၂.၅.၆။ ဗီုသ္ဂုတ်သွာတ်ဝိနဳတဝတ္ထုဂမၠိုၚ်

341) ပ္ဍဲမွဲအခိၚ်တေံ တြုံမွဲဂှ် “ယွံတဳလပိုဉ် ဩဝ်က္ညအာညိ၊ ဩဝ်စမ်ၜတ် ဗြဴမၞုံယၟုဝွံညိ” ရဴဝွံ ဖအောဝ်စကာခမဳမွဲရ၊ ခမဳဂှ် က္ညအာတုဲ “ဗြဴမၞုံယၟုဝွံဂှ် ညးဍေံဂှ်ရော?” ရဴဝွံ သၟာန်မၞိဟ်ဂမၠိုၚ်ရ၊ တိက်သၠိၚ်ဒၟံၚ်ရကျာ် ရဴဝွံ (ဂရၚ်ပတီအိုတ်ရ)။ “တဳလပိုဉ်ကျာ်တြဲ ဂပ်ဝ်ပညပ်လဝ် သိက္ခာပိုဒ်တုဲဒှ်ရ၊ အဲ ဒးအာပတ်သံဃာဒိသေသ်ဟာ” ရဴဝွံ ‘သံသယကုက္ကုစ္စ’ ပွချပ်သၠေဟ်ပၟာ ဒှ်ကုခမဳဂှ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ၊ ယွံခမဳ ဟွံဒးအာပတ်သံဃာဒိသေသ်ရ၊ ဒးအာပတ်ဒုက္ကဋ်ရ ရဴဝွံ (သ္ဂးရ)။ (၁)

ပ္ဍဲမွဲအခိၚ်တေံ တြုံမွဲဂှ် “ယွံတဳလပိုဉ် ဩဝ်က္ညအာညိ၊ ဩဝ်စမ်ၜတ် ဗြဴမၞုံယၟုဝွံညိ” ရဴဝွံ ဖအောဝ်စကာခမဳမွဲရ၊ ခမဳဂှ် က္ညအာတုဲ “ဗြဴမၞုံယၟုဝွံဂှ် ညးဍေံဂှ်ရော?” ရဴဝွံ သၟာန်မၞိဟ်ဂမၠိုၚ်ရ၊ ချိုတ်အာတုဲရကျာ် ။ ပ ။ တိတ်အာရကျာ် ။ ပ ။ မၞိဟ်ဗြဴ ဟွံသေၚ်ရကျာ် ။ ပ ။ ဗြဴခမၞုဲရကျာ် ရဴဝွံ (ဂရၚ်ပတီအိုတ်ရ)။ ‘သံသယကုက္ကုစ္စ’ ပွမချပ်သၠေဟ်ပၟာ ဒှ်ကုခမဳဂှ်ရ ။ ပ ။ ယွံခမဳ ဟွံဒးအာပတ် သံဃာဒိသေသ်ရ၊ ဒးအာပတ်ဒုက္ကဋ်ရ ရဴဝွံ (သ္ဂးရ)။ (၂-၅)

ပ္ဍဲမွဲအခိၚ်တေံ ဗြဴမွဲဂှ် ဒှ်သေက်ဇဵုကေုာံတြုံတၠသ္ၚိတုဲ အာသ္ၚိမိဇကုရ၊ ခမဳမလေပ်ပြာပ်စဴသ္ၚိဂှ် သ္ပတဴဂလာန်အိုတ်တၟိဟ်ရ၊ (ကဵုကလေၚ်စဴသ္ၚိရ) ‘သံသယကုက္ကုစ္စ’ ပွမချပ်သၠေဟ်ပၟာ ဒှ်ကုခမဳဂှ်ရ ။ ပ ။ ဗြဴထေက်ကဵုဟီုဂလာန်ကလုတ်ဟာ ရဴဝွံ (သၟာန်တိုန်ဂှ်) ဗြဴထေက်ကဵုဟီုဂလာန်ကလုတ် ဟွံသေၚ်ရကျာ် ရဴဝွံ (ဂရၚ်ပတီရ)။ ယွံခမဳ ပ္ဍဲဗြဴမဟွံထေက်ကဵုဟီုဂလာန်ကလုတ်ဂှ် ဟွံဒးအာပတ်ရ ရဴဝွံ (သ္ဂးရ)။ (၆)

ပ္ဍဲမွဲအခိၚ်တေံ ခမဳမွဲဇကု သ္ပကေၚ်ကာကလုတ် ပ္ဍဲခမၞုဲရ၊ ‘သံသယကုက္ကုစ္စ’ ပွမချပ်သၠေဟ်ပၟာဒှ်ကုခမဳဂှ်ရ ။ ပ ။ ယွံခမဳ ဟွံဒးအာပတ်သံဃာဒိသေသ်ရ၊ ဒးအာပတ်ထုလ္လစ္စယ်ရ ရဴဝွံ (သ္ဂးရ)။ (၇)

သဉ္စရိတ္တသိက္ခာပိုဒ်ပဉ္စမတုဲရ။