၆.၁.၁။ ကဵုအခေါၚ်အာ
၂၉၄။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞာဲကဵုစၞ ကုယန်လမ္စံက်ဂမၠိုၚ် ဇရေင်ဍုင်ရာဇဂြိုဟ်ရ၊ ပ္ဍဲအခိၚ်ဂှ် တဳလပိုဉ်ကျာ်တြဲ ဟဂွံပညပ်ဘာ ကုခမဳဂမၠိုၚ်ဏီရ။
ခမဳဂမၠိုၚ်လေဝ် ပဒတဴပ္ဍဲဌာန်ဂှ်ဂှ် မတွံဂးဂြိုပ် သၟဝ်တၞံဆု ဒဵု ဇြဟ်စောဝ် သရောဒဵုသုသာန် သပိုဟ်ဂြိုပ်ရာပ်ခြုမ် အမှဲအကး ဖအုံဆံက်အိုတ်ရ။ ပ္ဍဲခမဳဂမၠိုၚ်ဂှ် ပ္ဍဲနူဂယးပြဟ်ဟေၚ် တိတ်ကၠုၚ် နူဌာန်ပဒတဴဂမၠိုၚ်ဂှ်ဂှ် ဗွဲမဍိုက်ပေၚ်ကဵုဣရိယာပိုဒ် နပွမတိုန်ဂတ ပွမဆုတ်လက်ကရဴ ပွမသ္ၚေဝ်ရံၚ်တူရူ ပွမသ္ၚေဝ်ရံၚ်သကဲ ပွမခ္ဍပ် ပွမပၠး မထေက်ကဵုလျုၚ်ဇြုၚ်သ္ဍိုက် သီုမဖျေံလဝ်မတ် ဗွဲသၟဝ်အိုတ်ရ။
ပ္ဍဲအခိင်ဂှ် နူဂယးပြဟ်ဟေၚ် သေဌဳရာဇဂြိုဟ် မအာဥဒျာန်ဂှ် ညာတ်ဒးအာ ခမဳဂမၠိုၚ် ပ္ဍဲနူဂယးပြဟ်ဟေၚ် မတိတ်ကၠုၚ် နူဌာန်ပဒတဴဂှ်ဂှ်ဂမၠိုၚ် မတွံဂးဂြိုပ် သၟဝ်တၞံဆု ဒဵု ဇြဟ်စောဝ် သရော်ဒဵု သုသာန် သပိုဟ်ဂြိုပ်ရာပ်ခြုမ် အမှဲအကး ဖအုံဆံက် ဗွဲမဍိုက်ပေၚ်ကဵုဣရိယာပိုဒ် နပွမတိုန်ဂတ ပွမဆုတ်လက်ကရဴ ပွမသ္ၚေဝ်ရံၚ်တူရူ ပွမသ္ၚေဝ်ရံၚ်သကဲ ပွမခ္ဍပ် ပွမပၠး မထေက်ကဵုလျုၚ်ဇြုၚ်သ္ဍိုက် သီုမဖျေံလဝ်မတ်ဗွဲသၟဝ်တုဲ စိုတ်သေဌဳရာဇဂြိုဟ် ကေဝ်ဇြုၚ်ရ။ ပ္ဍဲအခိၚ်ဂှ် သေဌဳရာဇဂြိုဟ် ပြာပ်အာဇရေၚ်ခမဳဂမၠိုၚ်တုဲ—
“ယွံတဳလပိုဉ်တအ် ယဝ်အဲဍိက် သိုၚ်ခၞံကဵုဘာဂမၠိုၚ်မ္ဂး ပဒတဴ ပ္ဍဲဘာအဲဍိက်ဂမၠိုၚ်အိုတ်ဟာ” ရဴဝွံ ဂရၚ်ပတီ ခမဳဂမၠိုၚ်ရ။
ယွံဒကာ တဳလပိုဉ်ကျာ်တြဲ ဟဂွံကဵုအခေါၚ် ဘာဂမၠိုၚ်ဏီရ ရဴဝွံ (သ္ဂးအိုတ်ရ)။
ယွံတဳလပိုဉ်တအ် ဒှ်သာ်ဂှ်မ္ဂး ဂရၚ်ပတီသၟာန် တဳလပိုဉ်ကျာ်တြဲတုဲ သြဝ်ဟီုလဴကုအဲဍိက်အိုတ်ညိ ရဴဝွံ (ဂရၚ်ပတီရ)။
