၈.၁ ။ စၞောန်ထ္ၜးကဵုအာဂန္တုကဝတ်
၃၅၆။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳအာဂန္တုကဂမၠိုၚ် သီုမလိုန်ဍိုက်လဝ်ဒၞပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမဓလဝ်လဝ်က္ဍိုၚ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမဓလီုလဝ်က္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမစွံလဝ်သ္ၚာပ္ဍဲက္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ နကဵုဍာ်သုၚ်လေဝ် ကြာတ်ဇိုၚ်အိုတ်ရ၊ ခမဳ ပဒတဴ ဘာမဇၞော်ဂမၠိုၚ်လေဝ် ဟွံလ္ၚောဝ်အိုတ်ရ၊ ဘာသၞာသတိက်သၞာဒၟံၚ်လေဝ် ဟွံသၟာန်အိုတ်ရ။
ခမဳအာဂန္တုကမွဲဇကု ပံက်သၞောဝ်တြၚ် အပ္ဍဲဘာမဟွံပဒတဴတုဲ ဓရိုဟ်သၠတြၚ်တုဲမ္ဂး လုပ်အာ ဗွဲမပြဟ်ရ၊ နူလတူဇဵုတြၚ်လတူ ဇြုံဒတုံစှေ် ပ္ဍဲပၞးခမဳဂှ်ရ၊ ခမဳဂှ် ဖေက်လကိုတ်တုဲ က္ညာၚ်ကရေဲရ၊ ခမဳဂမၠိုၚ် ဂြိပ်ကၠုၚ်တုဲ “ ယွံကောန်တၠ တၠအဲ မုဟိုတ် က္ညာၚ်ကရေဲရော” ရဴဝွံ သၟာန်ခမဳဂှ်အိုတ်ရ။ ပ္ဍဲအခိၚ်ဂှ် ခမဳဂှ် ဟီုလဴဗ္စ ဟိုတ်ဂှ် ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ်—
“မုဟိုတ် ခမဳအာဂန္တုကဂမၠိုၚ် သီုမလိုန်ဍိုက်လဝ်ဒၞပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမဓလဝ်လဝ်က္ဍိုၚ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမဓလီုလဝ်က္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမစွံလဝ်သ္ၚာ ပ္ဍဲက္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ နကဵုဍာ်သုၚ်လေဝ် ကြာတ်ဇိုၚ်အိုတ်ရော?၊ ခမဳပဒတဴဘာ မဇၞော်ဂမၠိုၚ်လေဝ် ဟွံလ္ၚောဝ်အိုတ်ရော?၊ ဘာသၞာသတိက်သၞာဒၟံၚ်လေဝ် ဟွံသၟာန်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
“ယွံခမဳတအ် ခမဳအာဂန္တုကဂမၠိုၚ် သီုမလိုန်ဍိုက်လဝ်ဒၞပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမဓလဝ်လဝ်က္ဍိုၚ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမဓလီုလဝ်က္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ သီုမစွံလဝ်သ္ၚာပ္ဍဲက္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရ၊ နကဵုဍာ်သုၚ်လေဝ် ကြာတ်ဇိုၚ်အိုတ်ရ၊ ခမဳ ပဒတဴ ဘာမဇၞော်ဂမၠိုၚ်လေဝ် ဟွံလ္ၚောဝ်အိုတ်ရ၊ ဘာသၞာသတိက်သၞာဒၟံၚ်လေဝ် ဟွံသၟာန်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ။
ယွံခမဳတအ် ခမဳအာဂန္တုကဂမၠိုၚ် မုဟိုတ် သီုမလိုန်ဍိုက်လဝ်ဒၞပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမဓလဝ်လဝ်က္ဍိုၚ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမဓလီုလဝ်က္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ သီုမစွံလဝ်သ္ၚာ ပ္ဍဲက္ဍိုပ်လေဝ် လုပ်ကၠုၚ်အပ္ဍဲအာရှာမ်အိုတ်ရော?၊ နကဵုဍာ်သုၚ်လေဝ် ကြာတ်ဇိုၚ်အိုတ်ရော?၊ ခမဳပဒတဴဘာ မဇၞော်ဂမၠိုၚ်လေဝ် ဟွံလ္ၚောဝ်အိုတ်ရော?၊ ဘာသၞာသတိက်သၞာဒၟံၚ်လေဝ် ဟွံသၟာန်အိုတ်ရော?။
