၉.၈။ ဓရ်ထေက်ကဵု ပူဂိုလ်စောဒက ဗ္စာရဏာ
၃၉၉။ ယွံတဳလမၞုံပိုဉ် ခမဳစောဒက မမိက်စောဒနာညးသအာၚ်ဂှ် ဗ္စာရဏာပ္ဍဲသန္ထာန်ဇကု ဓရ်ဂမၠိုၚ်ဗၞတ်မုစိတုဲ ထေက်ကဵုစောဒနာ ညးသအာၚ်ရော? ရဴဝွံ (ဂရၚ်ပတီရ)။
ယွံဥပါလိ ခမဳစောဒက မမိက်စောဒနာညးသအာၚ်ဂှ် ဗ္စာရဏာပ္ဍဲသန္ထာန်ဇကု ဓရ်ဂမၠိုၚ်မသုန်သာ်တုဲ ထေက်ကဵုစောဒနာ ညးသအာၚ်ရ။
ယွံဥပါလိ ခမဳစောဒကာ မမိက်စောဒနာညးသအာၚ်ဂှ် ရဴဝွံ ဗ္စာရဏာရ။ “အဲ ဒ္ဂေတ်ဇကု သအးဇ္ၚးဟာ၊ ဍိုက်ပေၚ်တဴကေုာံ ဒ္ဂေတ်ဇကု မသအးဇ္ၚး မဟွံထောၚ်ပြိုဟ် မဟဂပ်ဝ်ဇွိတ်သပေါတ်ဟာ၊ ဓရ်ဝွံ နွံကုအဲဟာ၊ ဟွံသေၚ်သာ်ဂှ်မ္ဂး ဟွံမွဲဟာ” ရဴဝွံ ဒးဗ္စာရဏာရ။
ယွံဥပါလိ ခမဳဂှ် ဒ္ဂေတ်ဇကုဟွံသအးဇ္ၚးမ္ဂး ဟွံဍိုက်ပေၚ်တဴကေုာံဒ္ဂေတ်ဇကုမသအးဇ္ၚး မဟွံထောၚ်ပြိုဟ် မဟဂပ်ဝ်ဇွိတ်သပေါတ်မ္ဂး “ဗတိုက်ဖအောဝ်ရ၊ တဳလပိုဉ် သ္ၚေဝ်ရံၚ်ဒ္ဂေတ်ဇကုဇကု ဗွဲကိုပ်ကၠာညိ” ရဴဝွံ ညးမလေပ်ဟီုသ္ဂး ကုခမဳဂှ် လေပ်နွံအိုတ်ရ။
ယွံဥပါလိ မွဲဂကူပၠန်တုန် ခမဳစောဒက မမိက်စောဒနာညးသအာၚ်ဂှ်—
“အဲ ဒ္ဂေတ်ပါၚ် သအးဇ္ၚးဟာ၊ ဍိုက်ပေၚ်တဴကေုာံ ဒ္ဂေတ်ပါၚ် မသအးဇ္ၚး မဟွံထောၚ်ပြိုဟ် မဟဂပ်ဝ်ဇွိတ်သပေါတ်ဟာ၊ ဓရ်ဝွံ နွံကုအဲဟာ၊ ဟွံသေၚ်သာ်ဂှ်မ္ဂး ဟွံမွဲဟာ” ရဴဝွံ ဒးဗ္စာရဏာရ။
ယွံဥပါလိ ခမဳဂှ် ဒ္ဂေတ်ပါၚ်ဟွံသအးဇ္ၚးမ္ဂး ဟွံဍိုက်ပေၚ်တဴကေုာံ ဒ္ဂေတ်ပါၚ်မသအးဇ္ၚး မဟွံထောၚ်ပြိုဟ် မဟဂပ်ဝ်ဇွိတ်သပေါတ်မ္ဂး “ဗတိုက်ဖအောဝ်ရ၊ တဳလပိုဉ် သ္ၚေဝ်ရံၚ်ဒ္ဂေတ်ပါၚ်ဇကု ဗွဲကိုပ်ကၠာညိ” ရဴဝွံ ညးမလေပ်ဟီုသ္ဂး ကုခမဳဂှ် လေပ်နွံအိုတ်ရ။ ယွံဥပါလိ မွဲဂကူပၠန်တုန် ခမဳစောဒက မမိက်စောဒနာညးသအာၚ်ဂှ်—
