၂.၁၂။ ဒုဗ္ဗစသိက္ခာပိုဒ်
424) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဃောသိတာရာမ် ဇရေၚ်ဍုၚ်ကောသမ္ဗဳဂှ် တဳလပိုဉ်ဆန္န ဒ္ဂေတ်တဴဒ္ဂေတ်ဟွံဗဗွဲရ၊ ခမဳဂမၠိုၚ် “ယွံကောန်တၠဆန္န လ္ပသ္ပပွမၞုံသဘဴရဴဝွံညိ၊ ပွဝွံ ဟွံဂပ်ဝ်ရ” ရဴဝွံ ဟီုသ္ဂးအိုတ်ရ။ တဳလပိုဉ်ဆန္နဂှ် “ယွံကောန်တၠတအ် မၞးတအ်ညးဂမၠိုၚ် ထေက်ကဵုဟီုကဵုအဲရ ရဴဝွံ မုဟိုတ်သမ္တီကေတ်အိုတ်ဂှ်ရော? အဲဟေၚ် ထေက်ကဵုဟီုသ္ဂး ကဵုမၞးတအ်ညးဂမၠိုၚ်ရ၊ ကျာ်ပိုဲတအ်ညးဂမၠိုၚ်ရ၊ ကောန်နာဲ ပိုဲတအ်ညးဂမၠိုၚ် ဂပ်ဝ်ထပက်ခၠၚ်ဂြၚ်တီကေတ် ဓရ်တုဲရ၊ ဥပမာမ္ဂးတုန် လဗိုတ်ကျာမသကာတ်မြဟ် ပိုက်လွိၚ်ကၠုၚ်မ္ဂး ချောဲတၞာၚ်ဆု တၞးဆုကှ်ကှ်ဂမၠိုၚ် သၟဟ်ညံၚ်ရဴပကောံဂအုံလဝ် မွဲစွံဓဝ်တုဲဒှ်ကီု ဇၟောဝ်ဍာ်ကြုၚ် မဇွောဝ်စှေ်ကၠုၚ်နူက္ဍဟ်ဒဵုဂှ် သၟဟ်ညံၚ်ရဴပကောံဂအုံလဝ် သွိသွန်အိက်ၚာ်သွးဂမၠိုၚ် မွဲစွံဓဝ်တုဲဒှ်ကီု တုပ်သၟဟ်သာ်ဝွံဟေၚ် ဂပ်ဝ်ကဵုပကောံလဝ် မၞးတအ်ညးဂမၠိုၚ် မသ္ပခမဳနူတၞဟ်တၞဟ် မၞုံယၟုတၞဟ်တၞဟ် မၞုံတၞောဝ်တၞဟ်တၞဟ် မၞုံဇာတ်တၞဟ်တၞဟ် မွဲစွံအိုတ်ရ၊ ယွံကောန်တၠတအ် မၞးတအ်ညးဂမၠိုၚ် ထေက်ကဵုဟီုကဵုအဲရ ရဴဝွံ မုဟိုတ် သမ္တီကေတ်အိုတ်ဂှ်ရော? အဲဟေၚ်ထေက်ကဵုဟီုသ္ဂး ကဵုမၞးတအ်ညးဂမၠိုၚ်ရ၊ ကျာ်ပိုဲတအ်ညးဂမၠိုၚ်ရ၊ ဓရ်ပိုဲတအ်ညးဂမၠိုၚ်ရ၊ ကောန်နာဲပိုဲတအ်ညးဂမၠိုၚ် ဂပ်ဝ်ထပက်ခၠၚ်ဂြၚ်တီကေတ် ဓရ်တုဲရ” ရဴဝွံ ဟီုသ္ဂးရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဆန္န ခမဳဂမၠိုၚ် ဂပ်ဝ်ဒၠောံဗတောန် နသိက္ခာပိုဒ်ဂှ်မ္ဂး မုဟိုတ်သ္ဂောံသ္ပတဴ ဟွံထေက်ကဵုဟီုဒၠောံဗတောန်ဇကုဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဆန္န နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံဆန္န တၠအဲ ခမဳဂမၠိုၚ်ဂပ်ဝ်ဒၠောံဗတောန် နသိက္ခာပိုဒ်ဂှ်မ္ဂး