၂.၄.၁။ ဝတ္ထုတဳလပိုဉ်ဥဒါယဳ
290) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳဇရေၚ်ဍုၚ်သာရဝှ်ဂှ် တဳလပိုဉ်ဥဒါယဳ ဒှ်ခမဳ မလေပ်ပြာပ် စဴသ္ၚိ (ခမဳအ္စာ) ပ္ဍဲဍုၚ်သာရဝှ်ရ၊ ပြာပ်စဴသ္ၚိဂမၠိုၚ် ဗွဲမဂၠိုၚ်ရ၊ ပ္ဍဲအဃောအခိၚ်ဂှ် ဗြဴတြုံတၠသ္ၚိ ချိုတ်အာတုဲမွဲဂှ် ရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ရံၚ်ခိုဟ်ရ၊ လေပ်ကဵုစိုတ်ဇြုၚ်ကေဝ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳ ပ္ဍဲအခိၚ်နူဂယး ရုၚ်လတက်ပဠေဝ် သ္ၚာတုဲ ထ္ၜဂိုၚ်ကေတ် ဗဗေၚ်သ္ၚာ ပြာပ်စဴအာသ္ၚိဗြဴဂှ်တုဲ ဂဇအ်ဒၟံၚ် ပ္ဍဲသၞာမလးပညပ်လဝ်ရ၊ ပ္ဍဲအခိၚ်ဂှ် ဗြဴဂှ် ပြာပ်ကၠုၚ်ဇရေၚ် တဳလပိုဉ်ဥဒါယဳတုဲ လ္ၚောဝ်သ္ပဝတ် တဳလပိုဉ်ဥဒါယဳ ဗွဲမရှေ်သှေ်ရဴဂဴတုဲမ္ဂး ဂဇအ်ဒၟံၚ်ပ္ဍဲဒၞဲါမွဲရ၊ ဗြဴမဂဇအ်ဒၟံၚ် ပ္ဍဲဒၞဲါမွဲတုဲဂှ် နကဵုဂလာန်ဓရ် တဳလပိုဉ် ဥဒါယဳ ကဵုတီညာတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသ ကေက်သကာ ကဵုမြဟ်မြာတုဲဒှ်တုဲ ဗြဴဂှ်— “ယွံတဳလပိုဉ် အရာနွံပၟိက်ဂှ် ဩဝ်ဟီုညိ၊ ပိုဲဍိက် တအ်ညးဂမၠိုၚ် ကဵုဒါန်သ္ၚာပိဏ္ဍပါတ် ဘာ ဂဥုဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ် မာန်ဒၟံၚ်အိုတ်ရ” ရဴဝွံ ဂရၚ်ပတီ တဳလပိုဉ်ဥဒါယဳရ။ ယွံဒေံဗြဴ သ္ၚာပိဏ္ဍပါတ် ဘာ ဂဥုဲ မဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်ဂှ် ဟွံဝါတ်ခဲါ ကုပိုဲညးဂမၠိုၚ်ရ၊ သၟဟ်ရထမ္ဂး အရာဝတ္ထု ဇြိုၚ်ကဵုကလိဂွံမာန် ကုပိုဲညးဂမၠိုၚ်ဂှ် ဩဝ်ကဵုဒါန်ညိ ရဴဝွံ (သ္ဂးရ)။ မုအရာဝတ္ထုမွဲဂှ်ရော? ကျာ် ရဴဝွံ (ဂရၚ်ပတီရ)။ ဒ္ဂေတ်မေထုန်ရောၚ် ရဴဝွံ (သ္ဂးရ)။ နွံပၟိက်ဒၟံၚ်ဟာကျာ် ရဴဝွံ (ဂရၚ်ပတီရ)။ နွံပၟိက်ဒၟံၚ်ရဴ ယွံဒေံဗြဴ ရဴဝွံ (သ္ဂးရ)။ ယွံတဳလပိုဉ် ဩဝ်က္ညကၠုၚ်ညိ ရဴဝွံ ဟီုတုဲ လုပ်အာဂၠမ်တုဲမ္ဂး သၠောတ်ကၠေံဂၞိန်တုဲ တိက်ဒၟံၚ်လံက်လ္ၚာ ပ္ဍဲလတူဇံၚ်ခါတ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳ ပြာပ်အာဇရေၚ် ဗြဴဂှ်တုဲ “မုရဴညးမွဲ ကြက်ဂွံဇွိတ်သပေါတ် အရာဝတ္ထု မၞုံကဵုသၟူအမြာဲဟွံဒးရး ဟအာဲဟ အှေ် ယုတ်ပြေအ်ဝွံဂှ်ရော?” ရဴဝွံ ချဟ်စုတ်ဍာ်ပါၚ်တုဲ ပဲါစ္ဍးအာရ။ ပ္ဍဲအခိၚ်ဂှ် ဗြဴဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဟွံမွဲဂွဂလေံ အိုတ်ရ၊ ဟွံမွဲသဳလအိုတ်ရ၊ မၞုံအလေံဟီုသ္ဂး ဟွံဍာံစၟတ်အိုတ်ရ၊ သီုကဵုဒှ်သာ်ဂှ် ခမဳဂမၠိုၚ်ဝွံ မၞုံအလေံဒ္ဂေတ်တဴ ဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သၟန်အိုတ်ရ၊ မၞုံအလေံ ဒ္ဂေတ်တဴမပြဲအိုတ်ရ၊ မၞုံအလေံဟီုသ္ဂးဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲ အိုတ်ရ ရဴဝွံ ဂံၚ်ဒုၚ်ဝန်အိုတ်ဏီရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုသ်ခိုဟ်ပြဲ ဟွံမွဲတုဲရ၊ ကုခမဳဂမၠိုၚ်ဝွံ ဒဒှ်ခမဳ ဒဒှ်ညးသပ္ပုရိုသ်ခိုဟ်ပြဲ ကၠေံလီုတုဲရ၊ ကုခမဳဂမၠိုၚ်ဝွံ သာ်လဵု ဒဒှ်ခမဳ ဒဒှ်ညးသပ္ပုရိုသ်ခိုဟ်ပြဲ ဂွံနွံဏီဂှ်ရော? ခမဳဂမၠိုၚ်ဝွံ စာ်စ္ဍးနူဒဒှ်ခမဳ ဒဒှ်ညးသပ္ပုရိုသ်ခိုဟ်ပြဲ အိုတ်တုဲရ၊ မုဟိုတ် ခမဳဥဒါယဳဝွံ အလဵုဇကု အာတ်အဲဒ္ဂေတ်မေထုန်တုဲ 'မုရဴညးမွဲ ကြက်ဂွံ ဇွိတ်သပေါတ် အရာဝတ္ထု မၞုံကဵုသၟူအမြာဲဟွံဒးရး ဟအာဲဟ အှေ် ယုတ်ပြေအ်ဝွံဂှ်ရော?' ရဴဝွံ ချဟ်စုတ်ဍာ်ပါၚ်တုဲ ပါဲစ္ဍးအာဂှ်ရော? ပွမယုတ်မာအဲ ညးဍေံဂှ်ရော? သၟူအမြာဲဒးရး ဟအာဲ ဟ အှေ်အဲဂှ် ညးဍေံဂှ်ရော? အဲဂှ် မုရဴနအရာမွဲ ယုတ်သၟဝ်ဗြဴလဵုဂှ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ဗြဴသအာၚ်ဂမၠိုၚ်လေဝ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဟွံမွဲဂွဂလေံအိုတ်ရ၊ ဟွံမွဲသဳလအိုတ်ရ၊ မၞုံအလေံဟီုသ္ဂး ဟွံဍာံစၟတ်အိုတ်ရ ။ ပ ။ မုဟိုတ် ခမဳ ဥဒါယဳဝွံ အလဵုဇကု အာတ်ဒ္ဂေတ်မေထုန် ကုဗြဴဝွံတုဲ ‘မုရဴညးမွဲ ကြက်ဂွံဇွိတ်သပေါတ် အရာ ဝတ္ထု မၞုံကဵုသၟူအမြာဲဟွံဒးရး ဟအာဲဟ အှေ် ယုတ်ပြေအ်ဝွံဂှ်ရော?’ ရဴဝွံ ချဟ်စုတ်ဍာ်ပါၚ်တုဲ ပဲါစ္ဍးအာဂှ်ရော? ပွယုတ်မာဗြဴဝွံ ညးဍေံဂှ်ရော? သၟူအမြာဲဒးရးဟအာဲဟ အှေ်ဗြဴဝွံဂှ် ညးဍေံ ဂှ်ရော? ဗြဴဂှ် မုရဴနအရာမွဲ ယုတ်သၟဝ်ဗြဴလဵုဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက် အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဗြဴဂမၠိုၚ်ဂှ် ဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်မ္ဂး၊ ယြဴခမဳဂမၠိုၚ် ပၟိက်အောန်အိုတ်ရ၊ ခမဳဂမၠိုၚ်ဂှ် “မုဟိုတ် တဳလပိုဉ်ဥဒါယဳ ဟီုဂုဏ်ပွမကၠောန် ၜိုတ်နကာမဇကု မဂပ်ဝ်နွံပၟိက် ပ္ဍဲဇရေၚ်မၞိဟ်ဗြဴဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက် အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဥဒါယဳ နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး— “ယွံဥဒါယဳ တၠအဲဟီုဂုဏ်ပွမကၠောန်ၜိုတ် နကာမဇကုမဂပ်ဝ်နွံပၟိက် ပ္ဍဲဇရေၚ်မၞိဟ်ဗြဴရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် တဳလပိုဉ် ဥဒါယဳရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) (ကမၠောန်ပွ) ဝွံ ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာ ခမဳတအ်ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ “ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ ဟီုဂုဏ်ပွမကၠောန်ၜိုတ် နကာမဇကုမဂပ်ဝ်နွံပၟိက် ပ္ဍဲဇရေၚ်မၞိဟ်ဗြဴဂှ်ရော? ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုၚ်ဂၠၚ် ဟွံတွံလဝ်ဓရ်တၞဟ်နပွမဒှ်မွဲဟာန်ကေုာံရာဂတုဲ တွံလဝ် သွက်ဂွံစာ်စ္ဍးနူရာဂရ ဟွံသေၚ်ဟာ ။ ပ ။ တွံလဝ် ပွမၜိုဟ်လလမ် ဒတူတၠာဲကာမဂုဏ်မဂၠိုၚ်ရ ဟွံသေၚ်ဟာ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
291) ယြဴခမဳမွဒ လကိုဟ်ရာဂ ဂပ်ဝ်လုပ်ဍုန်ဒှ်တုဲ နကဵုစိုတ်မပၠန်ဂတးဂှ် ဟီုဂုဏ်မကၠောန်ၜိုတ်နကာမ ဇကုမဂပ်ဝ်နွံပၟိက် ပ္ဍဲဇရေၚ်မၞိဟ်ဗြဴမ္ဂး၊ ‘ယွံဒေဗြဴ ယြဴဗြဴမွဲ ဂွံကၠောန်ၜိုတ်ညးမၞုံကဵုဒ္ဂေတ်သဳလ မၞုံကဵုသဘဴဓရ်ခိုဟ်ဆာဲ မၞုံအလေံဒ္ဂေတ်တဴ ဒ္ဂေတ်မပြဲ မဖှ်ညံၚ်ရဴအဲ နကဵုဒ္ဂေတ်မေထုန်ရ၊ ပွမကၠောန်ၜိုတ်ဝွံ ပၞောဝ်ပွမကၠောန်ၜိုတ်ဂမၠိုၚ် ပြဲအိုတ်ရ’ ရဴဝွံ ဟီုသ္ဂး နဂလာန်မစပ်ကေုာံမေထုန်မ္ဂး၊ ကုခမဳဂှ် ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