“မေတ္တာစိုတ် တန်တဴတူရူ ကုအဲဟာ၊ စ္ဍးနူပၞောတ်ဒေါသ ပ္ဍဲညးဒ္ဂေတ်ဓရ်မွဲစွံဂမၠိုၚ်ဟာ၊ ဓရ်ဝွံ နွံကုအဲဟာ ဟွံသေၚ်သာ်ဂှ်မ္ဂး ဟွံမွဲဟာ” ရဴဝွံ ဒးဗ္စာရဏာရ။
ယွံဥပါလိ မေတ္တာစိုတ် ဟွံတန်တဴတူရူ ကုခမဳဂှ်မ္ဂး ဟွံစ္ဍးနူပၞောတ်ဒေါသ ပ္ဍဲညးဒ္ဂေတ်ဓရ်မွဲစွံဂမၠိုၚ်မ္ဂး “ဗတိုက်ဖအောဝ်ရ၊ တဳလပိုဉ်ဗွဲကိုပ်ကၠာ ဩဝ်ကဵုကတဵုဒှ်တူရူ မေတ္တာစိုတ် ပ္ဍဲညးဒ္ဂေတ်ဓရ်မွဲစွံဂမၠိုၚ်ညိ” ညးမလေပ်ဟီုသ္ဂး ကုခမဳဂှ် လေပ်နွံအိုတ်ရ။ ယွံဥပါလိ မွဲဂကူပၠန်တုန် ခမဳစောဒက မမိက်စောဒနာညးသအာၚ်ဂှ်—
“အဲ လမိၚ်လညာတ်ဂၠိုၚ်ဟာ၊ ပကၚ်ရၚ်လဝ် လၟိၚ်လညာတ်ဟာ၊ လ္ၚတ်ဆန်ၜန် (ပကောံပကေဝ်) လဝ် လမိၚ်လညာတ်ဟာ။ ဓရ်ဂမၠိုၚ် မၞုံကဵုပွမဆာဲတမ် ပွမဆာဲလဒေါဝ် ပွမဆာဲကၞောတ်တုဲ ဒှ်မွဲဟာန်ကေုာံအရထသဒ္ဒါသၟဟွံက ဍိုက်ပေၚ်ပွဳပွူးအိုတ်တ်သီုတုဲ မတွံထ္ၜးတဴ ဒ္ဂေတ်မပြဲမသအးဇ္ၚးဂှ် ဂပ်ဝ်ကလၚ်လဝ် ဗွဲမဂၠိုၚ်ဟာ၊ ပကၚ်ရၚ် ပတိုန်လဝ်ပါၚ်ဟာ၊ လ္ၚတ်လဝ်ဟာ၊ ဗ္စာရဏာလဝ် နစိုတ်ဟာ၊ ထပက်ခၠၚ်တီကေတ် နကဵုပညာ ဗွဲမဒးရးဟာ၊ ဓရ်ဝွံ နွံကုအဲဟာ၊ ဟွံသေၚ်သာ်ဂှ်မ္ဂး ဟွံမွဲဟာ” ရဴဝွံ ဒးဗ္စာရဏာရ။
