၁.၁.၁။ အခန်ထ္ၜးကဵုပရူပရာ ခမၟသုဒိန်
၂၄) ပ္ဍဲဃောအခိင်ဂှ် ပ္ဍဲဇရေင်ဍုင်ဝေသာလဳ ကွာန်မၞုံယၟုကလန္ဒ နွံမွဲရ၊ ပ္ဍဲကွာန်ကလန္ဒဂှ် ကောန်သေဌဳကလန္ဒ မၞုံယၟုသုဒိန် နွံရ၊ ပ္ဍဲအခိင်ဂှ် သုဒိန် ကောန်သေဌဳကလန္ဒ မွဲဟာန်ကေုာံသကအ်ရဲဂမၠိုင်မဂၠိုင်ဂၠင် အာတဴဍုင်ဝေသာလဳ နကဵုကမၠောန်ကေင်ကာ ထေက်ကဵုဒးသ္ပမမိက်ကဵုမွဲမွဲရ၊ ပ္ဍဲအခိင်ဂှ် တဳလမၞုံပိုဉ်ကျာ်တြဲ တွဳတွိုင်လဝ်ပရိသာတ်ဗွဲမဂၠိုင်တုဲ ဂဇအ်တွံဒၟံင်ဓရ်ရ။ သုဒိန် ကောန်သေဌဳကလန္ဒ သ္ဂောံညာတ်ကေတ် တဳလမၞုံပိုဉ်ကျာ်တြဲ တွဳတွိုင်လဝ်ပရိသာတ်ဗွဲမဂၠိုင်တုဲ ဂဇအ်တွံဒၟံင်ဓရ်ဂှ်တုဲ ပ္ဍဲကြဴ “အဲလေဝ် သ္ဂောံကလင်ပင်မှိင်ဓရ်မ္ဂးခိုဟ်သန်ရ” ရဴဝွံ ကသပ်ဒှ် ကုသုဒိန်ရ၊ ကသပ်ဒှ်သာ်ဂှ်တုဲ ပ္ဍဲကာလကြဴသုဒိန် ကောန်သေဌဳကလန္ဒ ပြာပ်အာဇရေင် ပရိသာတ်နွံတုဲ ဂဇအ်ကေတ် ပ္ဍဲဒၞါဲမွဲတုဲမ္ဂး—
“ဓရ်တဳလမၞုံပိုဉ်ကျာ်တြဲ ဟီုတွံလဝ်ဂှ် ဗွဲမထေက်ကြိုက် အဲဂွံတီကေတ်ရ၊ (အတိုင်ဂွံတီကေတ်လဝ်ဂှ်) ညးမပဒတဴ ပ္ဍဲအဝေါင်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေင်သအးဇ္ၚးစၟတ် မတုပ်သၟဟ်ကဵုကၞုသင်ပေါတ်လဝ်တၟိဝွံ ဟွံလောဲသွာရ၊ အဲကးပါဲကၠေံသော်က္ဍိုပ်သော်သၟိပ်တုဲမ္ဂး သၠောံလတက်ကေတ်ယာတ်ဂမၠိုင် မဖျောန်လဝ်ဍာ်လွံက်တုဲ နူအဝေါင်ဘဝခရှ် ဂွံလုပ်စိုပ်အဝေါင်ဘဝခမဳမ္ဂး ခိုဟ်ရ” ရဴဝွံ ကသပ်ဒှ် ကုသုဒိန် ကောန်သေဌဳကလန္ဒရ။
ပ္ဍဲအခိင်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵု) ကဵုဒဂိုန်ဂိုင်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြဴတုဲမ္ဂး ပရိသာတ်ဂှ် ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှေ်သှေ်ရဴဂဴကၠာ ပါဲစ္ဍးအာရ။
၂၅) ပ္ဍဲကြဴနူဂှ် သုဒိန် ကောန်သေဌဳကလန္ဒဂှ် ပရိသာတ်ဒလိုက်ကတဵုအာတုဲ ခြာဟွံလအ် ပြာပ်အာဇရေင်တဳလမၞုံပိုဉ်ကျာ်တြဲ လ္ၚောဝ်သ္ပဝတ်တုဲ ဂဇဒၟံင်ပ္ဍဲမွဲဒၞါဲတုဲ—
“ယွံတဳလမၞုံပိုဉ် ဓရ်တဳလမၞုံပိုဉ်ကျာ်တြဲ ဟီုတွံလဝ်ဂှ် ဗွဲမထေက်ကြိုက် အဲဍိက်ဂွံတီကေတ်ရ၊ (အတိုင်ဂွံတီကေတ်လဝ်ဂှ်) ညးမပဒတဴ ပ္ဍဲအဝေါင်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေင်သအးဇ္ၚးစၟတ် မတုပ်သၟဟ်ကဵုကၞုသင်ပေါတ်လဝ်တၟိဝွံ ဟွံလောဲသွာရ၊ ယွံတဳလမၞုံပိုဉ် အဲဍိက်ကးပါဲကၠေံ သော်က္ဍိုပ်သော်သၟိပ်တုဲမ္ဂး သၠောံလတက်ကေတ်ယာတ်ဂမၠိုင် မဖျောန်လဝ်ဍာ်လွံက်တုဲ နူအဝေါင်ဘဝခရှ်ဂှ် မိက်ဂွံလုပ်စိုပ် အဝေါင်ဘဝခမဳရ၊ တဳလမၞုံပိုဉ်ကျာ်တြဲဂှ် ဩဝ်သ္ပကဵုအဲဍိက်ခမဳညိ” ရဴဝွံ ဂရင်ပတီ တဳလမၞုံပိုဉ်ကျာ်တြဲရ။
ယွံသုဒိန် မိမဂမၠိုင်ဂှ် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳသ္ပကဵုအခေါင် ကဵုတၠအဲတုဲဒှ်ရဟာ ရဴဝွံ (သၟာန်ရ)။
ယွံတဳလမၞုံပိုဉ် မိမဂမၠိုင်ဂှ် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳဟဂွံသ္ပကဵုအခေါင်ကဵုအဲဍိက်ဏီရ ရဴဝွံ (ဂရင်ပတီရ)။
ယွံသုဒိန် ကျာ်တြဲဂမၠိုင်ဂှ် ကောန်မိမဂမၠိုင် ဟဂွံသ္ပကဵုအခေါင်ဂှ် ဟွံသ္ပကဵုခမဳအိုတ်ရ ရဴဝွံ (သ္ဂးရ)။
ယွံတဳလမၞုံပိုဉ် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳ ညံင်မိမဂမၠိုင် ဂွံကဵုအခေါင်ကုဵအဲဍိက်ဂှ် အဲဍိက်သ္ပရ ရဴဝွံ (ဂရၚ်ပတီရ)။
၂၆) ပ္ဍဲကြဴနူဂှ် သုဒိန် ကောန်သေဌဳကလန္ဒဂှ် ပတုဲထောံကၠေံ ကမၠောန်ကေင်ကာ ထေက်ကဵုဒးသ္ပဂှ် ပ္ဍဲဍုင်ဝေသာလဳတုဲမ္ဂး ပြာပ်စဴအာကွာန်ကလန္ဒ ဇရေင်မိမဂမၠိုင်တုဲ—
“ယွံမိအံက် မအံက်တအ် ဓရ်တဳလမၞုံပိုဉ်ကျာ်တြဲဟီုတွံလဝ်ဂှ် ဗွဲမထေက်ကြိုက် အဲဂွံတီကေတ်ရ၊ (အတိုင်ဂွံတီကေတ်လဝ်ဂှ်) ညးမပဒတဴ ပ္ဍဲအဝေါင်ဘဝခရှ်ဂှ် တၞဟ်နဂွံဒ္ဂေေတ်လ္ၚတ်ဒ္ဂေတ်မပြဲ မဍိုက်ပေင်သအးဇ္ၚးစၟတ် မတုပ်သၟဟ်ကဵုကၞုသင်ပေါတ်လဝ်တၟိဝွံ ဟွံလောဲသွာရ၊ အဲကးပါဲကၠေံ သော်က္ဍိုပ်သော်သၟိပ်တုဲ သၠောံလတက်ကေတ်ယာတ်ဂမၠိုင် မဖေျာန်လဝ်ဍာ်လွံက်တုဲ နူအဝေါင်ဘဝခရှ်ဂှ် မိက်ဂွံလုပ်စိုပ် အဝေါင်ဘဝခမဳရ၊ နူအဝေါင်ဘဝခရှ်ဂှ် တၞဟ်နသွက်ဂွံလုပ်စိုပ် အဝေါင်ဘဝခမဳဂှ် သ္ပကဵုအခေါင်ကဵုအဲအိုတ်ညိ” ရဴဝွံ ဟီုသ္ဂးကဵုမိမဂမၠိုင်ရ။
ဟီုသ္ဂးရဴဝွံမ္ဂး မိမသုဒိန် ကောန်သေဌဳကလန္ဒဂမၠိုင်ဂှ်— “ယွံကောန်သ္ဍိုက်သုဒိန်တၠအဲဂှ် ဒှ်ကောန်ပိုဲတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင်ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံကောန်သ္ဍိုက်သုဒိန် တၠအဲဂှ် မုဒဒိုခ်မွဲလေဝ်ဟွံတီရ၊ နမတၠအဲချိုတ်အာလေဝ် ပိုဲညးဂမၠိုင် သီုဟွံမွဲပၟိက်အိုတ်ဂှ် ဒးသာဲခြာအာ ကေုာံတၠအဲအိုတ်ရ၊ တၠအဲ မဂျိုင်ဒၟံင်လမျီုဂှ်တုန် နူအဝေါင်ဘဝခရှ်ဝွံ တၞဟ်နသွက်ဂွံလုပ်စိုပ် အဝေါင်ဘဝခမဳ သာ်လဵုပိုဲညးဂမၠိုင် ဂွံသ္ပကဵုအခေါင်မာန်အိုတ်ဂှ်ရော?” ရဴဝွံ ဟီုသ္ဂးကဵုသုဒိန်ကောန်သေဌဳကလန္ဒအိုတ်ရ။
မရနုက်ကဵုၜါဝါကီုလေဝ် သုဒိန် ကောန်သေဌဳကလန္ဒဂှ်— “ယွံမိအံက် မအံက်တအ် ဓရ်တဳလမၞုံပိုဉ်ကျာ်တြဲ ဟီုတွံလဝ်ဂှ် ဗွဲမထေက်ကြိုက် အဲဂွံတီကေတ်ရ၊ (အတိုင်ဂွံတီကေတ်လဝ်ဂှ်) ညးမပဒတဴ ပ္ဍဲအဝေါင်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေင်သအးဇ္ၚးစၟတ် မတုပ်သၟဟ်ကဵုကၞုသင်ပေါတ်လဝ်တိၟဝွံ ဟွံလောဲသွာရ၊ အဲကးပါဲကၠေံသော်က္ဍိုပ်သော်သၟိပ်တုဲ သၠောံလတက်ကေတ်ယာတ်ဂမၠိုင် မဖေျာန်လဝ်ဍာ်လွံက်တုဲ နူအဝေါင်ဘဝခရှ်ဂှ် မိက်ဂွံလုပ်စိုပ်အဝေါင်ဘဝခမဳရ၊ နူအဝေါင်ဘဝခရှ်ဂှ် တၞဟ်နသွက်ဂွံလုပ်စိုပ် အဝေါင်ဘဝခမဳဂှ် သ္ပကဵုအခါင်ကဵုအဲအိုတ်ညိ” ရဴဝွံ ဟီုသ္ဂးကဵုမိမဂမၠိုင်ရ။
