၂.၅.၂။ ပွံက်သဥ္စရိတ္တသိက္ခာပိုဒ်
302) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ သ္ပကဵုကေၚ်ကာကလုတ် မ္ဂးဂှ် မၞိဟ်ဗြဴဂှ် ဂပ်ဝ်ဖအောဝ်စကာဒှ်တုဲလေဝ် အာဇရေၚ်မၞိဟ်တြုံရ၊ မၞိဟ်တြုံဂှ် ဂပ်ဝ်ဖအောဝ်စကာဒှ်တုဲလေဝ် အာဇရေၚ်မၞိဟ်ဗြဴရ။ ကုဗြဴလေဝ် ပၟိက်တြုံ မ္ဂးဂှ် ပၟိက်တြုံဂှ် ဟီုလဴကဵုကုဗြဴရ။ ကုတြုံလေဝ် ပၟိက်ဗြဴ မ္ဂးဂှ် ပၟိက်ဗြဴဂှ် ဟီုလဴကဵုကုတြုံရ။ ဟိုတ်မမိက်ကဵုဒှ်သမ္ဘာကီု မ္ဂးဂှ် တၠအဲ ကြက်သ္ဂောံဒှ်သမ္ဘာရ။ ဟိုတ်မမိက်ကဵုဒှ်တၠသ္ၚိကီု မ္ဂးဂှ် တၠအဲ ကြက်သ္ဂောံဒှ်တၠသ္ၚိရ။ ဗွဲတွဵုမယုတ် မွဲချိုန်ခဏလေဝ် မ္ဂးဂှ် တၠအဲ ကြက်သ္ဂောံဒှ် သမ္ဘာမွဲချိုန်ခဏရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂးရဴဝွံမ္ဂး “သံဃာဒိသေသ်” ရ။
303) ဗြဴစှ်ဂကူ ဗွဲအစောံဗြဴ မိအံက်မၚ်မွဲလဝ်၊ ဗြဴမအံက်မၚ်မွဲလဝ်၊ ဗြဴမိမမၚ်မွဲလဝ်၊ ဗြဴကောဒေံမၚ်မွဲလဝ်၊ ဗြဴၝဲဒေံမၚ်မွဲလဝ်၊ ဗြဴကဠောမသမၚ်မွဲလဝ်၊ ဗြဴတၞောဝ်ဒတောဝ်မၚ်မွဲလဝ်၊ ဗြဴညးဒ္ဂေတ်ဓရ်မွဲစွံမၚ်မွဲလဝ်၊ ဗြဴစွံပတန်လဝ်ပၟၚ်ပၟဲ၊ ဗြဴစွံလဝ်ဒဏ်ရ။
304) သမ္ဘာစှ်ဂကူ ဗွဲအစောံသမ္ဘာ မဂပ်ဝ်ရာန်နသြန်၊ သမ္ဘာပၟိက်တုပ်တုဲ ပဒတဴ၊ သမ္ဘာပဒတဴ ဟိုတ်နူပိုဉ်ဟာန်ဘိုဂ်ဘဂ်၊ သမ္ဘာပဒတဴ ဟိုတ်နူယာတ်ဗွိုက်လတက်၊ သမ္ဘာဖျေံတဲမွဲစွံ ပ္ဍဲခ ရော်ဍာ်တုဲမထပ်တဲ၊ သမ္ဘာကဵုဖျေံကၠေံယာတ်ဒစဲတုဲ ပဒတဴ၊ သမ္ဘာဍိက်ဗြဴလေဝ်ဒှ် သမ္ဘာလေဝ်ဒှ်၊ သမ္ဘာသၟာကမၠောန်ဗြဴလေဝ်ဒှ် သမ္ဘာလေဝ်ဒှ်၊ ဇၞးပၞာန်တုဲ သမ္ဘာမဂပ်ဝ်ရၚ်တၠုၚ်နၚ်၊ သမ္ဘာပံၚ်ဖက်မွဲချိုန်ခဏရ။ ဗြဴ မိအံက်မၚ်မွဲလဝ် မ္ဂးဂှ် မိအံက်မၚ်မွဲလဝ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ မအံက်မၚ်မွဲလဝ် မ္ဂးဂှ် မအံက်မၚ်မွဲလဝ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ မိမမၚ်မွဲလဝ် မ္ဂးဂှ် မိမဂမၠိုၚ်မၚ်မွဲလဝ်အိုတ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ ကောဒေံမၚ်မွဲလဝ် မ္ဂးဂှ် ကောဒေံမၚ်မွဲလဝ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ ၝဲဒေံမၚ်မွဲလဝ် မ္ဂးဂှ် ၝဲဒေံဗြဴမၚ်မွဲလဝ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ ကဠောမသမၚ်မွဲလဝ် မ္ဂးဂှ် ကဠောမသဂမၠိုၚ် မၚ်မွဲလဝ်အိုတ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ တၞောဝ်ဒတောဝ်မၚ်မွဲလဝ် မ္ဂးဂှ် တၞောဝ်ဒတောဝ်ဂမၠိုၚ် မၚ်မွဲလဝ်အိုတ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ ညးဒ္ဂေတ်ဓရ်မွဲစွံမၚ်မွဲလဝ် မ္ဂးဂှ် ညးဒ္ဂေတ်ဓရ်မွဲစွံဂမၠိုၚ် မၚ်မွဲလဝ်အိုတ်ရ၊ ကဵုဂြောပ်ဗ္ဒန်ရ၊ သ္ပပွမဂွံအလဵုအသဳရ၊ ကဵုဒ္ဂေတ်ဗက်အလိုက်ပၟိက်ဇကုရ။ ဗြဴ စွံပတန်လဝ်ပၟၚ်ပၟဲ မ္ဂးဂှ် ပ္ဍဲအပ္ဍဲပုၚ်ဂၞဴမိဟေၚ် “ဗြဴဝွံ သမ္ဘာအဲရ” ရဴဝွံ ဗွဲတွဵုမယုတ် တဵုတိုၚ်ဇၟန်ပကဴတုဲ ဗြဴမဂပ်ဝ်စၟတ်သမ္တီလဝ်လေဝ် ဗြဴ မစွံပတန်လဝ်ပၟၚ်ပၟဲမ္ဂးရ။ ဗြဴ စွံလဝ်ဒဏ် မ္ဂးဂှ် “ယြဴညးမွဲ အာကၠုၚ်ကဵုဗြဴမၞုံယၟုဝွံရ၊ ကုညးဂှ် ဩဝ်တပ်ဒဏ်ဗၞတ်ဝွံညိ” ရဴဝွံ ဗြဴ ပူဂိုလ်လ္ၚဵုဂမၠိုၚ်ဂှ် စွံလဝ်ဒဏ်ရ။ သမ္ဘာ မဂပ်ဝ်ရာန်နသြန် မ္ဂးဂှ် ရာန်ကေတ်နကဵုသြန်တုဲ ကဵုပဒတဴရ။ သမ္ဘာ ပၟိက်တုပ်တုဲပဒတုဲ မ္ဂးဂှ် တြုံမသ္ဍိုက်ဆာန်ဂှ် ကဵုဗြဴသ္ဍိုက်ဆာန် ပဒတဴရ။ သမ္ဘာ ပဒတဴဟိုတ်နူပိုဉ်ဟာန်ဘိုဂ်ဘဂ် မ္ဂးဂှ် ကဵုပိုဉ်ဟာန်ဘိုဂ်ဘဂ်တုဲ ကဵုပဒတဴရ။ သမ္ဘာ ပဒတဴဟိုတ်နူယာတ်ဗွိုက်လတက် မ္ဂးဂှ် ကဵုယာတ်ဗွိုက်လတက်တုဲ ကဵုပဒတဴရ။ သမ္ဘာ ဖျေံတဲမွဲစွံ ပ္ဍဲခရော်ဍာ်တုဲ မထပ်တဲ မ္ဂးဂှ် ဇွိတ်သပေါတ်ရပ်ခရော်ဍာ်တုဲ ကဵုပဒတဴရ။ သမ္ဘာ ကဵုဖျေံကၠေံ ယာတ်ဒစဲတုဲ ပဒတဴ မ္ဂးဂှ် ကဵုဖျေံဒစဲတုဲ ကဵုပဒတဴရ။ ဍိက်ဗြဴ မ္ဂးဂှ် ဍိက်ဗြဴလေဝ်ဒှ်ရ၊ သမ္ဘာလေဝ် ဒှ်ရ။ သၟာကမၠောန်ဗြဴ မ္ဂးဂှ် သၟာကမၠောန်လေဝ်ဒှ်ရ၊ သမ္ဘာလေဝ်ဒှ်ရ။ ဇၞးပၞာန်တုဲ သမ္ဘာမဂပ်ဝ်ရၚ်တၠုၚ်နၚ် မ္ဂးဂှ် သ္ဂးတဴဗြဴဍိက်ဂၠုဲရ။ သမ္ဘာပံၚ်ဖက်မွဲချိုန်ခဏ မ္ဂးဂှ် သ္ဂးတဴသမ္ဘာမွဲချိုန်ရ။
305) တြုံဂှ် “ယွံတဳလပိုဉ် ဩဝ်က္ညအာညိ၊ ဗြဴ မိအံက်မၚ်မွဲလဝ်မၞုံယၟုဝွံ ဩဝ်ဒှ်သမ္ဘာ မဂ်ပဝ်ရာန်နသြန် ညးမၞုံယၟုဝွံညိ ရဴဝွံ ဩဝ်ဟီုညိ” ရဴဝွံ ဗလးဏာ ခမဳရ၊ ဒုၚ်တဲမ္ဂး၊ စမ်ၜတ်မ္ဂး၊ ကလေၚ်ရၚ်တၠုၚ်နၚ်ပၠန်မ္ဂး ဒးအာပတ်သံဃာဒိသေသ်ရ။ တြုံဂှ် “ယွံတဳလပိုဉ် ဩဝ်က္ညအာညိ၊ ဩဝ်ဟီုကဵုဗြဴ မအံက်မၚ်မွဲလဝ် မၞုံယၟုဝွံညိ” ရဴဝွံ ဗလးဏာရ ။ ပ ။ ဩဝ်ဟီုကဵုဗြဴ မိမမၚ်မွဲလဝ်။ ဩဝ်ဟီုကဵုဗြဴ ကောဒေံမၚ်မွဲလဝ်။ ဩဝ်ဟီုကဵုဗြဴ ၝဲဒေံဗြဴမၚ်မွဲလဝ်။ ဩဝ်ဟီုကဵုဗြဴ ကဠောမသမၚ်မွဲလဝ်။ ဩဝ်ဟီုကဵုဗြဴ တၞောဝ်ဒတောဝ်မၚ်မွဲလဝ်။ ဩဝ်ဟီုကဵုဗြဴ ညးဒ္ဂေတ်ဓရ်မွဲစွံမၚ်မွဲလဝ်။ ဩဝ်ဟီုကဵုဗြဴ စွံပတန်လဝ်ပၟၚ်ပၟဲ။ ဗြဴ စွံလဝ်ဒဏ်မၞုံယၟုဝွံ ဩဝ်ဒှ်သမ္ဘာ မဂပ်ဝ်ရာန်နသြန် ညးမၞုံယၟုဝွံညိ ရဴဝွံ ဩဝ်ဟီုညိ” ရဴဝွံ ဗလးဏာခမဳရ၊ ဒုၚ်တဲမ္ဂး၊ စမ်ၜတ်မ္ဂး၊ ကလေၚ်ရၚ်တၠုၚ်နၚ်ပၠန်မ္ဂး ဒးအာပတ်သံဃာဒိသေသ်ရ။ နိက္ခေပပိုဒ်ဂမၠိုၚ်ရောၚ်။