ယွံခမဳတအ် (ပွခမဳအာဂန္တုကဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ—
၃၅၇။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ်ခမဳအာဂန္တုကဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳအာဂန္တုကဂမၠိုၚ် ဒးဒ္ဂေတ်ရ။
ယွံခမဳတအ် ခမဳအာဂန္တုကဂှ် “ပ္ဍဲလၟုဟ် ကြက်လုပ်အာရှာမ်ရ” ရဴဝွံ သၠောတ်(ပတိတ်)ဒၞပ်တုဲ ဖျဝ်ဂရိုက်တုဲမ္ဂး ဂိုၚ်ကေတ်တုဲကီု ခ္ဍောပ်ကၠေံက္ဍိုၚ်တုဲကီု ပံက်ကၠေံက္ဍိုပ်တုဲကီု သ္ၚာပ္ဍဲက္ဍိုပ် စွံပ္ဍဲလတူပၞးတုဲ ဟွံပြဟ်ဟွံလဇုဲ ဒးလုပ်အာ အပ္ဍဲအာရှာမ် ဗွဲမဒးရးရ။ ခမဳ မလုပ်အပ္ဍဲအာရှာမ်ဂှ် “ခမဳ ပဒတဴဘာဂမၠိုၚ် မုရဴပ္ဍဲဌာန်မွဲ ပဒတဴဒၟံၚ်အိုတ်ရော?” ရဴဝွံ ဒးစၟတ်သမ္တီ ဗွဲမဒးရးရ၊ ပ္ဍဲဇြပ်ကောံဓရီုကဵုဒှ် ပ္ဍဲကၞာထးကဵုဒှ် ပ္ဍဲသၟဝ်တမ်ဆုကဵုဒှ် ခမဳ ပဒတဴဘာဂမၠိုၚ် ပဒတဴဒၟံၚ်အိုတ်မ္ဂး၊ အာဌာန်ဂှ်တုဲ ဒးဖျေံစွံဗဗေၚ် ပ္ဍဲဌာန်မဗဗွဲရ၊ ဒးစွံသ္ၚာ ပ္ဍဲဌာန်မဗဗွဲရ၊ ဂိုၚ်ကေတ် သၞာဂဇအ်မဗဗွဲတုဲ ဒးဂဇအ်ရ၊ “မုမွဲ ဒှ်ဍာ်သုၚ်ရော?၊ မုမွဲ ဒှ်ဍာ်ရပ်စပ်ရော?” ရဴဝွံ ဒးသၟာန် ဍာ်သုၚ် ဍာ်ရပ်စပ်ရ၊ နွံပၟိက်ကဵုဍာ်သုၚ်မ္ဂး ဂိုၚ်ကေတ်ဍာ်သုၚ်တုဲ ဒးသုၚ်ရ၊ နွံပၟိက်ကဵုဍာ်ရပ်စပ်မ္ဂး ဂိုၚ်ကေတ် ဒးကြာတ်ဇိုၚ်ရ။ ခမဳ မကြာတ်ဇိုၚ်ဂှ် နကဵုတဲမွဲလပါ်ဂှ် ဒးစဝ်ဍာ်ရ၊ နကဵုတဲမွဲလပါ်ဂှ် ဒးကြာတ်ဇိုၚ်ရ၊ နကဵုတဲဂှ်ဟေၚ် ဟဂပ်ဝ်စဝ်ဍာ်ရ၊ နကဵုတဲဂှ်ဟေၚ် ဟဂပ်ဝ်ကြာတ်ဇိုၚ်ရ။
သၟာန်ယာတ်တမြံၚ်ဇိုတ်ဒၞပ်တုဲ ဒးဇိုတ်ဒၞပ်ဂမၠိုၚ်ရ၊ ခမဳ မဇိုတ်ဒၞပ်ဂမၠိုၚ်ဂှ် ဗွဲကိုပ်ကၠာ ဒးဇိုတ် နကဵုယာတ်တမြံၚ်မကှ်ရ၊ ကြဴနူဂှ်မှ ဒးဇိုတ်နကဵုယာတ်မဍေက်ရ၊ လပိုက်ကြာတ်ကြဴယာတ်တမြံၚ်ဇိုတ်ဒၞပ်တုဲ ဒးပၠးလဝ် ပ္ဍဲဌာန်မဗဗွဲရ။
ခမဳ ပဒတဴဘာဂှ် ဒှ်ခမဳဇၞော်မ္ဂး ဒးလ္ၚောဝ်ရ၊ ဒှ်ခမဳသၟတ်မ္ဂး ဒးဒုၚ်လ္ၚောဝ်ရ၊ “သွက်အဲဍိက် မုရဴ ဘာသၞာသတိက် သၞာဒၟံၚ်မွဲ အာစိုပ်ရော?” ရဴဝွံ ဒးသၟာန် ဘာသၞာသတိက် သၞာဒၟံၚ်ရ၊ ကေၚ်ပဒတဴကီု ဟွံကေၚ်ပဒတဴကီု ဒးသၟာန်ရ၊ ဒးသၟာန် ကွာန်ဂ္ၚေၚ်ပိဏ္ဍပါတ်ရ၊ ဒးသၟာန်ကွာန်ဟွံသေၚ်ကဵုဂ္ၚေၚ်ပိဏ္ဍပါတ်ရ၊ ဒးသၟာန် ဒကာဂမၠိုၚ် မဂပ်ဝ်သၟိတ်ဂးသေက္ခရ၊ ဒးသၟာန်ဌာန်သၠးတရဴဇၞော်ရ၊ ဒးသၟာန် ဌာန်သၠးတရဴသၟတ်ရ၊ ဒးသၟာန် ဍာ်သုၚ်ရ၊ ဒးသၟာန် ဍာ်ရပ်စပ်ရ၊ ဒးသၟာန် လေံဒစုန်ရ၊ “မုရဴပ္ဍဲအခိၚ်မွဲ ဒးလုပ်ရ၊ မုရဴပ္ဍဲအခိၚ်မွဲ ဒးတိတ်ရော?” ရဴဝွံ ဒးသၟာန်ကတိကဝတ်သၚ်ရ။