“ယွံဒကာ ခိုဟ်သန်ရ” ရဴဝွံ ခမဳဂမၠိုၚ်ဂှ် ဒုၚ်ဝန် ကုသေဌဳရာဇဂြိုဟ်တုဲမ္ဂး ပြာပ်အာဇရေၚ် တဳလပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲမွဲဒၞာဲအိုတ်ဂှ် “ယွံတဳလပိုဉ် သေဌဳရာဇဂြိုဟ် မိက်ဂွံသိုၚ်ခၞံကဵုဘာဂမၠိုၚ်ရ၊ ပသာ်ဂွံသ္ပရောကျာ်”ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလပိုဉ်ကျာ်တြဲ တွံကဵုဂလာန်ဓရ်တုဲ—
“ယွံခမဳတအ် ကဵုအခေါၚ် ဘာဂမၠိုၚ်မသုန်ဂကူ မတွံဂးဘာဖျေံကၟဳၜါလပါ် ဘာဖျေံကၟဳမွဲလပါ် ပြာသာဒ်ပန်ကၠၚ် ပြသာဒ်ခၠုပ် ထီုဂိုဟ်ဝွံရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ပြာပ်အာဇရေၚ် သေဌဳရာဇဂြိုဟ်တုဲ “ယွံဒကာ တဳလပိုဉ်ကျာ်တြဲ ကဵုအခေါၚ် ဘာဂမၠိုၚ်တုဲရ၊ လၟုဟ်သြဝ်တီကေတ် အခိၚ် သွက်ဂွံသိုၚ်ခၞံဘာညိ ရဴဝွံ ဟီုသ္ဂးကဵု သေဌဳရာဇဂြိုဟ်အိုတ်ရ။
ပ္ဍဲအခိၚ်ဂှ် သေဌဳရာဇဂြိုဟ် ပ္ဍဲမွဲတ္ၚဲဓဝ်ဟေၚ် ကဵုပတန်ဘာဂမၠိုၚ်တြဴစှော်မရ။ ပ္ဍဲကြဴနူဂှ် သေဌဳရာဇဂြိုဟ် ကဵုပတုဲကၠေံ ဘာဂမၠိုၚ်တြဴစှော်မတုဲ ပြာပ်အာဇရေၚ် တဳလပိုဉ်ကျာ်တြဲတုဲ ပ္ဍဲကြဴ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞာဲမွဲဂှ်—
“ယွံတဳလပိုဉ်ကျာ်တြဲ သွက်တ္ၚဲယးတေံ တဳလပိုဉ်ကျာ်တြဲ မွဲဟာန်ကေုာံခမဳသၚ်ဂမၠိုၚ် သြဝ်ဒုၚ်တဲပိဏ္ဍပါတ် အဲဍိက်ညိ” ရဴဝွံ ဂရၚ်ပတီရ။ တဳလပိုဉ်ကျာ်တြဲဂှ် နမမံၚ်ထောံသ္ၚိတ်သ္ၚိတ်ဂှ် ဒုၚ်ကေတ်တဲရ။ ပ္ဍဲအခိၚ်ဂှ် သေဌဳရာဇဂြိုဟ် တီကေတ် တဳလပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှေ်သှေ်ရဴဂဴတုဲမ္ဂး ပါဲစ္ဍးအာရ။
ပ္ဍဲအခိၚ်ဂှ် သေဌဳရာဇဂြိုဟ်ဂှ် ဗတမ်ဂှ်လောန်ၜက်အာတုဲ ကဵုစဳရေၚ်စၞအာဟာရ ဘောဇိုန်မပြဲပြဲ ပ္ဍဲသ္ၚိဇကုတုဲ ‘ယွံတဳလပိုဉ် ဒးအခိၚ်ရ၊ ပဠေဝ်ပဠေတ်ပိဏ္ဍပါတ်တုဲရ’ ရဴဝွံ ကဵုဂရၚ်ပတီ အခိၚ်ကဵုပိုဉ် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံကဵုပိုဉ်ကျာ်တြဲ ပ္ဍဲအခိၚ်နူဂယး ဗိုက်ပဠေဝ်ပဠေတ်သ္ၚာတုဲ သီုမထ္ၜဂိုၚ်ကေတ်ဗဗေၚ်သ္ၚာဂှ် က္ညပြာပ်စဴအာသ္ၚိ သေဌဳရာဇဂြိုပ်တုဲမ္ဂး ဂဇအ်ဒၟံၚ် ပ္ဍဲသၞာမလးပညပ်လဝ် မွဲဟာန်ကေုာံခမဳသၚ်ရ၊ ပ္ဍဲအခိၚ်ဂှ် သေဌဳရာဇဂြိုဟ် နကဵုစၞအာဟာရ ဘောဇိုန်မပြဲပြဲ အလဵုဇကု ကၠောန်ၜိုတ်ဥပကာ တြာပ်ဖာပ်ဗ္စ ခမဳသၚ်မၞုံပဓာန်ဍေံ တဳလပိုဉ်ကျာ်တြဲတုဲ စဵုကဵုတရိုပ်ကဵုစိုတ် စဵုကဵုဒးဆေဝ်တာပဒေါအ်ကၠေံရ။ တဳလမၞုံပိုဉ်ကျာ်တြဲ ကဵုပိုန်တုဲ ပ္ဍဲအခိၚ်ပါဲကၠေံတဲ နူဗဗေၚ်တုဲဂှ် သေဌဳရာဇဂြိုဟ် ဂဇအ်ဒၟံၚ်ပ္ဍဲဒၞာဲမွဲတုဲ—
“ယွံတဳလမၞုံပိုဉ် အဲဍိက် ဟိုတ်မၞုံပၟိက်ကဵုကုသဵုထၟိက်ကီု ဟိုတ်မၞုံပၟိက်ကဵုသွဝ်ကီု ဂပ်ဝ်ကဵုသိုၚ်ခၞံဘာဂမၠိုၚ်တြဴစှော်မဝွံအိုတ်ရ၊ ယွံတဳလမၞုံပိုဉ် ပ္ဍဲဘာဂမၠိုၚ်ဂှ် အဲဍိက် ပသာ်ဂွံဒ္ဂေတ်သ္ပရော?” ရဴဝွံ ဂရၚ်ပတီ ကုတဳလမၞုံပိုဉ်ကျာ်တြဲရ။
ယွံဒကာ ဒှ်သာ်ဂှ်မ္ဂး ဘာဂမၠိုၚ်တြဴစှော်မဂှ် တၠအဲ သြဝ်ကဵုဒါန် ကုသၚ်မၞုံပ္ဍဲဒိုဟ်ပန်မကၠုၚ်စိုပ်တုဲ ကြက်ကၠုၚ်စိုပ်ညိ ရဴဝွံ (သ္ဂးရ)။ “ယွံတဳလမၞုံပိုဉ် ခိုဟ်သန်ရ” ရဴဝွံ သေဌဳရာဇဂြိုဟ် ဒုၚ်ဝန် ကုတဳလမၞုံပိုဉ်ကျာ်တြဲတုဲပ္ဍဲကြဴ ဘာဂမၠိုၚ်တြဴစှော်မဂှ် ကဵုဒါန် ကုသၚ်မၞုံပ္ဍဲဒိုဟ်ပန် မကၠုၚ်စိုပ်တုဲ ကြက်ကၠုၚ်စိုပ်ရ။
၂၉၅။ ကြဴနူဂှ် တဳလမၞုံပိုဉ်ကျာ်တြဲ သ္ပအနုမောဒနာကဵု သေဌဳရာဇဂြိုဟ် နကဵုဂါထာဂမၠိုၚ်ဝွံရ—
“(ဘာဂှ်) ပါဲပၠေၚ်ကၠေံ လၟုဟ်ဂံက်ကီု လၟုဟ်ဂမ္တဴကီု သအာၚ်နူဂှ် သတ်ဒမြိုဟ်ဂမၠိုၚ်ကီု ဇြုံဂဂဳအယဴဂမၠိုၚ်ကီု ဂမိတ်ဂမၠိုၚ်ကီု ကျာဂံက်ဂမၠိုၚ်ကီု ထၞဟ်ဗြဲဂမၠိုၚ်ကီုမာန်ရ။
သအာၚ်နူဂှ် ကျာမသကာတ်မြဟ် ဂမ္တတ္ၚဲသကာတ်မြဟ် မကတဵုဒှ်ကၠုၚ်လေဝ် ပါဲပၠေၚ်ကၠေံမာန်ရ၊ တၞဟ်နပွမသတိက်သတၚ်ကီု တၞဟ်နပွမဒှ်တသိုခ်ကီု တၞဟ်နပွမလုပ်စၛာန်ကီု တၞဟ်နပွမမၠာ်သ္ၚေဝ် ဝိပဿနာကီု ပွမဂွံကဵုဒါန်ဘာဂှ် ပြဲရ ရဴဝွံ ကျာ်တြဲထိုၚ်သးရ။ ဟိုတ်ဂှ်ရ ညးမၞုံကဵုပညာ မညာတ်အာ ဒတုဲဖဵုဇကုဂှ် ကဵုသိုၚ်ခၞံ ဘာဂမၠိုၚ်မထေက်ကဵုမိပ်လဟိၚ်ရ၊ ပ္ဍဲဘာဂမၠိုၚ်ဝွံ ကဵုခမဳဂမၠိုၚ် မၞုံကဵုလမိၚ်လညာတ်မဂၠိုၚ် ပဒတဴရ၊ နကဵုစိုတ်မလျုၚ်ဇြုၚ်သ္ဍိုက် ဒးကဵုဒါန် စၞစကီု စၞသုၚ်ကီု သ္ၚာသၞာသတိက် သၞာဒၟံၚ်ဂမၠိုၚ်ကီု မဗဗွဲကုခမဳမလ္ဂူတပ်တးဂမၠိုၚ်ရ။
ခမဳဂမၠိုၚ်ဂှ် တွံကဵုဓရ် မလေပ်ပါဲကၠေံ ဒဒိုခ်ဝဋ်အိုတ်သီုမာန် ကုဒကာဘာဂှ်အိုတ်ရ၊ ဒကာဘာဂှ် တီကေတ်ဓရ် ပ္ဍဲသာသနာဝွံတုဲ သီုဟွံမွဲကဵုဓရ်အာသဝဂှ် ဂွံၜိုဟ်သတိုတ်ရ” ရဴဝွံ (သ္ပအနုမောဒနာရ)
တဳလမၞုံပိုဉ်ကျာ်တြဲ သ္ပအနုမောဒနာကဵု သေဌဳရာဇဂြိုဟ် နကဵုဂါထာဂမၠိုၚ်ဝွံတုဲ ပ္ဍဲကြဴက္ညဒၠိုက်ကတဵုနူဒၞာဲတုဲ ပါဲစ္ဍးအာရ။
၂၉၆။ “တဳလမၞုံပိုဉ်ကျာ်တြဲ ကဵုအခေါၚ်ဘာဂမၠိုၚ်ရဂး” ရဴဝွံ ဂွံမိၚ်ကေတ်အိုတ်တုဲ မၞိဟ်ဂမၠိုၚ် ကဵုသိုၚ်ခၞံဘာဂမၠိုၚ် ဗွဲမဒးရးအိုတ်ရ။ ဘာဂမၠိုၚ်ဂှ် သၠတြၚ်ဟွံမွဲအိုတ်ဂှ်ရ ဇြုံအယဴဂဂဳဂမၠိုၚ် လုပ်အိုတ်ရ။ ဂရၚ်ပတီ ဟိုန်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဇဵုတြၚ်ကီု ခအဳသၟတ်ကီု ပးလကံက်လတူကီုရ ရဴဝွံ (သ္ဂးရ)။
သၠတြၚ်ဂမၠိုၚ် ဟွံစိပ်အိုတ်ရ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ပၞော်သွက်ဂွံတံၚ်ကီု ဇုက်သွက်ဂွံတံၚ်ကီုရ ရဴဝွံ (သ္ဂးရ)။
တၟာတ်သၠတြၚ်ဂမၠိုၚ် ဟွံမာန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဒယိုၚ်တိုၚ်စုတ်သၞောဝ်တြၚ်ကီု ပးလကံက်ဆုသၟတ် သွက်ဂွံစုတ်သၞောဝ်တြၚ်ကီု (ဂွေန်တဲကၞုဲပသဲ) ကီု သၞောဝ်တြၚ်သၟတ်ကီု သၞာဲတြၚ်ကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ပံက်သၠတြၚ်ဟွံမာန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ပသဲတ္ၚံက် (ကောန်ပၞံက်) ဂမၠိုၚ်ပိဂကူ မတွံဂး ပသဲတ္ၚံက်ဗရိုတ် ပသဲတ္ၚံက်ဆု ပသဲတ္ၚံက်ဒြၚ်သတ်ရ ရဴဝွံ (သ္ဂးရ)။ နကဵုပသဲတ္ၚံက်ဂမၠိုၚ်ဂှ် ပံက်သၠတြၚ်ဂမၠိုၚ်ဂှ်တုဲ ဂွံလုပ်အိုတ်ရ။
