၂.၁၃.၁။ ဝတ္ထုခမဳအဿဇိပုနဗ္ဗသုကဂမၠိုၚ်
431) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဲပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ် ခမဳယုတ် မဟွံမွဲကဵုဂွဂလေံဂမၠိုၚ် မၞုံယၟုအဿဇိပုနဗ္ဗက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞံပကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ၊ ၜှ်ဂၠောၚ်အိုတ်ရ၊ ဖအောဝ်ကဵုၜှ်ဂၠောၚ်အိုတ်ရ၊ ကၞောတ်ဇန်အိုတ်ရ၊ ဖအောဝ်ကဵုကၞောတ်ဇန်အိုတ်ရ၊ သ္ပတဴဇၟန်ပကဴ မၞုံတဝ်မတိတ် မွဲလ္ပာ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴဇၟန်ပကဴ မၞုံတဝ်မတိတ် ၜါလ္ပာ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပကဴ ဗ္တဗ္ဂဲအိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပကဴလကံက်တဲ (ဇၟန်ပကဴကဝး) အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပကဴတဝ်စရှ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴသၞေက်၊ ပကဴဂ္ညိကတောဝ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပကဴ ဂြောပ်သြိုဟ်အိုတ်ရ၊ ဖအောဝ်ကဵုသ္ပအိုတ်ရ။ ခမဳဂမၠိုၚ်ဂှ် တၞဟ်နဖဵုဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ရၚ်တၠုၚ်တဴဇၟန်ပကဴ မၞုံတဝ်မတိတ် မွဲလ္ပာ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ဇၟန်ပကဴမၞုံတဝ်မတိတ် ၜါလ္ပာ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴပကဴ ဗ္တဗ္ဂဲအိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴပကဴလကံက်တဲ (ဇၟန်ပကဴကဝး) အိုတ်ရ၊ ဖအောဝ်ကဵုရေၚ်တၠုၚ်အိုတ်ရ၊ ရၚ်တၠုၚ်တဴပကဴတဝ်စရှ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴသၞေက်၊ ပကဴဂ္ညိကတောဝ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပကဴဂြောပ်သြိုဟ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ။ ခမဳဂမၠိုၚ်ဂှ် မွဲဟာန်ကေုာံဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်ဓဝ်လေဝ် စဟာပ်အိုတ်ရ၊ ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ရ၊ ပ္ဍဲမွဲသၞာဓဝ်လေဝ် ဂဇအ်အိုတ်ရ၊ ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးဓဝ်လေဝ် တိက်အိုတ်ရ၊ ပ္ဍဲမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲမွဲယာတ်လး မွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ရ၊ သိအရက်လေဝ် သုၚ်အိုတ်ရ၊ ပကဴသဴမြမောဝ်ဂစေအ်စၠန်လံက်ဗဗိုဟ်လေဝ် ပကၚ်ရၚ်အိုတ်ရ၊ လှေ်လေဝ်လှေ်အိုတ်ရ၊ ဂယှေ်လေဝ်ဂယှ်အိုတ်ရ၊ တိၚ်တိုက်လေဝ် တိၚ်တိုက်အိုတ်ရ၊ လှေ်လေဝ် လှေ်သာၚ်သောဝ်အိုတ်ရ၊ (ဗတောန်ထ္ၜးကဵု နဲလှေ်အိုတ်ရ) အလိုက်ဗြဴသၟာလှေ်လေဝ် လှေ်ဗက်အိုတ်ရ၊ အလိုက်ဗြဴသၟာလှေ်လေဝ် လှေ်သာၚ်သောဝ်အိုတ်ရ၊ အလိုက်ဗြဴသၟာဂယှေ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဂယှေ်လေဝ် လှေ်သာၚ်သောဝ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှေ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် ဂယှေ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှေ်သာၚ်သောဝ်အိုတ်ရ၊ အလိုက်ဗြဴသၟာဗတောန်လေဝ် လှေ်ဗက်အိုတ်ရ၊ အလိုက်ဗြဴသၟာဗတောန်လေဝ် ဂယှေ်ဗက်အိုတ်ရ၊ အလိုက်ဗြဴသၟာဗတောန်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဗတောန်လေဝ် လှေ်သာၚ်သောဝ်ဗက်အိုတ်ရ။ ကၠဒ္စာံခန်လေဝ် ဝေၚ်အိုတ်ရ၊ ကၠစှ်ခန်လေဝ် ဝေၚ်တဴအိုတ်ရ၊ ကၠပ္ဍဲအမှဲအာကးလေဝ် ဝေၚ်တဴအိုတ်ရ၊ ကၠောန်သရက်ပ္ဍဲတိတုဲလေဝ် ဝေၚ်တဴအိုတ်ရ၊ နပွမပေါဟ်မခတ်လေဝ် ဝေၚ်အိုတ်ရ၊ နပွမဖျေံမပး ပ္ဍဲလတူခတဵုပးတုဲလေဝ် ဝေၚ်တဴအိုတ်ရ၊ နပွမတက်တၚ်ဏာၚ်လေဝ် ဝေၚ်တဴအိုတ်ရ၊ နကဵုဇြေဟ်ဒုန်ကရေက်လေဝ် ဝေၚ်တဴအိုတ်ရ၊ နပွမဝေၚ်မခနေအ်လေဝ် ဝေၚ်တဴအိုတ်ရ၊ နပွမဓဂိုဟ်ပေဝ်လေဝ် ဝေၚ်တဴအိုတ်ရ၊ နကဵုထဲသၟတ်လေဝ် ဝေၚ်တဴအိုတ်ရ၊ နပွမပစူတာ (နပွမဗတက်ဂတးဂတန်) လေဝ် ဝေၚ်တဴအိုတ်ရ၊ နကဵုစက်စာန်လေဝ် ဝေၚ်တဴအိုတ်ရ၊ နကဵုကၞာဲသၟတ်လေဝ် ဝေၚ်တဴအိုတ်ရ၊ နကဵုကွဳသၟတ်လေဝ် ဝေၚ်တဴအိုတ်ရ၊ နကဵုတ္ၚသၟတ်လေဝ် ဝေၚ်တဴအိုတ်ရ၊ နပွမပၞုက်အက္ခရ်လေဝ် ဝေၚ်တဴအိုတ်ရ၊ နပွမထၟံက်ပတိတ်ကသပ်စိုတ်လေဝ် ဝေၚ်တဴအိုတ်ရ၊ သ္ပမပ္တံကဵုညံၚ်ကၠက် ညံၚ်ခ္ဍဴ ညံၚ်ကုန်တုဲလေဝ် ဝေၚ်တဴအိုတ်ရ၊ ကွတ်စိၚ်လေဝ် ကတ်ဗတောန်အိုတ်ရ၊ ကွတ်ချေံလေဝ် ကတ်ဗတောန်အိုတ်ရ၊ ကွတ်ကွဳစောတ် (ရထာ) လေဝ် ကတ်ဗတောန်အိုတ်ရ၊ ကွတ်တ္ၚလေဝ် ကတ်ဗတောန်အိုတ်ရ၊ ကွတ်သာၚ်ၜုန်မြလေဝ် ကတ်ဗတောန်အိုတ်ရ၊ နူဂတစိၚ်လေဝ် ဂြိပ်အာအိုတ်ရ၊ နူဂတချေံလေဝ် ဂြိပ်အာအိုတ်ရ၊ နူဂတးကွဳစောတ် (ရထာ) လေဝ် ဂြိပ်အာဂြိပ်ကၠုၚ်အိုတ်ရ၊ သ္ပတဴညံၚ်ဒံၚ်သၠာ်တက်ၜုၚ်အိုတ်ရ၊ တက်လေဝ် တက်ကၞက်အိုတ်ရ၊ ကဝိုတ်လေဝ် ကဝိုတ်လက်ဗန်အိုတ်ရ၊ တက်လေဝ် တက်လက်ပၠုဲအိုတ်ရ။ ပ္ဍဲလဒေါဝ် ပေါဲလှေ်ဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ ဩဝ်လှေ် ပ္ဍဲသၞာဝွံညိ” ရဴဝွံ ဟီုသ္ဂးကဵု ဗြဴသၟာလှေ်အိုတ်ရ၊ ခိုဟ်ကွံရ ခိုဟ်ကွေံရ ယွံဒေံဗြဴရဴဝွံ ကဵုလေဝ် ကဵုသာဓုကာအိုတ်ရ၊ လပုဟ်တဲဂမၠိုၚ် ပတိုန်စွံလဝ်လတူေကၞၚ်လေဝ် ဍံက်ကဵုအိုတ်ရ၊ ဒ္ဂေတ်ပွယုတ်မနာနာသာ်လေဝ် ဒ္ဂေတ်သ္ပအိုတ်ရ။
432) ပ္ဍဲအခိၚ်ဂှ် ခမဳမွဲဇကု ဒၠိုက်ကတဵုနူဝှ် ပ္ဍဲဇနပိုဒ်ကာသိရးတုဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ အာတဴဍုၚ်သာရဝှ်မ္ဂး စိုပ်ကၠုၚ်ကဳဋာဂိရိရ၊ ပ္ဍဲအခိၚ်ဂှ်ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ မၞုံကဵုမတ်မဖျေံလဝ်ဗွဲသၟဝ် နပွမတိုန်ဂတ ပွမဆုတ်လက္ကရဴ ပွမသ္ၚေဝ်ရံၚ်တူရူ ပွမသ္ၚေဝ်ဒစေၚ်ရံၚ် ပွမခ္ဍောပ် ပွမပၠး မရၚ်တၠုၚ်ကဵုလျုၚ်ဇြုၚ်သ္ဍိုက်ဒှ်တုဲ ခမဳမဍိုက်ပေၚ်တဴ ကေုာံဣရိပိုတ်ဂှ် တၞဟ်နသွက်ပိဏ္ဍပါတ် လုပ်အာကဳဋာဂိရိရ။ မၞိဟ်ဂမၠိုၚ် ညာတ်ခမဳဂှ်တုဲ “ဍိုန်ဍိုန်လျလျ လဇုဲလဇုဲလ္ဇလ္ဇ ခ္ဍောပ်လဝ်မုက်တုဲ (ခတောအ်လဝ်ေကၞၚ်) ညံၚ်ညးဒေါသတိတ်ကီုတုဲ ညးမကၠုၚ်ဒၟံၚ်ဝွံ ညးလဵုဂှ်ရော? ကုညးမပြာပ်ကၠုၚ်ဝွံ မုရဴညးလဵုမွဲ ကြက်ကဵုဒါန်ပိဏ္ဍပါတ်ဂှ်ရော? တဳလပိုဉ်အဿဇိပုနဗ္ဗသုကဂမၠိုၚ် ပိုဲညးဂမၠိုၚ်တုန် ဍိုန်ဍောတ်ဇိပ်ဂၠိပ်အိုတ်ရ၊ ဍုက်ဍေက်ကလိတ်ကလောဝ် အိုတ်ရ၊ ပါၚ်ဍာတ်အိုတ်ရ၊ မၞုံကဵုပွမအီအာဂတအိုတ်ရ၊ ကၠုၚ်ညိ ကၠုၚ်ညိ ရဴဝွံ မၞုံအလေံဟီုဒုၚ်တၠုၚ်ပါၚ်ဆာတ်အိုတ်ရ၊ မၞုံကဵုမုက္ခဝါဍာတ်ပ္ညုၚ် ဇြုၚ်ကေဝ်ဒၟံၚ်ဟေၚ် မံက်ထေၚ်လဵုအိုတ်ရ၊ မၞုံအလေံဟီုသ္ဂးကိုပ်ကၠာရ၊ ကုတဳလပိုဉ်ဂမၠိုၚ်ဂှ်ဟေၚ် ထေက်ကဵု ကဵုဒါန်ပိဏ္ဍပါတ်ရ” ရဴဝွံ ဟီုသ္ဂးအိုတ်ရ။ ဥပးမွဲဂှ် ညာတ်ဒးအာခမဳ မဂေတ်ဂ္ၚေၚ် တၞဟ်နသွက်ပိဏ္ဍပါတ် ပ္ဍဲကဳဋာဂိရိဂှ်မ္ဂး ပြာပ်အာဇရေၚ်ခမဳဂှ်တုဲ လ္ၚောဝ်သ္ပဝတ် ဗွဲမရှေ်သှေ်ရဴဂဴမ္ဂး “ယွံတဳလပိုဉ် ကလိဂွံပိဏ္ဍပါတ်ညိဟာ” ရဴဝွံ ဂရၚ်ပတီရ။ ယွံဒကာ ဟွံကလိဂွံ ပိဏ္ဍပါတ်ရ ရဴဝွံ (ကလေၚ်သ္ဂးရ)။ ယွံတဳလပိုဉ် ဩဝ်က္ညကၠုၚ်ညိ၊ ကြက်အာသ္ၚိအိုတ်ရ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ဥပးဂှ် နိမန်ဏာခမဳဂှ် သ္ၚိတုဲ ဖါပ်ဗ္စတုဲမ္ဂး— “ယွံတဳလပိုဉ် တဳလပိုဉ် မုရဴဌာန်မွဲက္ညအာဂှ်ရော?” ရဴဝွံ ဂရၚ်ပတီရ။ ယွံဒကာ အဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ကြက်အာဍုၚ်သာရဝှ်ရ ရဴဝွံ (ကလေၚ်သ္ဂးရ)။ ယွံတဳလပိုဉ် ယဝ်ဒှ်သာ်ဂှ်မ္ဂး နကဵုဂလာန်အဲဍိက်ဂှ် ဩဝ်လ္ၚောဝ်ဖျေံက္ဍိုပ်ဂၠးဇိုၚ်တဳလမၞုံပိုဉ်ကျာ်တြဲဂမၠိုၚ်ညိ ရဴဝွံလေဝ် ဩဝ်ဂရၚ်ပတီညိ။ “ယွံတဳလမၞုံပိုဉ် ဘာပ္ဍဲကဳဋာဂိရိဂှ် လီုလာ်အာတုဲရ၊ ခမဳယုတ် မဟွံမွဲကဵုဂွဂလေံဂမၠိုၚ် မၞုံယၟုအဿဇိပုနဗ္ဗက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞံပကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ ။ ပ ။ ဒ္ဂေတ်ပွယုတ်မာနာနာသာ်လေဝ် ဒ္ဂေတ်သ္ပအိုတ်ရ။ ယွံတဳလမၞုံပိုဉ် မၞိဟ်ဂမၠိုၚ် မလျုၚ်ပတှေ် လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှေ် ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳမသ္ဍိုက်ဆာန်သဳလဂမၠိုၚ် သုန်ဂြာမ်အာအိုတ်ရ ခမဳယုတ်မာဂမၠိုၚ် ပဒတဴဒၟံၚ်အိုတ်ရ။ ယွံတဳလမၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ဗလးကဵုခမဳဂမၠိုၚ် ဘာပ္ဍဲကဳဋာဂိရိညိ၊ နပွမဗလးနၚ်သာ်ဂှ် ဘာပ္ဍဲကဳဋာဂိရိဝွံ တန်တဴဗွဲမဒးရးရ” ရဴဝွံလေဝ် (ဩဝ်ဂရၚ်ပတီညိ ရဴဝွံ ဂရၚ်ပတီရ)။ “ယွံဒကာ ခိုဟ်ရ” ရဴဝွံ ခမဳဂှ် ဒုၚ်ဝန်ကုဥပးဂှ်တုဲ ပါဲစ္ဍးအာ ဍုၚ်သာရဝှ်ရ၊ ဗွဲလၟေၚ်လၟေၚ်ပြာပ်အာဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ် ဇရေၚ်တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞါဲမွဲရ။ ပွမဟီုဂလာန်ဆက်မိတ် ဗွဲမမိပ်စိုတ်အိုတ်တၟိုဟ် ကေုာံခမဳအာဂန္တုကဂမၠိုၚ်မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်— “ယွံခမဳ ဒုၚ်စရၚ်ဒၟံၚ်ဟာ၊ ယိုပ်ယာပ်ဒၟံၚ်ဟာ၊ သီုဟွံဒှ်လၟောၚ်ဍောၚ်ၜိုတ်ဂှ် သ္ဂောံကၠုၚ်တရဴအဓါန်မဂၠိၚ်သ္ၚောဲဟာ၊ ယွံခမဳ တၠအဲ မုရဴနူဌာန်လဵုလေဝ် ကၠုၚ်တဴဂှ်ရော?” ရဴဝွံ သၟာန်ခမဳဂှ်ရ။ ဒုၚ်စရံၚ်ဒၟံၚ်ရ ယွံကျာ်မၞုံပိုဉ်၊ ယိုပ်ယာပ်ဒၟံၚ်ရ ယွံကျာ်မၞုံပိုဉ်၊ ယွံကျာ်မၞုံပိုဉ် အဲဍိက်သီုဟွံဒှ်လၟောၚ်ဍောၚ်ၜိုတ်ဂှ် သ္ဂောံကၠုၚ်တရဴ အဓါန်မဂၠိၚ်သ္ၚောဲရ၊ ယွံကျာ်မၞုံပိုဉ် အဲဍိက်ဒၠိုက်ကတဵုနူဝှ် ပ္ဍဲဇနပိုဒ်ကာသိရးတုဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ကၠုၚ်တဴဍုၚ်သာရဝှ်မ္ဂး စိုပ်ကၠုၚ်ကဳဋာဂိရိရ၊ ယွံကျာ်မၞုံပိုဉ် ပ္ဍဲအခိၚ်ဂှ် အဲဍိက် ပ္ဍဲအခိၚ်နူဂယးသၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ တၞဟ်နသွက်ပိဏ္ဍပါတ်လုပ်အာကဳဋာဂိရိရ။ ယွံကျာ်မၞုံပိုဉ် ဥပးမွဲဂှ် ညာတ်ဒးအာအဲဍိက် မဂေတ်ဂ္ၚေၚ်တၞဟ်နသွက်ပိဏ္ဍပါတ် ပ္ဍဲကဳဋာဂိရိဂှ်မ္ဂး ပြာပ်ကၠုၚ်ဇရေၚ်အဲဍိက်တုဲ လ္ၚောဝ်သ္ပဝတ်ကဵု အဲဍိက်တုဲမ္ဂး— “ယွံတဳလပိုဉ် ကလိဂွံပိဏ္ဍပါတ်ညိ” ရဴဝွံ ဂရၚ်ပတီရ။ ယွံဒကာ ဟွံကလိဂွံပိဏ္ဍပါတ်ရ ရဴဝွံ (ကလေၚ်သ္ဂးရ)။ ယွံတဳလပိုဉ် ဩဝ်က္ညကၠုၚ်ညိ၊ ကြက်အာသ္ၚိအိုတ်ရ ရဴဝွံ (ဂရၚ်ပတီရ)။ ယွံကျာ်မၞုံပိုဉ် ပ္ဍဲအခိၚ်ဂှ် ဥပးဂှ် နိမန်ဏာအဲဍိက် သ္ၚိဂှ်တုဲ ဖါပ်ဗ္စတုဲမ္ဂး— “ယွံတဳလပိုဉ် တဳလပိုဉ် မုရဴဌာန်လဵုမွဲ က္ညအာဂှ်ရော?” ရဴဝွံ ဂရၚ်ပတီရ။ ယွံဒကာအဲ တၞဟ်နသွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ကြက်အာဍုၚ်သာရဝှ်ရ ရဴဝွံ (ကလေၚ်သ္ဂးရ)။ ယွံတဳလပိုဉ် ယဝ်ဒှ်သာ်ဂှ်မ္ဂး နကဵုဂလာန်အဲဍိက်ဂှ် ဩဝ်လ္ၚောဝ်ဖျေံက္ဍိုပ် ဂၠးဇိုၚ် တဳလမၞုံပိုဉ်ကျာ်တြဲဂမၠိုၚ်ညိ ရဴဝွံလေဝ် ဩဝ်ဂရၚ်ပတီညိ။ “ယွံတဳလမၞုံပိုဉ် ဘာပ္ဍဲကဳဋာဂိရိဂှ် လီုလာ်အာတုဲရ၊ ခမဳယုတ် မဟွံမွဲကဵုဂွဂလေံဂမၠိုၚ် မၞုံယၟုအဿဇိပုနဗ္ဗက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞံပကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ ။ ပ ။ ဒ္ဂေတ်ပွယုတ်မာနာနာသာ်လေဝ် ဒ္ဂေတ်သ္ပအိုတ်ရ။ ယွံတဳလမၞုံပိုဉ် မၞိဟ်ဂမၠိုၚ် မလျုၚ်ပတှေ် လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှေ် ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳမသ္ဍိုက်ဆာန်သဳလဂမၠိုၚ် သုန်ဂြာမ်အာအိုတ်ရ ခမဳယုတ်မာဂမၠိုၚ် ပဒတဴဒၟံၚ်အိုတ်ရ။ ယွံတဳလမၞုံပိုဉ် အာတ်ပါန်အခေါၚ်ရ၊ တဳလမၞုံပိုဉ်ကျာ်တြဲ ဗလးကဵုခမဳဂမၠိုၚ် ဘာပ္ဍဲကဳဋာဂိရိညိ၊ နပွမဗလးနၚ်သာ်ဂှ် ဘာပ္ဍဲကဳဋာဂိရိဝွံ တန်တဴဗွဲမဒးရးရ ရဴဝွံ ဩဝ်ဂရၚ်ပတီညိ” ရဴဝွံ ဂရၚ်ပတီကုအဲဍိက်ရ။ ယွံကျာ်မၞုံပိုဉ် အဲဍိက်ကၠုၚ်ကဳဋာဂိရိရ ရဴဝွံ (ဂရၚ်ပတီရ)။
433) ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး “ယွံတဳလမၞုံပိုဉ် ဘာပ္ဍဲကဳဋာဂိရိဂှ် လီုလာ်အာတုဲရ၊ ခမဳယုတ် မဟွံမွဲကဵုဂွဂလေံဂမၠိုၚ် မၞုံယၟုအဿဇိပုနဗ္ဗက ဒှ်နွံပိုဉ်ဂဇအ်ဘာဂမၠိုၚ် ပ္ဍဲကဳဋာဂိရိအိုတ်ရ။ ခမဳဂမၠိုၚ်ဂှ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ရ၊ တဵုတဴတၞံပကဴသၟတ်အိုတ်ရ၊ ဖအောဝ်ကဵုညးသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုကိုဟ်စဝ်စရိုဟ်ဍာ်အိုတ်ရ ။ ပ ။ ဒ္ဂေတ်ပွယုတ်မာနာနာသာ်လေဝ် ဒ္ဂေတ်သ္ပအိုတ်ရ။ ယွံတဳလမၞုံပိုဉ် မၞိဟ်ဂမၠိုၚ် မလျုၚ်ပတှေ် လျုၚ်ဇြုၚ်သ္ဍိုက် (ရတ်ပိပြကာ) ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ဟွံလျုၚ်ပတှေ် ဟွံလျုၚ်ဇြုၚ်သ္ဍိုက် (ရတ်ပိပြကာ) အိုတ်ရ၊ ဝတ်ကဵုဒါန်သၚ်ဂမၠိုၚ် ပ္ဍဲအခိၚ်ကၠာတေံလေဝ် ပ္ဍဲအခိၚ်လၟုဟ် ပိုတ်အာအိုတ်ရ၊ ခမဳမသ္ဍိုက်ဆာန်သဳလဂမၠိုၚ် သုန်ဂြာမ်အာအိုတ်ရ ခမဳယုတ်မာဂမၠိုၚ် ပဒတဴဒၟံၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ဒ္ဂေတ်သ္ပတဴ ဒ္ဂေတ်ယုတ်မာ မၞုံသဘဴရဴဝွံအိုတ်ဂှ်ရော? တဵုတဴတၞံပကဴသၟတ်အိုတ်ဂှ်ရော? ဖအောဝ်ကဵုညးသအာၚ်တဵုအိုတ်ဂှ်ရော? ကိုဟ်စဝ်စရိုဟ်ဍာ်အိုတ်ဂှ်ရော? ဖအောဝ်ကဵု ကိုဟ်စဝ်စရိုဟ်ဍာ်အိုတ်ဂှ်ရော? ၜှ်ဂၠောၚ်အိုတ်ရော? ဖအောဝ်ကဵုၜှ်ဂၠောၚ်အိုတ်ဂှ်ရော? ကၞောတ်ဇန်အိုတ်ဂှ်ရော? ဖအောဝ်ကဵုကၞောတ်ဇန်အိုတ်ဂှ်ရော? သ္ပတဴဇၟန်ပကဴ မၞုံတဝ်မတိတ် မွဲလ္ပာ်အိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ၠတဴဇၟန်ပကဴမၞုံတဝ်မတိတ် ၜါလ္ပာ်အိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ပတဴပကဴဗ္တဗ္ဂဴအိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ပတဴပကဴလကံက်တဲ (ဇၟာန်ပကဴကဝး) အိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ပတဴပကဴ တဝ်စရှ်အိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ပတဴသၞေက် ပကဴဂ္ညိကတောဝ်အိုတ်ဂှ်ရော? ဖအောဝ်ကဵုသ္ပအိုတ်ဂှ်ရော? သ္ပတဴပကဴဂြောပ်သြိုဟ်အိုတ်ဂှ်ရော်? ဖအောဝ်ကဵုသ္ပအိုတ်ဂှ်ရော? ခမဳဂမၠိုၚ်ဂှ် တၞဟ်နဖဵုဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ရၚ်တၠုၚ်တဴဇၟန်ပကဴ မၞုံတဝ်မတိတ် မွဲလ္ပာ်အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴဇၟန်ပကဴ မၞုံတဝ်မတိတ် ၜါလ္ပာ်အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴပကဴ ဗ္တဗ္ဂဲအိုတ်ဂှ်ရောၚ်? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴပကဴလကံက်တဲ (ဇၟန်ပကဴကဝး) အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴပကဴတဝ်စရှ်အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴသၞေက်ပကဴဂ္ညိကတောဝ်အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရော? ရၚ်တၠုၚ်တဴ ပကဴဂြောပ်သြိုဟ်အိုတ်ဂှ်ရော? ဖအောဝ်ကဵုရၚ်တၠုၚ်အိုတ်ဂှ်ရ? ခမဳဂမၠိုၚ်ဂှ် မွဲဟာန်ကေုာံဗြဴကောန်ဂကူ ‘ဗြဴတၠလျိုၚ်’၊ ဗြဴဇၞော်ကောန်ဂကူ ‘ဝုတ်ဇၞော်’၊ သၟတ်ဗြဴကောန်ဂကူ ‘ဝုတ်သၟတ်’ ဂအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်ဓဝ်လေဝ် စဟာပ်အိုတ်ဂှ်ရော? ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ဂှ်ရော? ပ္ဍဲမွဲသၞာဓဝ်လေဝ် ဂဇအ်အိုတ်ဂှ်ရော? ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ဂှ်ရော? ပ္ဍဲမွဲယာတ်လးဓဝ်လေဝ်တိက်အိုတ်ဂှ်ရော? ပ္ဍဲမွဲယာတ်လတက်ဓဝ်လေဝ် တိက်အိုတ်ဂှ်ရော? ပ္ဍဲမွဲယာတ်လးမွဲ ယာတ်လတက်ဓဝ်လေဝ် တိက်အိုတ်ဂှ်ရော? ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ဂှ်ရော? သိအရက်လေဝ် သုၚ်အိုတ်ဂှ်ရော? ပကဴသဴမြမောဝ် ဂစေအ်စၠန်လံက်ဗဗိုဟ်လေဝ် ပကၚ်ရၚ်အိုတ်ဂှ်ရော? လှေ်လေဝ် လှေ်အိုတ်ဂှ်ရော? ဂယှေ်လေဝ် ဂယှေ်အိုတ်ဂှ်ရော? တိၚ်တိုက်လေဝ် တိၚ်တိုက်အိုတ်ဂှ်ရော? လှေ်လေဝ် လှေ်သာၚ်သောဝ်အိုတ်ဂှ်ရော? (ဗတောန်ထ္ၜးကဵုနဲလှေ်အိုတ်ဂှ်ရော?) အလိုက်ဗြဴသၟာလှေ်လေဝ် လှေ်ဗက်အိုတ်ဂှ်ရော? အလိုက်ဗြဴသၟာလှေ်လေဝ် ဂယှေ်ဗက်အိုတ်ဂှ်ရော? အလိုက်ဗြဴသၟာလှေ်လေဝ် တိၚ်တိုက်ဗက်အိုတ်ဂှ်ရော? အလိုက်ဗြဴသၟာလှေ်လေဝ် လှေ်သာၚ်သောဝ်အိုတ်ဂှ်ရော? အလိုက်ဗြဴသၟာဂယှေ်လေဝ် လှေ်ဗက်အိုတ်ဂှ်ရော? အလိုက်သၟာဗြဴဂယှေ်လေဝ် ဂယှေ်ဗက်အိုတ်ဂှ်ရော? အလိုက်ဗြဴသၟာဂယှေ်လေဝ် တိၚ်တိုက်ဗက်အိုတ်ဂှ်ရော? အလိုက်သၟာဗြဴဂယှေ်လေဝ် လှေ်သာၚ်သောဝ်ဗက်အိုတ်ဂှ်ရော? အလိုက်ဗြဴသၟာဆေၚ်ဝေၚ်လေဝ် လှေ်ဗက်အိုတ်ဂှ်ရော? အလိုက်ဗြဴသၟာဆေၚ်ဝေၚ်လေဝ် ဂယှေ်ဗက်အိုတ်ဂှ်ရော? အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ဂှ်ရော? အလိုက်ဗြဴသၟာဆေၚ်ဝေၚ်လေဝ် လှေ်သာၚ်သောဝ်အိုတ်ဂှ်ရော? အလိုက်ဗြဴသၟာဗတောန်လေဝ် လှေ်ဗက်အိုတ်ဂှ်ရော? အလိုက်ဗြဴသၟာဗတောန်လေဝ် ဂယှေ်ဗက်အိုတ်ဂှ်ရော? အလိုက်ဗြဴသၟာဗတောန်လေဝ် တိၚ်တိုက်ဗက်အိုတ်ဂှ်ရော? အလိုက်ဗြဴသၟာဗတောန်လေဝ် လှေ်သာၚ်သောဝ်ဗက်အိုတ်ဂှ်ရော? ကၠဒ္စာံခန်လေဝ် ဝေၚ်အိုတ်ဂှ်ရော? ကၠစှ်ခန်လေဝ် ဝေၚ်အိုတ်ဂှ်ရော? ကၠပ္ဍဲအမှဲအကးလေဝ် ဝေၚ်အိုတ်ဂှ်ရော? ကၠောန်သရက်ပ္ဍဲတိတုဲလေဝ် ဝေၚ်အိုတ်ဂှ်ရော? နပွမပေါဟ်မခတ်လေဝ် ဝေၚ်အိုတ်ဂှ်ရော? နပွမဖျေံမပး ပ္ဍဲလတူခတဵုပးတုဲလေဝ် ဝေၚ်အိုတ်ဂှ်ရော? နပွမတက်တၚ်ဏာၚ်လေဝ် ဝေၚ်အိုတ်ဂှ်ရော? နကဵုဇြေဟ်ဒုန်ကရေက်လေဝ် ဝေၚ်အိုတ်ရော? နဝေၚ်မခနေအ်လေဝ် ဝေၚ်အိုတ်ဂှ်ရော? နပွမဓဂိုဟ်ပေဝ်လေဝ် ဝေၚ်အိုတ်ဂှ်ရော? နကဵုထဲသၟတ်လေဝ် ဝေၚ်အိုတ်ဂှ်ရော? နပွမပစူတာ (နပွမဗတက်ဂတးဂတန်) လေဝ် ဝေၚ်အိုတ်ဂှ်ရော? နကဵုစက်စာန်လေဝ် ဝေၚ်အိုတ်ဂှ်ရော? နကဵုကၞာဲသၟတ်လေဝ် ဝေၚ်အိုတ်ဂှ်ရော? နကဵုကွဳသၟတ်လေဝ် ဝေၚ်အိုတ်ဂှ်ရော? နကဵုတ္ၚသၟတ်လေဝ် ဝေၚ်အိုတ်ဂှ်ရော? နပွမပၞုက်အက္ခရ်လေဝ် ဝေၚ်အိုတ်ဂှ်ရော? နပွမထၟံက်ပတိတ် ကသပ်စိုတ်လေဝ် ဝေၚ်အိုတ်ဂှ်ရော? သ္ပမပ္တံကဵုညံၚ်ကၠက် ညံၚ်ခ္ဍဴညံၚ်ကုန်တုဲလေဝ် ဝေၚ်အိုတ်ဂှ်ရော? ကွတ်စိၚ်လေဝ် ကတ်ဗတောန်အိုတ်ဂှ်ရော? ကွတ်ချေံလေဝ် ကတ်ဗတောန်အိုတ်ဂှ်ရော? ကွတ်ကွဳစောတ် (ရထာ) လေဝ် ကတ်ဗတောန်အိုတ်ဂှ်ရော? ကွတ်တ္ၚလေဝ် ကတ်ဗတောန်အိုတ်ဂှ်ရော? ကွတ်သာၚ်ၜုန်မြလေဝ် ကတ်ဗတောန်အိုတ်ဂှ်ရော? နူဂတစိၚ်လေဝ် ဂြိပ်အာအိုတ်ဂှ်ရော? နူဂတချေံလေဝ် ဂြိပ်အာအိုတ်ဂှ်ရော? နူဂတးကွဳစောတ် (ရထာ) လေဝ် ဂြိပ်အာဂြိပ်ကၠုၚ်အိုတ်ဂှ်ရော? သ္ပတဴညံၚ်ဒံၚ်သၠာ် တက်ၜုၚ်အိုတ်ဂှ်ရော? တက်လေဝ် တက်ကၞက်အိုတ်ဂှ်ရော? ကဝိုတ်လေဝ် ကဝိုတ်လက်ဗန်အိုတ်ဂှ်ရော? တက်လေဝ် တက်လက်ပၠုဲအိုတ်ဂှ်ရော? ပ္ဍဲလဒေါဝ်ပေါဲလှေ်ဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ ဩဝ်လှေ်ပ္ဍဲသၞာဝွံညိ” ရဴဝွံ ဟီုသ္ဂးကဵု ဗြဴသၟာလှေ်အိုတ်ဂှ်ရော? ခိုဟ်ကွေံရ ခိုဟ်ကွေံရ ယွံဒေံဗြဴ ရဴဝွံ ကဵုလေဝ်ကဵုသာဓုကာအိုတ်ဂှ်ရော? လပုဟ်တဲဂမၠိုၚ် ပတိုန်စွံလဝ်လတူတၞေၚ်လေဝ် ဍံက်ကဵုအိုတ်ဂှ်ရော? ဒ္ဂေတ်ပွယုတ်မာ နာနာသာ်လေဝ် ဒ္ဂေတ်သ္ပအိုတ်ရော၊ ယွံခမဳတအ် (ပွမၞးတအ်ညးဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဓရ်တုဲပ္ဍဲကြဴ— “ယွံသာရိပိုတ် မောဂ္ဂလာန်တအ် မၞးတအ်ညးဂမၠိုၚ် ဩဝ်အာအိုတ်ညိ၊ အာကဳဋာဂိရိတုဲ ဩဝ်သ္ပ ‘ပဗ္ဗာဇနဳယကမ်’ ပွမဗက်ဗ္ဒဴ နူကဳဋာဂိရိ ကုခမဳအဿဇဳပုနဗ္ဗသုကဂမၠိုၚ်အိုတ်ညိ၊ ခမဳဂမၠိုၚ်ဂှ် ဒှ်ကွးပဒတဴမွဲစွံဂမၠိုၚ် မၞးတအ်ညးဂမၠိုတ်အိုတ်ရ” ရဴဝွံ သ္ဂးကဵုသာရိပိုတ် မောဂ္ဂလာန်ရ။ ယွံတဳလမၞုံပိုဉ် ခမဳဂမၠိုၚ်ဂှ် ကြမ်ကြသအဵုသအာ်အိုတ်ရ၊ သကာတ်မြဟ်အိုတ်ရ၊ ပိုဲဍိက်တအ်ညးဂမၠိုၚ် မုရဴသာ်လဵု သ္ဂောံသ္ပပွမဗက်ဗ္ဒဴ နူကဳဋာဂိရိ ကုခမဳအဿဇဳပုနဗ္ဗသုကဂမၠိုၚ်အိုတ်ဂှ်ရော? ရဴဝွံ (ဂရၚ်ပတီအိုတ်ရ)။ ယွံသာရိပိုတ် မောဂ္ဂလာန်တအ် ယဝ်ဒှ်သာ်ဂှ်မ္ဂး မၞးတအ်ညးဂမၠိုၚ် အာမွဲဟာန်ကေုာံ ခမဳဂမၠိုၚ်မဂၠိုၚ်အိုတ်ညိ ရဴဝွံ (သ္ဂးရ)။ ယွံတဳလမၞုံပိုဉ် ခိုဟ်သန်ရ ရဴဝွံ သာရိပိုတ်ကေုာံ မောဂ္ဂလာန်ဂမၠိုၚ် ကလေၚ်ဂရၚ်ပတီ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဣဝွံတုန် ဒ္ဂေတ်ဝတ်ရောၚ်၊ ဗွဲကိုပ်ကၠာ သ္ဒးစောဒနာခမဳအဿဇိပုနဗ္ဗသုကဂမၠိုၚ်ရ၊ ကြဴနူဂှ် သ္ဒးကဵုဗှ်ဗၞုဟ်ရ၊ ကြဴနူဂှ် သ္ဒးပတိုန်အာပတ်ရ၊ ကြဴနူဂှ် ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
434) ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳအဿဇိပုနဗ္ဗသုကဂမၠိုၚ် လေပ်ပလီုပလာ်ဂကူအိုတ်ရ၊ မၞုံကဵုဒ္ဂေတ်ယုတ်မာအိုတ်ရ၊ ဒ္ဂေတ်မယုတ်မာဂမၠိုၚ် ဒဒက်တဴခမဳဂမၠိုၚ်ဝွံ ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ဂကူဂမၠိုၚ် မိန်ခမဳဂမၠိုၚ်ဝွံ မဂပ်ဝ်ပလီုပလာ်လေဝ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ကမ်မၞုံကဵုအခိၚ် မဗဗွဲကုသၚ် ယဝ်ဒှ်မ္ဂး သၚ်သ္ပပွမဗက်ဗ္ဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံရ’ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳအဿဇိပုနဗ္ဗသုကဂမၠိုၚ် လေပ်ပလီုပလာ်ဂကူအိုတ်ရ၊ မၞုံကဵုဒ္ဂေတ်ယုတ်မာအိုတ်ရ၊ ဒ္ဂေတ်မယုတ်မာဂမၠိုၚ် ဒဒက်တဴခမဳဂမၠိုၚ်ဝွံ ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ဂကူဂမၠိုၚ် မိန်ခမဳဂမၠိုၚ်ဝွံ မဂပ်ဝ်ပလီုပလာ်လေဝ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ကမ်မၞုံကဵုအခိၚ် မဗဗွဲကုသၚ် ယဝ်ဒှ်မ္ဂး သၚ်သ္ပပွမဗက်ဗ္ဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိဟွံဂွံ’ ရ၊ ယြဴကုတဳပိုဉ်မွဲ ဟွံမွဲကဵုပွမသ္ဍိုက်မၠိုၚ်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ ။ ပ ။ တဳလပိုဉ်ဂှ် သ္ဒးဟီုတိုန်ရ။ သၚ်ဂပ်ဝ်သ္ပ ပွမဗက်ဗ္ဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴ ပ္ဍဲကဳဋာဂိရိ ဟွံဂွံ’ တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
435) ပ္ဍဲအခိၚ်ဂှ် ခမဳသၚ်မၞုံပဓါန်ဍေံသာရိပိုတ် မောဂ္ဂလာန် က္ညအာကဳဋာဂိရိတုဲ ဂပ်ဝ်သ္ပပွမဗက်ဗ္ဒဴကၠေံ နူကဳဋာဂိရိ ကုခမဳအဿဇိပုနဗ္ဗသုကဂမၠိုၚ် ရဴဝွံမ္ဂး ‘ခမဳအဿဇိပုနဗ္ဗသုကဂမၠိုၚ် သ္ပဒတဴပ္ဍဲကဳဋာဂိရိ ဟွံဂွံ’ တုဲရ၊ ခမဳဂမၠိုၚ် မိန်သၚ်မဂပ်ဝ်ဗက်ဗ္ဒဴကၠေံတုဲဂှ် ဟွံဒ္ဂေတ်ဗွဲမဒးရးအိုတ်ရ၊ ဟွံဗလာပ်ဖျေံ တသော်မာန်အိုတ်ရ၊ ဟွံဒ္ဂေတ်တဴ ဒ္ဂေတ်မလေပ်ရၚ်တၠုၚ်ပတိတ်နူကမ်အိုတ်ရ၊ ဟွံကလအ်ခမဳဂမၠိုၚ်အိုတ်ရ၊ တ္ၜေဟ်လက်အိုတ်ရ၊ လဗပ်ပကီုဟီုစုတ်အိုတ်ရ၊ ကဵုအာစိုဒဒှ် ညးဗက်စဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ရ၊ ပါဲလေဝ် ပါဲစ္ဍးအာအိုတ်ရ၊ ရာမ်လေဝ် ရာမ်တိတ်ခရှ်အိုတ်ရ။ ခမဳပၟိက်အောန်ဂမၠိုၚ် “သၚ်သီုဂပ်ဝ်ဗက်ဗ္ဒဴအိုတ်ဂှ် မုဟိုတ် ဟွံဒ္ဂေတ်ဗွဲမဒးရးအိုတ်ဂှ်ရော? ဟွံဗလာပ်ဖျေံတသော်မာန်အိုတ်ဂှ်ရော? ဟွံဒ္ဂေတ်တဴ ဒ္ဂေတ်မလေပ်ရၚ်တၠုၚ်ပတိတ်ကမ်အိုတ်ဂှ်ရော? ဟွံကလအ်ခမဳဂမၠိုၚ်အိုတ်ဂှ်ရော? တ္ၜေဟ်လက်အိုတ်ဂှ်ရော? လဗပ်ပကီုဟီုစုတ်အိုတ်ဂှ်ရော? ကဵုအာစိုပ်ဒဒှ် ညးဗက်စဆန္ဒာဂတိ ဒေါသာဂတိ မောဟာဂတိ ဘယာဂတိဂမၠိုၚ်အိုတ်ဂှ်ရော? ပါဲလေဝ် ပါဲစ္ဍးအာအိုတ်ဂှ်ရော? ရာမ်လေဝ် ရာမ်တိတ်ခရှ်အိုတ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ် ဟီုဂရိုဟ်တၚ်ဒုဟ် ခမဳအဿဇိပုနဗ္ဗသုကဂမၠိုၚ် နဟိုတ်ဂမၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံခမဳတအ် ခမဳအဿဇိပုနဗ္ဗသုကဂမၠိုၚ် သၚ်သီုဂပ်ဝ်ဗက်ဗ္ဒဴအိုတ်ဂှ် ဟွံဒ္ဂေတ်ဗွဲမဒးရးအိုတ်ရ ။ ပ ။ ရာမ်လေဝ် ရာမ်တိတ်ခရှ်အိုတ်ရဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
436) ခမဳမလေပ်ပလီုပလာ်ဂကူဂမၠိုၚ် မၞုံကဵုဒ္ဂေတ်မယုတ်မာဂှ် သ္ပနိဿယ်ဗ္ဒာဲကဵုကွာန်နိဂီုမွဲမွဲတုဲ သ္ပဒတဴရ၊ ဒ္ဂေတ်မယုတ်မာဂမၠိုၚ် ခမဳဂှ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ဂကူဂမၠိုၚ် မိန်ခမဳဂှ် မဂပ်ဝ်ပလီုပလာ်လေဝ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ခမဳဂမၠိုၚ် ‘တဳလပိုဉ်တုန် လေပ်ပလီုပလာ်ဂကူရ၊ မၞုံကဵုဒ္ဂေတ်မယုတ်မာရ၊ ဒ္ဂေတ်မယုတ်မာဂမၠိုၚ် တဳလပိုဉ်ဂှ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ဂကူဂမၠိုၚ် မိန်တဳလပိုဉ် မဂပ်ဝ်ပလီုပလာ်လေဝ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ တဳလပိုဉ် ဩဝ်စ္ဍးတိတ်အာ နူဘာဝွံညိ၊ နပွမပဒတဴ ပ္ဍဲဘာဝွံ ဟွံမွဲဖဵုကုတဳလပိုဉ်ရ’ ရဴဝွံ သ္ဒးဟီုသ္ဂးကဵုခမဳဂှ်ရ၊ ရဴဝွံ ခမဳဂမၠိုၚ် ဂပ်ဝ်ဟီုသ္ဂးမ္ဂး ခမဳဂှ် ‘ခမဳဂမၠိုၚ် ဆန္ဒာဂတိလေဝ် ဗက်စအိုတ်ရ၊ ဒေါသာဂတိလေဝ် ဗက်စအိုတ်ရ၊ မောဟာဂတိလေဝ် ဗက်စအိုတ်ရ၊ ဘယာဂတိလေဝ် ဗက်စအိုတ်ရ၊ နအာပတ်မၞုံသဘဴသာ်ဂှ် ခမဳလ္ၚဵုဂမၠိုၚ် ဗက်ဗ္ဒဴအိုတ်ရ၊ ခမဳလ္ၚဵုဂမၠိုၚ် ဟွံဗက်ဗ္ဒဴအိုတ်ရ’ ရဴဝွံ ဟီုသ္ဂးကဵုခမဳဂမၠိုၚ်မ္ဂး၊ ခမဳဂမၠိုၚ် ‘တဳလပိုဉ် လ္ပဟီုရဴဝွံညိ၊ ခမဳဂမၠိုၚ် ဆန္ဒာဂတိလေဝ် ဟွံဗက်စအိုတ်ရ၊ ဒေါသာဂတိလေဝ်ဟွံဗက်စအိုတ်ရ၊ မောဟာဂတိလေဝ် ဟွံဗက်စအိုတ်ရ၊ ဘယာဂတိလေဝ် ဟွံဗက်စအိုတ်ရ၊ တဳလပိုဉ်ဟေၚ် လေပ်ပလီုပလာ်ဂကူရ၊ မၞုံကဵုဒ္ဂေတ်မယုတ်မာရ၊ ဒ္ဂေတ်မယုတ်မာဂမၠိုၚ် တဳလပိုဉ်ဂှ် ညာတ်လေဝ်ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ ဂကူဂမၠိုၚ်မိန်တဳလပိုဉ် မဂပ်ဝ်ပလီုပလာ်လေဝ် ညာတ်လေဝ် ဂပ်ဝ်ညာတ်အိုတ်ရ၊ မိၚ်လေဝ် ဂပ်ဝ်မိၚ်အိုတ်ရ၊ တဳလပိုဉ် ဩဝ်စ္ဍးတိတ်အာနူဘာဝွံညိ၊ နပွမပဒတဴ ပ္ဍဲဘာဝွံ ဟွံမွဲဖဵု ကုတဳလပိုဉ်ရ’ ရဴဝွံ သ္ဒးဟီုသ္ဂးကဵုခမဳဂှ်ရ၊ ရဴဝွံဟေၚ်ခမဳဂမၠိုၚ် သီုဂပ်ဝ်သ္ဂးတဴခမဳဂှ် တုပ်နဲကိုပ်ကၠာဟေၚ် ယိုက်ဒိုက်ဂိုၚ်ကေတ်မ္ဂး တၞဟ်နကဵုသၠးကၠေံကွေတ်ဂှ် စဵုကဵုပေၚ်ပိဝါ ခမဳဂမၠိုၚ် ဂပ်ဝ်ဒၠောံဗတောန်ခမဳဂှ် ဗွဲမဒးရးရ၊ စဵုကဵုပေၚ်ပိဝါ ဂပ်ဝ်ဒၠောံဗတောန် ဗွဲမဒးရနေဝ် ယဝ်သၠးကၠေံကွေတ်ဂှ်မ္ဂး၊ ပွမသၠးကၠေံ ရဴဝွံ ခိုဟ်သန်ရ၊ ယဝ်ဟွံသၠးကၠေံမ္ဂး၊ (ကုခမဳဂှ်) ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
