၂.၇။ ဝိဟာရကာရသိက္ခာပိုဒ်

365) ပ္ဍဲအခိင်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံင် ပ္ဍဲဘာဃောသိတာရာမ် ဇရေင်ဍုင်ကောသမ္ဗဳဂှ် သမ္ၚေဟ်မဒှ်ညးကေၠာန်ၜိုတ်ဥပကာ တဳလပိုဉ်ဆန္နဂှ် “ယွံတဳလပိုဉ် ဩဝ်တီကေတ်ဂအာင်ဘာညိ၊ ကြက်ကဵုသိုင်ခၞံဘာ သွက်တဳလပိုဉ်ရ” ရဴဝွံ ဂရင်ပတီ တဳလပိုဉ်ဆန္နရ။ ပ္ဍဲအခိင်ဂှ် တဳလပိုဉ်ဆန္န သအးဇ္ၚးၚးတး ဂအာင်ဘာမ္ဂး ကဵုကုတ်ကၠေံ တၞံဆုဗယိမွဲ ကွာန်မဂပ်ဝ်သ္ပပူဇဴ နိဂီုမဂပ်ဝ်သ္ပပူဇဴ ဇနပိုဒ်ရးမဂပ်ဝ်သ္ပပူဇဴ တွဵုရးဍုင်မဂပ်ဝ်သ္ပပူဇဴရ။ “ခမဳဂမၠိုင် မဒှ်တၞောဝ်ကျာ်ကောန်သၟိင်သာကျဝင် တၞံဆၞဗယိ ကွာန်မဂပ်ဝ်သ္ပပူဇဴ နိဂီုမဂပ်ဝ်သ္ပပူဇဴ ဍုင်မဂပ်ဝ်သ္ပပူဇဴ ဇနပိုဒ်ရးမဂပ်ဝ်သ္ပပူဇဴ တွဵုရးဍုင်မဂပ်ဝ်သ္ပပူဇဴဂှ် မုဟိုတ်ကဵုကုတ်ကၠေံအိုတ်ဂှ်ရော? ခမဳဂမၠိုင် မဒှ်တၞောဝ်ကျာ်ကောန်သၟိင်သာကျဝင် ရာန်သကိုတ်တဴလမျီု မၞုံကဵုဣနြ္ဒဳမွဲအိုတ်ရ” ရဴဝွံ မၞိဟ်ဂမၠိုင် ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုင် သ္ဂောံမိင်ကေတ် (ဂလာန်) မၞိဟ်ဂမၠိုင် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ရ၊ ခမဳပိၟက်အောန်ဂမၠိုင် “တဳလပိုဉ်ဆန္န တၞံဆုဗယိ ကွာန်မဂပ်ဝ်သ္ပပူဇဴ ။ ပ ။ တွဵုရးဍုင်ဂပ်ဝ်သ္ပပူဇဴဂှ် မုဟိုတ် ကဵုကုတ်ကေၠံဂှ် ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုင်ဂှ် ဟီုဂရိုဟ်တင်ဒုဟ် တဳလပိုဉ်ဆန္န နဟိုတ်မဂၠိုင်အိုတ်တုဲ ဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံဆန္န တၠအဲ ကဵုကုတ်ကေၠံတၞံဆုဗယိ ကွာန်မဂပ်ဝ်သ္ပပူဇဴ ။ ပ ။ တွဵုရးဍုင်မဂပ်ဝ်သ္ပပူဇဴရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရင်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံတြုံမလ္ၚုသၟး (နူမဂ်ဖိုလ်) တၠအဲ တၞံဆုဗယိ ကွာန်မဂပ်ဝ်သ္ပပူဇဴ နဳဂီု မဂပ်ဝ်သ္ပပူဇဴ ဍုင်မဂပ်ဝ်သ္ပပူဇဴ ဇနပိုဒ်ရးမဂပ်ဝ်သ္ပပူဇဴ တွဵုရးဍုင်မဂပ်ဝ်သ္ပပူဇဴဂှ် မုဟိုတ်ကဵုကုတ်ကေၠံဂှ်ရော? ။ ပ ။ ယွံတြုံမလ္ၚုသၟး (နူမဂ်ဖိုလ်) မၞိဟ်ဂမၠိုင် ပ္ဍဲတၞံဆုဂှ် မၞုံကဵုပွမသမ္တီထေင်ကေတ် ရဴဝွံမ္ဂးမၞုံကဵု လမျီုအိုတ်ရ၊ ယွံတြုံမလ္ၚုသၟး (နူမဂ်ဖိုဟ်) (ပွတၠအဲသ္ပဒး)ဝွံ ကုညးဟွံလျုင်ဇြုင်သ္ဍိုက်ဂမၠိုင်ဏီ တၞဟ်နပွမကဵုလျုင်ဇြုင်သ္ဍိုက်ကီု ။ ပ ။ ယွံခမဳတအ် ရဴဝွံဟေင် ဩဝ်စၞောန်ထ္ၜးသိက္ခာပိုဒ်ဝွံ အိုတ်ညိ။

366) ခမဳမမိက်သိုင်ခၞံဘာမဇေၞာ် မဟွံမွဲကဵုတၠ (ဒကာညးမသိုင်) မၞုံကဵုပူဂိုလ်မဂပ်ဝ် စၞောန်ထ္ၜးမ္ဂးဇကုတုန် တၞဟ်နစၞောန်ထ္ၜးဂအာင်ဘာ ဂပ်ဝ်ရင်တၠုင်ဘိက်နိမန်နင် ခမဳဂမၠိုင်အိုတ်ရ၊ ခမဳဂမၠိုင်ဂှ် ဂပ်ဝ်စၞောန်ထ္ၜးဂအာင်ဘာ မဟွံမွဲကဵုပရိုက်ဘဲ မပ္တံစၟဂြုန် မၞုံကဵုဥပစာမွဲ သ္ပဝ်ကွဳအိုတ်ရ၊ ခမဳဂှ် ပ္ဍဲဂအာင်ဘာ မၞုံကဵုပရိုက်ဘဲ မပ္တံစၟဂြုန် မဟွံမွဲကဵုဉပစာ မွဲသ္ပဝ်ကွဳဂှ် ကဵုသိုင်ခၞံဘာမဇၞော်မ္ဂး၊ တၞဟ်နစၞောန်ထ္ၜး ဂအာင်ဘာမဇၞော် ခမဳဂမၠိုင်လေဝ် ဟွံရင်တၠုင်နိမန်နင်မ္ဂး၊ ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။