၂.၃.၁။ ဝတ္ထုတဳလပိုဉ် ဥဒါယဳ
283) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥဒါယဳ သ္ပဒတဴဒၟံၚ်ပ္ဍဲဂြိုပ်ရ၊ ဘာတဳလပိုဉ်ဥဒါယဳဂှ် ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ရံၚ်ခိုဟ်ရ၊ လေပ်ကဵုစိုတ်ဇြုၚ်ကေဝ်ရ။ ပ္ဍဲအခိၚ်ဂှ် ညးဗြဴဂမၠိုၚ်ဗွဲမဂၠိုၚ် သၟိက်ဗဵုဝေၚ်ဘာဂှ် ကၠုၚ်တဴအပ္ဍဲအာရှာမ်အိုတ်ရ၊ ပ္ဍဲကြဴနူဂှ် ညးဗြဴဂမၠိုၚ်ဂှ် ပြာပ်ကၠုၚ်ဇရေၚ် တဳလပိုဉ်ဥဒါယဳအိုတ်တုဲ “ယွံတဳလပိုဉ် ပိုဲဍိက်တအ် ညးဂမၠိုၚ် သၟိက်ဗဵုဝေၚ်ဘာတဳလပိုဉ်ဥဒါယဳအိုတ်ရ” ရဴဝွံ ဂရၚ်ပတီ တဳလပိုဉ်ဥဒါယဳအိုတ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳကဵုညးဗြဴဂမၠိုၚ် ဗဵုဝေၚ်ဘာတုဲမ္ဂး ရန်ကဵုဝစ္စမဂ် ပဿာဝမဂ်ညးဗြဴဂမၠိုၚ်ဂှ်တုဲ ဂုဏ်ဂှ်လေဝ်သ္ဂးရ၊ မသက္ကုဂုဏ် (ဂလာန်ဂရိုဟ်) လေဝ် သ္ဂးရ၊ အာတ်လေဝ် အာတ်ရ၊ ထပ်ကဵုထပ်လေဝ် အာတ်ရ၊ သၟာန်လေဝ် သၟာန်ရ၊ ကလေၚ်တုဲလေဝ် သၟာန်ပၠန်ရ၊ ဟီုလေဝ်ဟီုရ၊ ဒၠောံဗတောန်လေဝ် ဒၠောံဗတောန်ရ၊ တ္ၜေဟ်လက်လေဝ် တ္ၜေဟ်လက်ရ၊ ယြဴဗြဴဂမၠိုၚ် စာ်စ္ဍးနူ ‘ဩတ္တပ္ပ’ ပွမလကိုတ်ပါပ်အိုတ်ရ၊ မၞုံသဘဴတ္ၚံက်စၞာဲအိုတ်ရ၊ စာ်စ္ဍးနူဂွပါပ်အိုတ်ရ၊ ဗြဴဂမၠိုၚ်ဂှ် အီလေဝ်အီ ကေုာံတဳလပိုဉ်ဥဒါယဳ မွဲစွံအိုတ်ရ၊ ပတိုန်တုဲလေဝ် ဟီုအိုတ်ရ၊ ဗွဲမသကာတ်လေဝ် ဂြိုၚ်ဂ အှေ်အိုတ်ရ၊ ဗျံက်လေဝ် ဟီုဗျံက်တဴအိုတ်ရ။ ယြဴဗြဴဂမၠိုၚ်တုန် မၞုံစိုတ်လေပ်ဂွဖေက်အိုတ်ရ၊ ဗြဴဂမၠိုၚ်ဂှ် တိတ်အာအိုတ်တုဲ “ယွံတဳလပိုဉ်တအ် ဂလာန် (တဳလပိုဉ်ဥဒါယဳ) ဟီုသ္ဂးဝွံ ဟွံထေက်ရ၊ ဟွံဗဗွဲရ၊ ပိုဲဍိက်ဗြဴတအ်ညးဂမၠိုၚ် တြုံတၠသ္ၚိဂှ် ဂပ်ဝ်ဟီုသ္ဂးရဴဝွံမှ ဟွံမွဲပၟိက်အိုတ်ရ၊ တဳလပိုဉ်ဥဒါယဳ ဂပ်ဝ်ဟီုသ္ဂးတုန် ပသာ်သ္ဂောံနွံပၟိက်အိုတ်ဂှ်ရော?” ရဴဝွံ ကဵုခမဳဂမၠိုၚ် ဟီုဂရိုဟ်အိုတ်ရ၊ (ဟီုတေၚ်ကဵုခမဳဂမၠိုၚ်အိုတ်ရ။) ခမဳပၟိက်အောန်ဂမၠိုၚ် “တဳလပိုဉ်ဥဒါယဳ မုဟိုတ်သ္ဂောံဟီုဂရိုၚ်စရဵုကဵုညးဗြဴ နဂလာန်မရုန်မဵုသကာတ်မြဟ်ဂမၠိုၚ်ဂှ်ရော?” ရဴဝွံ ဟီုဂရိုဟ်တၚ်ဒုဟ် တဳလပိုဉ်ဥဒါယဳ နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး— “ယွံဥဒါယဳ တၠအဲ ဟီုဂရိုၚ်စရဵုကဵုညးဗြဴနဂလာန်မရုန်မဵု သကာတ်မြဟ်ဂမၠိုၚ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် တဳလပိုဉ်ဥဒါယဳရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) (ကမၠောန်ပွ) ဝွံ ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာ ခမဳတအ်ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ “ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲဟီုဂရိုၚ်စရဵုကဵုညးဗြဴ နဂလာန်မရုန်မဵု သကာတ်မြဟ်ဂမၠိုၚ်ဂှ်ရော? ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုၚ်ဂၠၚ် ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံရာဂတုဲ တွံလဝ် သွက်ဂွံစာ်စ္ဍးနူရာဂရ ဟွံသေၚ်ဟာ ။ ပ ။ တွံလဝ် ပွမၜိုဟ်လလမ်ဒတူတၠာဲကာမဂုဏ်ဂမၠိုၚ်ရ ဟွံသေၚ်ဟာ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
284) ယြဴခမဳမွဲ လကိုဟ်ရာဂ ဂပ်ဝ်ဍုန်ဒှ်တုဲ နကဵုစိုတ်မပၠန်ဂတးဂှ် သၟတ်ဗၠာဲဂှ် သၟဟ်ညံၚ်ရဴ ဟီုဂရိုၚ်စရဵုကဵုသၟတ်ဝုတ် နဂလာန်မစပ်ကေုာံမေထုန်ဂမၠိုၚ်ကီု ဟီုဂရိုၚ်စရဵုကဵုညးဗြဴ နဂလာန်မရုန်မဵု သကာတ်မြဟ်ဂမၠိုၚ်မ္ဂး၊ ကုခမဳဂှ် ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ ရဴဝွံ သ္ဂးရ)။
