၂.၁၂.၁။ ပွံက်ဒုဗ္ဗစသိက္ခာပိုဒ်
426) ခမဳဂှ် ဒှ်ညးမၞုံသဘဴ ဟီုဒၠောံဗတောန်ဝါတ်ဟေၚ် ဒှ်ရ မ္ဂးဂှ် ဍိုက်ပေၚ်တဴကေုာံဓရ်ဂမၠိုၚ် မလေပ်သ္ပကဵု ပွမဟီုဒၠောံဗတောန်ဝါတ်ဒှ်တုဲ ဟီုဒၠောံဗတောန်ဝါတ်ရ၊ ဟွံမွဲကဵုအေၚ်ဒုၚ်ရ၊ ဟွံကလၚ်ဂိုၚ်ကေတ် ဒၠောံဗတောန် ဗွဲမရှေ်သှေ်ရဴဂဴရ။ နသိက္ခာပိုဒ်ဂမၠိုၚ် မကၠုၚ်ပ္ဍဲပါတိမုက် မ္ဂးဂှ် နသိက္ခာပိုဒ်ဂမၠိုၚ် မလုပ်လၟိဟ်ပ္ဍဲပါတိမုက်။ ခမဳဂမၠိုၚ် မ္ဂးဂှ် ခမဳသအာၚ်ဂမၠိုၚ်။ နဟိုတ်မဗဗွဲကဵုဓရ် မ္ဂးဂှ် ယြဴသိက္ခာပိုဒ်မွဲ တဳလမၞုံပိုဉ်ကျာ်တြဲ ပညပ်လဝ်ရ၊ သိက္ခာပိုဒ်ဂှ် ဟိုတ်မဗဗွဲကဵုဓရ်မ္ဂးရ၊ ဂပ်ဝ်ဟီုဒၠောံဗတောန် နဟိုတ်မဗဗွဲကဵုဓရ်ဂှ်မ္ဂး “တဳလပိုဉ်တအ်ညးဂမၠိုၚ် ခိုဟ်ကီု ပရေအ်ကီု မမိက်ကဵုညိည လ္ပဟီုကဵုအဲဍိက်အိုတ်ညိ၊ အဲဍိက်လေဝ ခိုဟ်ကီု ပရေအ်ကီု မမိက်ကဵုညိည ကြက်ဟွံဟီုသ္ဂးကဵုတဳလပိုဉ်တအ်ညးဂမၠိုၚ်ရ၊ တဳလပိုဉ်တအ်ညးဂမၠိုၚ် ဩဝ်ဝေၚ်ပါဲကၠေံ နူပွမဟီုဒၠောံဗတောန် အဲဍိက်အိုတ်ညိ” ရဴဝွံ သ္ပတဴ ဟွံထေက်ကဵုဟီုသ္ဂးကဵုဇကုရ။ ခမဳဂှ် မ္ဂးဂှ် ယြဴခမဳမွဲ ဟီုဒၠောံဗတောန်ဝါတ်ရ၊ ခမဳဂှ်။ ခမဳဂမၠိုၚ် မ္ဂးဂှ် ခမဳသအာၚ်ဂမၠိုၚ်။ ယြဴခမဳဂမၠိုၚ် ညာတ်အိုတ်ရ၊ ယြဴခမဳဂမၠိုၚ် မိၚ်အိုတ်ရ၊ ခမဳဂမၠိုၚ်ဂှ် “တဳလပိုဥ် လ္ပသ္ပတဴ ပွမဟွံထေက်ကဵု ဟီုသ္ဂးကဵုဇကုညိ၊ တဳလပိုဉ် ဩဝ်သ္ပတဴ ပွမထေက်ကဵုဟီုသ္ဂး ကဵုဇကုဟေၚ်ညိ၊ တဳလပိုဉ်လေဝ် ဩဝ်ဟီုသ္ဂးကဵုခမဳဂမၠိုၚ် နဟိုတ်မဗဗွဲကဵုဓရ်ညိ၊ ခမဳဂမၠိုၚ်လေဝ် ကြက်ဟီုသ္ဂးကဵုတဳလပိုဉ် နဟိုတ်မဗဗွဲကဵုဓရ်အိုတ်ရ၊ ရဴသာ်ဝွံ နပွမဒၠောံဗတောန်ရၚ်သကအ် ပွမကဵုဒၠိုက်ကတဵုနူအာပတ် ရၚ်သကအ်ဝွံဟေၚ် ပရိသာတ်ကျာ်တြဲဂှ် အာစိုပ်ပွမဇၞော်မောဝ်မာန်ရ” ရဴဝွံ သ္ဒးဟီုသ္ဂးရ။ မရနုက်ကဵုၜါဝါလေဝ် သ္ဒးဟီုသ္ဂးရ၊ မရနုက်ကဵုပိဝါလေဝ် သ္ဒးဟီုသ္ဂးရ။ ယဝ်သၠးကၠေံတဴမ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး ဒးအာပတ်ဒုက္ကဋ်ရ၊ မိၚ်တုဲ ဟွံဟီုသ္ဂးအိုတ်မ္ဂး ဒးအာပတ်ဒုက္ကဋ်ရ၊ ခမဳဂှ် ဇရေၚ်လဒေါဝ်သၚ်လေဝ် ကော်ဏာတုဲ “တဳလပိုဉ် လ္ပသ္ပတဴ ပွမဟွံထေက်ကဵု ဟီုသ္ဂးကဵုဇကုညိ ။ ပ ။ ပွမကဵုဒၠိုက်ကတဵုနူအာပတ် ရၚ်သကအ်ဝွံ ပရိသာတ်ကျာ်တြဲဂှ် အာစိုပ်ပွမဇၞော်မောဝ်မာန်ရ” ရဴဝွံ (သ္ဒးဟီုသ္ဂးရ)။ မရနုက်ကဵုၜါဝါလေဝ် သ္ဒးဟီုသ္ဂးရ၊ မရနုက်ကဵုပိဝါလေဝ် သ္ဒးဟီုသ္ဂးရ။ ယဝ်သၠးကၠေံတဴမ္ဂး ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး ဒးအာပတ်ဒုက္ကဋ်ရ။ ဂပ်ဝ်ဒးဒၠောံဗတောန် ခမဳဂှ် ဗွဲမဒးရး (နဉတ်ကမ္မဝါစ်) ရ၊ ယွံခမဳတအ် ရဴဝွံဟေၚ် သ္ဒးဒၠောံဗတောန် ဗွဲမဒးရးရ၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
427) ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ခမဳဂမၠိုၚ် ဂပ်ဝ်ဒၠောံဗတောန် နသိက္ခာပိုဒ်မ္ဂး သ္ပတဴဟွံထေက်ကဵု ဟီုသ္ဂးကဵုဇကုရ၊ ခမဳဂှ်ဟွံသၠးကၠေံကွေတ်ဂှ်ရ၊ ကမ်မၞုံကဵုအခိၚ် မဗဗွဲကုသၚ် ယဝ်ဒှ်မ္ဂး တၞဟ်နကဵုသၠးကၠေံကွေတ်ဂှ် သၚ်သ္ဒးဒၠောံဗတောန် ခမဳမၞုံယၟုဝွံ ဗွဲမဒးရးရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ခမဳဂမၠိုၚ် ဂပ်ဝ်ဟီုဒၠောံဗတောန် နသိက္ခာပိုဒ်မ္ဂး သ္ပတဴဟွံထေက်ကဵု ဟီုသ္ဂးကဵုဇကုရ၊ ခမဳဂှ်ဟွံသၠးကၠေံကွေတ်ဂှ်ရ၊ တၞဟ်နကဵုသၠးကၠေံကွေတ်ဂှ် သၚ်ဒၠောံဗတောန် ခမဳမၞုံယၟုဝွံ ဗွဲမဒးရးရ၊ ယြဴကုတဳလပိုဉ်မွဲ တၞဟ်နကဵုသၠးကၠေံကွေတ်ဂှ် သ္ဍိုက်မၠိုက်ပွမဒၠောံဗတောန် ခမဳမၞုံယၟုဝွံ ဗွဲမဒးရးရ၊ တဳလပိုဉ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ ခမဳဂမၠိုၚ် ဂပ်ဝ်ဟီုဒၠောံဗတောန် နသိက္ခာပိုဒ်မ္ဂး သ္ပတဴဟွံထေက်ကဵု ဟီုသ္ဂးကဵုဇကုရ၊ ခမဳဂှ်ဟွံသၠးကၠေံကွေတ်ဂှ်ရ၊ တၞဟ်နကဵုသၠးကၠေံကွေတ်ဂှ် သၚ်ဒၠောံဗတောန် ခမဳမၞုံယၟုဝွံ ဗွဲမဒးရးရ၊ ယြဴကုတဳလပိုဉ်မွဲ တၞဟ်နကဵုသၠးကၠေံကွေတ်ဂှ် သ္ဍိုက်မၠိုက်ပွမဒၠောံဗတောန် ခမဳမၞုံယၟုဝွံ ဗွဲမဒးရးရ၊ တဳလပိုဉ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ တၞဟ်နကဵုသၠးကၠေံကွေတ်ဂှ် သၚ်ဂပ်ဝ်ဒၠောံဗတောန် ခမဳမၞုံယၟုဝွံ ဗွဲမဒးရးရ၊ ကုသၚ်ဂှ်လေဝ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
428) ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ဒးအာပတ်သံဃာဒိသေသ်ရ။ ကုခမဳ မအာစိုပ်သံဃာဒိသေသ်ဂှ် ဒုက္ကဋ် ပ္ဍဲလအိတ်ဉတ် ထုလ္လစ္စယ် ပ္ဍဲလအိတ်ကမ္မဝါစ်ဂမၠိုၚ် ၜါဝါဂမၠိုၚ်ဂှ် လလမ်အိုတ်ရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
429) ပ္ဍဲဓမ္မကမ် မၞုံပွမသမ္တီထေၚ်ကေတ် ဓမ္မကမ်တုဲ ဟွံသၠးကၠေံမ္ဂး ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံသၠေဟ်ပၟာတုဲ ဟွံသၠးကၠေံမ္ဂး ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံပွမသမ္တီထေၚ်ကေတ် အဓမ္မကမ်တုဲ ဟွံသၠးကၠေံမ္ဂး ဒးအာပတ်သံဃာဒိသေသ်ရ။ ပ္ဍဲအဓမ္မကမ် မၞုံပွမသမ္တီထေၚ်ကေတ် ဓမ္မကမ်တုဲ ဟွံသၠးကၠေံမ္ဂး ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံသၠေဟ်ပၟာတုဲ ဟွံသၠးကၠေံမ္ဂး ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံပွမသမ္တီထေၚ်ကေတ် အဓမ္မကမ်တုဲ ဟွံသၠးကၠေံမ္ဂး ဒးအာပတ်ဒုက္ကဋ်ရ။
430) ကုခမဳ မဟဂပ်ဝ်ဒၠောံဗတောန် ဗွဲမဒးရး (နဉတ်ကမ္မဝါစ်) ခမဳသၠးကၠေံကွေတ် ခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဒုဗ္ဗစသိက္ခာပိုဒ် ဒွါဒသမတုဲရ။