မရနုက်ကဵုၜါဝါကီုလေဝ် မိမသုဒိန် ကောန်သေဌဳကလန္ဒဂမၠိုင်ဂှ်— “ယွံကောန်သ္ဍိုက်သုဒိန် တၠအဲဂှ် ဒှ်ကောန်ပိုဲတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင် ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံကောန်သ္ဍိုက်သုဒိန် တၠအဲဂှ် မုဒဒိုခ်မွဲလေဝ် ဟွံတီရ၊ နမတၠအဲချိုတ်အာလေဝ် ပိုဲညးဂမၠိုင် သီုဟွံမွဲပၟိက်အိုတ်ဂှ် ဒးသာဲခြာအာ ကေုာံတၠအဲအိုတ်ရ၊ တၠအဲ မဂျိုင်ဒၟံင်လမျီုဂှ်တုန် နူအဝေါင်ဘဝခရှ်ဝွံ တၞဟ်နသွက်ဂွံလုပ်စိုပ် အဝေါင်ဘဝခမဳ သာ်လဵု ပိုဲညးဂမၠိုင် ဂွံသ္ပကဵုအခေါင်မာန်အိုတ်ဂှ်ရော?” ရဴဝွံ ဟီုသ္ဂးကဵုသုဒိန် ကောန်သေဌဳကလန္ဒအိုတ်ရ။
မရနုက်ကဵုပိဝါကီုလေဝ် သုဒိန် ကောန်သေဌဳကလန္ဒဂှ်— “ယွံမိအံက် မအံက်တအ်ဓရ်တဳလမၞုံပိုဉ်ကျာ်တြဲ ဟီုတွံလေဝ်ဂှ် ဗွဲမထေက်ကြိုက် အဲဂွံတီကေတ်ရ၊ (အတိုင်ဂွံတီကေတ်လဝ်ဂှ်) ညးမပဒတဴ ပ္ဍဲအဝေါင်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေင်သအးဇ္ၚးစၟတ် မတုပ်သၟဟ်ကဵုကၞုသင်ပေါတ်လဝ်တၟိဝွံ ဟွံလောဲသွာရ၊ အဲကးပါဲကၠေံသော်က္ဍိုပ်သော်သိၟပ်တုဲ သၠောံလတက်ကေတ်ယာတ်ဂမၠိုင် မဖေျာန်လဝ်ဍာ်လွံက်တုဲ နူအဝေါင်ဘဝခရှ်ဂှ် မိက်ဂွံလုပ်စိုပ် အဝေါင်ဘဝခမဳရ၊ နူအဝေါင်ဘဝခရှ်ဂှ် တၞဟ်နသွက်ဂွံလုပ်စိုပ် အဝေါင်ဘဝခမဳဂှ် သ္ပကဵုအခေါင်ကဵုအဲအိုတ်ညိ” ရဴဝွံ ဟီုသ္ဂးကဵု မိမဂမၠိုင်ရ။
မရနုက်ကဵုပိဝါကီုလေဝ် မိမသုဒိန် ကောန်သေဌဳကလန္ဒဂမၠိုင်ဂှ်— “ယွံကောန်သ္ဍိုက်သုဒိန် တၠအဲဂှ် ဒှ်ကောန်ပိုဲတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင် ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံကောန်သ္ဍိုက်သုဒိန် တၠအဲဂှ် မုဒဒိုခ်မွဲလေဝ် ဟွံတီရ၊ နမတၠအဲ ချိုတ်အာလေဝ် ပိုဲညးဂမၠိုင် သီုဟွံမွဲပၟိက်အိုတ်ဂှ် ဒးသာဲခြာအာ ကေုာံတၠအဲအိုတ်ရ၊ တၠအဲ မဂျိုင်ဒၟံင်လမျီုဂှ်တုန် နူအဝေါင်ဘဝခရှ်ဝွံ တၞဟ်နသွက်ဂွံလုပ်စိုပ် အဝေါင်ဘဝခမဳ သာ်လဵု ပိုဲညးဂမၠိုင် ဂွံသ္ပကဵုအခေါင်မာန်အိုတ်ဂှ်ရော?” ရဴဝွံ ဟီုသ္ဂးကဵုသုဒိန် ကောန်သေဌဳကလန္ဒအိုတ်ရ။
၂၇) ပ္ဍဲကြဴနူဂှ် သုဒိန် ကောန်သေဌဳကလန္ဒဂှ် “မိမဂမၠိုၚ်ဂှ် နူအဝေါၚ်ခရှ် တၞဟ်နသွက်ဂွံလုပ်စိုပ်အဝေါၚ်ဘဝခမဳဂှ် ဟွံသ္ပကဵုအခေါၚ်အဲအိုတ်ရ” ရဴဝွံ တီကေတ်တုဲ ပ္ဍဲလတူတိ ဟွံမွဲကဵုသၞာလးဂှ် “ပ္ဍဲဒၞါဲဝွံဟေၚ် ပွမချိုတ်လေဝ်ကီု ဒဒှ်ခမဳလေဝ်ကီု ကြက်ဒှ်ကုအဲရ” (သ္ဂးရဴဝွံတုဲ) တိက်ဒၟံၚ်ပ္ဍဲဌာန်ဂှ်ဟေၚ်ရ။ ကြဴနူဂှ် သုဒိန် ကောန်သေဌဳကလန္ဒဂှ် ပုၚ်မွဲဗဂါပ်လေဝ်ဟွံစရ၊ ပုၚ်ၜါဗဂါပ်ဂမၠိုၚ်လေဝ် ဟွံစရ၊ ပုၚ်ပိဗဂါပ်လေဝ် ဟွံစရ၊ ပုၚ်ပန်ဗဂါပ်ဂမၠိုၚ်လေဝ် ဟွံစရ၊ ပုၚ်မသုန်ဗဗဂါပ်ဂမၠိုၚ်လေဝ် ဟွံစရ၊ ပုၚ်တြဴဗဂါပ်ဂမၠိုၚ်လေဝ် ဟွံစရ၊ ပုၚ်ထပှ်ဗဂါပ်ဂမၠိုၚ်လေဝ် ဟွံစရ။
၂၈) ပ္ဍဲကြဴနူဂှ် မိမသုဒိန် ကောန်သေဌဳကလန္ဒဂမၠိုင်ဂှ်— “ယွံကောန်သ္ဍိုက်သုဒိန်တၠအဲဂှ် ဒှ်ကောန်ပိုဲတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင် ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံကောန်သ္ဍိုက်သုဒိန် တၠအဲဂှ် မုဒဒိုခ်မွဲလေဝ် ဟွံတီရ၊ နမတၠအဲချိုတ်အာလေဝ် ပိုဲညးဂမၠိုင် သီုဟွံမွဲပၟိက်အိုတ်ဂှ် ဒးသာဲခြာအာကေုာံတၠအဲအိုတ်ရ၊ တၠအဲမဂျိုင်ဒၟံင်လမျီုဂှ်တုန် နူအဝေါင်ဘဝခရှ်ဝွံ တၞဟ်နသွက်ဂွံလုပ်စိုပ်အဝေါင်ဘဝခမဳ သာ်လဵုပိုဲညးဂမၠိုင် ဂွံသ္ပကဵုအခေါင်မာန်အိုတ်ဂှ်ရော? ယွံကောန်သ္ဍိုက်သုဒိန် ဩဝ်ဒၠိုက်ကတဵုညိ၊ စလေဝ် ဩဝ်စညိ၊ သုင်လေဝ် ဩဝ်သုင်ညိ၊ မိပ်မြဟ်လေဝ် ဩဝ်မိပ်မြဟ်ညိ၊ စသုင်မိပ်မြဟ်ဒုင် စသိုင်ကာမဂုဏ်ဂမၠိုင်တုဲ သီုကဵုကၠောန်သ္ပ ပွကုသိုလ်ဂမၠိုင်ဂှ် ဩဝ်မိပ်လဟိင်ညိ၊ နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳဂှ် ပိုဲညးဂမၠိုင် သ္ပကဵုအခေါင် ကဵုတၠအဲဟွံမာန်အိုတ်ရ” ရဴဝွံ ဟီုသ္ဂးကဵုသုဒိန် ကောန်သေဌဳကလန္ဒအိုတ်ရ။
ဟီုသ္ဂးရဴဝွံအိုတ်မ္ဂး သုဒိန် ကောန်သေဌဳကလန္ဒဂှ် မံင်ထောံသ္ၚိတ်သ္ၚိတ်ရ၊ မရနုက်ကဵုၜါဝါကီုလေဝ် ။ ပ ။ မရနုက်ကဵုပိဝါကီုလေဝ် မိမသုဒိန် ကောန်သေဌဳကလန္ဒဂမၠိုင်ဂှ်— “ယွံကောန်သ္ဍိုက်သုဒိန် တၠအဲဂှ် ဒှ်ကောန်ပိုဲတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင် ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံကောန်သ္ဍိုက်သုဒိန် တၠအဲဂှ် မုဒဒိုခ်မွဲလေဝ် ဟွံတီရ၊ နမတၠအဲချိုတ်အာလေဝ် ပိုဲညးဂမၠိုင်သီုဟွံမွဲပၟိက်အိုတ်ဂှ် ဒးသာဲခြာအာ ကေုာံတၠအဲအိုတ်ရ၊ တၠအဲမဂျိုင်ဒၟံင်လမျီုဂှ်တုန် နူအဝေါင်ဘဝခရှ်ဝွံ တၞဟ်နသွက်ဂွံလုပ်စိုပ် အဝေါင်ဘဝခမဳ သာ်လဵုပိုဲညးဂမၠိုင် ဂွံသ္ပကဵုအခေါင်မာန်အိုတ်ဂှ်ရော? ယွံကောန်သ္ဍိုက်သုဒိန် ဩဝ်ဒၠိုက်ကတဵုညိ၊ စလေဝ် ဩဝ်စညိ၊ သုင်လေဝ် ဩသုင်ညိ၊ မိပ်မြဟ်လေဝ် ဩဝ်မိပ်မြဟ်ညိ၊ စသုင်မိပ်မြဟ် ဒုင်စသိုင်ကာမဂုဏ်ဂမၠိုင်တုဲ သီုကဵုကၠောန်သ္ပ ပွကုသိုလ်ဂမၠိုင်ဂှ် ဩဝ်မိပ်လဟိင်ညိ၊ နူအဝေါင်ဘဝခရှ် တၞဟ်နသွက်ဂွံလုပ်စိုပ်အဝေါင်ဘဝခမဳဂှ် ပိုဲညးဂမၠိုင် သ္ပကဵုအခေါင်ကဵုတၠအဲ ဟွံမာန်အိုတ်ရ” ရဴဝွံ ဟီုသ္ဂးကဵုသုဒိန် ကောန်သေဌဳကလန္ဒအိုတ်ရ။ မရနုက်ကဵုပိဝါလေဝ် သုဒိန် ကောန်သေဌဳကလန္ဒဂှ် မံင်ထောံသ္ၚိတ်သ္ၚိတ်ရ၊ ပ္ဍဲကြဴနူဂှ် သကအ်ရဲသုဒိန် ကောန်သေဌဳကလန္ဒဂမၠိုင် ပြာပ်အာဇရေင်သုဒိန် ကောန်သေဌဳကလန္ဒတုဲ “ယွံသဟာဲသုဒိန် တၠအဲဂှ် ဒှ်ကောန်မိမတအ်မွဲမဓဝ်တုဲ ဂပ်ဝ်သ္ဍိုက်ဆာန်ရ၊ ဂပ်ဝ်သ္ဍိုက်မၠိုက်ရ၊ ဂပ်ဝ်ကဵုဇၞော်ဂေါဝ်ကၠုင် ဗွဲတသိုခ်ရ၊ ဒှ်ညးမြိမြန်ကၠုင် ဗွဲတသိုခ်ရ၊ ယွံသဟာဲသုဒိန် တၠအဲဂှ် မုဒဒိုခ်မွဲလေဝ် ဟွံတီရ၊ မိမတၠအဲဂမၠိုင်ဂှ် တၠအဲချိုတ်အာလေဝ် (မိမတအ်ဂှ်) သီုကဵုဟွံမွဲပၟိက်အိုတ်ဂှ် ဒးသာဲခြာအာကေုာံတၠအဲအိုတ်ရ၊ တၠအဲမဂျိုင်ဒၟံင်လမျီုဂှ်တုန် နူအဝေါင်ဘဝခရှ် တၞဟ်နသွက်ဂွံလုပ်အာ အဝေါင်ဘဝခမဳဂှ် သာ်လဵုဂွံသ္ပကဵုအခေါင်မာန်အိုတ်ရော? ယွံသဟာဲသုဒိန် ဩဝ်ဒၠိုက်ကတဵုညိ၊ စလေဝ် ဩဝ်စညိ၊ သုင်လေဝ် ဩဝ်သုင်ညိ၊ မိပ်မြဟ်လေဝ် ဩဝ်မိပ်မြဟ်ညိ၊ စသုင်မိပ်မြဟ် ဒုင်စသိုင်ကာမဂုဏ်ဂမၠိုင်တုဲ သီုကဵုကၠောန်သ္ပပွကုသိုလ်ဂမၠိုင်ဂှ် ဩဝ်မိပ်လဟိင်ညိ၊ နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳဂှ်တုန် မိမဂမၠိုင် သ္ပကဵုအခေါင်ကဵုတၠအဲ ဟွံသေင်အိုတ်ရ” ရဴဝွံ ဟီုသ္ဂးကဵုသုဒိန် ကောန်သေဌဳကလန္ဒအိုတ်ရ။
ဟီုသ္ဂးရဴဝွံအိုတ်မ္ဂး သုဒိန် ကောန်သေဌဳကလန္ဒဂှ် မံင်ထောံသ္ၚိတ်သ္ၚိတ်ရ၊ မရနုက်ကဵုၜါဝါကီုလေဝ် ။ ပ ။ မရနုက်ကဵုပိဝါကီုလေဝ် သကအ်ရဲသုဒိန် ကောန်သေဌဳကလန္ဒဂမၠိုင်ဂှ် ဟီုသ္ဂးကဵုသုဒိန် ကောန်သေဌဳကလန္ဒ ဂလာန်ဝွံအိုတ်ရ၊ ယွံသဟာဲသုဒိန် ။ ပ ။ မရနုက်ကဵုပိဝါလေဝ် သုဒိန် ကောန်သေဌဳကလန္ဒဂှ် မံင်ထောံသ္ၚိတ်သ္ၚိတ်ရ။
၂၉) ပ္ဍဲအခိင်ဂှ် သကအ်ရဲသုဒိန် ကောန်သေဌဳကလန္ဒဂမၠိုင် ပြာပ်အာဇရေင် မိမသုဒိန် ကောန်သေဌဳကလန္ဒအိုတ်တုဲ—
“ယွံမိအံက်မအံက်တအ် သုဒိန်ဝွံ ပ္ဍဲလတူတိ မဟွံမွဲကဵုသၞာလးဝွံ ‘ပ္ဍဲဒၞာဲဝွံဟေင် ပွမချိုတ်လေဝ်ကီု ဒဒှ်ခမဳလေဝ်ကီု ကြက်ဒှ်ကုအဲရ’ ရဴဝွံ တိက်ဒၟံင်ရ၊ မၞးတအ်ညးဂမၠိုင် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳ ဟွံသ္ပကဵုအခေါင် ကဵုသုဒိန်အိုတ်မ္ဂး ပ္ဍဲဒၞာဲဂှ်ဟေင် ကြက်ဒးအာစိုပ် ပွမချိုတ်အာရ၊ ယဝ်မၞးတအ်ညးဂမၠိုင် သ္ပကဵုအခေါင် သွက်ဂွံသ္ပခမဳအိုတ်မ္ဂး သုဒိန်မတန်တဴဒၟံင်ဒဒှ်ခမဳဂှ် ကြက်ဂွံညာတ်ကေတ်အိုတ်ဏီရ၊ သုဒိန်ဂှ် နူအဝေါင်ဘဝခရှ် လုပ်စိုပ်အဝေါင်ဘဝခမဳတုဲ သ္ပခမဳတုဲ ယဝ်ဟွံမိပ်လဟိင်မ္ဂး သွက်ဂွံအာကၠေံ မသအာင်နူသ္ၚိမိမတအ်ဂှ် သာ်လဵုဂွံနွံ ကုဍေံဂှ်ရော? ကြက်ကလေင်ကၠုင်သ္ၚိဝွံဟေင်ရ၊ နူအဝေါင်ဘဝခရှ် တၞဟ်နသွက်ဂွံလုပ်စိုပ် ဘဝခမဳဂှ် ဩဝ်သ္ပကဵုအခေါင် ကဵုသုဒိန်အိုတ်ညိ” ရဴဝွံ ဟီုသ္ဂးကဵုမိမသုဒိန် ကောန်သေဌဳကလန္ဒဂမၠိုင်အိုတ်ရ။
(ပ္ဍဲအခိင်ဂှ် မိမသုဒိန်ဂမၠိုင်) ယွံအမာံတအ် နူအဝေါင်ဘဝခရှ် တၞဟ်နသွက်ဂွံလုပ်စိုပ်အဝေါင်ဘဝခမဳဂှ် ပိုဲတအ်သ္ပကဵုအခေါင် ကဵုသုဒိန်အိုတ်ရ ရဴဝွံ (ဟီုသ္ဂးအိုတ်ရ)။
ပ္ဍဲအခိင်ဂှ် သကအ်ရဲသုဒိန် ကောန်သေဌဳကလန္ဒဂမၠိုင် ပြာပ်အာဇရေင်သုဒိန် ကောန်သေဌဳကလန္ဒအိုတ်တုဲ “ယွံသဟာဲသုဒိန် ဩဝ်ဒၠိုက်ကတဵုညိ၊ မိမဂမၠိုင်ဂှ် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳ သ္ပကဵုအခေါင်ကဵုတၠအဲတုဲအိုတ်ရ” ရဴဝွံ ဟီုသ္ဂးအိုတ်ရ။
၃၀) ပ္ဍဲအခိင်ဂှ် သုဒိန် ကောန်သေဌဳကလန္ဒဂှ် “မိမဂမၠိုင် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳ သ္ပကဵုအခေါင်တုဲရ” ရဴဝွံ မြဟ်မြာမၞုံကဵုစိုတ် မတိုန်ဒှ်တုဲ သီုမဇွိတ်သပေါတ်တဴဇကု နကဵုတဲဂှ် ဒၠိုက်ကတုဵခြုဟ်ရ။
ပ္ဍဲကြဴနူဂှ် သုဒိန် ကောန်သေဌဳကလန္ဒ ဂိုင်ကေတ် ဇြဟတ်မွဲတ္ၚဲၜါတ္ၚဲတုဲ ပ္ၚောံပြာပ်အာဇရေင် တဳလမၞုံပိုဉ်ကျာ်တြဲ လ္ၚောဝ်သ္ပဝတ်တဳလ မၞုံပိုဉ်ကျာ်တြဲတုဲ ဂဇအ်ကေတ် ပ္ဍဲဒၞါဲမွဲတုဲမ္ဂး သုဒိန် ကောန်သေဌဳကလန္ဒဂှ်— “ယွံတဳလပိုဉ် မိမဂမၠိုင်ဂှ် နူအဝေါင်ဘဝခရှ် တၞဟ်နသွက်ဂွံလုပ်စိုပ် အဝေါင်ဘဝခမဳ သ္ပကဵုအခေါင်ကဵုအဲဍိက်တုဲအိုတ်ရ၊ တဳလမၞုံပိုဉ်ကျာ်တြဲ ဩဝ်သ္ပကဵုအဲဍိက်ခမဳညိ” ရဴဝွံ ဂရင်ပတီ တဳလမၞုံပိုဉ်ကျာ်တြဲရ။ သုဒိန် ကောန်သေဌဳကလန္ဒဂှ် ကလိဂွံဒဒှ်ထပိုဲ ဒဒှ်ခမဳ ပ္ဍဲဇရေင်တဳလမၞုံပိုဉ်ကျာ်တြဲရ။
ဒှ်ခမဳတုဲခြာဟွံလအ် တဳလပိုဉ်သုဒိန်ဂှ် ဒဂိုန်ဂိုင်ကေတ် ဂုဏ် ‘ဓုတင်’ ဟိုတ်မခါလယှ် ပတိတ်ကိလေသဂမၠိုင် မၞုံသဘဴမြဴသာ်ဝွံတုဲ ဒ္ဂေတ်လ္ၚတ်ရ၊ ပကင်ရင်ဓုတင် ‘အာရညိက’ ပွမပဒတဴဘာဂြိုပ်ရ၊ ပကင်ရင်ဓုတင် ‘ပိဏ္ဍပါတိက’ ပွမဂ္ၚေင်စဴစပိဏ္ဍပါတ်ရ၊ ပကင်ရင်ဓုတင် ‘ပံသုကူလိက’ ပွမဗိုက်လတက်သ္ၚာပံသုကူရ၊ သကင်ရင်ဓုတင် ‘သပဒါနစာရိက’ ပွမဂ္ၚေင်ပိဏ္ဍပါတ် အတိုင်လၟေင်သ္ၚိရ၊ သ္ပနိဿယ်ဗ္ဒာဲကဵု ကွာန်ဝဇ္ဇဳရးမွဲတုဲ သ္ပဒတဴရ။
ပ္ဍဲအခိင်ဂှ် ဝဇ္ဇဳရး စၞစသုဝါတ်ခါဲရ၊ (ကတဵုဒှ် ကၠောဝ်ရ)၊ သွက်ဂွံဂယိုင်လမျီုဝါတ်ဂါတ်ရ၊ မၞုံကဵုဇုတ်ဗုတၜတ်ရ၊ သ္ဒးဂယိုင်လမျီု နကဵုဇြောဟ်လိက်မာဲရ၊ မိန်ထ္ၜကေတ် ဗဗေင်ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် ဟွံလောဲသွာရ။ ပ္ဍဲအခိင်ဂှ် ကသပ်ကတဵုဒှ် ကုတဳလပိုဉ်သုဒိန်ရ—
“ပ္ဍဲအခိင်လၟုဟ် ဝဇ္ဇဳရးစၞစသုင်ဝါတ်ခါဲရ၊ သွက်ဂွံဂယိုင်လမျီု ဝါတ်ဂါတ်ရ၊ မၞုံကဵုဇုတ်ဗုတၜတ်ရ၊ သ္ဒးဂယိုင်လမျီု နကဵုဇြေဟ်လိက်မာဲရ၊ မိန်ထ္ၜကေတ် ဗဗေင်ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် ဟွံလောဲသွာရ။ ပ္ဍဲဍုင်ဝေသာလဳတေံ ကဠောမသအဲဂမၠိုင် (ပိုဉ်ဟာန်ဂြပ်ရတ်) မသ္ဂေဟ်သွဟ်ဖဲသအဳ မၞုံကဵုဂြပ်ကသပ် (တိုပ်ဒေပ်လဝ် ပ္ဍဲတိ) မဂၠိုင်ဂၠင်ဂှ် (သွက်ဂွံသုင်စောဲဇၟာပ်တ္ၚဲ) မၞုံကဵုပိုဉ်ဟာန်ဘိုဂ်ဘဂ်မဂၠိုင်ဂၠင် မၞုံကဵုထဝ်သြန်မဂၠိုင်ဂၠင်မၞုံကဵုရတ်အရပ်အရာ မထေက်ကဵုသ္ဍိုက်မၠိုက်မဂၠိုင်ဂၠင် မၞုံကဵုဂြပ်သြောံ (ကူသာန်သွံရာန်လှာဲဂတး) မဂၠိုင်ဂၠင်ဂှ် နွံဂၠိုင်အိုတ်ရ၊ အဲသ္ပနိဿယ်ဗ္ဒာဲကဵု ကဠောမသဂမၠိုင်တုဲ သ္ဂောံသပဒတဴမ္ဂး ခိုဟ်သန်ရ၊ ကဠောမသဂမၠိုင် သ္ပနိဿယ်ဗ္ဒာဲကဵုအဲတုဲ ကြက်သ္ဂောံကဵုဒါန် ကပေါတ်ကဵုဒါန်ဂမၠိုင်အိုတ်ရ၊ ကြက်သ္ဂောံသ္ပပတုဲတဴ ကုသိုလ်ထၟိက်ဂမၠိုင်အိုတ်ရ၊ ခမဳဂမၠိုင်လေဝ်ကြက်ကလိဂွံ လာဘ်အိုတ်ရ၊ အဲလေဝ် ကြက်ဟွံဒှ် လၟောင်လၟေတ်ဍောင်ၜိုတ် နကဵုပိဏ္ဍပါတ်ရ” ရဴဝွံ (ကသပ်ကတဵုဒှ်ရ)။ ပ္ဍဲကြဴနူဂှ် တဳလပိုဉ်သုဒိန် လပှ်သီဂိုင်ဒေပ် သၞာသတိက်သၞာဒၟံင်တုဲမ္ဂး ဂိုင်ကေတ် ဗဗေင်သ္ၚာတုဲပါဲစ္ဍးက္ညအာ ဍုင်ဝသသာလဳမ္ဂး အတိုင်လၟေင်လၟေင်စိုပ်အာဍုင်ဝေသာလဳရ၊ သ္ပဒတဴဒၟံင် ပ္ဍဲဘာပြာသာဒ်ဇၞော် မၞုံကဵုအထောဋ်သ္ၚိကၠတ် အပ္ဍဲဂြိုပ်မဟာဝိုန် ဇရေင်ဍုင်ဝေသာလဳဂှ်ရ။ ကဠောမသတဳလပိုဉ်သုဒိန်ဂမၠိုင်ဂှ် “သုဒိန် ကောန်သေဌဳကလန္ဒ ကၠုင်စိုပ်ဍုင်ဝေသာလဳရ” ရဴဝွံ သ္ဂောံမိင်ကေတ်အိုတ်ရ။ ညးဂမၠိုင်ဂှ် ပလံင်တဴပုင်တြဴစှော်ထၟာဲဂမၠိုင် ကုတဳလပိုဉ်သုဒိန်အိုတ်ရ။
