက်ကဵုၜါခရော်မ္ဂး ဍာ်သမ်ညိ” ရဴဝွံ သမ္ၚေဟ်ဂှ် ဖအောဝ်စကာလဝ် ဍိက်ဗြဴရ၊ ယွံတဳလပိုဉ်တအ် ဩဝ်ပြဘိုဂ်ကဵုပိုဉ်အိုတ်ညိ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ်ဂှ် “ယွံကောန်တၠတအ် နူတနေံတေံ ဒကာကလျာဏဘတ္တိက ကၠုၚ်အာရှာမ်ဇရေၚ်တဳလပိုဉ်ဒဗ္ဗ ကောန်သၟိၚ်မလ္လရ၊ ဨကန္တ တဳလပိုဉ်ဒဗ္ဗကောန်သၟိၚ်လ္လ ဂပ်ဝ်ပလီုပလာ်ထောံ ပိုဲညးဂမၠိုၚ် ပ္ဍဲဇရေၚ်ဒကာတုဲအိုတ်ရ” ရဴဝွံ ခမဳမေတ္တိယဘူမဇကဂမၠိုၚ်ဂှ် နပွမဟွံမိပ်စိုတ်ဂှ်ဟေၚ် အတိုၚ်ပၟိက်စိုတ် ဟွံသ္ပပြဘိုဂ်အိုတ်ရ၊ ပ္ဍဲအခိၚ်ဂှ်ခမဳမေတ္တိယဘူမဇကဂမၠိုၚ် ကဵုပိုဉ်တုဲပ္ဍဲကြဴ ပါဲစ္ဍးအာနူဇြပ်ကဵုပိုဉ်တုဲအိုတ်မ္ဂး စဴအာ အာရှာမ်တုဲ သီဂိုၚ်ဒေပ်ဗဗေၚ်သ္ၚာတုဲ သီုမဒက်တာန်အာယောဂပတ်သကိုပ် ပ္ဍဲမုက်တြၚ်မ္ၚးအာရှာမ် ကၞပ်သ္ၚောံသ္ၚိတ်ဇြဒၟံၚ်အိုတ်တုဲ မုက်မတ်ဟွံကျေဝ်ဂမၠိုၚ်ဒှ်တုဲ မၞုံကဵုပၞးမဖျေံလဝ်မုက်သၟဝ်ဂမၠိုၚ်ဒှ်တုဲ ၚုၚ်ၚဇြဟောံဂမၠိုၚ်ဒှ်တုဲ ဟွံဟီုအရေဝ်ဂမၠိုၚ်ဒှ်တုဲ ဂဇအ်ဒၟံၚ်အိုတ်ရ။ ပ္ဍဲအခိၚ်ဂှ် ခမဳဗြဴမေတ္တိယာ ပြာပ်ကၠုၚ်ဇရေၚ် ခမဳမေတ္တိယဘူမဇကဂမၠိုၚ်တုဲ ပ္ဍဲကြဴ “ယွံတဳလပိုဉ်တအ် လ္ၚောဝ်သ္ပဝတ်ရ” ရဴဝွံ သ္ဂးကဵုခမဳမေတ္တိယဘူမဇကဂမၠိုၚ်ရ၊ သ္ဂးတဴရဴဝွံမ္ဂး ခမဳမေတ္တိယဘူမဇကဂမၠိုၚ် ဟွံဟီုအရေဝ်အိုတ်ရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ခမဳဗြဴမေတ္တိယာဂှ် “ယွံတဳလပိုဉ်တအ် လ္ၚောဝ်သ္ပဝတ်ရ” ရဴဝွံ သ္ဂးကဵုခမဳမေတ္တိယဘူမဇကဂမၠိုၚ်ရ၊ မနုက်ကဵုပိဝါလေဝ် ခမဳမေတ္တိယဘူမဇကဂမၠိုၚ် ဟွံဟီုအရေဝ်အိုတ်ရ။ အဲဍိက်ဗြဴ ပသာ်လုတ်မှာဒးဒုဟ် ကုတဳလပိုဉ်တအ်ညးဂမၠိုၚ်ဂှ်ရော? မုဟိုတ်တဳလပိုဉ်တအ် ညးဂမၠိုၚ် ဟွံဟီုအရေဝ်ကဵုအဲဍိက်ဗြဴအိုတ်ဂှ်ရော? ရဴဝွံ (သၟာန်ရ)။ ယွံဒေံဗြဴ လဴထ္ၜးကဵု အတိုၚ်ဒဒှ်ပိုဲတအ်ရ၊ ဒဗ္ဗကောန်သၟိၚ်မလ္လ သီုဂပ်ဝ်ရာန်သကိုတ် ပျဲပျာံဒၟံၚ်ပိုဲညးဂမၠိုၚ်ဂှ်တၠအဲ သ္ၚဳမဲမဇ္ၛဟ်ရောၚ်သွံ ရဴဝွံ (သ္ဂးအိုတ်ရ)။ ယွံတဳလပိုဉ်တအ် အဲဍိက်ဗြဴ မုမွဲသ္ဂောံသ္ပညိဂှ်ရော? ရဴဝွံ (သၟာန်ရ)။ ယွံဒေံဗြဴ တၠအဲ ယဝ်နွံပၟိက်မ္ဂး ပ္ဍဲတ္ၚဲဝွံဟေၚ် တဳလမၞုံပိုဉ်ကျာ်တြဲ ဩဝ်ကဵုပြာမ် (ပလီုပလာ်) ထောံဒဗ္ဗကောန်သၟိၚ်မလ္လရ ရဴဝွံ (သ္ဂးအိုတ်ရ)။ ယွံတဳလပိုဉ်တအ် အဲဍိက်ဗြဴ မုမွဲ သ္ဂောံသ္ပညိဂှ်ရော? အဲဍိက်ဗြဴတၞဟ်နသ္ပတဴ မုမွဲ သၟဟ်ရထဂှ်ရော? ရဴဝွံ (သၟာန်ရ)။ ယွံဒေံဗြဴ ဩဝ်ကၠုၚ်ညိ၊ တၠအဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံတဳလမၞုံပိုဉ် ပွဝွံ ဟွံထေက်ကြိုက်ရ၊ ဟွံဗဗွဲရ၊ ယွံတဳလမၞုံပိုဉ် ယြဴဌာန်ဒိုဟ်မွဲ ဟွံမွဲကၠုၚ်ကဵုဘဲရ၊ ဟွံမွဲကၠုၚ်ကဵု သၞသတြုသၞဝဲရ၊ ဟွံမွဲကၠုၚ်ကဵုပရိုက်ဥပ္ပဒ္ဒြဴ မလေပ်ရာန်သကိုတ်ရ၊ ယြဴနူဒိုဟ်မွဲ ဟွံမွဲကၠုၚ်ကဵု ပွမကျာဗာပိုက်လွိၚ်၊ (လၟုဟ်) နူဒိုဟ်ဂှ် မၞုံကၠုၚ်ကဵုကျာဗာပိုက်လွိၚ်ရ၊ တဳလပိုဉ်ဒဗ္ဗ ကောန်သၟိၚ်မလ္လ ဂပ်ဝ်ပလီုပလာ်ထောံ အဲဍိက်ဗြဴရ” ရဴဝွံ ဩဝ်ဂရၚ်ပတီညိ ရဴဝွံ (သ္ဂးအိုတ်ရ)။ ယွံတဳလပိုဉ်တအ် ခိုဟ်သန်ရ ရဴဝွံ ခမဳဗြဴမေတ္တိယာ ဒုၚ်ဝန်ကုခမဳမေတ္တိယဘူမဇကဂမၠိုၚ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်တန်တဴဒၟံၚ် ပ္ဍဲဒၞါဲမွဲရ၊ ခမဳဗြဴမေတ္တိယာ မဂဇအ်တန်တဴဒၟံၚ် ပ္ဍဲဒၞါဲမွဲတုဲဂှ် “ယွံတဳလမၞုံပိုဉ် ပွဝွံ ဟွံထေက်ကြိုက်ရ၊ ဟွံဗဗွဲရ၊ ယွံတဳလမၞုံပိုဉ် ယြဴဌာန်ဒိုဟ်မွဲ ဟွံမွဲကၠုၚ်ကဵုဘဲရ၊ ဟွံမွဲကၠုၚ်ကဵု