၅.၅။ ဖဵုဆဆုဒကမသုန်သာ်
ယွံခမဳတအ် ဖဵုဂမၠိုၚ် ပ္ဍဲအရာမစဆုဒက ဣဝွံ မၞုံမသုန်သာ်အိုတ်ရ။
(၁) မတ် ကေဝ်ဇြုၚ်ရ။
(၂) သၟူအမြာဲပါၚ် ဒးရးရ။
(၃) လတေၚ်မလေပ်ရၚ်တၠုၚ် ရှ်သာဂမၠိုၚ် သအးဇ္ၚးအိုတ်ရ။
(၄) ကၠၚ်ကၟတ် သၠေဟ်ဂမၠိုၚ် ဟွံကွိၚ်ဂြောပ်ပုၚ်အိုတ်ရ။
(၅) ညးဂှ် စပုၚ်မိပ်ရ။
ယွံခမဳတအ် ဖဵုဂမၠိုၚ် ပ္ဍဲအရာမစဆုဒက ဣဝွံ မၞုံမသုန်သာ်အိုတ်ရ။
ယွံခမဳတအ် ကဵုအခေါၚ် ဆုဒကရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဳဂမၠိုၚ် စဆုဒကဂမၠိုၚ်မဂၠိၚ်အိုတ်ရ။ နကဵုဆုဒကဂမၠိုၚ်ဂှ်ဟေၚ် ခ္ဍံက်သာမဏဳဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်စဆုဒကမဂၠိၚ်ရ၊ ကုခမဳ မစဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် ဆုဒကမၞုံဗၞတ်ဒ္စာံလပုဟ်ရ ရဴဝွံ (သ္ဂးရ)။
နကဵုဆုဒကဂှ် ဟဂပ်ဝ်ခ္ဍံက်သာမဏဳရ၊ ကုခမဳ မခ္ဍံက်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကုဂှ် ဃောစဒၟံၚ်ဆုဒကမဂၠေံလောန်ဂှ် ခက်ဗာန် ပ္ဍဲခ္ဍောၚ်ကအ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်စဆုဒကမဂၠေံလောန်ရ၊ ကုခမဳ မစဂှ် ဒးအာပတ်ဒုက္ကဋ်ရ၊ ယွံခမဳတအ် ကဵုအခေါၚ် ဆုဒကမၞုံဗၞတ်ယုတ်အိုတ်ပန်လပုဟ်ရ ရဴဝွံ (သ္ဂးရ)။
၂၈၃။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် စံၚ်ပၟတ်ဂြိုပ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴသၟာစံၚ်ပၟတ်ဂြိုပ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်စံၚ်ပၟတ်ဂြိုပ်ရ၊ ကုခမဳ မစံၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဘာဂမၠိုၚ် တ္ၜန်တ္ၜောဲယှုက်တုဲ နကဵုရာပ်ခြုမ်ချောဲဂမၠိုၚ်အိုတ်ရ။ ပၟတ်ဂြိုပ်တူမ္ဂး တူဒးဘာဂမၠိုၚ်အိုတ်ရ၊ ခမဳဂမၠိုၚ် သွက်ဂွံကဵုပၟဝ်ပတုန်ကီု သွက်ဂွံသ္ပပၟၚ်ပၟဲကီု မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ပၟတ်ဂြိုပ်တူမ္ဂး ကဵုအခေါၚ် သွက်ဂွံကဵုပၟတ်ပတုန်ကီု သွက်ဂွံသ္ပပၟၚ်ပၟဲကီုရ ရဴဝွံ (သ္ဂးရ)။
၂၈၄။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် တိုန်တၞံဆုအိုတ်ရ။ နူတၞံဆုမွဲ ပြံၚ်ကၠောံအာ တၞံဆုမွဲအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴကၞုဲကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်တိုန်တၞံဆုရ၊ ကုခမဳ မတိုန်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကု ဃောအာဍုၚ်သာရဝှ် ပ္ဍဲအကြာဂၠံၚ်တရဴ ဇနပိုဒ်ကောသလရး စိၚ်ဂမၠိုၚ် ထ္ဍေၚ်ဗက်အိုတ်ရ။ ပ္ဍဲအခိၚ်ဂှ် ခမဳဂှ် ဂြိပ်ကာတ်ဗ္ဒာဲ သၟဝ်တၞံဆုတုဲပ္ဍဲကြဴ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံတိုန်တၞံဆုရ၊ စိၚ်ဂှ် အာနဂၠံၚ်မွဲသအာၚ်ရ။ ပ္ဍဲအခိၚ်ဂှ် ခမဳဂှ် အာဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကိစ္စကေၚ်ကာနွံမ္ဂး တၞဟ်နတိုန်တၞံဆု ဗၞတ်မွဲဟောဝ် ပရိုက်ဘဲနွံမ္ဂး တၞဟ်နတိုန်အတိုၚ်နွံပၟိက်ဂှ် ကဵုအခေါၚ်ရ ရဴဝွံ (သ္ဂးရ)။
