၂.၃.၂။ ပွံက်ဒုဋ္ဌုလ္လဝါစစာသိက္ခာပိုဒ်

285) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ လကိုဟ်ရာဂ ဂပ်ဝ်လုပ်ဍုန်ဒှ်တုဲ မ္ဂးဂှ် ထၞေန်စပ်လောန်ဒှ်တုဲ မၞုံကဵုပွမသ္ၚေဝ်မွဲဒှ်တုဲ မၞုံစိုတ်မဂပ်ဝ်ဒက်ဂြေန်ပူပါန်ဒှ်တုဲ။ ပၠန်ဂတး မ္ဂးဂှ် စိုတ်မထၞေန်စပ်လေဝ် ပၠန်ဂတးမ္ဂးရ၊ စိုတ်မထေဲပၞတ်လေဝ် ပၠန်ဂတးမ္ဂးရ၊ စိုတ်မဝိဝိၚ်လေဝ်ပၠန်ဂတးမ္ဂးရ၊ ၜိုန်ဂှ်လေဝ် ပ္ဍဲအရာဝွံ စိုတ်မထၞေန်စပ်ဂှ် ဂပ်ဝ်နွံပၟိက်ရဴဝွံမ္ဂး “ပၠန်ဂတး” ရ။ မာတုဂါမ မ္ဂးဂှ် ဗြဴမၞိဟ်ရောၚ်၊ လကိုဟ် (ဒေဝတဴ) ဗြဴ ဟွံသေၚ်၊ ပြိုတ်ဗြဴ ဟွံသေၚ်၊ တိရစ္ဆာန်ဗြဴ ဟွံသေၚ်၊ မၞိဟ်ဗြဴမသၟဟ်စောံတီကၠိုဟ်ခၠၚ် ဂလာန်ခိုဟ် ဟွံခိုဟ် ရုန်မဵု ဟွံရုန်မဵုရောၚ်။ ဂလာန်မရုန်မဵု သကာတ်မြဟ် မ္ဂးဂှ် ဂလာန်မစပ်ကေုာံဝစ္စမဂ် ပဿာဝမဂ် မေထုန်ရောၚ်။ ဟီုဂရိုၚ်စရဵုမ္ဂး မ္ဂးဂှ် သ္ဂးတဴပွမကလိလောန်ရ။ သၟတ်ဗၠာဲဂှ် ညံၚ်ရဴသၟတ်ဝုတ် မ္ဂးဂှ် သၟတ်တြုံဂှ် သၟတ်ဗြဴ သၟတ်ဗၠာဲဂှ် သၟတ်ဝုတ်ညးဒုၚ်စသိုၚ်ကာမဂုဏ်ဂှ် ညးဗြဴဒုၚ်စသိုၚ်ကာမဂုဏ်။ နဂလာန်မစပ် ကေုာံမေထုန် မ္ဂးဂှ် နဂလာန်မစိုန်သကီု ကေုာံမေထုန်။ သံဃာဒိသေသ်မ္ဂး ဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်ရ” ရ။