သၞသတြုသၞဝဲရ၊ ဟွံမွဲကၠုၚ်ကဵုပရိုက်ဥပ္ပဒ္ဒြဴ မလေပ်ရာန်သကိုတ်ရ၊ ဌာန်ဒိုဟ်ဂှ် (လၟုဟ်) မၞုံကဵုဘဲရ၊ မၞုံကဵုဘဲရ၊ မၞုံကဵုသၞသတြုသၞဝဲရ၊ မၞုံကဵုပရိုက်ဥပ္ပဒ္ဒြဴ မလေပ်ရာန်သကိုတ်ရ၊ ယြဴနူဒိုဟ်မွဲ ဟွံမွဲကၠုၚ်ကဵု ပွမကျာ်ဗာပိုက်လွိၚ်ရ၊ (လၟုဟ်) နူဒိုဟ်ဂှ် မၞုံကၠုၚ်ကဵုပွမကျာဗာပိုက်လွိၚ်ရ၊ တဳလပိုဉ်ဒဗ္ဗ ကောန်သၟိၚ်မလ္လ ဂပ်ဝ်မလီုပလာ်ထောံ အဲဍိက်ဗြဴရ” ရဴဝွံ ဩဝ်ဂရၚ်ပတီညိ ရဴဝွံ (သ္ဂးအိုတ်ရ)။ ယွံတဳလပိုဉ်တအ် ခိုဟ်သန်ရ ရဴဝွံ ခမဳဗြဴမေတ္တိယာ ဒုၚ်ဝန်ကုခမဳမေတ္တိယဘူမဇကဂမၠိုၚ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲဂဇအ်တန်တဴဒၟံၚ် ပ္ဍဲဒၞါဲမွဲရ၊ ခမဳဗြဴမေတ္တိယာ မဂဇအ်တန်တဴဒၟံၚ် ပ္ဍဲဒၞါဲမွဲတုဲဂှ် “ယွံတဳလမၞုံပိုဉ် ပွဝွံ ဟွံထေက်ကြိုက်ရ၊ ဟွံဗဗွဲရ၊ ယွံတဳလမၞုံပိုဉ် ယြဴဌာန်ဒိုဟ်မွဲ ဟွံမွဲကၠုၚ်ကဵုဘဲရ၊ ဟွံမွဲကၠုၚ်ကဵု သၞသတြုသၞဝဲရ၊ ဟွံမွဲကၠုၚ်ကဵုပရိုက်ဥပ္ပဒ္ဒြဴ မလေပ်ရာန်သကိုတ်ရ၊ ဌာန်ဒိုဟ်ဂှ် (လၟုဟ်) မၞုံကဵုဘဲရ၊ မၞုံကဵုသၞသတြုသၞဝဲရ၊ မၞုံကဵုပရိုက်ဥပ္ပဒ္ဒြဴ မလေပ်ရာန်သကိုတ်ရ၊ ယြဴနူဒိုဟ်မွဲ ဟွံမွဲကၠုၚ်ကဵု ပွမကျာဗာပိုက်လွိၚ်ရ၊ (လၟုဟ်) နူဒိုဟ်ဂှ် မၞုံကၠုၚ်ကဵု ပွမကျာဗာပိုက်လွိၚ်ရ၊ ဍာ်ဂှ် သၟဟ်ညံၚ်ဂဵုဍာဲဒၟံၚ်ရောၚ် ထေၚ်ရ၊ တဳလပိုဉ်ဒဗ္ဗ ကောန်သၟိၚ်မလ္လ ဂပ်ဝ်ပလီုပလာ် အဲဍိက်ဗြဴရ” ရဴဝွံ ဩဝ်ဂရၚ်ပတီညိ တဳလမၞုံပိုဉ်ကျာ်တြဲရ။
384) ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး ယွံဒဗ္ဗ အတိုၚ်ခမဳဗြဴဝွံဟီုဂှ် တၠအဲ သ္ပဒးကမၠောန် ပွမပလီုပလာ် မၞုံသဘဴရဴဝွံရဂှ် ဂွံသတိ (သမ္တီ) ဒးဟာ” ရဴဝွံ စၟဳစၟတ်သၟာန်သၟုက် တဳလပိုဉ်ဒဗ္ဗ ကောန်သၟိၚ်မလ္လရ။ ယွံတဳလမၞုံပိုဉ် အတိုၚ်တဳလမၞုံပိုဉ်ကျာ်တြဲ တီတဴ အဲဍိက်ဟေၚ်ရ ရဴဝွံ (ဂရၚ်ပတီရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ယွံဒဗ္ဗ အတိုၚ်ခမဳဗြဴဝွံဟီုဂှ် တၠအဲ သ္ပဒးကမၠောန်ပွမပလီုပလာ် မၞုံသဘဴရဴဝွံရဂှ် ဂွံသတိ (သမ္တီ) ဒးဟာ” ရဴဝွံ (သ္ဂးရ)။ ယွံတဳလမၞုံပိုဉ် အတိုၚ်တဳလမၞုံပိုဉ်ကျာ်တြဲ တီတဴ အဲဍိက်ဟေၚ်ရ ရဴဝွံ (ဂရၚ်ပတီရ)။ ယွံဒဗ္ဗ တၠပညာဂမၠိုၚ် ဟွံခၠေဝ်သှ်ရဴဝွံအိုတ်ရ၊ (ဟွံသောၚ်ကလးရဴဝွံအိုတ်ရ)၊ တၠအဲ ယဝ်ဂပ်ဝ်သ္ပဒးမ္ဂး၊ ဂပ်ဝ်သ္ပဒးရ ရဴဝွံ ဩဝ်ဂရၚ်ပတီညိ ရဴဝွံ (သ္ဂးရ)။ ယွံတဳလမၞုံပိုဉ် အဲဍိက် သ္ပတမ်နူၜံၚ်သၠးတိတ်တုဲ နအယာံမာတ်တိက်လ္ပအ်ညာတ်လေဝ် သွိုန်ဗပိုန်သိပ်ဂၠိပ်ဒး ဒ္ဂေတ်မေထုန်ရဂှ် ဟွံတီရ၊ အဲဍိက်မၚုဟ်ဒၟံၚ်ဂှ် မုသ္ဇက်သ္ဂးနွံဏီဂှ်ရော? ရဴဝွံ (ဂရၚ်ပတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် ယဝ်ဒှ်သာ်ဂှ်မ္ဂး ဩဝ်ပြာမ်ပၠေၚ်ထောံ ခမဳဗြဴမေတ္တိယာအိုတ်ညိ၊ (ဩဝ်ပလီုပလာ်ထောံ (အယောၚ်အလာ) ခမဳဗြဴမေတ္တိယာအိုတ်ညိ)၊ ခမဳ (မဖအောဝ်စကာ) ဂမၠိုၚ်ဝွံလေဝ် ဩဝ်စၟဳစၟတ်သၟာန်သၟုက်အိုတ်ညိ” ရဴဝွံ သ္ဂးကဵုခမဳဂမၠိုၚ်ရ။ တဳလမၞုံပိုဉ်ကျာ်တြဲ သ္ဂးတိုန်ဂလာန်ဝွံတုဲမ္ဂး ဒၠိုက်ကတဵုနူဒၞါဲတုဲ က္ညလုပ်အာဘာရ။ ပ္ဍဲအခိၚ်ဂှ် ခမဳဂမၠိုၚ်ဂှ် ပြာမ်ပၠေၚ်ထောံခမဳဗြဴမေတ္တိယာအိုတ်ရ၊ ပ္ဍဲအခိၚ်ဂှ် ခမဳမေတ္တိယဘူမဇကဂမၠိုၚ်— “ယွံကောန်တၠတအ် ဩဝ်လ္ပပြာမ်ပၠေၚ်ထောံ ခမဳဗြဴမေတ္တိယာအိုတ်ညိ၊ ခမဳဗြဴဂှ်လုတ်မှာဒုဟ်မမိက်ကဵုမွဲမွဲ ဟွံသေၚ်ရ၊ ပိုဲညးဂမၠိုၚ်မထေဲပၞတ် မဟွံမိပ်စိုတ် မမိက်ကဵုတသိုတ်အာ (နူသာသနာ) ဟေၚ် ဂပ်ဝ်ဖအောဝ်ဗတိုက် ခမဳဗြဴဂှ်အိုတ်ရ” ဟီုသ္ဂးကဵုခမဳဂမၠိုၚ်အိုတ်ရ။ ယွံကောန်တၠတအ် မၞးတအ်ညးဂမၠိုၚ် စောတ်စောဲပလီုပလာ် တဳလပိုဉ်ဒဗ္ဗကောန်သၟိၚ်မလ္လ နအာပတ်ပါရာဇ် မဟွံမွဲကဵုရိုဟ်တၞမ်အိုတ်ဟာ ရဴဝွံ (သၟာန်အိုတ်ရ)။ ခမဳပၟိက်အောန်ဂမၠိုၚ်ဂှ် “ခမဳမေတ္တိယဘူမဇကဂမၠိုၚ် မုဟိုတ်စောတ်စောဲပလီုပလာ် တဳလပိုဉ်ဒဗ္ဗ ကောန်သၟိၚ်မလ္လ နအာပါတ်ရာဇ် မဟွံမွဲကဵုရိုဟ်တၞမ်အိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳမေတ္တိယဘူမဇကဂမၠိုၚ် နဟိုတ်ဂမၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ် ကျာ်တြဲအိုတ်ရ ။ ပ ။ “ယွံတဳတအ် မၞးတအ်ညးဂမၠိုၚ် စောတ်စောဲပလီုပလာ် ဒဗ္ဗကောန်သၟိၚ်မလ္လ နအာပတ်ပါရာဇ် မဟွံမွဲကဵုရိုဟ်တၞမ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်စောတ်စောဲပလီုပလာ် ဒဗ္ဗကောန်သၟိၚ်မလ္လ နအာပတ်ပါရာဇ် မဟွံမွဲကဵုရိုဟ်တၞမ်အိုတ်ဂှ်ရော? ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္္ခာပိုဒ်ဝွံအိုတ်ညိ။
385) ယြဴခမဳမွဲ မၞုံကဵုစိုတ်ဒေါသမဂပ်ဝ်ပ္ဍဵုပ္ဍိုက် မမိက်ပလီုပလာ်ဒှ်တုဲ ဟွံသ္ဍိုက်မၠိုက်ဒှ်တုဲ ‘ကဵုခမဳဂှ် တသိုတ်အာနူဒ္ဂေတ်မပြဲဝွံမာန်ရ’ ချပ်ရဴဝွဴတုဲ စောတ်စောဲပလီုပလာ် နအာပတ်ပါရာဇ် မဟွံမွဲကဵုရိုဟ်တၞမ်မ္ဂး၊ ပ္ဍဲကြဴနူစောတ်စောဲပလီုပလာ်တုဲဂှ် (ညးသအာၚ်ဂမၠိုၚ်) ဂပ်ဝ်သၟာန်စၟဳစၟတ်တုဲကီုလဝ် သီုမဟဂပ်ဝ်သၟာန်စၟဳစၟတ်ကီုလဝ် အဓိကိုရ်ဂှ်လေဝ် ဟွံမွဲကဵုရိုဟ်တၞမ်ဒှ်မ္ဂး၊ ခမဳမစောတ်စောဲဂှ်လေဝ် ဒုၚ်ဝန်ဒုဟ်မ္ဂး၊ (ကုခမဳဂှ်) ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးသိက္ခာပိုဒ်ဝွံအိုတ် ရဴဝွံ သ္ဂးရ)။