ဘာဂမၠိုၚ် ဟွံဂြောပ်ဗ္ဒန်ခိုၚ်ကၠိုက်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ယန္တရာပံက် (ကသအ်) သၞောဝ်တြၚ်သၟတ် (ကောန်ကသအ်) ရ ရဴဝွံ (သ္ဂးရ)။
ပ္ဍဲအခိၚ်ဂှ် ဟိုတ်စၟဳလဝ်ဘာဂမၠိုၚ် နကဵုချောဲဂှ်ရ ပ္ဍဲအခိၚ်ဂံက် ၜိုဟ်ဂံက်အိုတ်ရ၊ ပ္ဍဲအခိၚ်ဂမ္တဴကတဴဥအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ်ဂရိုက်တုဲ တၞဟ်နလံက်လေတ် အပ္ဍဲမ္ၚးရ ရဴဝွံ (သ္ဂးရ)။
ပ္ဍဲအခိၚ်ဂှ် ဘာဂမၠိုၚ် ဟွံမွဲကဵုပၞော်ဗတၚ်ကျာတုဲ ဟွံကဵုမတ်ဂမၠိုၚ် ကေဝ်ဇြုၚ်အိုတ်ရ၊ သၟူအမြာဲဟွံဒးရးအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဗတၚ်ကျာဂမၠိုၚ်ပိဂကူ မတွံဂး ဗတၚ်ကျာတိုၚ်ဗွုတ် ဗတၚ်ကျာဒဇာ ဗတၚ်ကျာဒုၚ်ကရေက်ရ ရဴဝွံ (သ္ဂးရ)။
နအကြာဗတၚ်ကျာဂှ် ပြေပ်ဂမၠိုၚ်ကီု ကဝကၞိဂမၠိုၚ်ကီု လုပ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နဒက်ဗတၚ်ကျာ နကဵုကဝးဇုက်ဇိုတ်ဇိုၚ်ရ ရဴဝွံ (သ္ဂးရ)။
နအကြာကဝးဇုက်ဇိုတ်ဇိုၚ်လေဝ် ပြေပ်ဂမၠိုၚ်ကီု ကဝကၞိဂမၠိုၚ်ကီု လုပ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သၠတြၚ်ဗတၚ်ကျာကီု ဖုန်မသ္ပလဝ်တၟာဗတၚ်ကျာကီုရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် တိက်ပ္ဍဲတိဂှ်ရ ဇကုကေုာံသ္ၚာဂမၠိုၚ် ခၞိက်တိကၠေဝ်ဗာန်ဒှ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် သၞာလးချောဲရ ရဴဝွံ (သ္ဂးရ)။
ကၞိဂမၠိုၚ်ကီု ဂြုန်ဂမၠိုၚ်ကီု ကိတ်သၞာချောဲဂှ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ပွမလံက်လေတ်ဗွဝ်တိသလာတ်ရ ရဴဝွံ (သ္ဂးရ)။ ဟိုတ်မလံက်လေတ်ဗွဝ်တိသလာတ်ဂှ် ဇကုဂမၠိုၚ်ဂိသကေဝ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဇံၚ်တာန်ကဵုၜဝ်ရ ရဴဝွံ (သ္ဂးရ)။
