၂.၆.၂။ ဝတ္ထုသၟိၚ်နာ်မဏိကဏ္ဌ
344) ယွံခမဳတအ် ကေင်ဒှ်ကၠုင်ပ္ဍဲကိုပ်ကၠာတေံတုန် ရသိကောကဵုဒေံဂမၠိုင်ၜါ သ္ပနိဿယ်ဗ္ဒာဲကဵုကြုင်ဂၚ်္ဂါတုဲ သ္ပဒတဴအိုတ်ရ၊ ယွံခမဳတအ် ပ္ဍဲအခိင်ဂှ် သၟိင်နာ်မၞုံယၟုမဏိကဏ္ဌၜိင်ကေၠာံကြုင်ဂၚ်္ဂါတုဲ ပြာပ်ကၠုင်ဇရေင် ရသိဒေံတုဲမ္ဂး ပူပါတ်တဴရသိဒေံ နကဵုကဝးဂမၠိုင်ထပှ်ပွူတုဲ စၟဳလဝ်ကဵုဒၞော် (နော်) မဇေၞာ် ပ္ဍဲလတူကၞိပ် (က္ဍိုပ်) တုဲ တန်တဴရ၊ ယွံခမဳတအ် ပ္ဍဲအခိင်ဂှ် ရသိဒေံဂှ် ဖေက်နာ်ဂှ်တုဲ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ရ၊ မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်)ရ။ ယွံခမဳတအ် ရသိကောဂှ် သ္ဂောံညာတ်ကေတ် ရသိဒေံ မဇြာဲသကှ် ဖျုန်ဆီဒေက်ခ္ဍေက် ရုပ်သာ်လီုလာ် မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ် မၞုံကဵုဇကုဓရံင်ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ဂှ်တုဲ— “ယွံဒေံ တၠအဲ မုဟိုတ်ဇြာဲသကှ်ဂှ်ရော? ဖျုန်ဆီဒေက်ခ္ဍေက်ဂှ်ရော? ရုပ်သာ်လီုလာ်ဂှ်ရော? မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ဂှ်ရော? မၞုံကဵုဇကုဓရံင်ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ဂှ်ရော?” ရဴဝွံ သၟာန်ရသိဒေံရ။ ယွံကော ပ္ဍဲဌာန်ဝွံ သၟိင်နာ်မဏိကဏ္ဌ ၜိင်ကၠောံကြုင်ဂၚ်္ဂါတုဲ ပြာပ်ကၠုင်ဇရေင်အဲတုဲမ္ဂး ပူပါတ်လဝ်အဲ နကဵုကဝးဂမၠိုင် ထပှ်ပွူတုဲ စၟဳလဝ်ကဵုဒၞော် (နော်) မဇေၞာ် ပ္ဍဲလတူကၞိပ် (က္ဍိုပ်) တုဲ တန်တဴရ၊ ယွံကော အဲဟိုတ်မဖေက်နာ်ဂှ်ရ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ရ၊ မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ရ ရဴဝွံ (သ္ဂးရ)။ ယွံဒေံဍောတ် တၠအဲ နွံပၟိက်ကဵုနာ်ဂှ် ဟွံကၠုင်ဟာ ရဴဝွံ (သၟာန်ရ)။ ယွံကော အဲနွံပၟိက်ကဵုနာ်ဂှ် ဟွံကၠုင်ရ ရဴဝွံ (သ္ဂးရ)။ ယွံဒေံဍောတ် တၠအဲ ညာတ်ဒၟံင်ဇြပ်နာ်ဂှ် မမိက်ကဵုမွဲမွဲဟာ ရဴဝွံ (သၟာန်ရ)။ ယွံကော အဲ ညာတ်ဒၟံင်မၞိဟ် မကျိုင်ကျဝ်ကွက်လဝ် ပ္ဍဲကအ်နာ်ဂှ်ရ ရဴဝွံ (သ္ဂးရ)။ ယွံဒေံဍောတ် ယဝ်ဒှ်သာ်ဂှ်မ္ဂး တၠအဲဂှ် “ယွံသၟိင်နာ် မၞိက်ဂှ် ဩဝ်ကဵုကုအဲညိ၊ အဲနွံပၟိက်ကဵုမၞိက်ရ” ရဴဝွံ ဩဝ်အာတ်နာ်ဂှ် မၞိက်ညိ ရဴဝွံ (သ္ဂးရ)။ ယွံခမဳတအ် ပ္ဍဲအခိင်ဂှ် သၟိင်နာဂ်မဏိကဏ္ဌ ၜိင်ကေၠာံကြုင်ဂၚ်္ဂါတုဲ ပြာပ်ကၠုင်ဇရေင်ရသိဒေံတုဲမ္ဂး တန်တဴဒၟံင် ပ္ဍဲဌာန်မွဲရ၊ ယွံခမဳတအ် သၟိင်နာဂ်မဏိကဏ္ဌ မတန်တဴပ္ဍဲဌာန်မွဲတုဲဂှ် ရသိဒေံဂှ် “ယွံသၟိင်နာ် မၞိက်ဂှ် ဩဝ်ကဵုကုအဲညိ၊ အဲနွံပၟိက်ကဵုမၞိက်ရ” ရဴဝွံ သ္ဂးရ၊ ယွံခမဳတအ် ပ္ဍဲအခိင်ဂှ် သၟိင်နာဂ်မဏိကဏ္ဌဂှ် “ခမဳဂှ် အာတ်ဒၟံင်မၞိက်ရ၊ ခမဳဂှ် နွံပိၟက်ကဵုမၞိက်ရ” ရဴဝွံ ဗွဲမပြဟ်သန်ဟေင် (တိတ်) အာရ။ ယွံခမဳတအ် မရနုက်ကဵုၜါဝါလေဝ် သၟိင်နာဂ်မဏိကဏ္ဌ ၜိင်ကၠောံကြုင်ဂၚ်္ဂါတုဲ ပြာပ်ကၠုင်ဇရေင် ရသိဒေံရ။ ယွံခမဳတအ် ရသိဒေံဂှ် ညာတ်ကေတ်သၟိင်နာ်မဏိကဏ္ဌ မကၠုင်ဒၟံင်နူဇမ္ၚောဲဟေင်မ္ဂး “ယွံသၟိင်နာ် မၞိက်ဂှ် ဩဝ်ကဵုကုအဲညိ၊ အဲနွံပၟိက်ကဵုမၞိက်ရ” ရဴဝွံ သ္ဂးကဵုသၟိင်နာ် မဏိကဏ္ဌရ၊ ယွံခမဳတအ် ပ္ဍဲအခိင်ဂှ် သၟိင်နာ်မဏိကဏ္ဌဂှ် “ခမဳဂှ် အာတ်ဒၟံင်မၞိက်ရ၊ ခမဳဂှ် နွံပၟိက်ကဵုမၞိက်ရ” ရဴဝွံ နူဌာန်ဂှ်ဟေင် ဂတးကလေင်အာရ။ ယွံခမဳတအ် မရနုက်ကဵုပိဝါလေဝ် သၟိင်နာ်မဏိကဏ္ဌ ၜိင်ကေၠာံကြုင်ဂၚ်္ဂါရ၊ ယွံခမဳတအ် ရသိဒေံဂှ် ညာတ်ကေတ် သၟိင်နာ်မဏိကဏ္ဌ ၜိင်ကေၠာံကၠုင်ကြုင်ဂၚ်္ဂါမ္ဂး “ယွံသၟိင်နာ်မၞိက်ဂှ် ဩဝ်ကဵုကုအဲညိ၊ အဲနွံပၟိက်ကဵုမၞိက်ရ” ရဴဝွံ သ္ဂးကဵုသၟိင်နာ်မဏိကဏ္ဌရ။ ယွံခမဳတအ် ပ္ဍဲအခိင်ဂှ် သၟိင်နာ်မဏိကဏ္ဌဂှ်— “ပုင်ဍာ်ပၠာဲ မလှဲလးမပြဲ ကုအဲဂှ် ကတဵုဒှ်ကၠုင် ဟိုတ်နူမၞိက်ဝွံရ၊ မၞိက်ဂှ် ကြက်ကဵုကုတၠအဲ ဟွံသေင်ရ၊ တၠအဲ ဒှ်ညးလေပ်အာတ်လောန်ဗၞတ်ရ၊ ဘာအဿမပိုဒ် တၠအဲလေဝ် ကြက်ကၠုင် ဟွံသေင်ရ။ သၟတ်ဗၠာဲ ညးမရပ်လဝ်သၞာ် မဂပ်ဝ်ချူလဝ် ပ္ဍဲတၟံဂှ် သၟဟ်ညံင်ရဴစမြ (ဘပဠ) ဒၟံင်အဲကီု အာတ်မၞိက်တုဲ စမြဗဟေက်ဒၟံင်ရ၊ တၠအဲ ဒှ်ညးလေပ်အာတ်လောန်ဗၞတ်ရ၊ ဘာအဿမပိုဒ်တၠအဲလေဝ် ကြက်ကၠုင်ဟွံသေင်ရ” ရဴဝွံ သ္ဂးကဵုရသိဒေံဂှ် နကဵုဂါထာဂမၠိုင်ရ။ ယွံခမဳတအ် ပ္ဍဲကြဴနူဂှ် သၟိင်နာ်မဏိကဏ္ဌဂှ် “ခမဳဂှ် အာတ်ဒၟံင်မၞိက်ရ၊ ခမဳဂှ် နွံပၟိက်ကဵုမၞိက်ရ” ရဴဝွံ ပါဲစ္ဍးအာရ၊ ပါဲစ္ဍးအာ အတိုင်ပါဲစ္ဍးအာဟေင်ရ၊ မွဲလှေ်ပၠန် ဟွံကလေင်ကၠုင်ရ။ ယွံခမဳတအ် ပ္ဍဲအခိင်ဂှ် ရသိဒေံဂှ် ဟဂွံညာတ်ကေတ် နာ်မညာတ်ဒၟံင်လိၟုန်ဂှ်တုဲ လောန်လတူကိုပ်ကၠာတေံ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ရ၊ မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ရ။ ယွံခမဳတအ် ရသိကောဂှ် သ္ဂောံညာတ်ကေတ် ရသိဒေံ လောန်လတူကိုပ်ကၠာတေံ မဇြာဲသကှ် ဖျုန်ဆီဒေက်ခ္ဍေက် ရုပ်သာ်လီုလာ် မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ် မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ဂှ် တုဲ ပ္ဍဲကြဴ— “ယွံဒေံ တၠအဲ မုဟိုတ် လောန်လတူကိုပ်ကၠာတေံ ဇြာဲသကှ်ဂှ်ရော? ဖျုန်ဆီဒေက်ခ္ဍေက်ဂှ်ရော? ရုပ်သာ်လီုလာ်ဂှ်ရော? မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ဂှ်ရော? မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ဂှ်ရော?” ရဴဝွံ သ္ဂးကဵုရသိဒေံရ။ ယွံကော အဲဟဂွံညာတ်ကေတ် နာ်မညာတ်ဒၟံင်လၟိုန်ဂှ်တုဲ လောန်လတူကိုပ်ကၠာတေံ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်ရ၊ မၞုံကဵုဇကု ဓရံင်ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) ရဴဝွံ သ္ဂးရ။ ခမဳတအ် ပ္ဍဲအခိင်ဂှ် ရသိကောဂှ်— “ယြဴအရာဝတ္ထု မဂပ်ဝ်သ္ဍိုက်ဆာန်မွဲ နွံယြဴကုညးမွဲရ၊ ဝတ္ထုညးဂှ်ဂှ် ၜိုန်သ္ဍိုက်မၠိုက်ဒးဂၞပ်လေဝ် ဟွံထေက်ကဵုအာတ်ရ၊ ဟိုတ်ပွမအာတ်လောန်ဗၞတ် ဒှ်ပွမက္ဍုဟ်မၠေံရ၊ ညးပြဲဂှ် အာတ်နာ်မၞိက်ရ၊ သ္ဒးအာစိုပ် ပွမဟဂွံညာတ်နာဂ်ဂှ်ဟေင်ရ” ရဴဝွံ သ္ဂးကဵုရသိဒေံဂှ် နကဵုဂါထာရ။ ယွံခမဳတအ် သတ်ဂမၠိုင် မဒှ်တိရစ္ဆာန်ဂှ်လေဝ် ဟွံသ္ဍိုက်မၠိုက် ပွမအာတ်အိုတ်ရ၊ ဟွံသ္ဍိုက်မၠိုက် ပွမထ္ၜးသၞိင်နိမိတ်အိုတ်ရ၊ ကုညးမဒှ်မၞိဟ်ဂမၠိုင်တုန် မုသ္ဇက်သ္ဂးနွံဏီဂှ်ရော?
345) ယွံခမဳတအ် ကေင်ဒှ်ကၠုင် ပ္ဍဲကိုပ်ကၠာတေံတုန် ခမဳမွဲဇကု သ္ပဒတဴဒၟံင်ပ္ဍဲသပိုဟ်ဂြိုပ်မွဲ ဇရေင်သကဲဒဵုဟိမဝန်ရ၊ ယွံခမဳတအ် ပ္ဍဲဇရေင်သပိုဟ်ဂြိုပ်ဂှ် လ္စသၠိုက်သရီု (အင်လှာ) မဇေၞာ်ခၠိုင်နွံရ၊ ယွံခမဳတအ် ပ္ဍဲအခိင်ဂှ် ဂကောံဂစေံပဝါမဂၠိုင် လုကဴမွဲတ္ၚဲ ဂေတ်ဂ္ၚေင်ဂၠာဲစ ပ္ဍဲလ္စအင်လှာဂှ်တုဲ ပ္ဍဲအခိင်သဝ်တ္ၚဲ တၞဟ်နပဒတဴ ပြာပ်အာသပိုဟ်ဂြိုပ်ဂှ်ရ။ ယွံခမဳတအ် ပ္ဍဲအခိင်ဂှ် ခမဳဂှ် ဗရုရမျာင်ဂကောံဂစေံပဝါဂှ် ဂပ်ဝ်ပ္ဍဵုပ္ဍိုက်ရာန်သကိုတ်ဗွဲမသကာတ်ဒှ်တုဲ ပြာပ်ကၠုင်ဇရေင်အဲတုဲမ္ဂး လ္ၚောဝ်သ္ပဝတ်အဲ ဗွဲမရှေ်သှေ်ရဴဂဴတုဲ ဂဇအ်ဒၟံင်ပ္ဍဲဒၞါဲမွဲရ၊ ယွံခမဳတအ် ခမဳမဂဇအ်ဒၟံင် ပ္ဍဲဒၞါဲမွဲတုဲဂှ်—