၂၈၅။ ပ္ဍဲအခိၚ်ဂှ် ခမဳဂကူဗၞးကောကဵုဒေံဂမၠိုၚ်ၜါတၠ မၞုံယၟု ယမေဠ,ကေတုဋာနွံအိုတ်ရ။ ဒှ်ညးဟီုတွံခိုဟ် ရမျာၚ်ခိုဟ်ဂမၠိုၚ်အိုတ်ရ။ (ပ္ဍဲဗၟာတုန်− ပါဠိမေဠကေတုဋာဂှ် ပါ်ပိုဒ်မွဲဗီုတုဲ ပ္ဍဲကွာန်ယမေဠက ခမဳဂကူဗၞးကောကဵုဒေံဂမၠိုၚ်ၜါတၠ မၞုံယၟုကုဋာ နွံအိုတ်ရ။ ကၠာဲလဝ်ရ။)
ခမဳကောကဵုဒေံဂမၠိုၚ်ၜါဂှ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞာဲမွဲအိုတ်ဂှ်−
“ယွံတဳလမၞုံပိုဉ် ပ္ဍဲအခိၚ်လၟုဟ် ခမဳဂမၠိုၚ် မၞုံယၟုတၞဟ်တၞဟ်အိုတ်ရ၊ မၞုံတၞောဝ်တၞဟ်တၞဟ်အိုတ်ရ၊ မၞုံဇာတ်တၞဟ်တၞဟ်အိုတ်ရ၊ တိတ်ကၠုၚ်နူဂကူတၞဟ်တၞဟ်တုဲ ပခမဳအိုတ်ရ။
ခမဳဂမၠိုၚ်ဂှ် နကဵုဘာသာဇကုဇကုတအ် ပလီုပလာ် ဂလာန်ကျာ်အိုတ်ရ၊ “ယွံတဳလမၞုံပိုဉ် ပ္ဍဲအခိၚ်လၟုဟ် ပိုဲဍိက်တအ်ညးဂမၠိုၚ် ပတိုန်ဂလာန်ကျာ် နကဵုဘာသာသက္ကဋအိုတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် “ယွံတဳလမၞုံပိုဉ် ပ္ဍဲအခိၚ်လၟုဟ် ပိုဲဍိက်တအ်ညးဂမၠိုၚ် ပတိုန်ဂလာန်ကျာ် နကဵုဘာသာသက္ကဋအိုတ်ရ” ရဴဝွံ မုဟိုတ် ဟီုသ္ဂးအိုတ်ရော?၊ ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး—
“ယွံခမဳတအ် ဟဂပ်ဝ်ပတိုန်ဂလာန်ကျာ် နကဵုဘာသာသက္ကဋရ၊ ကုခမဳ မပတိုန်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
၂၈၆။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဂိုၚ်ကတ်ကေတ် ပြကိုဟ်လောကာယတအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် ဂွံမိၚ်ကေတ် ဂလာန်မၞိဟ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ညးမၞုံအလေံမၠာ်သ္ၚဳရဴဝွံကြက် ပ္ဍဲပြကိုဟ်လောကာယတဂှ် ပ္ဍဲသာသနာဝွံ အာစိုပ်ပွမဇၞော်မောဝ် ပွမဍိုပ်ဍဴဖောအ်ဗြေဝ် ပွမလှဲလးဟာ ရဴဝွံ သၟာန်ရ။ ယွံကျာ်မၞုံပိုဉ် အာစိုပ်ဟွံမာန်ရ ရဴဝွံ (ဂရၚ်ပတီအိုတ်ရ)။
ကြက်သ္ဂးကဵုမွဲနယ်ပၠန်ရ၊ ပ္ဍဲသာသနာဝွံ ညးမၞုံအလေံမၠာ်သ္ၚဳရဴဝွံကြက်ဂှ် ဂိုၚ်ကတ်ကေတ် ပြကိုဟ်လောကာယတဟာ ရဴဝွံ သၟာန်ရ။ ယွံကျာ်မၞုံပိုဉ် ဟွံဂိုၚ်ကတ်ကေတ်ရ ရဴဝွံ (ဂရၚ်ပတီ)။
ယွံခမဳတအ် ဟဂပ်ဝ်ဂိုၚ်ကတ်ကေတ် ပြကိုဟ်လောကာယတရ၊ ကုခမဳ မဂိုၚ်ကတ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဖျေံပတိုန် ပြကိုဟ်လောကာယတအိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ဖျေံပတိုန် ပြကိုဟ်လောကာယတရ၊ ကုခမဳ မဖျေံပတိုန်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၂၈၇။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဂိုၚ်ကတ်ကေတ် ကွတ်မဒစဵုဒစးကဵုမဂ်ဖိုလ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ဂိုၚ်ကတ်ကေတ် ကွတ်မဒစဵုဒစးကဵုမဂ်ဖိုလ်ရ၊ ကုခမဳ မဂိုၚ်ကတ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဖျေံပတိုန် ကွတ်မဒစဵုဒစးကဵုမဂ်ဖိုလ်အိုတ်ရ။ မၞိဟ်ဂမၠိုၚ် “သၟဟ်ညံၚ်ရဴမၞိဟ်ဒုၚ်စသိုၚ် ကာမဂုဏ်ဂမၠိုၚ်ကီုရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟဂပ်ဝ်ဖျေံပတိုန် ကွတ်မဒစဵုဒစးကဵုမဂ်ဖိုလ်ရ၊ ကုခမဳ မဂိုၚ်ကတ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၂၈၈။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွဳတွိုၚ်လဝ်ပရိသာဂမၠိုၚ်တုဲ ဃောတွံဒၟံၚ်ဓရ်ဂှ် ခအှ်ရ၊ ‘သ္ပဗရုရမျာၚ်ဟံၚ်ချီုရ’။ “ယွံကျာ်မၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သြဝ်ကဵုအာယုက်ဂၠိၚ်ညိ၊ တဳလမၞုံပိုဉ်ကျာ်တြဲ မက္ညကၠုၚ်ခိုဟ်ဆာဲ သြဝ်ကဵုအာယုက်ဂၠိၚ်ညိ” ရဴဝွံ ခမဳဂမၠိုၚ် သ္ပတဴ ဗရုရမျာၚ် မသကာတ်မြဟ်ဇၞော်လှဲအိုတ်ရ။ နဗရုရမျာၚ်ဂှ် ဂလာန်ဓရ်ခြာပိုတ်အာရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်—
“ယွံခမဳတအ် ပ္ဍဲအရာခအှ်ဂှ် သြဝ်ကဵုအာယုက်ဂၠိၚ်ညိ ရဴဝွံ ဟီုသ္ဂးမ္ဂး ဟိုတ်နူဟီုသ္ဂးဂှ် အာယုက်လေဝ် ဂၠိၚ်တိုန်ဟာ၊ ချိုတ်လေဝ် ချိုတ်အာဟာ” ရဴဝွံ သၟာန်ခမဳဂမၠိုၚ်ရ။
ယွံတဳလမၞုံပိုဉ် ပွမအာယုက်ဂၠိၚ် ပွမချိုတ်ဝွံ ဒှ်ဟွံမာန်ရ ရဴဝွံ (ဂရၚ်ပတီအိုတ်ရ)။ ယွံခမဳတအ် ပ္ဍဲအရာခအှ်ဂှ် သြဝ်ကဵုအာယုက်ဂၠိၚ်ညိ ရဴဝွံ ဟဂပ်ဝ်ဟီုသ္ဂးရ၊ ကုခမဳ မဟီုသ္ဂးဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲအရာခမဳဂမၠိုၚ်ခအှ်ဂှ် “ယွံတဳလပိုဉ်တအ် သြဝ်ကဵုအာယုက်အိုတ်ညိ” ရဴဝွံ ဟီုသ္ဂးအိုတ်ရ။ မၞုံကဵု’သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံပလန်ဂလာန်အိုတ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ် ‘တဳလပိုဉ်တအ် သြတ်ကဵုအာယုက်ဂၠိၚ်အိုတ်ညိ’ ရဴဝွံ သီုမဟီုသ္ဂး ကလေၚ်ပလန်တုဲ မုဟိုတ် ဟွံဟီုအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် မၞိဟ်ဂမၠိုၚ် မၞုံပၟိက်ကဵုမ္ၚိုလ်အိုတ်ရ။ ယွံခမဳတအ် (မၞိဟ်ဂမၠိုၚ်) “တဳလပိုဉ်တအ် သြတ်ကဵုအာယုက်ဂၠိၚ်အိုတ်ညိ” ရဴဝွံ ဟီုသ္ဂး “သြဝ်ကဵုအာယုက်ဂၠိၚ် ဗွဲမလအ်ညိ” ရဴဝွံ ကဵုအခေါၚ် တၞဟ်နဟီုသ္ဂးရ ရဴဝွံ (သ္ဂးရ)။
၂၈၉။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တွဳတွိုၚ်လဝ်ပရိသာဂမၠိုၚ်တုဲ ဃောတွံဒၟံၚ်ဓရ်ဂှ် ဂဇအ်ဒၟံၚ်ရ၊ ခမဳမွဲဇကုဂှ် စလဝ်လသိုဏ်ဗတာၚ်ရ၊ “လ္ပကဵုဒှ် အန္တရာယ်ပလာဲပထုဲ ခမဳဂမၠိုၚ်ညိ” ရဴဝွံ ခမဳဂှ် ဂဇအ်ဒၟံၚ်ဌာန်မွဲရ။ တဳလမၞုံပိုဉ်ကျာ်တြဲ ညာတ်ဒး ခမဳမဂဇအ်ဒၟံၚ်ပ္ဍဲဌာန်မွဲဂှ်တုဲ “ယွံခမဳတအ် ခမဳဂှ် မုဟိုတ် ဂဇအ်ဒၟံၚ်ပ္ဍဲဌာန်မွဲဂှ်ရော” ရဴဝွံ (သၟာန်ရ)။ ယွံတဳမၞုံပိုဉ် ခမဳဂှ် စလဝ်လသိုဏ်ဗတာၚ်ရ၊ “လ္ပကဵုဒှ် အန္တရာယ်ပလာဲပထုဲ ခမဳဂမၠိုၚ်ညိ” ရဴဝွံ ခမဳဂှ် ဂဇအ်ဒၟံၚ်ဌာန်မွဲရ ရဴဝွံ ဂရၚ်ပတီအိုတ်ရ။
ယွံခမဳတအ် စဒးယြဴအရာဝတ္ထုမွဲတုဲ ဒှ်အာမ္ၚး နူဂလာန်ဓရ်မၞုံသဘဴရဴဝွံရ၊ ထေက်ကဵုစအရာဝတ္ထုဂှ်ဟာ ‘သွက်ဂွံစအရာဝတ္ထုစဵုကဵုဒးပါဲစ္ဍးနူပေဲါဓရ်ဂှ် ဗဗွဲထေက်ညိဟာ’ ရဴဝွံ သၟာန်ရ။ ယွံကျာ်မၞုံပိုဉ် ဟွံဗဗွဲထေက်ရ ရဴဝွံ (ဂရၚ်ပတီအိုတ်ရ)။
ယွံခမဳတအ် ဟဂပ်ဝ်စလသိုဏ်ဗတာၚ်ရ၊ ကုခမဳ မစဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ယဲကျာပ္ဍဲဗုၚ် ဒှ်ကၠုၚ်ကုတဳလပိုဉ်သာရိပိုတ်ရ၊ ပ္ဍဲအခိၚ်ဂှ် တဳလပိုဉ်မဟာမောဂ္ဂလာန် ပြာပ်အာဇရေၚ် တဳလပိုဉ်သာရိပိုတ်တုဲ “ယွံကောန်တၠသာရိပိုတ် ပ္ဍဲကိုပ်ကၠာတေံ ယဲကျာဗုၚ်တၠအဲ ဒှ်တသိုခ် မုရဴ နဝတ္ထုမွဲရော?” ရဴဝွံ သၟာန်ရ။
ပ္ဍဲအခိၚ်ဂှ် တဳလပိုဉ်သာရိပိုတ်ဂှ် “ယွံကောန်တၠမောဂ္ဂလာန် ပ္ဍဲကိုပ်ကၠာတေံ ယဲကျာဗုၚ်အဲ ဒှ်တသိုခ် နကဵုလသိုဏ်ဗတာၚ်ရ” ရဴဝွံ သ္ဂးကဵုတဳလပိုဉ်မဟာမောဂ္ဂလာန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဟိုတ်နူဟိုတ် မတွံဂးယဲ ကဵုအခေါၚ် သွက်ဂွံစလသိုဏ်ဗတာၚ်ရ ရဴဝွံ (သ္ဂးရ)။
၂၉၀။ ပ္ဍဲအခိၚ်ဂှ် ခမဳဂမၠိုၚ် အပ္ဍဲအာရှာမ် သၠးစုတ်တရဴသၟတ် ပ္ဍဲဌာန်ဂှ်ဂှ်အိုတ်ရ၊ အာရှာမ်လီုလာ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နသၠးတရဴသၟတ် ပ္ဍဲဌာန်မွဲရ ရဴဝွံ (သ္ဂးရ)။ အာရှာမ်ဂှ် မၞုံကဵုသၟူအမြာဲ ဟွံဒးရးရ။ ပ ။ ယွံခမဳတအ် ကဵုအခေါၚ် နုၚ်တရဴသၟတ်ရ ရဴဝွံ (သ္ဂးရ)။
ဒးဂဇအ်ဗွဲဒဒိုခ်ဂမၠိုၚ်ဒှ်တုဲ သၠးတရဴသၟတ်အိုတ်ရ။ ပ ။ ယွံခမဳတအ် ကဵုအခေါၚ် ဒၞပ်ခုၚ်လိုန် သွက်ဂွံသၠးတရဴသၟတ်ရ ရဴဝွံ (သ္ဂးရ)။
ဒၞပ်ခုၚ်လိုန် သွက်ဂွံသၠးတရဴသၟတ်ဂမၠိုၚ် မံက်ဂတဝ်ပြာကဋ်အိုတ်ရ၊ ခမဳဂမၠိုၚ် သွက်ဂွံအာသၠးတရဴသၟတ် ဂွဂၠေံအိုတ်ရ။ ပ ။ ယွံခမဳတအ် ကဵုအခေါၚ် တၞဟ်နပွမစဵုဗိုၚ်ဂမၠိုၚ် ပိဂကူ မတွံဂး အစဵုဗိုၚ်ဍိုတ် အစဵုဗိုၚ်တၟဴ အစဵုဗိုၚ်ဆုရ ရဴဝွံ (သ္ဂးရ)။
နုၚ်တရဴသၟတ်ဂမၠိုၚ် သကိုပ်ဂၟဳဟွံမွဲတုဲ သၟူအမြာဲ ဟွံဒးရးအိုတ်ရ။ ပ ။ ယွံခမဳတအ် ကဵုအခေါၚ် သကိုပ်ဂၟဳရ ရဴဝွံ (သ္ဂးရ)။
၂၉၁။ ပ္ဍဲအခိၚ်ဂှ် ခမဳဂမၠိုၚ် အပ္ဍဲအာရှာမ် သၠးစုတ်တရဴဇၞော် ပ္ဍဲဌာန်ဂှ်ဂ်ှအိုတ်ရ။ အာရှာမ်လီုလာ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နသၠးတရဴဇၞော် ပ္ဍဲဌာန်မွဲရ ရဴဝွံ (သ္ဂးရ)။
အာရှာမ်ဂှ် မၞုံကဵုသၟူအမြာဲ ဟွံဒးရးရ။ ပ ။ ယွံခမဳတအ် ကဵုအခေါၚ် ကတိုၚ်တရဴဇၞော်ရ ရဴဝွံ (သ္ဂးရ)။ ကတိုၚ်တရဴဇၞော် လာ်စှေ်ရ။ ပ ။ ယွံခမဳတအ် ကဵုအခေါၚ် တၞဟ်နပွမတပ်စဳဗွဝ် ပွမတပ်စဳဗွဝ်ပိဂကူ မတွံဂး ပွမတပ်စဳဗဝ်ဍိုတ် ပွမတပ်စဳဗဝ်တၟံ ပွမတပ်စဳဗဝ်ဆုရ ရဴဝွံ (သ္ဂးရ)။ ကတိုၚ်တရဴဇၞော် တိသဝ်တုဲ ဍာ်ဓလီုရ။ ပ ။ ယွံခမဳတအ် ကဵုအခေါၚ် တၞဟ်နပွမသ္ပစဵုကဵုတိသၠုၚ်ရ ရဴဝွံ (သ္ဂးရ)။ တိဗဝ် (တိဗွဝ်) လာ်စှေ်ရ။ ပ ။ ယွံခမဳတအ် ကဵုအခေါၚ် တၞဟ်နပွမတပ်စဳဗွဝ် ပွမတပ်စဳဗွဝ်ပိဂကူ မတွံဂး ပွမတပ်စဳဗဝ်ဍိုတ် ပွမတပ်စဳဗဝ်တၟံ ပွမတပ်စဳဗဝ်ဆုရ ရဴဝွံ (သ္ဂးရ)။ ခမဳ မတိုန်ဂမၠိုၚ် ဍောၚ်ၜိုတ်အိုတ်ရ။ ပ ။ ယွံခမဳတအ် ကဵုအခေါၚ် တၞိန်ဂမၠိုၚ်ပိဂကူ မတွံဂး တၞိန်ဍိုတ် တၞိန်တၟံ တၞိန်ဆုရ ရဴဝွံ (သ္ဂးရ)။
ခမဳမတိုန်ဂမၠိုၚ် လောစှေ်အိုတ်ရ။ ပ ။ ယွံခမဳတအ် ကဵုအခေါၚ် ဗလဲသွက်ဂွံဂြဲရပ် (ဗလဲတၞိန်) ရ ရဴဝွံ (သ္ဂးရ)။ ဂဇအ်ဒၟံၚ်ပ္ဍဲတၞုၚ်တုဲ ညးသၠးတရဴဇၞော်ဂမၠိုၚ် လောစှေ်အိုတ်ရ။ ပ ။ ယွံခမဳတအ် လးတုဲ ပထောၚ်လဝ်ပၞော် ပ္ဍဲလဒေါဝ်တုဲ တၞဟ်နသၠးတရဴဇၞော်ဂှ် ကဵုအခေါၚ်ရ ရဴဝွံ (သ္ဂးရ)။ ဒးဂဇအ်ဗွဲဒဒိုခ်ဂမၠိုၚ်ဒှ်တုဲ သၠးတရဴဇၞော်အိုတ်ရ။ ပ ။ ယွံခမဳတအ် ကဵုအခေါၚ် ဒၞပ်ခုၚ်လိုန် သွက်ဂွံသၠးတရဴဇၞော်ရ ရဴဝွံ (သ္ဂးရ)။ သၠးစုတ်တရဴသၟတ် ပ္ဍဲမ္ၚးအိုတ်ရ။ ပ ။ ယွံခမဳတအ် ကဵုအခေါၚ် ဒၞိဟ်ကရံက်တရဴသၟတ်ရ ရဴဝွံ (သ္ဂးရ)။
ဃရိုအ် (ကၞေဟ်) ဟွံမွဲရ။ ပ ။ ယွံခမဳတအ် ကဵုအခေါၚ် ဃရိုအ်ရ ရဴဝွံ (သ္ဂးရ)။ နစုတ်ဃရိုအ် ဟွံမွဲရ။ ပ ။ ယွံခမဳတအ် ကဵုအခေါၚ် နစုတ်ဃရိုအ်ရ ရဴဝွံ (သ္ဂးရ)။
ကတိုၚ်တရဴဇၞော် သကိုပ်ဂဒဵု ဟွံမွဲတုဲ သၟူအမြာဲ ဟွံဒးရးအိုတ်ရ။ ပ ။ ယွံခမဳတအ် ကဵုအခေါၚ် သကိုပ်ဂဒဵုရ ရဴဝွံ (သ္ဂးရ)။
ခမဳဂမၠိုၚ် မဒးသၠးတရဴဇၞော် ပ္ဍဲအမှဲအကးဂှ် ဟိုတ်နူလၟုဟ်ဂံက်ကီု ဟိုတ်နူဂမ္တဴကီု ဍောၚ်ၜိုတ်အိုတ်ရ။ ပ ။ ယွံခမဳတအ် ကဵုအခေါၚ် ဝစ္စကုဋဳ ‘သ္ၚိဝစ်’ ရ ရဴဝွံ (သ္ဂးရ)။
ပ္ဍဲဝစ္စကုဋဳ သၠတြၚ်ဟွံမွဲရ။ ပ ။
ယွံခမဳတအ် သၠတြၚ်ကီု ဇဵုတြၚ်ကီု ခအဳသၟတ်ကီု ပးလကံက်လတူကီု ဒယိုၚ်တိုၚ်စုတ်သၞောဝ်တြၚ်ကီု ပးလကံက်ဆုသၟတ် သွက်ဂွံစုတ်သၞောဝ်တြၚ်ကီု (ဂွေန်တဲကၞုဲပသဲ) သၞောဝ်တြၚ်သၟတ်ကီု သၞာဲတြၚ်ကီု ပၞော်ကောန်ပၞံက်ကို ပၞော်သွက်ဂွံတံၚ်ကီု ဇုက်သွက်ဂွံတံၚ်ကီု ကဵုအခေါၚ်ရ ရဴဝွံ (သ္ဂးရ)။
ပ္ဍဲဝစ္စကုဋဳ ခၞိက်ချောဲ ဒတုံစှေ်ရ။ ပ ။ ခမဳတအ် ဂရိုက်တုဲ တၞဟ်နလံက်လေတ် အပ္ဍဲမ္ၚးဂှ် ကဵုအခေါၚ်ရ။ သာ်ဗုကီု သာ်လမ္စံက်ကီု ပွမသ္ပကလိတ်ကလောတ် နကဵုဆီတၟံကီု ပွမသ္ပကသဴပ္ကဴကီု ပွမသ္ပကသဴလွာဇုက်ကီု ပွမထၟံက်လဝ်ၚေက်ကမၚ်ကရ်ကီု ပွမချူရုပ် ဒမၚ်သုၚ်ဍာ်ကီု (သရက်ပၞေတ်တဲမသုန်) ဒုၚ်တေၚ်သ္ၚာကီု ဇုက်တေၚ်သွက်ဂွံစဲသ္ၚာကီု ကဵုအခေါၚ်ရ ရဴဝွံ (သ္ဂးရ)။
၂၉၂။ ပ္ဍဲအခိၚ်ဂှ် ခမဳမွဲဇကု ဇၞော်ဗျုသတဲဟွံမွဲဒြဟတ်ဂှ် သၠးတရဴဇၞော်တုဲပ္ဍဲကြဴ ဒၠိုက်ကတဵုမ္ဂး လောတ်စှေ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် ဗလဲသွက်ဂွံဂြဲရပ်ရ ရဴဝွံ (သ္ဂးရ)။
