၂.၆.၁။ ဝတ္ထုခမဳကောန်ဍုၚ်အာဠဝဳဂမၠိုၚ်
342) ပ္ဍဲအခိင်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒံၟင် ပ္ဍဲဘာဝေဠုဝန် မဒှ်ဒၟါဲကဵုစၞ ကုယန်လမ္စံက်ဂမၠိုင် ဇရေင်ဍုင်ရာဇဂြိုဟ်ဂှ် ခမဳကောန်ဍုင်အာဠဝဳဂမၠိုင်ကဵုသိုင်ခၞံဘာဂမၠိုင် မၞုံကဵုကပေါတ်ကြိယာဗာ မဂပ်ဝ်အာတ်အလဵုဇကု မဟွံမွဲကဵုတၠ (ဒကာညးမသိုင်) ဍေံမၞုံကဵုပူဂိုလ် မစၞောန်ထ္ၜးမ္ဂးသွက်ဇကု မဟွံမွဲကဵုဗၞတ်ဗ္ၜတ်အိုတ်ရ၊ ဘာဂမၠိုင်ဂှ် ဟွံအာစိုပ် ပွမစိုပ်ဒတုဲအိုတ်ရ၊ ခမဳဂမၠိုင်ဂှ် “ဩဝ်ကဵုမၞိဟ်တြုံအိုတ်ညိ၊ ဩဝ်ကဵုကေင်ကာတဲတြုံအိုတ်ညိ၊ ဩဝ်ကဵုဂၠဴအိုတ်ညိ၊ ဩဝ်ကဵုကွဳအိုတ်ညိ၊ ဩဝ်ကဵုဝါစဳ (ဗဗဴ) အိုတ်ညိ၊ ဩဝ်ကဵုမုဲအိုတ်ညိ၊ ဩဝ်ကဵုမြပံင်အိုတ်ညိ၊ ဩဝ်ကဵုကွဵုဇၜံက်အိုတ်ညိ၊ ဩဝ်ကဵုပၞုတ်အိုတ်ညိ၊ ဩဝ်ကဵုဇုက်လွာအိုတ်ညိ၊ ဩဝ်ကဵုဒုန်အိုတ်ညိ၊ ဩဝ်ကဵုကၟတ်ဇပူအိုတ်ညိ၊ ဩဝ်ကဵုကၟတ်စောဗဲအိုတ်ညိ၊ ဩဝ်ကဵုချောဲ (သှေ်သၟေဟ်) အိုတ်ညိ၊ ဩဝ်ကဵုတိကမၠောတ်အိုတ်ညိ” ရဴဝွံ အာတ်ဂၠိုင်ဂမၠိုင်ဒှ်တုဲ ထ္ၜးသၞိင်နိမိတ်ဂၠိုင်ဂမၠိုင်ဒှ်တုဲ သ္ပဒတဴအိုတ်ရ။ မၞိဟ်ဂမၠိုင် ဂပ်ဝ်ပ္ဍဵုပ္ဍိုက်ရာန်သကိုတ် နပွမအာတ်ဂမၠိုင်ဒှ်တုဲ ဂပ်ဝ်ပ္ဍဵုပ္ဍိုက်ရာန်သကိုတ်ဂှ် နပွမထ္ၜးသၞိင်နိမိတ်ဂမၠိုင်ဒှ်တုဲ ညာတ်ဒးခမဳဂမၠိုင်မ္ဂး သမ္ၚာတ်လေဝ် သမ္ၚာတ်အိုတ်ရ၊ လကိုတ်လေဝ် လကိုတ်အိုတ်ရ၊ ဂြိပ်လေဝ် ဂြိပ်ပေက်အိုတ်ရ၊ ပါဲတုဲလေဝ် အာအိုတ်ရ၊ ဗလေတ်မုက်တုဲလေဝ် ပဒတဴအိုတ်ရ၊ တြင်သ္ၚိလေဝ် ကၟာတ်ဒဝ်ထောံအိုတ်ရ၊ ညာတ်ဒးဂၠဴဂမၠိုင်လေဝ် သမ္တီထေင်ကေတ် ခမဳတုဲ ဂြိပ်ဒဴအိုတ်ရ။
