၆.၁.၄။ ပါဲကၠေံ ပွမချူရုပ်ကသဴ

၂၉၉။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ကဵုသ္ပတဴ ပွမချူရုပ်ကသဴမစိစောန် မတွံဂးရုပ်ဗြဴ ရုပ်တြုံ ပ္ဍဲဘာအိုတ်ရ။ မၞိဟ်မဂေတ်ဂ္ၚေၚ်ဘာဂမၠိုၚ် ညာတ်ဒးတုဲ “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ကဵုသ္ပတဴ ပွမချူရုပ်ကသဴ မစိစောန် မတွံဂးရုပ်ဗြဴ ရုပ်တြုံရ၊ ကုခမဳမကဵုသ္ပဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် ကသဴပ္ကဴကီု ကသဴလွာဇုက်ကီု ၚေက်ကမၚ်ကရ်ကီု ရုပ်ဒမၚ်သုၚ်ဍာ်ကီုရ ရဴဝွံ (သ္ဂးရ)။