ဝစ္စကုဋဳ ဟွံမွဲကဵုအစဵုဗိုၚ်ရ။ ပ ။ ယွံခမဳတအ် ကဵုအခေါၚ် တၞဟ်နပွမစဵုဗိုၚ်ဂမၠိုၚ် ပိဂကူ မတွံဂး အစဵုဗိုၚ်ဍိုတ် အစဵုဗိုၚ်တၟံ အစဵုဗိုၚ်ဆုရ ရဴဝွံ (သ္ဂးရ)။ မုက်ထော်တြၚ် ဟွံမွဲရ ။ ပ ။ ယွံခမဳတအ် ကဵုအခေါၚ် မုက်ထော်တြၚ်ရ ရဴဝွံ (သ္ဂးရ)။ သၠတြၚ် မုက်ထော်တြၚ် ဟွံမွဲရ။ ပ ။ ယွံခမဳတအ် သၠတြၚ်ကီု ဇဵုတြၚ်ကီု ခအဳသၟတ်ကီု ပးလကံက်လတူကီု ဒယိုၚ်တိုၚ်စုတ်သၞောဝ်တြၚ်ကီု ပးလကံက်ဆုသၟတ် သွက်ဂွံစုတ်သၞောဝ်တြၚ်ကီု (ဂွေန်တဲကၞုဲပသဲ) သၞောဝ်တြၚ်သၟတ်ကီု သၞာဲတြၚ်ကီု ပၞော်ကောန်ပၞံက်ကို ပၞော်သွက်ဂွံတံၚ်ကီု ဇုက်သွက်ဂွံတံၚ်ကီု ကဵုအခေါၚ်ရ ရဴဝွံ (သ္ဂးရ)။ ပ္ဍဲမုက်ထော်တြၚ် ခၞိက်ချောဲ ဒတုံစှေ်ရ။ ပ ။ ခမဳတအ် ဂရိုက်တုဲ တၞဟ်နလံက်လေတ် အပ္ဍဲမ္ၚးဂှ် ကဵုအခေါၚ်ရ။ သာ်ဗုကီု သာ်လမ္စံက်ကီု ပွမသ္ပကလိတ်ကလောတ် နကဵုဆီတၟံကီု ပွမသ္ပကသဴပ္ကဴကီု ပွမသ္ပကသဴလွာဇုက်ကီု ပွမထၟံက်လဝ်ၚေက်ကမၚ်ကရ်ကီု ပွမချူရုပ် ဒမၚ်သုၚ်ဍာ်ကီု (သရက်ပၞေတ်တဲမသုန်) ကဵုအခေါၚ်ရ ရဴဝွံ (သ္ဂးရ)။
ပြဝိုဏ် ဒှ်လၟက်ရ။ ပ ။ ယွံခမဳတအ် ကဵုအခေါၚ် တၞဟ်နပွမလးစဝ် ကြေဟ်ဝါန်ရ ရဴဝွံ (သ္ဂးရ)။ ဟွံရုမ်ဂပ်အိုတ်ရ။ ပ ။ ယွံခမဳတအ် ကဵုအခေါၚ် တၞဟ်နလးတၟံလးရ ရဴဝွံ (သ္ဂးရ)။
ဍာ်ခၠိုၚ်ဍာ်မၚ်ဒၟံၚ်ရ။ ပ ။ ယွံခမဳတအ် ကဵုအခေါၚ် ပၠံၚ်ပတိတ်ဍာ်ရ ရဴဝွံ (သ္ဂးရ)။ နုၚ်ဍာ်ကရာတ် ဟွံမွဲရ။ ပ ။ ယွံခမဳတအ် ကဵုအခေါၚ် နုၚ်ဍာ်ကရာတ်ရ ရဴဝွံ (သ္ဂးရ)။ ခေါ်ဗြံက်ဍာ်ကရာတ် ဟွံမွဲရ။ ပ ။ ယွံခမဳတအ် ကဵုအခေါၚ် ခေါ်ဗြံက်ဍာ်ကရာတ်ရ ရဴဝွံ (သ္ဂးရ)။
ဒးဂဇအ်ဗွဲဒဒိုခ်ဂမၠိုၚ်ဒှ်တုဲ ကြာတ်ဍာ်ကရာတ်အိုတ်ရ။ ပ ။ ယွံခမဳတအ် ကဵုအခေါၚ် ဒၞပ်ခုၚ်လိုန် သွက်ဂွံကြာတ်ဍာ်ကရာတ်ရ ရဴဝွံ (သ္ဂးရ)။
ဒၞပ်ခုၚ်လိုန် သွက်ဂွံကြာတ်ဍာ်ကရာတ်ဂမၠိုၚ် မံက်ဂတဝ်ပြာကဋ်အိုတ်ရ၊ ခမဳဂမၠိုၚ် သွက်ဂွံကြာတ်ဍာ်ကရာတ် ဂွဂၠေံအိုတ်ရ။ ပ ။ ယွံခမဳတအ် ကဵုအခေါၚ် တၞဟ်နပွမစဵုဗိုၚ်ဂမၠိုၚ် ပိဂကူ မတွံဂး အစဵုဗိုၚ်ဍိုတ် အစဵုဗိုၚ်တၟံ အစဵုဗိုၚ်ဆုရ ရဴဝွံ (သ္ဂးရ)။
နုၚ်ဍာ်ကရာတ်ဂမၠိုၚ် သကိုပ်ဂၟဳဟွံမွဲရ၊ တ္ၜန်တ္ၜောဲနှဴရဴ နကဵုခၞိက်ချောဲဂမၠိုၚ်ကီု နကဵုခၞိက်တိဂမၠိုၚ်ကီုရ။ ပ ။ ယွံခမဳတအ် ကဵုအခေါၚ် သကိုပ်ဂၟဳရ ရဴဝွံ (သ္ဂးရ)။
၂၉၃။ ခမဳဆဗ္ဗဂ္ဂဳဂမၠိုၚ် ဒ္ဂေတ်သ္ပတဴဒ္ဂေတ်ယုတ်မာ မၞုံသဘဴရဴဝွံအိုတ်ရ။ တဵုတဴတၞံပ္ကဴသၟတ်အိုတ်ရ၊ ဖအောဝ်ကဵုသအာၚ်တဵုအိုတ်ရ၊ ကိုဟ်စဝ်စရိုဟ်ဍာ်အိုတ်ရ၊ ဖအောဝ်ကဵုညးသအာၚ်စဝ်စရိုဟ်ဍာ်အိုတ်ရ၊ ၜှ်ဂၠောၚ်အိုတ်ရ၊ ဖအောဝ်ကဵုညးသအာၚ်ၜှ်ဂၠောၚ်အိုတ်ရ၊ ကၞောတ်ဇန်အိုတ်ရ၊ ဖအောဝ်ကဵုညးသအာၚ်ကၞောတ်ဇန်အိုတ်ရ၊ သ္ပတဴဇၟန်ပ္ကဴ မွဲလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴဇၟန်ပ္ကဴမၞုံတဝ်မတိတ်ၜါလပါ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴဗ္တဗ္ဂဲအိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴလကံက်တဲ (ဇၟန်ပ္ကဴကဝး) အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴတဝ်စရှ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴသၞေက်၊ ပ္ကဴဂ္ညိကတောဝ်အိုတ်ရ၊ ဖအောဝ်ကဵုသ္ပအိုတ်ရ၊ သ္ပတဴပ္ကဴဂြောပ်သြိုဟ်အိုတ်ရ၊ ဖအောဝ်ကဵုသ္ပအိုတ်ရ။
ခမဳဂမၠိုၚ်ဂှ် တၞဟ်နဖဵု ဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ ‘ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ခအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ရၚ်တၠုၚ်တဴ ပ္ကဴ မွဲလပါ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ဇၟန်ပ္ကဴမၞုံတဝ်မတိတ်ၜါလပါ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴဗ္တဗ္ဂဲအိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴလကံက်တဲ (ဇၟန်ပ္ကဴကဝး) အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴ ပ္ကဴတဝ်စရှ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ၊ ရၚ်တၠုၚ်တဴသၞေက်၊ ပ္ကဴဂ္ညိကတောဝ်အိုတ်ရ၊ ဖအောဝ်ကဵုသ္ပအိုတ်ရ၊ ရၚ်တၠုၚ်တဴ ပ္ကဴဂြောပ်သြိုဟ်အိုတ်ရ၊ ဖအောဝ်ကဵုရၚ်တၠုၚ်အိုတ်ရ။
ခမဳဂမၠိုၚ်ဂှ် မွဲဟာန်ကေုာံ ဗြဴကောန်ဂကူ ‘ဗြဴတၠလျိုၚ်’ ဗြဴဇၞော်ကောန်ဂကူ’ဝုတ်ဇၞော်’ သၟတ်ဗြဴကောန်ဂကူ ‘ဝုတ်သၟတ်’ ခအှ်ဗြဴကောန်ဂကူ ဍိက်ဗြဴကောန်ဂကူဂမၠိုၚ် ပ္ဍဲမွဲပ္ၚာန်ခရော်ဓဝ်လေဝ် စဟာပ်အိုတ်ရ၊ ပ္ဍဲမွဲခရော်သုၚ်ဍာ်ဓဝ်လေဝ် သုၚ်အိုတ်ရ၊ ပ္ဍဲမွဲသၞာဓဝ်လေဝ် ဂဇအ်အိုတ်ရ၊ ပ္ဍဲမွဲဇံၚ်ခါတ်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးဓဝ်လေဝ် တိက်အိုတ်ရ၊ ပ္ဍဲမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲမွဲယာတ်လးမွဲယာတ်လတက်ဓဝ်လေဝ် တိက်အိုတ်ရ၊ ပ္ဍဲဟွံသေၚ်ကဵုအခိၚ်လေဝ် စဟာပ်အိုတ်ရ၊ သိအရက်လေဝ် သုၚ်အိုတ်ရ၊ ပ္ကဴသဴမြမောဝ်ဂစေအ်စၠန်လံက်ဗဗိုဟ်လေဝ် ပကၚ်ရၚ်အိုတ်ရ၊ လှ်ေလေဝ်လှေ်အိုတ်ရ၊ ဂယှ်ေလေဝ်ဂယှ်ေအိုတ်ရ၊ တိၚ်တိုက်လေဝ် တိၚ်တိုက်အိုတ်ရ၊ လှ်ေလေဝ် လှ်ေသာၚ်သောဝ်အိုတ်ရ၊ (ဗတောန်ထ္ၜးကဵုနယ်ကဲလှ်ေအိုတ်ရ၊) အလိုက်ဗြဴသၟာလှ်ေလေဝ် လှ်ေဗက်အိုတ်ရ၊ အလိုက်ဗြဴသၟာလှ်ေလေဝ် လှ်ေသာၚ်သောဝ်အိုတ်ရ၊ အလိုက်ဗြံဂယှ်ေလေဝ် လှ်ေဗက်အိုတ်ရ၊ အလိုက်ဗြဴသၟာဂယှ်ေလေဝ် ဂယှ်ေဗက်အိုတ်ရ၊ အလိုက်ဗြဴသၟာဂယှေ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဂယှ်ေလေဝ် လှ်ေသာၚ်သောဝ်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် ဂယှေ်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် တိၚ်တိုက်ဗက်အိုတ်ရ၊ အလိုက်ဗြဴသၟာဆေၚ်ဝေၚ်လေဝ် လှ်ေသာၚ်သောဝ်အိုတ်ရ၊ အလိုက်ဗြဴသၟာဗတောန်လေဝ် လှ်ေဗက်အိုတ်ရ၊ အလိုက်ဗြဴသၟာဗတောန်လေဝ် ဂယှေ်ဗက်အိုတ်ရ၊ အလိုက်ဗြဴသၟာဗတောန်လေဝ် တိက်တိုၚ်ဗက်အိုတ်ရ၊ အလိုက်ဗြဴသၟာဗတောန်လေဝ် လှ်ေသာၚ်သောဝ်ဗက်အိုတ်ရ။