သ္ပတဴဟွံထေက်ကဵု ဟီုဒၠောံဗတောန်ဇကုရဟီုဂှ် ဍာံပြဟာ ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) ခမဳဂမၠိုၚ် ဂပ်ဝ်ဒၠောံဗတောန် နသိက္ခာပိုဒ်ဂှ်မ္ဂး မုဟိုတ် တၠအဲ သ္ဂောံသ္ပတဴဟွံထေက်ကဵု ဟီုဒၠောံဗတောန်ဇကုဂှ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
425) ခမဳဂှ် ဒှ်ညးမၞုံသဘဴ ဟီုဒၠောံဗတောန်ဝါတ် နသိက္ခာပိုဒ်ဂမၠိုၚ် မကၠုၚ်ပ္ဍဲပါတိမုက်ဟေၚ်ရ၊ ခမဳဂမၠိုၚ် ဂပ်ဝ်ဟီုဒၠောံဗတောန် နသိက္ခာပိုဒ်မ္ဂး ‘တဳလပိုဉ်တအ်ညးဂမပိုၚ် ခိုဟ်ကီု ပရေအ်ကီု မမိက်ကဵုညိည လ္ပဟီုကဵုအဲဍိက်အိုတ်ညိ၊ အဲဍိက်လေဝ် ခိုဟ်ကီု ပရေအ်ကီု မမိက်ကဵုညိည ကြက်ဟွံဟီုသ္ဂးကဵု တဳလပိုဉ်တအ်ညးဂမၠိုၚ်ရ၊ တဳလပိုဉ်တအ်ညးဂမၠိုၚ် ဩဝ်ဝေၚ်ပါဲကၠေံ နူပွမဟီုဒၠောံဗတောန် အဲဍိက်အိုတ်ညိ’ ရဴဝွံ သ္ပတဴဟွံထေက်ကဵု ဟီုသ္ဂးကဵုဇကုရ၊ ခမဳဂမၠိုၚ် ‘တဳလပိုဉ် လ္ပသ္ပတဴပွမဟွံထေက်ကဵု ဟီုသ္ဂးကဵုဇကုညိ၊ တဳလပိုဉ် ဩဝ်သ္ပတဴပွမထေက်ကဵု ဟီုသ္ဂးကဵုဇကုဟေၚ်ညိ၊ တဳလပိုဉ်လေဝ် ဩဝ်ဟီုသ္ဂးကဵုခမဳဂမၠိုၚ် နဟိုတ်မဗဗွဲကဵုဓရ်ညိ၊ ခမဳဂမၠိုၚ်လေဝ် ကြက်ဟီုသ္ဂးကဵုတဳလပိုဉ် နဟိုတ်မဗဗွဲကဵုဓရ်အိုတ်ရ၊ ရဴသာ်ဝွံ နပွမဒၠောံဗတောန်ရၚ်သကအ် ပွမကဵုဒၠိုက်ကတဵု နူအာပတ်ရၚ်သကအ်ဝွံဟေၚ် ပရိသာတ်ကျာ်တြဲဂှ် အာစိုပ်ပွမဇၞော်မောဝ်မာန်ရ’ ရဴဝွံ သ္ဒးဟီုသ္ဂးကဵုခမဳဂှ်ရ၊ ရဴဝွံဟေၚ် ခမဳဂမၠိုၚ် သီုဂပ်ဝ်သ္ဂးတဴ ခမဳဂှ် တုပ်နဲကိုပ်ကၠာဟေၚ် ယိုက်ဒိုက်ဂိုၚ်ကေတ်မ္ဂး၊ တၞဟ်နကဵုသၠးကၠေံကွေတ်ဂှ် စဵုကဵုပေၚ်ပိဝါ ခမဳဂမၠိုၚ် ဂပ်ဝ်ဒၠောံဗတောန်ခမဳဂှ် ဗွဲမဒးရးရ၊ စဵုကဵုပေၚ်ပိဝါ ဂပ်ဝ်ဒၠောံဗတောန်ဗွဲမဒးရးနေဝ် ယဝ်သၠးကၠေံကွေတ်ဂှ်မ္ဂး ပွမသၠးကၠေံ ရဴဝွံ ခိုဟ်သန်ရ၊ ယဝ်ဟွံသၠးကၠေံမ္ဂး (ကုခမဳဂှ်) ဒးအာပတ်သံဃာဒိသေသ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