ပ္ဍဲအခိင်ဂှ် တဳလပိုဉ်မဟာကဿပ သ္ပဒတဴ လုကဴဂိတုဗြဲ ပ္ဍဲဍုင်ရာဇဂြိုဟ်တုဲမ္ဂး က္ညအာဍုင်အာဠဝဳရ၊ အတိုင်လၟေင်လၟေင် အာစိုပ်ဍုင်အာဠဝဳမ္ဂး တဳလပိုဉ်မဟာကဿပ သ္ပဒတဴဒၟံင် ပ္ဍဲအဂ္ဂါဠဝစေတဳ ဇရေင်ဍုင်အာဠဝဳဂှ်ရ၊ ပ္ဍဲအခိင်ဂှ် တဳလပိုဉ်မဟာကဿပ ပ္ဍဲအခိင်နူဂယး ရုင်လတက်ပဠေဝ်သ္ၚာတုဲ ထ္ၜဂိုင်ကေတ် ဗဗေင်သ္ၚာတုဲမ္ဂး၊ လုပ်ဂ္ၚေင်ပိဏ္ဍပါတ် ပ္ဍဲဍုင်အာဠဝဳရ၊ မၞိဟ်ဂမၠိုင်ညာတ်ကေတ် တဳလပိုဉ်မဟာကဿပမ္ဂး သမ္ၚာတ်လေဝ် သမ္ၚာတ်အိုတ်ရ၊ လကိုတ်လေဝ် လကိုတ်အိုတ်ရ၊ ဂြိပ်လေဝ် ဂြိပ်ပေက်အိုတ်ရ၊ ပါဲတုဲလေဝ်အာအိုတ်ရ၊ ဗလေတ်မုက်တုဲလေဝ် ပဒတဴအိုတ်ရ၊ တြင်သ္ၚိလေဝ် ကၟာတ်ဒဝ်ထောံအိုတ်ရ။
ပ္ဍဲအခိင်ဂှ် တဳလပိုဉ်မဟာကဿပ ဂေတ်ဂ္ၚေင်ပိဏ္ဍပါတ် ပ္ဍဲဍုင်အာဠဝဳတုဲ ကဵုပိုဉ်တုဲ ပ္ဍဲကြဴ ပါဲစ္ဍးနူဇြပ်ကဵုပိုဉ်တုဲမ္ဂး— “ယွံကောန်တၠတအ် ပ္ဍဲကိုပ်ကၠာတေံ ဍုင်အာဠဝဳဝွံ ဖဲသအဳရ၊ မၞုံကဵုပိဏ္ဍပါတ် ကလိဂွံလောဲသွာရ၊ မိန်ကေတ် ဗဗေင်ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် လောဲသွာတဴရ၊ ပ္ဍဲအခိင်လၟုဟ်တုန် ဍုင်အာဠဝဳဝွံ စၞစသုင်ဝါတ်ခါဲရ၊ မၞုံကဵုပိဏ္ဍပါတ် ဇြိုင်ကဵုကလိဂွံရ၊ မိန်ကေတ် ဗဗေင်ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် ဟွံလောဲသွာရ၊ ယွံကောန်တၠတအ် ဍုင်အာဠဝဳဝွံ မုရဴဟိုတ်နူဟိုတ်အထံင်အပင်မွဲ စၞစသုင်ဝါတ်ခါဲဂှ်ရော? မၞုံကဵုပိဏ္ဍပါတ်ဇြိုင်ကဵုကလိဂွံဂှ်ရော? မိန်ကေတ် ဗဗေင်ပ္ဍဲတဲတုဲ နပွမဂေ္ၚင်ပိဏ္ဍပါတ် သွက်ဂွံယိုပ်ယာပ်ဟွံလောဲသွာဂှ်ရော?” ရဴဝွံ သၟာန်ခမဳဂမၠိုင်ရ။ ပ္ဍဲအခိင်ဂှ် ခမဳဂမၠိုင်ဂှ် ဂရင်ပတီ လဴဟိုတ် ပရူပရာဝွံ ကုတဳလပိုဉ် မဟာကဿပအိုတ်ရ။ 343) ပ္ဍဲအခိင်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံင် ပ္ဍဲဍုင်ရာဇဂြိုဟ် ဗွဲမမိပ်လဟိင်တုဲမ္ဂး က္ညအာဒေသစာရိတ် ဍုင်အာဠဝဳရ၊ အတိုင်လေၟင်လေၟင် က္ညဂ္ၚေင်အာဒေသစရိတ်ဂှ်မ္ဂး စိုပ်ကၠုင်ဍုင်အာဠဝဳရ၊ တဳလမၞုံပိုဉ်ကျာ်တြဲ သ္ပဒတဴဒၟံင် ပ္ဍဲအဂ္ဂါဠဝစေတဳ ဇရေင်ဍုင်အာဠဝဳဂှ်ရ၊ ပ္ဍဲအခိင်ဂှ် တဳလပိုဉ်မဟာကဿပ ပြာပ်အာဇရေင် တဳလမၞုံပိုဉ်ကျာ်တြဲတုဲမ္ဂး လေ္ၚာဝ်သ္ပဝတ် တဳလမၞုံပိုဉ်ကျာ်တြဲ ဗွဲမရှေ်သှေ်ရဴဂဴတုဲ ဂဇအ်ကေတ် ပ္ဍဲဒၞါဲမွဲတုဲပ္ဍဲကြဴ ဂရင်ပတီလဴဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ၊ ပ္ဍဲအခိင်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲကဵုခမဳသင် ကောံဓရီုတုဲမ္ဂး— “ယွံခမဳတအ် မၞးတအ်ညးမဂမၠိုင် ကဵုသိုင်ခၞံဘာဂမၠိုင် မၞုံကဵုကပေါတ်ကြိယာဗာ မဂပ်ဝ်အာတ်အလဵုဇကု မဟွံမွဲကဵုတၠ (ဒကာညးမသိုင်) မၞုံကဵုပူဂိုလ်မစၞောန်ထ္ၜးမ္ဂး သွက်ဇကုမဟွံမွဲကဵုဗၞတ်ဗ္ၜတ်အိုတ်ရ၊ ဘာဂမၠိုင်ဂှ် ဟွံအာစိုပ် ပွမစိုပ်ဒတုဲအိုတ်ရ၊ မၞးတအ်ညးဂမၠိုင်ဂှ် ‘ဩဝ်ကဵုမၞိဟ်တြုံအိုတ်ညိ၊ ဩဝ်ကဵုကေင်ကာတဲတြုံအိုတ်ညိ၊ ဩဝ်ကဵုဂၠဴအိုတ်ညိ၊ ဩဝ်ကဵုကွဳအိုတ်ညိ၊ ဩဝ်ကဵုဝါစဳ (ဗဗဴ) အိုတ်ညိ၊ ဩဝ်ကဵုမုဲအိုတ်ညိ၊ ဩဝ်ကဵုမြပံင်အိုတ်ညိ၊ ဩဝ်ကဵုကွဵုဇၜံက်အိုတ်ညိ၊ ဩဝ်ကဵုပၞုတ်အိုတ်ညိ၊ ဩဝ်ကဵုဇုက်လွာအိုတ်ညိ၊ ဩဝ်ကဵုဒုန်အိုတ်ညိ၊ ဩဝ်ကဵုကၟတ်ဇပူအိုတ်ညိ၊ ဩဝ်ကဵုကၟတ်စောဗဲအိုတ်ညိ၊ ဩဝ်ကဵုချောဲ (သှေ်သၟေဟ်) အိုတ်ညိ၊ ဩဝ်ကဵုတိကမေၠတ်အိုတ်ညိ’ ရဴဝွံ အာတ်ဂၠိုင်ဂမၠိုင်ဒှ်တုဲ ထ္ၜးသၞိင်နိမိတ်ဂၠိုင်ဂမၠိုင်ဒှ်တုဲ သ္ပဒတဴအိုတ်ရ၊ မၞိဟ်ဂမၠိုင် ဂပ်ဝ်ပ္ဍဵုပ္ဍိုက်ရာန်သကိုဟ် နပွမအာတ်ဂမၠိုင်ဒှ်တုဲ ဂပ်ဝ်ပ္ဍဵုပ္ဍိုက်ရာန်သကိုတ် နပွမထ္ၜးသိၞင်နိမိတ်ဂမၠိုင်ဒှ်တုဲ ညာတ်ဒးခမဳဂမၠိုင်မ္ဂး သမ္ၚာတ်လေဝ် သမ္ၚာတ်အိုတ်ရ၊ လကိုတ်လေဝ် လကိုတ်အိုတ်ရ၊ ဂြိပ်လေဝ် ဂြိပ်ပေက်အိုတ်ရ၊ ပါဲတုဲလေဝ် အာအိုတ်ရ၊ ဗလေတ်မုက်တုဲလေဝ် ပဒတဴအိုတ်ရ၊ တြင်သ္ၚိလေဝ် ကၟာတ်ဒဝ်ထောံအိုတ်ရ၊ ညာတ်ဒးဂၠဴဂမၠိုင်လေဝ် သမ္တီထေင်ကေတ်ခမဳတုဲ ဂြိပ်ဒဴအိုတ်ရ ဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက် ခမဳကောန်ဍုင်အာဠဝဳဂမၠိုင်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရင်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ်မၞးတအ်ညးဂမၠိုင် မုဟိုတ်ကဵုသိုင်ခၞံဘာဂမၠိုင် မၞုံကဵုကပေါတ်ကြိယာဗာ မဂပ်ဝ်အာတ်အလဵုဇကု မဟွံမွဲကဵုတၠ (ဒကာညးမသိုင်) ဍေံမၞုံကဵုပူဂိုလ် မစၞောန်ထ္ၜးမ္ဂးသွက်ဇကု မဟွံမွဲကဵုဗၞတ်ဗ္ၜတ်အိုတ်ဂှ်ရော? ဘာဂမၠိုင်ဂှ် ဟွံအာစိုပ် ပွမစိုပ်ဒတုဲအိုတ်ရ၊ မၞးတအ်ညးဂမၠိုင်ဂှ် ဩဝ်ကဵုမၞိဟ်တြုံအိုတ်ညိ၊ ဩဝ်ကဵုကေင်ကာတဲတြုံအိုတ်ညိ ။ ပ ။ ဩဝ်ကဵုချောဲ (သှေ်သၟေဟ်) အိုတ်ညိ၊ ဩဝ်ကဵုတိကမၠေတ်အိုတ်ညိ ရဴဝွံ အာတ်ဂၠိုင်ဂမၠိုင်ဒှ်တုဲ ထ္ၜးသၞိင်နိမိတ်ဂၠိုင်ဂမၠိုင်ဒှ်တုဲ သ္ပဒတဴအိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုင်သ္ပဒး) ဝွံ ကုညးဟွံလျုင်ဇြုင်သ္ဍိုက်ဂမၠိုင်ဏီ တၞဟ်နပွမကဵု လျုင်ဇြုင်သ္ဍိုက်ကီု ။ ပ ။ ဟီုဂရိုဟ်တုဲ တွံတဴဂလာန်ဓရ်တုဲမ္ဂး သ္ဂးကဵုခမဳဂမၠိုင်ရ။
