၂.၁၀.၂။ ပွံက်သံဃဘေဒသိက္ခာပိုဒ်
412) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳရ။ သၚ်မညဳသာသၟဟ်သၟန် မ္ဂးဂှ် (သၚ်) မၞုံကဵုပွမပံၚ်ဖက် တုပ်သၟဟ်မတန်တဴပ္ဍဲသိမ် တုပ်တၟဟ်။ သ္ပလွဳပရာ တၞဟ်နပွမပါ်ဒကး မ္ဂးဂှ် မုရဴသာ်လဵုခမဳဂမၠိုၚ်ဝွံ သ္ဂောံပါ်အာတၞဟ်တၞဟ်အိုတ်ဂှ်ရော? သ္ဂောံဒှ်ဟွံစပ်အိုတ်ဂှ်ရော? သ္ဂောံဒှ်ဂကောံကဵုဂကောံအိုတ်ဂှ်ရော? ရဴဝွံ ဂၠာဲသ္ၚေဝ်ဗော်သွးရ၊ ဒက်ဂကောံဂိုဏ်ရ။ ဟိုတ်မလေပ်ကတဵုဗဒှ်ကဵု ပွမပါ်ဒကးလေဝ် မ္ဂးဂှ် ဝတ္ထုစှ်ဒ္စာံသာ် မလေပ်ကတဵုဗဒှ်ကဵု ပွမပါ်ဒကးဂမၠိုၚ်ရောၚ်။ ဂိုၚ်ကေတ်ဗွဲမဗိုန်ဗတ်တုဲ မ္ဂးဂှ် ဂိုၚ်ကေတ်တုဲ။ သ္ပယိုက်ဒိုက်တုဲ မ္ဂးဂှ်စၞောန်ထ္ၜးမ္ဂး။ တန်တဴ မ္ဂးဂှ်ဟွံသေၚ်ကၠေံမ္ဂး။ ခမဳဂှ် မ္ဂးဂှ်ခမဳမလေပ်ပါ်ဒကးသၚ်ရောၚ်။ ခမဳဂမၠိုၚ် မ္ဂးဂှ် ခမဳသအာၚ်ဂမၠိုၚ်။ ယြဴခမဳဂမၠိုၚ် ညာတ်အိုတ်ရ၊ ယြဴခမဳဂမၠိုၚ် မိၚ်အိုတ်ရ၊ ခမဳဂမၠိုၚ်ဂှ် “တဳလပိုဉ်ဂှ် လ္ပသ္ပလွဳပရာ တၞဟ်နပွမပါ်ဒကး သၚ်မညဳသာသၟဟ်သၟန်ညိ၊ ဟိုတ်မလေပ်ကတဵုဗဒှ်ကဵု ပွမပါ်ဒကးလေဝ် ယိုက်ဒိုက်ဂိုၚ်ကေတ် ဗွဲမဗိုန်ဗတ်တုဲ လ္ပတန်တဴညိ၊ တဳလပိုဉ် ဩဝ်ညဳသာသၟဟ်သၟန်ကေုာံသၚ်ညိ၊ သၚ်မညဳသာသၟဟ်သၟန်ဂှ်ဟေၚ် အိုတ်တၟိုဟ်ဗွဲမဒးရးဒှ်တုဲ ဟွံမွဲပွမကယျာန်ဒဝါတ်ဒှ်တုဲ မၞုံကဵုပွမစၞောန်ထ္ၜး ပါတိမုက်မွဲစွံဒှ်တုဲ သ္ဂောံပဒတဴ ဗွဲတသိုခ်ရ” ရဴဝွံ သ္ဒးဟီုသ္ဂးရ။ မရနုက်ကဵုၜါဝါလေဝ် သ္ဒးဟီုသ္ဂးရ၊ မရနုက်ကဵုပိဝါလေဝ် သ္ဒးဟီုသ္ဂးရ။ ယဝ်သၠးကၠေံမ္ဂး၊ ပွမသၠကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး ဒးအာပတ်ဒုက္ကဋ်ရ၊ မိၚ်တုဲ ဟွံဟီုသ္ဂးအိုတ်မ္ဂး၊ ဒးအာပတ်ဒုက္ကဋ်ရ၊ ခမဳဂှ် ဇရေၚ်လဒေါဝ်သၚ်လေဝ် ကော်ဏာတုဲ “တဳလပိုဉ်ဂှ် လ္ပသ္ပလွဳပရာ တၞဟ်နပွမပါ်ဒကး သၚ်မညဳသာသၟဟ်သၟန်ညိ၊ ဟိုတ်မလေပ်ကတဵုဗဒှ်ကဵုပွမပါ်ဒကးလေဝ် ယိုက်ဒိုက်ဂိုၚ်ကေတ် ဗွဲမဗိုန်ဗတ်တုဲ လ္ပတန်တဴညိ၊ တဳလပိုဉ် ဩဝ်ညဳသာသၟဟ်သၟန်ကေုာံသၚ်ညိ၊ သၚ်မညဳသာသၟဟ်သၟန်ဂှ်ဟေၚ် အိုတ်တၟိုဟ်ဗွဲမဒးရးဒှ်တုဲ ဟွံမွဲပွမကယျာန်ဒဝါတ်ဒှ်တုဲ မၞုံကဵုပွမစၞောန်ထ္ၜး ပါတိမုက်မွဲစွံဒှ်တုဲ သ္ဂောံပဒတဴ ဗွဲတသိုခ်ရ” ရဴဝွံ သ္ဒးဟီုသ္ဂးရ။ မရနုက်ကဵုၜါဝါလေဝ် သ္ဒးဟီုသ္ဂးရ၊ မရနုက်ကဵုပိဝါလေဝ် သ္ဒးဟီုသ္ဂးရ။ ယဝ်သၠးကၠေံမ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး ဒးအာပတ်ဒုက္ကဋ်ရ။ ဂပ်ဝ်ဒးဒၠောံဗတောန်ခမဳဂှ် ဗွဲဒးရးရ၊ ယွံခမဳတအ် ရဴဝွံဟေၚ် သ္ဒးဒၠောံဗတောန် ဗွဲမဒးရးရ၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
413) ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ သ္ပလွဳပရာ တၞဟ်နပွပါ်ဒကး သၚ်မညဳသာသၟဟ်သၟန်ရ၊ ခမဳဂှ် ဟွံသၠးကၠေံကွေတ်ဂှ်ရ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ တၞဟ်နကဵုသၠးကၠေံကွေတ်ဂှ် သၚ် သ္ဒးဒၠောံဗတောန် ခမဳမၞုံယၟုဝွံ ဗွဲမဒးရးရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ သ္ပလွဳပရာတၞဟ်နပွမပါ်ဒကးသၚ် မညဳသာသၟဟ်သၟန်ရ၊ ခမဳဂှ် ဟွံသၠးကၠေံကွေတ်ဂှ်ရ၊ တၞဟ်နကဵုသၠးကၠေံကွေတ်ဂှ် သၚ်ဒၠောံဗတောန်ခမဳမၞုံယၟုဝွံ ဗွဲမဒးရးရ၊ ယြဴကုတဳလပိုဉ်မွဲ တၞဟ်နကဵုသၠးကၠေံကွေတ်ဂှ် သ္ဍိုက်မၠိုက်ပွမဒၠောံဗတောန် ခမဳမၞုံယၟုဝွံ ဗွဲမဒးရးရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ဂှ်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ သ္ပလွဳပရာတၞဟ်နပွမပါ်ဒကး သၚ်မညဳသာသၟဟ်သၟန်ရ၊ ခမဳဂှ် ဟွံသၠးကၠေံကွေတ်ဂှ်ရ၊ တၞဟ်နကဵုသၠးကၠေံကွေတ်ဂှ် သၚ်ဒၠောံဗတောန် ခမဳမၞုံယၟုဝွံ ဗွဲမဒးရးရ၊ ယြဴကုတဳလပိုဉ်မွဲ တၞဟ်နကဵုသၠးကၠေံကွေတ်ဂှ် သ္ဍိုက်မၠိုက်ပွမဒၠောံဗတောန် ခမဳမၞုံယၟုဝွံ ဗွဲမဒးရးရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ တၞဟ်နကဵုသၠးကၠေံကွေတ်ဂှ် သၚ်ဂပ်ဝ်ဒၠောံဗတောန် ခမဳမၞုံယၟုဝွံ ဗွဲမဒးရးတုဲရ၊ ကုသၚ်မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
414) ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ဒးအာပတ်သံဃာဒိသေသ်ရ။ ကုခမဳမအာစိုပ်သံဃာဒိသေသ် ဒုက္ကဋ်ဂှ် ပ္ဍဲလအိတ်ဉတ် ထုလ္လစ္စယ် ပ္ဍဲလအိတ်ကမ္မဝါစ်ဂမၠိုၚ် ၜါဝါဂမၠိုၚ်ဂှ် လလမ်အိုတ်ရ။ သံဃာဒိသေသ်မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
415) ပ္ဍဲဓမ္မကမ် (မဂပ်ဝ်သ္ပနဗဗွဲဓရ်) မၞုံပွမသမ္တီထေၚ်ကေတ် ဓမ္မကမ်တုဲ ဟွံသၠးကၠေံမ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံသၠေဟ်ပၟာတုဲ ဟွံသၠးကၠေံမ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံပွမသမ္တီထေၚ်ကေတ် အဓမ္မကမ်တုဲ ဟွံသၠးကၠေံမ္ဂး၊ ဒးအာပတ်သံဃာဒိသေသ်ရ။ ပ္ဍဲအဓမ္မကမ်မၞုံပွမသမ္တီထေၚ်ကေတ် ဓမ္မကမ်တုဲ ဟွံသၠးကၠေံမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ်မၞုံသၠေဟ်ပၟာတုဲ ဟွံသၠးကၠေံမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံပွမသမ္တီထေၚ်ကေတ် အဓမ္မကမ်တုဲ ဟွံသၠးကၠေံမ္ဂး ဒးအာပတ်ဒုက္ကဋ်ရ။
416) ကုခမဳ မဟဂပ်ဝ်ဒၠောံဗတောန် ဗွဲမဒးရ (နဉတ်ကမ္မဝါစ်) ခမဳသၠးကၠေံကွေတ် ခမဳကြအ်ဥမ္မတ် ခမဳစိုတ်ကလှ်လဖှ် ခမဳဝေဒနာပ္ဍဵုပ္ဍိုက် ခမဳကလိလောန်ကၠာတဲဂှ် ဟွံဒးအာပတ်ရ။ သံဃာဘေဒသိက္ခာပိုဒ်ဒသမတုဲရ။