ယွံဥပါလိ ခမဳဂှ် လမိၚ်လညာတ်ဟွံဂၠိုၚ်မ္ဂး ဟွံပကၚ်ရၚ်လဝ်လၟိၚ်လညတ်မ္ဂး ဟွံလ္ၚတ်ဆန်ၜန် (ပကောံပကေဝ်) လဝ် လမိၚ်လညာတ်မ္ဂး။ ဓရ်ဂမၠိုၚ် မၞုံကဵုပွမဆာဲတမ် ပွမဆာဲလဒေါဝ် ပွမဆာဲကၞောတ်တုဲ ဒှ်မွဲဟာန်ကေုာံအရထသဒ္ဒါသၟးဟွံက ဍိုက်ပေၚ်ပွဳပွူအိုတ်သီုတုဲ မတွံထ္ၜးတဴ ဒ္ဂေတ်မပြဲမသအးဇ္ၚးဂှ် ဟဂပ်ဝ်ကလၚ်လဝ် ဗွဲမဂၠိုၚ်မ္ဂး ဟဂွံပကၚ်ရၚ်ပတိုန်လဝ်ပါၚ်မ္ဂး ဟဂွံလ္ၚတ်လဝ်မ္ဂး ဟဂွံဗ္စာရဏာလဝ် နစိုတ်မ္ဂး ဟဂွံထပက်ခၠၚ်တီကေတ် နကဵုပညာဗွဲမဒးရးမ္ဂး “ဗတိုက်ဖအိုတ်ရ၊ တဳလပိုဉ် ဗွဲကိုပ်ကၠာ ဩဝ်ကတ်ဗတောန် ပါဠိသုတ်ညိ” ညးမလေပ်ဟီုသ္ဂး ကုခမဳဂှ် လေပ်နွံအိုတ်ရ။
ယွံဥပါလိ မွဲဂကူပၠန်တုန် ခမဳစောဒက မမိက်စောဒနာညးသအာၚ်ဂှ်—
“အဲ ဂွံလဝ်ပါၚ်တိုက် ပါတိမုက်ဂမၠိုၚ်ၜါ ဗွဲတြးဟာ၊ ပါ်ပရအ်လဝ် ဗွဲမဒးရးတုဲဒှ်ဟာ၊ မၞုံကဵုပွမကဵုဒှ်ဗွဲမဒးရးဟာ၊ ဗွဲပါဠိကီု ဗွဲအဋ္ဌကထာကီု သ္ဂုတ်သွာတ်လဝ် ဗွဲမဒးရးတုဲဒှ်ဟာ၊ ဓရ်ဝွံ နွံကုအဲဟာ ဟွံသေၚ်သာ်ဂှ်မ္ဂး ဟွံမွဲဟာ” ရဴဝွံ ဒးဗ္စာရဏာရ။
ယွံဥပါလိ ခမဳဂှ် ဟွံဂွံလဝ်ပါၚ်တိုက် ပါတိမုက်ဂမၠိုၚ်ၜါ ဗွဲတြးမ္ဂး ဟွံဂွံပါ်ပရအ်လဝ် ဗွဲမဒးရးမ္ဂး ဟွံမွဲကဵုပွမကတဵုဒှ်ဗွဲမဒးရးမ္ဂး ဗွဲပါဠိကီု ဗွဲအဋ္ဌကထာကီု ဟဂွံသ္ဂုတ်သွာတ်လဝ်ဗွဲမဒးရးမ္ဂး “ယွံကောန်တၠ သိက္ခာပိုဒ်ဝွံ မုရဴပ္ဍဲဌာန်မွဲ ကျာ်တြဲ တွံလဝ်ရော?” ရဴဝွံ သၟာန်မ္ဂး သှ်ကဵုဗွဲမဒးရး ဟွံမာန်မ္ဂး “ဗတိုက်ဖအောဝ်ရ၊ တဳလပိုဉ် ဗွဲကိုပ်ကၠာ ဩဝ်ကတ်ဗတောန် ဝိနယ်ညိ” ရဴဝွံ ညးမလေပ်ဟီုသ္ဂး ကုခမဳဂှ် လေပ်နွံအိုတ်ရ။
ယွံဥပါလိ ခမဳစောဒက မမိက်စောဒနာညးသအာၚ်ဂှ် ဗ္စာရဏာပ္ဍဲသန္ထာန်ဇကု ဓရ်ဂမၠိုၚ်မသုန်သာ်ဝွံတုဲ ထေက်ကဵုစောဒနာညးသအာၚ်ရ ရဴဝွံ (သ္ဂးရ)။