“ယွံခမဳ ဒုင်စရင်ဒၟံင်ဟာ၊ ယိုပ်ယာပ်ဒၟံင်ဟာ၊ သီုဟွံဒှ်လၟောင်ဍောင်ၜိုတ်ဂှ် သ္ဂောံကၠုင်တရဴအဓာန်မဂၠိင်သ္ၚောဲဟာ၊ ယွံခမဳ တၠအဲ မုရဴနူဌာန်လဵု ကၠုင်တဴဂှ်ရော?” ရဴဝွံ အဲသၟာန်ရ။
ဒုင်စရင်ဒၟံင်ရ ယွံကျာ်မၞုံပိုဉ်၊ ယိုပ်ယာပ်ဒၟံင်ရ ယွံကျာ်မၞုံပိုဉ် ယွံကျာ်မၞုံပိုဉ် အဲဍိက်သီုဟွံဒှ်လၟောင်ဍောင်ၜိုတ်ဂှ် သ္ဂောံကၠုင်တရဴအဓာန်မဂၠိင်သ္ၚောဲရ၊ ယွံကျာ်မၞုံပိုဉ် ပ္ဍဲဇရေင်သကဲဒဵုဟိမဝန်ဂှ် သပိုဟ်ဂြိုပ်ဇေၞာ် နွံမွဲရ၊ ယွံကျာ်မၞုံပိုဉ် ပ္ဍဲဇရေင်သပိုဟ်ဂြိုပ်ဂှ် သ္စသၠိုက်သရီု (အင်လှာ) မဇေၞာ်ခၠိုင် နွံရ၊ ယွံကျာ်မၞုံပိုဉ် ပ္ဍဲအခိင်ဂှ် ဂကောံဂစေံပဝါမဂၠိုင် လုကဴမွဲတ္ၚဲ ဂေတ်ဂ္ၚေင်ဂၠာဲစ ပ္ဍဲလ္စအင်လှာဂှ်တုဲ ပ္ဍဲအခိင်သဝ်တ္ၚဲ တၞဟ်နပဒတဴ ပြာပ်အာသပိုဟ်ဂြိုပ်ဂှ်ရ၊ ယွံကျာ်မၞုံပိုဉ် ဗရုရမျာင်ဂကောံဂစေမ်ပဝါဂှ် ဂပ်ဝ်ပ္ဍဵုပ္ဍိုက်ရာန်သကိုတ်ဒှ်တုဲ အဲဍိက် ကၠုင်နူဌာန်ဂှ်ရ ရဴဝွံ (ဂရင်ပတီရ)။ ယွံခမဳ တၠအဲ နွံပိၟက်ကဵုဂကောံဂစေံပဝါဂှ် ဟွံကၠုင်ဟာ ရဴဝွံ (သၟာန်တိုန်ဂှ်) ယွံကျာ်မၞုံပိုဉ် အဲဍိက် နွံပၟိက်ကဵုဂကောံဂစေံပဝါဂှ် ဟွံကၠုင်ရ ရဴဝွံ (ဂရင်ပတီရ)။ ယွံခမဳ ယဝ်ဒှ်သာ်ဂှ်မ္ဂး တၠအဲ အာဌာန်ဂှ်တုဲ လုပ်အာသပိုဟ်ဂြိုပ်ဂှ်တုဲမ္ဂး ပ္ဍဲအခိင်ကိုပ်ကၠာဗ္တမ် ဗၞတ်ပိဝါ ဩဝ်လၟိင်ဟီုတိုန်ရမျာင်ညိ။ “ယွံဂကောံဂစေံပဝါတအ် ဩဝ်ကလင် (ဂလာန်) အဲအိုတ်ညိ၊ ယြဴဂစေံဂမၠိုင်မၞုံဗၞတ်မွဲ ပြာပ်စိုပ်ပွမပဒတဴ ပ္ဍဲသပိုဟ်ဂြိုပ်ဝွံအိုတ်ရ၊ အဲနွံပၟိက်ကဵုသၞေင်ရ၊ ယွံဂကောံဂစေံပဝါတအ် ဩဝ်ကဵုကုအဲ သၞေင်မွဲမွဲဇဳအိုတ်ညိ ရဴဝွံ ဩဝ်လၟိင်ဟီုတိုန်ရမျာင်ညိ၊ ပ္ဍဲအခိင်သ္ဂာဗ္တမ်၊ ပ္ဍဲအခိင်ပယျာံဂယး ဗၞတ်ပိဝါ ဩဝ်လၟိင်ဟီုတိုန်ရမျာင်ညိ။ ယွံဂကောံဂစေံပဝါတအ် ဩဝ်ကလင် (ဂလာန်) အဲအိုတ်ညိ၊ ယြဴဂစေံဂမၠိုင်မၞုံဗၞတ်မွဲ ပြာပ်စိုပ်ပွမပဒတဴ ပ္ဍဲသပိုဟ်ဂြိုပ်ဝွံအိုတ်ရ၊ အဲနွံပၟိက်ကဵုသၞေင်ရ၊ ယွံဂကောံဂစေံပဝါတအ် ဩဝ်ကဵုကုအဲ သၞေင်မွဲမွဲဇဳအိုတ်ညိ ရဴဝွံ (ဩဝ်လၟိင်ဟီုတိုန်ရမျာင်ညိ ရဴဝွံ သ္ဂးရ)။ ယွံခမဳ ပ္ဍဲအခိင်ဂှ် ခမဳဂှ် အာဌာန်ဂှ်တုဲ လုပ်အာသပိုဟ်ဂြိုပ်ဂှ်တုဲမ္ဂး ပ္ဍဲအခိင်ကိုပ်ကၠာဗ္တမ်ဗၞတ်ပိဝါ လၟိင်ဟီုတိုန်ရမျာင်ရ။ “ယွံဂကောံဂစေံပဝါတအ် ဩဝ်ကလင် (ဂလာန်) အဲအိုတ်ညိ၊ ယြဴဂစေံဂမၠိုင်မၞုံဗၞတ်မွဲပြာပ်စိုပ်ပွမပဒတဴ ပ္ဍဲသပိုဟ်ဂြိုပ်ဝွံအိုတ်ရ၊ အဲနွံပိၟက်ကဵုသၞေင်ရ၊ ယွံဂကောံဂစေံပဝါတအ် ဩဝ်ကဵုကုအဲ သၞေင်မွဲမွဲဇဳအိုတ်ညိ ရဴဝွံ လၟိင်ဟီုတိုန်ရမျာင်ရ၊ ပ္ဍဲအခိင်သ္ဂာဗ္တမ်၊ ပ္ဍဲအခိင်ပယျာံဂယး ဗၞတ်ပိဝါ လၟိင်ဟီုတိုန်ရမျာင်ရ။ ယွံဂကောံဂစေံပဝါတအ် ဩဝ်ကလင် (ဂလာန်) အဲအိုတ်ညိ၊ ယြဴဂစေံဂမၠိုင်မၞုံဗၞတ်မွဲ ပြာပ်စိုပ်ပွမပဒတဴ ပ္ဍဲသပိုဟ်ဂြိုပ်ဝွံအိုတ်ရ၊ အဲနွံပၟိက်ကဵုသၞေင်ရ၊ ယွံဂကောံဂစေံပဝါတအ် ဩဝ်ကဵုကုအဲ သၞေင်မွဲမွဲဇဳအိုတ်ညိ ရဴဝွံ လၟိင်ဟီုတိုန်ရမျာင်ရ။ ယွံခမဳ ပ္ဍဲအခိင်ဂှ် ဂကောံဂစေံပဝါဂှ် “ခမဳဂှ် အာတ်သၞေင်ရ၊ ခမဳဂှ် နွံပၟိက်ကဵုသၞေင်ရ” ရဴဝွံ ပါဲစ္ဍးအာနူသပိုဟ်ဂြိုပ်ဂှ်ရ၊ ပါဲစ္ဍးအာ အတိုင်ပါဲစ္ဍးအာဟေင်ရ၊ မွဲလှေ်ပၠန် ဟွံကလေင်ကၠုင်ရ။ ယွံခမဳတအ် သတ်ဂမၠိုင် မဒှ်တိရစ္ဆာန်ဂှ်လေဝ် ဟွံသ္ဍိုက်မၠိုက် ပွမအာတ်အိုတ်ရ၊ ဟွံသ္ဍိုက်မၠိုက် ပွမထ္ၜးသၞိင်နိမိတ်အိုတ်ရ၊ ကုညးမဒှ်မၞိဟ်ဂမၠိုင်တုန် မုသ္ဇက်သ္ဂးနွံဏီဂှ်ရော?