ပ္ဍဲအခိင်ဂှ် ပုင်တြဴစှော်ထၟာဲဂမၠိုင်ဂှ် တဳလပိုဉ်သုဒိန် သၠးကဵုဒါန် ကုခမဳဂမၠိုင်တုဲ (ဇကုဇကုတုန်) ပ္ဍဲရုင်လတက်ပဠေဝ်သ္ၚာ မိန်ဂိုင်ထ္ၜကေတ် ဗဗေင်သ္ၚာတုဲ လုပ်ဂ္ၚေင်ပိဏ္ဍပါတ်ကွာန်ကလန္ဒရ၊ ဂေတ်ဂ္ၚေင်ပိဏ္ဍပါတ် ပ္ဍဲကွာန်ကလန္ဒ အတိုင်လၟေင်လၟေင်မ္ဂး ပြာပ်စိုပ်အာသ္ၚိမအံက်ဇကုရ။
၃၁) ပ္ဍဲအခိင်ဂှ် ဍိက်ဗြဴ ကဠောသမ တဳလပိုဉ်သုဒိန်ဂမၠိုင် နွံပၟိက်သၟိက်မိက်ဂွံထောံကွာင်ဒလောမ် မအုတ်ဒီုမွဲဗ္တမ်ရ၊ ပ္ဍဲအခိင်ဂှ် တဳလပိုဉ်သုဒိန်ဂှ် “ယွံဒေံဗြဴ ကွာင်ဒလောမ်ဂှ် ယဝ်ဒးကၠဟ်ထောံမ္ဂး၊ ကိုဟ်လံင်စုတ် ပ္ဍဲဗဗေင်အဲဝွံညိ” ရဴဝွံ ဟီုသ္ဂးကဵုဍိက်ဗြဴ ကဠောမသဂမၠိုင်ဂှ်ရ။
ပ္ဍဲအခိင်ဂှ် ဍိက်ဗြဴ ကဠောသမ တဳလပိုဉ်သုဒိန်ဂမၠိုင် ဃောကိုဟ်လံင်စုတ် ကွာင်ဒလောမ်မအုပ်ဒီုမွဲဗ္တမ် ပ္ဍဲဗဗေင် တဳလပိုဉ်သုဒိန်ဂှ် ဂိုင်သမ္တီကေတ် စၟတ်သမ္တီ တဲ,ဇိုင်,ရမျာင်ဂမၠိိုင်တုဲပ္ဍဲကြဴ ပြာပ်အာဇရေင်မိ တဳလပိုဉ်သုဒိန်တုဲ “ယွံနာဲဗြဴ ဩဝ်တီကေတ်ညိ၊ ကောန်နာဲဗြဴသုဒိန်ဂှ် စိုပ်ကၠုင်ရ” ရဴဝွံ ဟီုသ္ဂးကဵုမိ တဳလပိုဉ်သုဒိန်ရ။ ဟာဲဍိက်ဗြဴ ယဝ်တၠအဲ ဟီုဍာံစၟတ်မ္ဂး ပတိတ်ဗၠးကဵုတၠအဲ နူဒဒှ်ဍိက်ရ ရဴဝွံ သ္ဂးရ။
၃၂) ပ္ဍဲအခိင်ဂှ် တဳလပိုဉ်သုဒိန် နိဿယ်ဗဒါဲကဵု ဇိုင်ဗဒင်မွဲတုဲ ပြဘိုဂ်ဒၟံင်ကွာင်ဒလောမ်မအုတ်ဒီုမွဲဗ္တမ်တုဲဂှ်ရ။ မအံက်တီလပိုဉ်သုဒိန်လေဝ် ကလေင်စဴကၠုင် နူဌာန်ကၠောန်ကမၠောန်မ္ဂး ဟိုတ်မဂွံညာတ်ကေတ် တဳလပိုဉ်သုဒိန် နိဿယ်ဗဒါဲကဵု ဇိုင်ဗဒင်မွဲတုဲ ပြဘိုဂ်ဒၟံင်ကွာင်ဒလောမ် မအုတ်ဒီုမွဲဗ္တံတုဲဂှ်ရ ပြာပ်အာဇရေင် တဳပိုဉ်သုဒိန်တုဲ— “ယွံကောန်သ္ဍိုက်သုဒိန် ကွာင်ဒလောမ် မအုတ်ဒီုမွဲဗ္တမ်တုဲဂှ် စဒှ်ကွေံရသွံ၊ ဗွဲစၟတ်မ္ဂး ထေက်ကဵုဒးပြာပ်အာသ္ၚိဇကုရ ဟွံသေင်ဟာ” ရဴဝွံ ဟီုသ္ဂးကဵု တဳလပိုဉ်သုဒိန်ရ။
ယွံဒကာဇၞော် အာစိုပ်သ္ၚိတၠအဲတုဲရ၊ ကွာင်ဒလောမ် မအုတ်ဒီုမွဲဗ္တမ်တုဲဝွံ ဒှ်နူသ္ၚိတၠအဲဂှ်ရ ရဴဝွံ (ကလေင်ဟီုသ္ဂးရ)။
ပ္ဍဲအခိင်ဂှ် မအံက်တဳလပိုဉ်သုဒိန် ဂန်ရပ်ကအ်တဲ တဳလပိုဉ်သုဒိန်တုဲ “ယွံကောန်သ္ဍိုက်သုဒိန် ဩဝ်ကၠုင်ညိ၊ အာသ္ၚိအိုတ်စိုအ်” ရဴဝွံ ဟီုသ္ဂးကဵု တဳလပိုဉ်သုဒိန်ရ။ ပ္ဍဲကြဴနူဂှ် တဳလပိုဉ်သုဒိန် က္ညပြာပ်အာသ္ၚိ မအံက်ဇကုတုဲမ္ဂး ဂဇအ်ဒၟံင် ပ္ဍဲသၞာမလးပဠေဝ်လဝ်ဂှ်ရ။ ပ္ဍဲအခိင်ဂှ် မအံက်တဳလပိုဉ်သုဒိန်ဂှ်— “ယွံကောန်သ္ဍိုက်သုဒိန် ဩဝ်စညိ ရဴဝွံ သ္ဂးရ။ ယွံဒကာဇၞော် ဒေါံရ၊ တ္ၚဲဏအ်ဝွံ ကိစ္စကဵုပိုဉ်တုဲအာ ကုအဲရ ရဴဝွံ (ကလေင်သ္ဂးရ)။ ယွံကောန်သ္ဍိုက်သုဒိန် သွက်တ္ၚဲယးဂှ် ဩဝ်ဒုင်တဲ ပိဏ္ဍပါတ်ညိ ရဴဝွံ (ပ္ဍဲအခိင်မကလေင်ဟီုဂှ်)— တဳလပိုဉ်သုဒိန် နမမံင်သ္ၚိတ်သ္ၚိတ်ဂှ် ဒုင်တဲတုဲပ္ဍဲကြဴ ဒၠိုက်ကတဵုနူဒၞါဲ က္ညပါဲစ္ဍးအာရ။
၃၃) ပ္ဍဲအခိင်ဂှ် မိအံက်တဳလပိုဉ်သုဒိန်ဂှ် ပ္ဍဲအခိင်မလောန်ၜက်အာဗ္တမ်ဂှ် ကဵုလံက်လေတ်တိဇၞော် နကဵုအိက်ဂၠဴဍုက်ဍုက်တုဲမ္ဂး ကဵုသ္ပဖအုမ်ၜါဖအုမ် ဗွဲထဝ်မွဲဖအုမ် သြန်မွဲဖအုမ်ရ၊ ဖအုမ်ဂမၠိုင်ဇၞော်လောန်အိုတ်ရ၊ တြုံမဒတူဒၟံင် ပ္ဍဲလ္ပာ်ဏအ်ဂှ် ညာတ်ကေတ် တြုံမဒတူဒၟံင်လ္ပာ်တေံ ဟွံမာန်ရ၊ တြုံမဒတူဒၟံင် ပ္ဍဲလ္ပာ်တေံဂှ် ညာတ်ကေတ် တြုံမဒတူဒၟံင်လ္ပာ်ဏအ်ဟွံမာန်ရ၊ ကဵုဂြောပ်ကၠေံ ဖအုမ်ဂမၠိုင်ဂှ် နကဵုသကဝ်ဂမၠိုင်တုဲ ကဵုလးသၞာ ပ္ဍဲလဒေါဝ်တုဲ စဵုဗိုင်ယာတ်သၞိက်တုဲမ္ဂး “ယွံခအှ်ဗြဴ အဲဖအောဝ်ဗတိုက်ရ၊ ဩဝ်ကျိုင်ကျဝ်ကယျိုင်ယျဝ်မလေပ်ကဵုသ္ဍိုက်မၠိုက်ကြိုက်စိုတ် ကုသုဒိန် ကောန်အဲဂှ်ညိ” ရဴဝွံ ကော်ဟီုကဵု သမ္ဘာတြေမ်တဳလပိုဉ်သုဒိန်ရ။ “ယွံနာဲဗြဴ ခိုဟ်သန်ရ” ရဴဝွံ သမ္ဘာတြေမ်တဳလပိုဉ်သုဒိန် ဒုင်ဝန်ကုမိအံက်တဳလပိုဉ်သုဒိန်ရ။
၃၄) ပ္ဍဲအခိင်ဂှ် တဳလပိုဉ်သုဒိန်ဂှ် ပ္ဍဲအခိင်နူဂယး ရုင်လတက်သဠေဝ်သ္ၚာ ထ္ၜဂိုင်ရပ်ကေတ်ဗဗေင်သ္ၚာတုဲ ပြာပ်စဴအာသ္ၚိ မအံက်ဇကုတုဲ ဂဇအ်ဒၟံင် ပ္ဍဲသၞာမလးပဠေဝ်လဝ်ဂှ်ရ။
မအံက်တဳလပိုဉ်သုဒိန်ဂှ် ပြာပ်အာဇရေင် တဳလပိုဉ်သုဒိန်တုဲမ္ဂး ကဵုပံက်ကၠေံ ဖအုမ်ထဝ်သြန်ဂမၠိုင်တုဲ— “ယွံကောန်သ္ဍိုက်သုဒိန် ထဝ်သြန်ဝွံ ဂြပ်ပါကၠုင်နူလ္ပာ်မိ မိတၠအဲရ၊ ဂြပ်ညးဗြဴသုင်စောဲ (မဂပ်ဝ်ကလိဂွံ တၞဟ်နသုင်စောဲ)ရ၊ ဂြပ်ပါကၠုင် နူလ္ပာ်မအံက်ဂှ်တုန်နွံတၞဟ်ခြာဏီရ၊ ဂြပ်မဆက်ကၠုင်နူအပါနော် အပါနက်လေဝ် နွံတၞဟ်ခြာဏီရ၊ ယွံကောန်သ္ဍိုက်သုဒိန် ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင်လေဝ် သွက်ဂွံဒုင်စသိုင် ကုသိုလ်ထၟိက်ဂမၠိုင်လေဝ် သွက်ဂွံကၠောန်သ္ပဂှ် ဂွံမာန်ဒၟံင်ရ၊ ယွံကောန်သ္ဍိုက်သုဒိန် ဩဝ်ကၠုင်ညိ၊ ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင်လေဝ်ဩဝ်ဒုင်စသိုင်ညိ၊ ကုသိုလ်ထၟိက်ဂမၠိုင်လေဝ် ဩဝ်ကၠောန်သ္ပညိ” ရဴဝွံ ဟီုသ္ဂးကဵု တဳလပိုဉ်သုဒိန်ရ။
ယွံမအံက် ရာမ်တိတ်ခရှ် ဟွံမာန်ရ၊ ဟွံဂံင်ရာမ်တိတ်ခရှ်ရ၊ အဲ ဗွဲမမိပ်လဟိင်လောန် ဒ္ဂေတ်ဒၟံင် ဒ္ဂေတ်မပြဲရ ရဴဝွံ (ကလေင်ဟီုသ္ဂးရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် မအံက်တဳလပိုဉ်သုဒိန်ဂှ်—
“ယွံကောန်သ္ဍိုက်သုဒိန် ထဝ်သြန်ဝွံ ဂြပ်ပါကၠုင်နူလ္ပာ်မိ မိတၠအဲရ၊ ဂြပ်ညးဗြဴသုင်စောဲ (မဂပ်ဝ်ကလိဂွံ တၞဟ်နသုင်စောဲ) ရ၊ ဂြပ်ပါကၠုင် နူလ္ပာ်မအံက်ဂှ်တုန် နွံတၞဟ်ခြာဏီရ၊ ဂြပ်မဆက်ကၠုင် နူအပါနော် အပါနက်လေဝ် နွံတၞဟ်ခြာဏီရ၊ ယွံကောန်သ္ဍိုက်သုဒိန် ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင်လေဝ် သွက်ဂွံဒုင်စသိုင် ကုသိုလ်ထၟိက်ဂမၠိုင်လေဝ် သွက်ဂွံကၠောန်ဂှ် ဂွံမာန်ဒၟံင်ရ၊ ယွံကောန်သ္ဍိုက်သုဒိန် ဩဝ်ကၠုင်ညိ၊ ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင်လေဝ် ဩဝ်ဒုင်စသိုင်ညိ၊ ကုသိုလ်ထၟိက်ဂမၠိုင်လေဝ် ဩဝ်ကၠောန်သ္ပညိ” ရဴဝွံ ဟီုသ္ဂးကဵု တဳလပိုဉ်သုဒိန်ရ။
ယွံဒကာ ယဝ်တၠအဲ ဟွံထေဲပၞတ်မ္ဂး မိက်ဟီုသ္ဂးကဵုတၠအဲရ (ရဴဝွံ ပ္ဍဲအခိင်မဟီုတိုန်ဂှ်) ယွံကောန်သ္ဍိုက်သုဒိန် ဩဝ်ဟီုညိ ရဴဝွံ (ကလေင်ဟီုရ)။
“ယွံဒကာ ဒှ်သာ်ဂှ်မ္ဂး တၠအဲ ကဵုဇိင်ထိုင်ရိုက်ကာန်ဇၞော်ဇၞော်ဂမၠိုင်တုဲမ္ဂး စုတ်ဗပေင်ထဝ်သြန်ပေင်ပေင်တုဲ ရင်တၠုင်ဇက်ပတိတ်ဏာ နကဵုကွဳဂမၠိုင်တုဲ ဩဝ်ဗိုတ်ကၠဟ်ထောံပ္ဍဲဇၟောဝ်ဍာ် လဒေါဝ်ကြုင်ဂၚ်္ဂါညိ၊ မုဟိုတ် ကဵုသ္ပသာ်ဂှ်ရောဟီုမ္ဂး ယွံဒကာ ဟိုတ်နူဟိုတ်မတွံဂး ဂြပ်နွံဂှ် ပွမဖေက်ဂၟံက်ကီု ပွမချဳဇတဝ်ဇဝဝ်ကီု ပွမနရဴသော်ဇကုကီု ပွမသ္ဒးမင်မွဲကီု ကြက်ကတဵုဒှ် ကုတၠအဲရ၊ (ဂြပ်ဟွံမွဲမ္ဂး) အန္တရာယ် (မပ္တံပွမဖေက်ဂၟံက်) ဂှ် ကတဵုဒှ်ကုတၠအဲ ဟွံမာန်ရ၊ ဟိုတ်ဒှ်သာ်ဂှ်ဟေင်ရောင်” ရဴဝွံ (သ္ဂးရ)။
ဟီုသ္ဂးတဴရဴဝွံမ္ဂး မအံက်တဳလပိုဉ်သုဒိန်ဂှ် “ကောန်သုဒိန် မုဟိုတ် သ္ဂောံဟီုသ္ဂးရဴဝွံဂှ်ရော?” ရဴဝွံ စိုတ်ဟွံမိပ် ဒှ်တဴရ။
၃၅) ပ္ဍဲကြဴနူဂှ် မအံက်တဳလပိုဉ်သုဒိန် ကော်သမ္ဘာတြေမ်တဳလပိုဉ်သုဒိန်တုဲ “ယွံကောန်ခအှ်ဗြဴ အဲ ဖအောဝ်ဗတိုက်ရ၊ ကောန်သုဒိန်ဂှ် ဆာန်လေဝ် ဆာန်တၠအဲရ၊ သ္ဍိုက်မၠိုက်လေဝ် သ္ဍိုက်မၠိုက်ရ၊ ကောန်သုဒိန်ဂှ် ကလင်ဗက်ဂလာန်တၠအဲဏောဝ် တန်ဒှ်မာန်ရ” ရဴဝွံ ဟီုသ္ဂးရ။ ပ္ဍဲအခိင်ဂှ် သမ္ဘာတြေမ်တဳလပိုဉ်သုဒိန်ဂှ် ဗန်ရပ်ကေတ် ဇိုင်တဳလပိုဉ်သုဒိန်ဂမၠိုင်တုဲ “ယွံနာဲပိုဲ ယြဴဟိုတ်နူဟိုတ်မတွံဂး မိက်ကလိဂွံ ကောန်အဆေရ်သွဝ်ဗြဴဂမၠိုင်တုဲ နာဲပိုဲဂှှ် ဒ္ဂေတ်ဒၟံင်ဒ္ဂေတ်မပြဲရ၊ ကောန်အဆေရ်သွဝ်ဗြဴဂမၠိုင်တုန် မၞုံသဘဴသာ်လဵုအိုတ်ဂှ်ရော?” ရဴဝွံ သၟာန်တဳလပိုဉ်သုဒိန်ရ။
“ယွံဒေံဗြဴ အဲဂှ် ဟိုတ်နူဟိုတ်မတွံဂး ကောန်အဆေရ်သွဝ်ဗြဴဂမၠိုင်ဂှ် ဒ္ဂေတ်ဒၟံင်ဒ္ဂေတ်မပြဲဟွံသေင်ရ” ရဴဝွံ (ကလေင်ဟီုသ္ဂးရ)။
ပ္ဍဲအခိင်ဂှ် သမ္ဘာတြေမ်တဳလပိုဉ်သုဒိန်ဂှ် “သ္ပတမ်နူတ္ၚဲဝွံတုဲ ကောန်နာဲသုဒိန်ဂှ် နပွမဟီုသ္ဂး အကော်အခဴမတွံဂး ဒေံဗြဴဂှ် ဟီုသ္ဂးကော်ခဴဒၟံင် အဲရသွံ” ရဴဝွံ (ဒှ်စံင်တူပူဆာတုဲ) ပ္ဍဲဒၞာဲဂှ်ဟေင် ဝိုတ်စိပ်တုဲ လောတ်စှေ်ရ။
ပ္ဍဲအခိင်ဂှ် တဳလပိုဉ်သုဒိန်ဂှ် “ယွံဒကာ ကဵုဒါန်ပိဏ္ဍပါတ် ဘောဇိုန်ဂမၠိုင်မ္ဂးတေှ် ဩဝ်ကဵုဒါန်ညိ၊ (ထ္ၜးဂြပ် ထ္ၜးဗြဴနာနာသာ်တုဲ) ဩဝ်လ္ပပျဲပျာံ ပိုဲညးဂမၠိုင်ညိ” ရဴဝွံ ဟီုသ္ဂးကဵုကုညးမဒှ်မအံက်ဂှ်ရ။ ယွံကောန်သ္ဍိုက်သုဒိန် ဩဝ်သ္ပပြဘိုဂ်ညိ ရဴဝွံ (ကလေင်ဟီုသ္ဂးရ)။
ပ္ဍဲကြဴနူဂှ် မိမတဳလပိုဉ်သုဒိန်ဂမၠိုင် နကဵုစၞအာဟာရဘောဇိုန်မပြဲပြဲဂှ် စဵုကဵုတရိုပ်စိုတ်စဵုကဵုဒးဆေဝ်တာပဒေါံကၠေံ အလဵုဇကုတအ် ကၠောန်ၜိုတ်ဥပကာ တြာပ်ဖာပ်ဗ္စ ကုတဳလပိုဉ်သုဒိန်အိုတ်ရ။
ပ္ဍဲအခိင်ဂှ် မိအံက်တဳလပိုဉ်သုဒိန်ဂှ် ဟီုသ္ဂးကဵုတဳလပိုဉ်သုဒိန် ကဵုပိုဉ်တုဲ မၞုံကဵုတဲမပါဲကၠေံနူဗဗေင်တုဲဂှ်ရ—
“ယွံကောန်သ္ဍိုက်သုဒိန် ဂကူ (ပိုဲတအ်) ဝွံ (ပိုဉ်ဟာန်ဂြပ်ရတ်) သ္ဂေဟ်သွဟ်ဖဲသအဳရ၊ ဂြပ်ကသပ်(တိုပ်ဒေပ်လဝ်ပ္ဍဲတိ) ဂၠိုင်ဂၠင်ရ၊ (သွက်ဂွံသုင်စောဲဇၟာပ်တ္ၚဲ) မၞုံကဵုပိုဉ်ဟာန်ဘိုဂ်ဘဂ်ဂၠိုင်ဂၠင်ရ၊ မၞုံကဵုထဝ်သြန်ဂၠိုင်ဂၠင်ရ၊ မၞုံကဵုရတ်အရပ်အရာ မထေက်ကဵုသ္ဍိုက်မၠိုက်ဂၠိုင်ဂၠင်ရ၊ မၞုံကဵုဂြပ်သြောံ (ကူသာန်သွံရာန်လှာဲဂတး) ဂၠိုင်ဂၠင်ရ၊ ယွံကောန်သ္ဍိုက်သုဒိန် ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင်လေဝ် သွက်ဂွံဒုင်စသိုင် ကုသိုလ်ထၟိက်ဂမၠိုင်လေဝ် သွက်ဂွံကေၠာန်သ္ပဂှ်ဂွံမာန်ဒၟံင်ရ၊ ယွံကောန်သ္ဍိုက်သုဒိန် ဩဝ်ကၠုင်ညိ၊ ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုင် လေဝ် ဩဝ်ဒုင်စသိုင်ညိ၊ ကုသိုလ်ထၟိက်ဂမၠိုင်လေဝ် ဩဝ်ကေၠာန်သ္ပညိ” ရဴဝွံ (ဟီုသ္ဂးရ)။
ယွံမိအံက် ရာမ်တိတ်ခရှ် ဟွံမာန်ရ၊ ဟွံဂံင်ရာမ်တိတ်ခရှ်ရ၊ အဲ ဗွဲမမိပ်လဟိင်လောန် ဒ္ဂေတ်ဒၟံင် ဒ္ဂေတ်မပြဲရ ရဴဝွံ (ကလေင်ဟီုသ္ဂးရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် မိအံက်တဳလပိုဉ်သုဒိန်ဂှ်—
“ယွံကောန်သ္ဍိုက်သုဒိန် ဂကူ (ပိုဲတအ်) ဝွံ (ပိုဉ်ဟာန်ဂြပ်ရတ်) သ္ဂေဟ်သွဟ်ဖဲသအဳရ၊ ဂြပ်ကသပ် (တိုပ်ဒေပ်လဝ်ပ္ဍဲတိ) ဂၠိုင်ဂၠင်ရ၊ (သွက်ဂွံသုင်စောဲဇၟာပ်တ္ၚဲ) မၞုံကဵုပိုဉ်ဟာန်ဘိုဂ်ဘဂ် ဂၠိုင်ဂၠင်ရ၊ မၞုံကဵုထဝ်သြန် ဂၠိုင်ဂၠင်ရ၊ မၞုံကဵုရတ်အရပ်အရာ မထေက်ကဵုသ္ဍိုက်မၠိုက်ဂၠိုင်ဂၠင်ရ၊ မၞုံကဵုဂြပ်သြောံ (ကူသာန်သွံရာန်လှာဲဂတး) ဂၠိုင်ဂၠင်ရ၊ ယွံကောန်သ္ဍိုက်သုဒိန်ယဝ်ဒှ်သာ်ဂှ်မ္ဂး မဗဳဇကောန်ဇာတ်လေဝ် ဩဝ်ကဵုညိ၊ ဂြပ်ကသပ်ပိုဲညးဂမၠိုင် မဟွံမွဲကဵုကောန်ဒုင်အာဲကၟာဲဂှ် သၟိင်လိစ္ဆဝဳဂမၠိုင် လ္ပကဵုရင်တၠုင်ကေတ်ဏာ (နဒဒှ်ဂြပ်သၟိင်) အိုတ်ညိ” ရဴဝွံ (ပ္ဍဲအခိင်မဟီုကဵု) တဳလပိုဉ်သုဒိန်ဂှ်—
ယွံမိအံက် ကမၠောန်ကေၚ်ကာ ပွမကဵုမဗဳဇကောန်ဇာတ်ဝွံတုန် သ္ပကဵုမာန်ရ ရဴဝွံ (ကလေၚ်ဟီုရ)။ ယွံကောန်သ္ဍိုက်သုဒိန် ပ္ဍဲအခိၚ်လၟုဟ် (တၠအဲ) သ္ပဒတဴဒၟံၚ် ပ္ဍဲဌာန်လဵုဂှ်ရော? ရဴဝွံ (ပ္ဍဲအခိၚ်မသၟာန်ဂှ်)—
ယွံမိအံက် (သ္ပဒတဴဒၟံၚ်) ပ္ဍဲဂြိုပ်မဟာဝိုန်ရ ရဝွံ (ကလေၚ်ဟီုရ)။ ပ္ဍဲကြဴနူဂှ် တဳလပိုဉ်သုဒိန် ဒၠိုက်ကတဵုနူဒၞါဲတုဲ က္ညပါဲစ္ဍးအာရ။
၃၆) ပ္ဍဲအခိၚ်ဂှ် မိအံက်တဳလပိုဉ်သုဒိန်ဂှ် “ယွံခအှ်ဗြဴ ကဵုဂွံအာတ်အခေါၚ် ဒှ်ဟိုတ်သွက်ဂွံကလိဂွံ ကောန်ဇာတ်ညိ၊ ဥတုကၠုၚ်တုဲ ပ္ဍဲအခိၚ်ပကဴ (ဓမ္မတာမၞိဟ်ဗြဴဂမၠိုၚ်) ရာၚ်ဂှ် ဩဝ်ဟီုလဴထ္ၜး ကုအဲညိ” ရဴဝွံ ကော်ဟီုကဵု သမ္ဘာတြေမ် တဳလပိုဉ်သုဒိန်ရ။ “ယွံနာဲဗြဴ ခိုဟ်သန်တဴရ” ရဴဝွံ သမ္ဘာတြေမ်တဳလပိုဉ်သုဒိန် ကလေၚ်ပလန်ဂလာန် ကုမိအံက်တဳလပိုဉ်သုဒိန်ရ။
ပ္ဍဲကြဴနူဂှ် ခြာဟွံလအ်ဟေၚ် ဥတုကၠုၚ်တုဲ ပကဴ (ဓမ္မတာမၞိဟ်ဗြဴဂမၠိုၚ်) ရာၚ်ကၠုၚ်ကုသမ္ဘာတြေမ်တဳလပိုဉ်သုဒိန်ရ၊ ပ္ဍဲအခိၚ်ဂှ် သမ္ဘာတြေမ်တဳလပိုဉ်သုဒိန်ဂှ် “ယွံနာဲဗြဴ ဥတုကၠုၚ်တုဲ ပကဴ (ဓမ္မတာမၞိဟ်ဗြဴဂမၠိုၚ်) ရာၚ်ကၠုၚ် ကုအဲရ” ရဴဝွံ ဟီုလဴထ္ၜး ကုမိအံက် တဳလပိုဉ်သုဒိန်ရ။ “ယွံခအှ်ဗြဴ အဲ ဖအောဝ်ဗတိုက်ရ၊ ဩဝ်ကျိုၚ်ကျဝ် ကယျိုၚ်ကယျဝ် မလေပ်ကဵုသ္ဍိုက်မၠိုက် ကြိုက်စိုတ် ကုသုဒိန် ကောန်အဲဂှ်ညိ” ရဴဝွံ ကော်ဟီုကဵု သမ္ဘာတြေမ်တဳလပိုဉ်သုဒိန်ရ။ “ယွံနာဲဗြဴ ခိုဟ်သန်တဴရ” ရဴဝွံ သမ္ဘာတြေမ်တဳလပိုဉ်သုဒိန် ကလေၚ်ပလန်ဂလာန် ကုမိအံက်တဳလပိုဉ်သုဒိန်ရ။ ပ္ဍဲကြဴနူဂှ် မိအံက်တဳလပိုဉ်သုဒိန် ကော်ဂွံသမ္ဘာတြေမ်တဳလပိုဉ်သုဒိန်တုဲ ပ္ၚောံပြာပ်အာဂြိုပ်မဟာဝိုန် ဇရေၚ်တဳလပိုဉ်သုဒိန်တုဲမ္ဂး—
“ယွံကောန်သ္ဍိုက်သုဒိန် ဂကူ (ပိုဲတအ်) ဝွံ (ပိုဉ်ဟာန်ဂြပ်ရတ်) သ္ဂေဟ်သွဟ်ဖဲသအဳရ၊ ဂြပ်ကသပ် (တိုပ်ဒေပ်လဝ်ပ္ဍဲတိ) ဂၠိုၚ်ဂၠၚ်ရ၊ (သွက်ဂွံသုၚ်စောဲဇၟာပ်တ္ၚဲ) မၞုံကဵုပိုဉ်ဟာန်ဘိုဂ်ဘဂ် ဂၠိုၚ်ဂၠၚ်ရ၊ မၞုံကဵုထဝ်သြန် ဂၠိုၚ်ဂၠၚ်ရ၊ မၞုံကဵုရတ်အရပ်အရာ မထေက်ကဵုသ္ဍိုက်မၠိုက်ဂၠိုၚ်ဂၠၚ်ရ၊ မၞုံကဵုဂြပ်သြောံ (ကူသာန်သွံရာန်လှာဲဂတး) ဂၠိုၚ်ဂၠၚ်ရ၊ ယွံကောန်သ္ဍိုက်သုဒိန် ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုၚ်လေဝ် သွက်ဂွံဒုၚ်စသိုၚ် ကုသိုလ်ထၟိက်ဂမၠိုၚ်လေဝ် သွက်ဂွံကၠောန်သ္ပဂှ် ဂွံမာန်ဒၟံၚ်ရ၊ ယွံကောန်သ္ဍိုက်သုဒိန် ဩဝ်ကၠုၚ်ညိ၊ ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုၚ်လဝ် ဩဝ်ဒုၚ်စသိုၚ်ညိ၊ ကုသိုလ်ထၟိက်ဂမၠိုၚ်လေဝ် ဩဝ်ကၠောန်သ္ပညိ” ရဴဝွံ ဟီုသ္ဂးကဵုတဳလပိုဉ်သုဒိန်ပၠန်ရ။
ယွံမိအံက် ရာမ်တိတ်ခရှ် ဟွံမာန်ရ၊ ဟွံဂံၚ်ရာံတိတ်ခရှ်ရ၊ အဲ ဗွဲမမိပ်လဟိၚ်လောန်ဒ္ဂေတ်ဒၟံၚ် ဒ္ဂေတ်မပြဲရ ရဴဝွံ (ကလေၚ်ဟီုသ္ဂးရ)။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် မိအံက်တဳလပိုဉ်သုဒိန်ဂှ်—
“ယွံကောန်သ္ဍိုက်သုဒိန် ဂကူ (ပိုဲတအ်) ဝွံ (ပိုဉ်ဟာန်ဂြပ်ရတ်) သ္ဂေဟ်သွဟ်ဖဲသအဳရ၊ ဂြပ်ကသပ် (တိုပ်ဒေပ်လဝ်ပ္ဍဲတိ) ဂၠိုၚ်ဂၠၚ်ရ၊ (သွက်ဂွံသုၚ်စောဲဇၟာပ်တ္ၚဲ) မၞုံကဵုပိုဉ်ဟာန်ဘိုဂ်ဘဂ် ဂၠိုၚ်ဂၠၚ်ရ၊ မၞုံကဵုထဝ်သြန် ဂၠိုၚ်ဂၠၚ်ရ၊ မၞုံကဵုရတ်အရပ်အရာ မထေက်ကဵုသ္ဍိုက်မၠိုက်ဂၠိုၚ်ဂၠၚ်ရ၊ မၞုံကဵုဂြပ်သြောံ (ကူသာန်သွံရာန်လှာဲဂတး) ဂၠိုၚ်ဂၠၚ်ရ၊ ယွံကောန်သ္ဍိုက်သုဒိန် ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုၚ်လေဝ် သွက်ဂွံဒုၚ်စသိုၚ် ကုသိုလ်ထၟိက်ဂမၠိုၚ်လေဝ် သွက်ဂွံကၠောန်သ္ပဂှ် ဂွံမာန်ဒၟံၚ်ရ၊ ယွံကောန်သ္ဍိုက်သုဒိန် ဩဝ်ကၠုၚ်ညိ၊ ရာမ်တိတ်ခရှ်တုဲ ပိုဉ်ဟာန်သမ္ပတ္တိဂမၠိုၚ်လဝ် ဩဝ်ဒုၚ်စသိုၚ်ညိ၊ ကုသိုလ်ထၟိက်ဂမၠိုၚ်လေဝ် ဩဝ်ကၠောန်သ္ပညိ” ရဴဝွံ ဟီုသ္ဂးကဵုတဳလပိုဉ်သုဒိန်ပၠန်ရ။
ယွံမိအံက် ကမၠောန်ကေၚ်ကာ ပွမကဵုဗဳဇကောန်ဝွံတုန် သ္ပကဵုမာန်ရ ရဴဝွံ ဟီုသ္ဂးတုဲမ္ဂး ဂန်ရပ်ကေတ် ကအ်တဲသမ္ဘာတြေမ်တုဲ လုပ်အာအပ္ဍဲဂြိုပ်မဟာဝိုန်တုဲမ္ဂး ကိုပ်ကၠာဟွံဂွံပညပ် (ပဌမပါရာဇိက) သိက္ခာပိုဒ်ဏီ ဟွံညာတ်ကေတ်ဒုဟ် (ပ္ဍဲပွမသွိုန်ဗပိုန်မေထုန်) ဒှ်တုဲ စဵုကဵုဗၞတ်ပိဝါ ဒ္ဂေတ်သ္ပ ဒ္ဂေတ်မေထုန် ပ္ဍဲသမ္ဘာတြေမ်ရ၊ သမ္ဘာတြေမ်ဂှ် နအယံမာတ် (ပွမဒ္ဂေတ်သ္ပ ဒ္ဂေတ်မေထုန်) ဂှ် ဂိုၚ်ကေတ်ဂၠမ်ဂဝ်ရ၊ ဒေဝတဴဘုမ္မဇဵုဂမၠိုၚ်—
“ယွံသကအ်တအ် ခမဳသၚ်ဂှ် စာ်စ္ဍးနူခၜိုဟ် (မတွံဂးဒုဿဳလ) ရသွံ၊ စာ်စ္ဍးနူဒုဟ်ရသွံ၊ သုဒိန် ကောန်သေဌဳကလန္ဒဂှ် ကဵုကတဵုဒှ်ခၜိုဟ် (မတွံဂးဒုဿဳလ) တုဲရ၊ ကဵုကတဵုဒှ်ဒုဟ်တုဲရ” ရဴဝွံ ဟီုလၟိၚ်လၟဟ်အာ အဆက်အဆက်အိုတ်ရ။ သ္ဂောံမိၚ်ကေတ် ဗရုရမျာၚ် ဒေဝတဴဘုမ္မဇဵုဂမၠိုၚ်တုဲ ဒေဝတဴစာတုမရာဇ်ဂမၠိုၚ် ။ ပ ။ ဒေဝတဴတာဝတိံဂမၠိုၚ်။ ဒေဝတဴယာမာဂမၠိုၚ်။ ဒေဝတဴတုသိတာဂမၠိုၚ်။ ဒေဝတဴနိမ္မာနရတိဂမၠိုၚ်။ ဒေဝတဴပရနိမ္မိတဝသဝတ္တဳဂမၠိုၚ်။ ပကောံဗြီုဂမၠိုၚ်— “ယွံသကအ်တအ် ခမဳသဂှ် စာ်စ္ဍးနူၜိုဟ် (မတွံဂးဒုဿဳလ) ရသွံ၊ စာ်စ္ဍးနူဒုဟ်ရသွံ၊ သုဒိန် ကောန်သေဌဳကလန္ဒဂှ် ကဵုကတဵုဒှ်ခၜိုဟ် (မတွံဂးဒုဿဳလ) တုဲရ၊ ကဵုကတဵုဒှ်ဒုဟ်တုဲရ” ရဴဝွံ ဟီုလၟိၚ်လၟဟ်အာ အဆက်အဆက်အိုတ်ရ။
ရဴဝွံဟေၚ် နမွဲခဏဓဝ်ဂှ် နမွဲမုဟုတ်ဓဝ်ဂှ် စဵုကဵုစိုပ်ဍုၚ်ဗြီု ဗရုရမျာၚ်လၟိၚ်လၟဟ်ဂှ် ဗြုဗျာပ်တိုန်အာရ။
ပ္ဍဲကြဴနူဂှ် သမ္ဘာတြေမ်တဳလပိုဉ်သုဒိန်ဂှ် သ္ပဟိုတ်ကဵုဂၠမ်ဂဝ် (ပဋိသန္ဓိ) ဂှ် ကြံၚ်ဍုဟ်တုဲၜံၚ်သၠတိတ် ကောန်တြုံရ။ ပ္ဍဲအခိၚ်ဂှ် သကအ်ရဲ တဳလပိုဉ်သုဒိန်ဂမၠိုၚ် ကုကောန်ၚာ်သၟတ်ဂှ် ခုတ်ခဴကဵုထောံယၟု ရဴဝွံမ္ဂး ဗဳဇကအိုတ်ရ၊ ကုသမ္ဘာတြေမ်တဳလပိုဉ်သုဒိန်ဂှ် ခုတ်ခဴကဵုထောံယၟု ရဴဝွံမ္ဂး ဗဳဇကမာတာအိုတ်ရ၊ ကုတဳလပိုဉ်သုဒိန်ဂှ် ခုတ်ခဴကဵုထောံယၟု ရဴဝွံမ္ဂး ဗဳဇကပိတာအိုတ်ရ ကောန်ကဵုမိၜါတၠဂမၠိုၚ်ဂှ် ပ္ဍဲအခိၚ်လက္ကရဴ (လအ်အာဗၞတ်ထပှ်သၞာံ ဒ္စါံသၞာံ) နူအဝေါၚ်ဘဝခရှ် လုပ်စိုပ်အဝေါၚ်ဘဝခမဳ သ္ပခမဳအိုတ်တုဲ သ္ပဇၞောဝ်မတ် အရဟတ္တဖိုလ်အိုတ်ရ။
၃၇) ပ္ဍဲအခိၚ်ဂှ် “ကုအဲဂှ် ဟွံကလိဂွံ (ဓရ်ဂုဏ်မပ္တံၛာန်) ရသွံ၊ ကုအဲဂှ် ကလိဂွံ (ဒဒှ်ခမဳ) ဟွံဒးရးရသွံ၊ အဲဂပ်ဝ်ကလိဂွံ (သာသနာ) ဗွဲဟွံဒးရးရသွံ၊ အဲကလိဂွံ (သာသနာ) ဗွဲမဒးရးဟွံသေၚ်ရသွံ၊ ယြဴအဲမွဲ သ္ပခမဳပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ်ဗွဲမဒးရး ရဴဝွံတုဲ သွက်သ္ဂောံဒ္ဂေတ်လ္ၚတ် ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိတ်လမျီုဂှ် ဟွံသၟဟ်ရထရသွံ” ရဴဝွံ ပွမဂွိၚ်စံၚ်တူ ဗွဲကြဴ ပွမသၠိုက်သ္ၚောံစိုတ် ကတဵုဒှ် ကုတဳလပိုဉ်သုဒိန်ရ။ တဳလပိုဉ်သုဒိန်ဂှ် ဟိုတ်နူ ပွမဂွိၚ်စံၚ်တူ ဗွဲကြဴ ပွမသၠိုက်သ္ၚောံစိုတ်ဂှ် ဇြာဲသကှ်ကၠုၚ်တုဲ၊ ဖျုန်ဆီဒေက်ခ္ဍေက်ကၠုၚ်တုဲ၊ ရုပ်သာ်လီုလာ်ကၠုၚ်တုဲ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်တုဲ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) တုဲ၊ မၞုံကဵုစိုတ် (ဂမ္တဴပူဆာ) အပ္ဍဲဒှ်တုဲ မၞုံကဵုစိုတ်မခ္ဍောပ်ကဝေန်ဒှ်တုဲ မၞုံကဵုဒဒိုခ်ဒှ်တုဲ စိုတ်ဟွံခိုဟ် (ဟွံမိပ်) ဒှ်တုဲ သၠိုက်သ္ၚောံစိုတ်ဒှ်တုဲ ၚုၚ်ၚဇြဟောံဒၟံၚ်ရ။
၃၈) ပ္ဍဲအခိၚ်ဂှ် ခမဳသကအ်ရဲ တဳလပိုဉ်သုဒိန်ဂမၠိုၚ်ဂှ်— “ယွံကောန်တၠသုဒိန် ပ္ဍဲကိုပ်ကၠာတေံ တၠအဲရုပ်သာ်ကျေဝ်လှေဝ်ရ၊ မၞုံကဵုဣန္ဒြဳပေၚ်အုဟ်ရ၊ သာ်မုက္ခဝါဇြုၚ်ကေဝ်ခ္ဍေက်ရ၊ သာ်စၞာံဇကု ဇြုၚ်ကေဝ်ဗွဲတၟေၚ်ရ၊ ပ္ဍဲအခိၚ်လၟုဟ် တၠအဲ ဇြာဲသကှ်ရ၊ ဖျုန်ဆီဒေက်ခ္ဍေက်ရ၊ ရုပ်သာ်လီုလာ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံၚ်တၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ၊ မၞုံကဵုဟိုတ် (ဂမ္တဴပူဆာ) အပ္ဍဲဒှ်တုဲ မၞုံကဵုစိုတ်မခ္ဍောပ်ကဝေန်ဒှ်တုဲ မၞုံကဵုဒဒိုခ်ဒှ်တုဲ ဟိုတ်ဟွံခိုဟ် (ဟွံမိပ်) ဒှ်တုဲ သၠိုက်သ္ၚောံစိုတ်ဒှ်တုဲ ၚုၚ်ၚဇြဟောံဒၟံၚ်ရ၊ ယွံကောန်တၠသုဒိန် ပသာ်ဂှ်ရော? တၠအဲ ဒ္ဂေတ်ဒၟံၚ်ဒ္ဂေတ်မပြဲ သီုဟွံမိပ်လဟိၚ်ဟာ” ရဴဝွံ ဟီုသ္ဂးကဵု တဳလပိုဉ်သုဒိန်အိုတ်ရ။
ယွံတဳလပိုဉ်တအ် အဲဍိက် ဒ္ဂေက်ဒၟံၚ် ဒ္ဂေတ်မပြဲ သီုဟွံမိပ်လဟိၚ် ဟွံသေၚ်ရ၊ ပွသရာမ်ပါပ် အဲဍိက်ကၠောန်သ္ပဒး နွံဒၟံၚ်ရ၊ ဒ္ဂေတ်သ္ပဒး ဒ္ဂေတ်မေထုန် ပ္ဍဲသမ္ဘာတြေမ်ရ၊ ယွံတဳလပိုဉ်တအ် “ကုအဲဂှ် ဟွံကလိဂွံ (ဓရ်ဂုဏ်မပ္တံၛာန်) ရသွံ၊ ကုအဲဂှ် ကလိဂွံ (ဒဒှ်ခမဳ) ဟွံဒးရးရသွံ၊ အဲဂပ်ဝ်ကလိဂွံ (သာသနာ) ဗွဲဟွံဒးရးရသွံ၊ အဲကလိဂွံ (သာသနာ) ဗွဲမဒးရးဟွံသေၚ်ရသွံ၊ ယြဴအဲမွဲ သ္ပခမဳပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ်ဗွဲမဒးရး ရဴဝွံတုဲ သွက်သ္ဂောံဒ္ဂေတ်လ္ၚတ် ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိတ်လမျီုဂှ် ဟွံသၟဟ်ရထရသွံ” ရဴဝွံ ပွမဂွိၚ်စံၚ်တူ ဗွဲကြဴ ပွမသၠိုက်သ္ၚောံစိုတ် ကတဵုဒှ်ဒၟံၚ် ကုအဲဍိက်ရ ရဴဝွံ (ကလေၚ်ဟီုလဴထ္ၜးရ)။
ယွံကောန်တၠသုဒိန် ပွမဂွိၚ်စံၚ်တူဗွဲကြဴ ပွမသၠိုက်သ္ၚောံစိုတ် ထေက်ကဵုကတဵုဒှ် ကုတၠအဲရ၊ ယြဴတၠအဲမွဲ သ္ပခမဳ ပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ် ဗွဲမဒးရးရဴဝွံတုဲ သွက်သ္ဂောံဒ္ဂေတ်လ္ၚတ် ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိတ်လမျီုဂှ် ဟွံသၟဟ်ရထရသွံ၊ ယွံကောန်တၠ တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံရာဂတုဲ တွံလဝ်သွက်ဂွံစာ်စ္ဍးနူရာဂရ ဟွံသေၚ်ဟာ၊ ဟွံတွံလဝ်ဓရ် တၞဟ်နပွမစိုန်သကီုစပ်ကေုာံကာမဂုဏ်တုဲ တွံလဝ် သွက်ဟွံစိုန်သကီု ဟွံစပ် ကေုာံကာမဂုဏ်ရ ဟွံသေၚ်ဟာ၊ ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံပွမစောဲလာံ (နတဏှာဒိဋ္ဌိ) တုဲ တွံလဝ်သွက်ဟွံစောဲလာံ (နတဏှာဒိဋ္ဌိ) ရ ဟွံသေၚ်ဟာ။
ယွံကောန်တၠ တဳလမၞုံပိုဉ်ကျာ်တြဲဂှ် သီုဂပ်ဝ်တွံလဝ်ဓရ် သွက်ဂွံစာ်စ္ဍးနူရာဂသာ်ဂှ် တၠအဲဂှ် ပတိတ်ဇြဟတ် တၞဟ်နပွမဒှ်မွဲဟာန်ကေုာံရာဂရသွံ၊ သီုဂပ်ဝ်တွံလဝ်ဓရ် သွက်ဟွံစိုန်သကီု ဟွံစပ်ကေုာံကာမဂုဏ်သာ်ဂှ် ပတိတ်ဇြဟတ်တၞဟ်နပွမစိုန်သကီုစပ် ကေုာံကာမဂုဏ်ရသွံ၊ သီုဂပ်ဝ်တွံလဝ်ဓရ် သွက်ဟွံစောဲလာံ (နတဏှာဒိဋ္ဌိ) သာ်ဂှ် ပတိတ်ဇြဟတ် တၞဟ်နပွမဒှ် မွဲဟာန်ကေုာံပွမစောဲလာံ (နတဏှာဒိဋ္ဌိ) ရသွံ။
ယွံကောန်တၠ တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် တွံလဝ်ဓရ် တၞဟ်နပွမစာ်စ္ဍးနူရာဂ ဟွံသေၚ်ဟာ၊ တွံလဝ်ဓရ် တၞဟ်နပွမဟွံဗ္ၜူမာန် တၞဟ်နပွမပါဲပၠေၚ်ကၠေံ ပွမဗျဵုတဟၚ် (မတွံဂးကိလေသ) တၞဟ်နပွမပါဲသကုတ်ကၠေံ အစောဲအလာံ တၞဟ်ပွမသကုတ်ကၠေံရိုဟ်ကၞက်ဝဋ် တၞဟ်နတဏှာအိုတ် တၞဟ်နပွမဟွံထၞေန်စပ် တၞဟ်နပွမပၠိုတ်လလမ် တၞဟ်နပွမၜိုတ်သတိုတ်ရ ဟွံေသၚ်ဟာ။
ယွံကောန်တၠ တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် တွံလဝ်ပွမပါဲကၠေံ ကာမဂုဏ်ရဟွံသေၚ်ဟာ၊ တွံလဝ် ပွမပိုၚ်ခြာတီကေတ် သညာ (စိုတ်) ကာမဂုဏ်ဂမၠိုၚ်ရ ဟွံသေၚ်ဟည၊ တွံလဝ် ပွမပါဲပၠေၚ်ကၠေံ ပွမဗျဵုတဟၚ်ကာမဂုဏ်ရ ဟွံသေၚ်ဟာ၊ တွံလဝ် ပွမပါဲဂစိုတ်ကၠေံ ‘ကာမဝိတက်’ ပွမချပ်ပ္ဍဲကာမဂုဏ်ရ ဟွံသေၚ်ဟာ၊ တွံလဝ် ပွမၜိုဟ်လလမ် ဒတူတၠာဲကာမဂုဏ်ဂမၠိုၚ်ရ ဟွံသေၚ်ဟာ။
ယွံကောန်တၠ ပွမယုတ်မာတၠအဲ သ္ပဒးဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ကဵုကတဵုဒှ်ဟွံမာန်ရ။ ယွံကောန်တၠ ဍာံဍာံစၟတ်စၟတ် ပွယုတ်မာတၠအဲ သ္ပဒးဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမဟွံကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲ လ္ၚဵုဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်လီုလာ်ကီု ကဵုကတဵုဒှ်ရ ရဴဝွံ (ဟီုသ္ဂးအိုတ်ရ)။
၃၉) ပ္ဍဲကြဴနူဂှ် ခမဳဂမၠိုင်ဂှ် ဟီုဂရိုဟ်တင်ဒုဟ် တဳလပိုဉ်သုဒိန် နဟိုတ်မဂၠိုင်အိုတ်တုဲဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိင်ဂှ် ဟိုတ်နူဟိုတ်အရာ (ပွမကလိလောန်မေထုန် တဳလပိုဉ်သုဒိန်)ဝွံ တဳလမၞုံပိုဉ်ကျာ်တြဲ ကဵုခမဳသင် ကောံဓရီုတုဲမ္ဂး “ယွံသုဒိန် တၠအဲ သွိုန်ဗပိုန် (ဒ္ဂေတ်သ္ပဒး) ဒ္ဂေတ်မေထုန် ပ္ဍဲသမ္ဘာတြေမ်ရဂှ် ဍာံပြဟာ” ရဴဝွံ စၟၟဳစၟတ်သၟာန်သၟုက် တဳလပိုဉ်သုဒိန်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရင်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) (ပွကမၠောန်တၠအဲ)ဝွံ ဟွံထေက်ကုခမဳဂမၠိုင်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေင်ရ၊ ဟွံဂပ်ဝ်ရ၊ ဟွံထေကကဵုသ္ပရ၊ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲဂှ် သ္ပခမဳ ပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ် ဗွဲမဒးရးရဴဝွံတုဲ သွသ္ဂောံဒ္ဂေတ်လ္ၚတ် ဒ္ဂေတ်မပြဲ ဗွဲမဍိုက်ပေင်သအးဇ္ၚး စဵုကဵုလအိတ်လမျီုဂှ် ဟွံသၟဟ်ရထဂှ်ရော?
ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုင်ဂၠင် ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံရာဂတုဲ တွံလဝ်သွက်ဂွံစာ်စ္ဍးနူရာဂရ ဟွံသေင်ဟာ၊ ဟွံတွံလဝ်ဓရ် တၞဟ်နပွမစိုန်သကီုစပ်ကေုာံကာမဂုဏ်တုဲ တွံလဝ် သွက်ဟွံစိုန်သကီုဟွံစပ် ကေုာံကာမဂုဏ်ရ ဟွံသေင်ဟာ၊ ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံပွမစောဲလာံ (နတဏှာဒိဋ္ဌိ)တုဲ တွံလဝ်သွက်ဟွံစောဲလာံ (နတဏှာဒိဋ္ဌိ)ရ ဟွံသေင်ဟာ။
ယွံတြုံမလ္ၚုသၟး (နူမဂ်ဖိုလ်) အဲဂှ် သီုဂပ်ဝ်တွံလဝ်ဓရ် သွက်ဂွံစာ်စ္ဍးနူရာဂဂှ် တၠအဲဂှ် မုဟိုတ် ပတိတ်ဇြဟတ် တၞဟ်နပွမဒှ်မွဲဟာန်ကေုာံရာဂဂှ်ရော? သီုဂပ်ဝ်တွံလဝ်ဓရ် သွက်ဟွံစိုန်သကီု ဟွံစပ်ကေုာံကာမဂုဏ်သာ်ဂှ် သတိတ်ဇြဟတ် တၞဟ်နပွမစိုန်သကီု စပ်ကေုာံကာမဂုဏ်ဂှ်ရော? သီုဂပ်ဝ်တွံလဝ်ဓရ် သွက်ဟွံစောဲလာံ (နတဏှာဒိဋ္ဌိ) သာ်ဂှ် ပတိတ်ဇြဟတ်တၞဟ်နပွမဒှ်မွဲဟာန် ကေုာံပွမစောဲလာံ (နတဏှာဒိဋ္ဌိ)ဂှ်ရော?
ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုင်ဂၠင် တွံလဝ်ဓရ် တၞဟ်ပွမစာ်စ္ဍးနူရာဂရ ဟွံသေင်ဟာ၊ တွံလဝ်ဓရ် တၞဟ်နပွမဟွံဗ္ၜူမာန် တၞဟ်နပွမပါဲပၠေင်ကၠေံ ပွမဗျဵုတဟင် (မတွံဂးကိလေသ) တၞဟ်နပွမပါဲသကုတ်ကၠေံ အစောဲအလာံ တၞဟ်နပွမသကုတ်ကၠေံရိုဟ်ကၞက်ဝဋ် တၞဟ်နတဏှာအိုတ် တၞဟ်နပွမဟွံထၞေန်စပ် တၞဟ်နပွမပၠိုတ်လလမ် တၞဟ်နပွွမၜိုဟ်သတိုတ်ရ ဟွံသေင်ဟာ။
ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုင်ဂၠင် တွံလဝ် ပွမပါဲကၠေံ ကာမဂုဏ်ရ ဟွံသေင်ဟာ၊ တွံလဝ် ပွမပိုင်ခြာတီကေတ် သညာ (စိုတ်) ကာမဂုဏ်ဂမၠိုင်ရ ဟွံသေင်ဟာ၊ တွံလဝ် ပွမပါဲပၠေင်ကေၠံ ပွမဗျုဵတဟင်ကာမဂုဏ်ရ ဟွံသေင်ဟာ၊ တွံလဝ် ပွမပါဲဂစိုတ်ကၠေံ ‘ကာမဝိတက်’ ပွမချပ်ပ္ဍဲကာမဂုဏ်ရ ဟွံသေင်ဟာ၊ တွံလဝ်ပွမၜိုဟ်လလမ် ဒတူတၠာဲကာမဂုဏ်ဂမၠိုင်ရ ဟွံသေင်ဟာ။
ယွံတြုံမလ္ၚုသၟး (နူမဂ်ဖိုလ်) ပွမပၠုပ်စုတ်အၚ်္ဂဇာတ်တၠအဲ ပ္ဍဲပါင်ဇြုံမၞုံကဵုဂျိမပြဟ် မၞုံကဵုဂျိမသကာတ်ဂှ် ပြဲသန်ဏီရ၊ ပွမပၠုပ်စုတ်အၚ်္ဂဇာတ်တၠအဲ ပ္ဍဲအၚ်္ဂဇာတ်မၞိဟ်ဗြဴဂှ် ဟွံပြဲဟေင်ရ။ ယွံတြုံမလ္ၚုသၟး (နူမဂ်ဖိုလ်) ပွမပၠုပ်စုတ်အၚ်္ဂဇာတ်တၠအဲ ပ္ဍဲပါင်ဇြုံဗုဲ ဇြုံဇာတ်ဂှ် ပြဲသန်ဏီရ၊ ပွမပၠုပ်စုတ် အၚ်္ဂဇာတ်တၠအဲ ပ္ဍဲအၚ်္ဂဇာတ်မၞိဟ်ဗြဴဂှ် ဟွံပြဲဟေင်ရ။
ယွံတြုံမလ္ၚုသၟး (နူမဂ်ဖိုလ်) ပွမပၠုပ်စုတ် အၚ်္ဂဇာတ်တၠအဲ ပ္ဍဲဗွဝ်ဖအုမ်လ္ၚပၟတ် မဂဵုတူဍာဲဂြင် မဂဵုလဟဵုတူပွဳပွူ မဒှ်မွဲဟာန်ကေုာံသၞပၟတ်ဂၠန်ပၟတ်ဂှ် ပြဲသန်ဏီရ၊ ပွမပၠုပ်စုတ်အၚ်္ဂဇာတ်တၠအဲ ပ္ဍဲအၚ်္ဂဇာတ်မၞိဟ်ဗြဴဂှ် ဟွံပြဲဟေင်ရ။
ပွမဒှ်သာ်ဂှ်ဂှ် မုဟိုတ်ရောဟီုမ္ဂး ယွံတြုံမလ္ၚုသၟး (နူမဂ်ဖိုလ်) ဟိုတ်နူဟိုတ် (မတွံဂးပွမပၠုပ်စုတ်အၚ်္ဂဇာတ် ပ္ဍဲပါင်ဇြုံ ဗွဝ်ဖအုမ်လ္ၚပၟတ်)ဂှ် သ္ဒးအာစိုပ် ပွမချိုတ်ကီု ဒဒိုခ်ဆိုက်ညောန်ကဵုချိုတ်ကီုရ၊ ဟိုတ်နူဟိုတ် (မတွံဂး ပွမပၠုပ်စုတ်အၚ်္ဂဇာတ် ပ္ဍဲပါင်ဇြုံ ဗွဝ်ဖအုမ်လ္ၚပၟတ်)ဂှ် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် နရက်မစာ်စ္ဍးနူတသိုခ် မဒှ်လအာဂတိ ညးဟွံခိုဟ်ဆာဲတအ် မဒှ်အရာဒၞါဲဒတုံစှေ်ပြးဆာဲတုန် အာစိုပ်ဟွံမာန်ဟေင်ရ။
ယွံတြုံမလ္ၚုသၟး (နူမဂ်ဖိုလ်) ဟိုတ်နူဟိုတ် (မတွံဂးပွမပၠုပ်စုတ်အၚ်္ဂဇာတ် ပ္ဍဲအၚ်္ဂဇာတ်မၞိဟ်ဗြဴ) ဝွံတုန် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် သ္ဒးအာစိုပ်နရက် မစာ်စ္ဍးနူတသိုခ် မဒှ်လအာဂတိ ညးဟွံခိုဟ်ဆာဲတအ် မဒှ်အရာဒၞါဲဒတုံစှေ်ပြးဆာဲရ။
ယွံတြုံမလ္ၚုသၟး (နူမဂ်ဖိုလ်) သီုကဵုဒှ်တဴသာ်ဂှ် တၠအဲ ဒ္ဂေတ်သ္ပတဴ ဒ္ဂေတ်မေထုန် မဟွံသေင်ကဵုဒ္ဂေတ်ညးသပ္ပုရိုသ် မဒှ်ဒ္ဂေတ် ညးပဒတဴပ္ဍဲကွာန် ဒ္ဂေတ်ညးယုတ်ဂမၠိုင် မရုန်မဵုသကာတ်မြဟ် မၞုံလအိတ်ဍေံ ပွမဒးကြဴကြာတ်ကဵုဍာ် (မၞိဟ်ညာတ်ဒးမ္ဂး ဟွံဆာဲတုဲ) မဒးဒ္ဂေတ်သ္ပပ္ဍဲဌာန်ဂြောပ်ဗ္ဒန် မၞိဟ်တြုံမၞိဟ်ဗြဴၜါၜါမွဲစွံ မဒးဒ္ဂေတ်သ္ပရသွံ။
ယွံတြုံမလ္ၚုသၟး (နူမဂ်ဖိုလ်) တၠအဲဂှ် ဒှ်ညးဒ္ဂေတ်သ္ပ ဓရ်အကုသိုလ်ဂမၠိုင်မဂၠိုင် ဗွဲကိုပ်ကၠာ (ညးဂမၠိုင်အိုတ်သီု)တုဲ ဒှ်က္ဍိုပ်သကိုပ်အာဂတပၠတရဴရ။
ယွံတြုံမလ္ၚုသၟး (နူမဂ်ဖိုလ်) ပွယုတ်မာ တၠအဲသ္ပဒးဝွံ ကုညးဟွံလျုင်ဇြုင်သ္ဍိုက်ဂမၠိုင်တၞဟ်နပွမကဵုလျုင်ဇြုင်သ္ဍိုက်ကီု ကုညးလျုင်ဇြုင်သ္ဍိုက်တုဲဂမၠိုင် တၞဟ်နပွမကဵုလျုင်ဇြုင်သ္ဍိုက်ဂၠိုင်တိုန်ကီု ကဵုကတဵုဒှ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) ဍာံဍာံစၟတ်စၟတ် ပွယုတ်မာတၠအဲသ္ပဒးဝွံ ကုညးဟွံလျုင်ဇြုင်သ္ဍိုက်ဂမၠိုင်ဏီ တၞဟ်နပွမဟွံကဵုလျုင်ဇြုင်သ္ဍိုက်ကီု ကုညးလျုင်ဇြုင်သ္ဍိုက်တုဲလ္ၚဵုဂမၠိုင် တၞဟ်နပွမကဵုလျုင်ဇြုင်သ္ဍိုက်လီုလာ်ကီု ကဵုကတဵုဒှ်ရ ရဴဝွံ (ဟီုဂရိုဟ်ရ)။
ပ္ဍဲကြဴနူဂှ် တဳလမၞုံပိုဉ်ကျာ်တြဲ ဟီုဂရိုဟ်တင်ဒုဟ် တဳလပိုဉ်သုဒိန် နဟိုတ်မဂၠိုင်တုဲမ္ဂး ဟီုဂလာန်ဂရိုဟ်မဟွံမွဲကဵုဂုဏ် ဒဒက်တဴဇကုဇကု ပွမဇြိုင်ကဵုလွဳမြိမြန်ဇကုဇကု ညးသအာင်ဂမၠိုင် ပွမဇြိုင်ကဵုလွဳမြိမြန် ပွမပၟိက်ဇၞော် ပွမဟွံအေင်သတေှ် (ဟွံတရိုပ်စိုတ်) ပွမမိပ်လဟိင်ပ္ဍဲဂကောံသကအ်ပွံင် ပွမလၞုဟ်လၞန်ဂမၠိုင်တုဲ နဟိုတ်မဂၠိုင်ဂၠင် ဟီုသ္ဂးတဴဂုဏ် ဒဒက်တဴဇကုဇကု ပွမလွဳမြိမြန်ဇကုဇကုလောဲသွာ ညးသအာင်ဂမၠိုင်လွဳမြိမြန်လောဲသွာ ပွမပၟိက်အောန်ပွမအေင်သတေှ် (တရိုပ်စိုတ်) ပွမတေှ်တြဳထောံကိလေသ ပွမခါလယှ်ထောံကိလေသ ပွမမၞုံကဵုလျုင်ဇြုင်သ္ဍိုက် ပွမဟွံဆန်ၜန်ကိသေလ ပွမပတိတ်ဇြဟတ် နဝဳရိယဂမၠိုင်တုဲမ္ဂး ဟီုတွံတဴဂလာန်ဓရ် မဗဗွဲညဳသၟဟ်ကဵုဗီုဒဒှ်ဂှ် ကုခမဳဂမၠိုင်တုဲပ္ဍဲကြဴ—