ဒှ်ဘာဟွံကေၚ်ပဒတဴမ္ဂး ခ္ဍံက်သၠတြၚ်တုဲ လၟတ်မၚ်မွဲမုဟုတ်တုဲမ္ဂး ပလှ်ကယျာသၞောဝ်တြၚ်တုဲ ဓရိုဟ်သၠတြၚ်တုဲ ဒတူဒၟံၚ်ပ္ဍဲလပါ်မ္ၚးတုဲ ဒးသ္ၚေဝ်ရံၚ်ရ။ ဘာ သၟိက်ဟန်ဗန်နွံမ္ဂးကီု ပတိုန်စွံဇံၚ် ပ္ဍဲလတူဇံၚ်ကီု ပတိုန်စွံဂတဵု လတူဂတဵုကီု ဘာ သၟိက်ဟန်ဗန်ဂအုံနှဴရဴဒၟံၚ်ကီု သၟဟ်အစောံမ္ဂး ဒးကွဟ်ၚးတးရ။
ခမဳ မသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် သၞာလးတိတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဂၞဳဒုၚ်ဂိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဖုန်ဂၞဳတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန် သၞာလးတိက်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ထၟာဲဂစှ် (ထၟာဲတဲ) တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞာဲမဗဗွဲရ၊ သၞာလးတိဂှ် သမ္တီလဝ် ဒၞာဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး၊ သ္ဒးပါဲကၠေံ နူသၠဖ္ဍာန် ဗွဲကိုပ်ကၠာရ၊ သ္ဒးဇိုတ်ပေါတ်ဗတၚ်ကျာ ကေုာံ သကဲခဒမ်ဂမၠိုၚ်ရ။
ဗ္ဒၚ်မသ္ပလဝ်ကလိတ်ကလောတ် နကဵုခၞိက်တိကမၠေတ်ကေတ် (နကဵုဆီတၟံ) ပတိုဟ်တိုန်မ္ဂး၊ ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကလိတ်ကလောတ် နကဵုသာ်လမ္စံက်ဂှ် ပတိုဟ်တိုန်မ္ဂး၊ ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ ဒှ်တိမဟဂွံသ္ပလဝ်ကလိတ်ကလောတ်မ္ဂး လၟုဟ်ဖရုဲဍာ်တုဲ”လ္ပကဵုမၠိုက်တိုန်ဘာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး သၞာနိသဳဒိုန် သၞာလးတိက်တုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ်ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ။
သ္ဒးစွံဗဗေၚ်သ္ၚာရ။ ခမဳ မိက်ဂွံစွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ ခမဳ မိက်ဂွံစွံသ္ၚာဂှ် နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။ နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၠုၚ်ကျာဂမၠိုၚ်ရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗတၚ်ကျာဂမၠိုၚ်ရ၊ ပ္ဍဲအခိၚ်ဗတမ် သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ မုက်ထော်တြၚ်ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် မုက်ထော်တြၚ်ခဒမ်ဟုမ်ဍာ်ရ။
ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ်(သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန် ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ်(နုၚ်သအးသ္ၚိဍာ်) ဍာ်ဟွံမွဲမ္ဂး၊ သ္ဒးဗပေၚ်စုတ်ဍာ်ရ။
ယွံခမဳတအ် ဣဝွံတုန် ဒ္ဂေတ်ဝတ်ခမဳအာဂန္တုကဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳအာဂန္တုကဂမၠိုၚ် ဒးဒ္ဂေတ်ရ ရဴဝွံ (သ္ဂးရ)။