346) ယွံခမဳတအ် ကေင်ဒှ်ကၠုင်ပ္ဍဲကိုပ်ကၠာတေံတုန် မအံက် ကောန်ဂကူရဋ္ဌပါလဂှ် “(ယွံကောန်သ္ဍိုက်) ရဋ္ဌပါလ ဗွဲစၟတ် မၞိဟ်ဂမၠိုင်မဂၠိုင်ဂှ် အဲ ဟွံတီရ၊ မၞိဟ်မဂၠိုင်ဂှ် ကောံကၠုင်ဇရေင်အဲအိုတ်တုဲ အာတ်အိုတ်ရ၊ မုဟိုတ် တၠအဲ ဟွံအာတ်အဲဂှ်ရော?” ရဴဝွံ သ္ဂးကဵုကောန်ဂကူရဋ္ဌပါလ နကဵုဂါထာရ။ “ယွံမအံက် ညးမလေပ်အာတ်ဂှ် ဒှ်အရာထေက်ကဵုက္ဍုဟ်မၠေံရ၊ ညးဟွံကဵုတဴအရာမအာတ်ဂှ်လေဝ် ဒှ်အရာထေက်ကဵုက္ဍုဟ်မၠေံဟေင်ရ၊ ကုအဲဂှ် ဟိုတ်မဟွံမိက်ကဵုဒှ်ပွမက္ဍုဟ်မၠေံဂှ် အဲဟွံအာတ် တၠအဲရ” ရဴဝွံ (ကလေင်ဟီုရ)။ ယွံခမဳတအ် ကောန်ဂကူရဋ္ဌပါလဂှ် အပါအံက်ဇကုဂှ်မှ ရဴဝွံ ဟွံအာတ်ဏီရ၊ မၞိဟ် (ညးသအာင်) ဂှ် မၞိဟ် (ညးသအာင်) တုန် မုသ္ဇသ်သ္ဂးနွံဏီရော?
347) ယွံခမဳတအ် မၞိဟ်ဂမၠိုင် ဂပ်ဝ်ဇြိုင်ဂွံပကောံပကေဝ် ပိုဉ်ဟာန်ဂြပ်ရတ်ဂမၠိုင်အိုတ်ရ၊ ပိုဉ်ဟာန်ဂြပ်ရတ်ဂမၠိုင် မဂပ်ဝ်ပကောံပကေဝ်လဝ်တုဲလေဝ် ဂပ်ဝ်ဇြိုင်ဂွံမင်မွဲအိုတ်ရ၊ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုင် ပ္ဍဲပိုဉ်ဟာန်ဂြပ်ရတ်ဂမၠိုင် ဂပ်ဝ်ဇြိုင်ဂွံပကောံပကေဝ် ဂပ်ဝ်ပကောံပကေဝ်လဝ်တုဲလေဝ် မဂပ်ဝ်ဇြိုင်ဂွံမင်မွဲမာန်ရဴဝွံဂှ် “ဩဝ်ကဵုမၞိဟ်တြုံအိုတ်ညိ၊ ဩဝ်ကဵုကေင်ကာတဲတြုံအိုတ်ညိ၊ ဩဝ်ကဵုဂၠဴအိုတ်ညိ၊ ဩဝ်ကဵုကွဳအိုတ်ညိ၊ ဩဝ်ကဵုဝါစဳ (ဗဗဴ) အိုတ်ညိ၊ ဩဝ်ကဵုမုဲအိုတ်ညိ၊ ဩဝ်ကဵုမြပံင်အိုတ်ညိ၊ ဩဝ်ကွဵုဇၜံက်အိုတ်ညိ၊ ဩဝ်ကဵုပၞုတ်အိုတ်ညိ၊ ဩဝ်ကဵုဇုက်လွာအိုတ်ညိ၊ ဩဝ်ကဵုဒုန်အိုတ်ညိ၊ ဩဝ်ကဵုကၟတ်ဇပူအိုတ်ညိ၊ ဩဝ်ကဵုကၟတ်စောဗဲအိုတ်ညိ၊ ဩဝ်ကဵုချောဲ (သှေ်သၟေဟ်) အိုတ်ညိ၊ ဩဝ်ကဵုတိကမၠေတ်အိုတ်ညိ” ရဴဝွံ အာတ်ဂၠိုင်ဂမၠိုင်ဒှ်တုဲ ထ္ၜးသၞိင်နိမိတ်ဂၠိုင်ဂမၠိုင်ဒှ်တုဲ သ္ပဒတဴအိုတ်ရောင်သွံ။ ယွံတြုံမလ္ၚုသၟး (နူမဂ်ဖိုလ်) (ပွမၞးတအ်ညးဂမၠိုင်သ္ပဒး) ဝွံ ကုညးဟွံလျုင်ဇြုင်သ္ဍိုက်ဂမၠိုင်ဏီ တၞဟ်နပွမကဵုလျုင်ဇြုင်သ္ဍိုက်ကီု ။ ပ ။ ယွံခမဳတအ် ရဴဝွံဟေင် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
348) ခမဳ မမိက်ကဵုသိုင်ခၞံဘာကုဋ် မဟွံမွဲကဵုတၠ (ဒကာညးမသိုင်) မၞုံကဵုပူဂိုလ်မစၞောန်ထ္ၜးမ္ဂးဇကု နကပေါတ်ကြိယာဗာ မဂပ်ဝ်အာတ်အလဵုဇကုတုန် ဂပ်ဝ်ကဵုသိုင်ခၞံဘာမၞုံကဵုဗၞတ်ဗ္ၜတ်ပမာဏာရ၊ ကြက်သ္ဂးဂတဝွံတုန် ဗၞတ်ဗ္ၜတ်ပမာဏဘာဂှ်ရောင်၊ နကဵုက္ဍစၞေန်တဲကျာ်ဇမၠိင်စှ်ၜါက္ဍ အနာံထပှ်က္ဍဂမၠိုင်ရောင်၊ သွက်ဂွံစၞောန်ထ္ၜးဂအာင်ဘာ ဂပ်ဝ်ရင်တၠုင်ဘိက်နိမန်နင်ခမဳဂမၠိုင်အိုတ်ရ၊ ခမဳဂမၠိုင်ဂှ် ဂပ်ဝ်စၞောန်ထ္ၜးဂအာင်ဘာ မဟွံမွဲကဵုရိုက်ဘဲ မပ္တံစၟဂြုန် မၞုံကဵုဥပစာ မွဲသ္ပဝ်ကွဳအိုတ်ရ၊ ခမဳဂှ် ပ္ဍဲဂအာင်ဘာကုဋ် မၞုံကဵုပရိုက်ဘဲ မပ္တံစၟဂြုန် မဟွံမွဲကဵုဥပစာမွဲသ္ပဝ်ကွဳဂှ် ကဵုသၞိင်ခၞံဘာကုဋ် နကပေါတ်ကြိယာဗာ မဂပ်ဝ်အာတ်အလဵုဇကုမ္ဂး၊ ခမဳဂမၠိုင်လေဝ် တၞဟ်နစၞောန်ထ္ၜး ဂအာင်ဘာကုဋ် ဟွံရင်တၠုင်နိမန်နင်မ္ဂး၊ ဗၞတ်ဗ္ၜတ်ပမာဏလေဝ် ကဵုကလိလောန်အာမ္ဂး၊ ဒးအာပတ်သံဃာဒိသေသ်ရ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