ကၠဒ္စာံခန်လေဝ် ဝေၚ်အိုတ်ရ၊ ကၠစှ်ခန်လေဝ် ဝေၚ်အိုတ်ရ၊ ကၠပ္ဍဲအမှဲအကးလေဝ် ဝေၚ်အိုတ်ရ၊ ကၠောန်သရက်ပ္ဍဲတိတုဲလေဝ် ဝေၚ်အိုတ်ရ၊ နပွမပေါဟ်မခတ်လေဝ် ဝေၚ်အိုတ်ရ၊ နပွမဖျေံမပး ပ္ဍဲလတူခတဵုပးတုဲလေဝ် ဝေၚ်အိုတ်ရ၊ နပွမတက်တၚ်ဏာၚ်လေဝ် ဝေၚ်အိုတ်ရ၊ နကဵုဇြေဟ်ဒုန်ကရေက်လေဝ် ဝေၚ်အိုတ်ရ၊ နဝေၚ်မခနေအ်လေဝ် ဝေၚ်အိုတ်ရ၊ နပွမဓဂိုဟ်ပေဝ်လေဝ် ဝေၚ်အိုတ်ရ၊ နကဵုထဲသၟတ်လေဝ် ဝေၚ်အိုတ်ရ၊ နပွမပစူတာ (နပွမဗတက်ဂတးဂတန်) လေဝ် ဝေၚ်အိုတ်ရ၊ နကဵုစက်စာန်လေဝ် ဝေၚ်အိုတ်ရ၊ နကဵုကၞာဲသၟတ်လေဝ် ဝေၚ်အိုတ်ရ၊ နကဵုကွဳသၟတ်လေဝ် ဝေၚ်အိုတ်ရ၊ နကဵုတ္ၚသၟတ်လေဝ် ဝေၚ်အိုတ်ရ၊ နပွမပၞုက်အက္ခရ်လေဝ် ဝေၚ်အိုတ်ရ၊ နပွမထၟံက်ပတိတ်ကသပ်စိုတ်လေဝ် ဝေၚ်အိုတ်ရ၊ သ္ပမပတမ်ကဵုညံၚ်ကၠက် ညံၚ်ခ္ဍဴ ညံၚ်ကုန်တုဲလေဝ် ဝေၚ်အိုတ်ရ၊ ကွတ်စိၚ်လေဝ် ကတ်ဗတောန်အိုတ်ရ၊ ကွတ်ချေံလေဝ် ကတ်ဗတောန်အိုတ်ရ၊ ကွတ်ကွဳစောတ် (ရထာ) လေဝ် ကတ်ဗတောန်အိုတ်ရ၊ ကွတ်တ္ၚလေဝ် ကတ်ဗတောန်အိုတ်ရ၊ ကွတ်သာၚ်ၜုန်မြလေဝ် ကတ်ဗတောန်အိုတ်ရ၊ နူဂတစိၚ်လေဝ် ဂြိပ်အာအိုတ်ရ၊ နူဂတချေံလေဝ် ဂြိပ်အာအိုတ်ရ၊ နူဂတကွဳစောတ် (ရထာ) လေဝ် ဂြိပ်အာဂြိပ်ကၠုၚ်အိုတ်ရ၊ သ္ပတဴညံၚ်ဒံၚ်သၠာ်တက်ၜုၚ်အိုတ်ရ၊ တက်လေဝ် တက်ကၞက်အိုတ်ရ၊ ကဝိုတ်လေဝ် ကဝိုတ်လက်ဗန်အိုတ်ရ၊ တက်လေဝ် တက်လက်ပၠုဲအိုတ်ရ။
ပ္ဍဲလဒေါဝ်ပေဲါလှ်ေဂမၠိုၚ်လေဝ် လးပၠးသကိုပ်တုဲ “ယွံဒေံဗြဴ သြဝ်လှေ်ပ္ဍဲသၞာဝွံညိ” ရဴဝွံ ဟီုသ္ဂးကဵု ဗြဴသၟာလှေ်အိုတ်ရ၊ ခိုဟ်ကွေံရ ခိုဟ်ကွေံရ ယွံဒေံဗြဴ ရဴဝွံ ကဵုလေဝ် ကဵုသာဓုကာအိုတ်ရ၊ ‘လပုဟ်တဲဂမၠိုၚ် ပတိုန်စွံလဝ်လတူတၞေၚ်လေဝ် ဍံက်ကဵုအိုတ်ရ၊’ ဒ္ဂေတ်ပွယုတ်မာ နာနာသာ်လေဝ် ဒ္ဂေတ်သ္ပတဴအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ ယွံခမဳတအ် ဟဂပ်ဝ်ဒ္ဂေတ်တဴ ဒ္ဂေတ်ပွယုတ်မာနာနာသာ်ရ၊ ကုခမဳ မဒ္ဂေတ်သ္ပဂှ် ဒးကဵုသ္ပ (ဒ္ဂေတ်လ္ၚတ်) ဗွဲမဗဗွဲကဵုဓရ်ရ ရဴဝွံ (သ္ဂးရ)။
ပ္ဍဲအခိၚ်ဂှ် တဳလပိုဉ်ဥရုဝေလကဿပ သ္ပခမဳမ္ဂး ကယျာဘဏ်ဗရိုတ်ပသဲကီု ကယျာဘဏ်ဆုကီု ဗွဲမဂၠိုၚ်ဂၠိုၚ် ကတဵုဒ်ှကၠုၚ် ကုသၚ်ရ။ ပ္ဍဲအခိၚ်ဂှ်—
“တဳလမၞုံပိုဉ်ကျာ်တြဲ ကဵုအခေါၚ် ကယျာဘဏ်ဗရိုတ်ဗသဲဟာ၊ ဟွံကဵုအခေါၚ်ဟာ၊ ကဵုအခေါၚ် ကယျာဘဏ်ဆုဟာ၊ ဟွံကဵုအခေါၚ်ဟာ၊ ကဵုအခေါၚ် ကယျာဘဏ်တိဟာ၊ ဟွံကဵဵုအခေါၚ်ဟာ” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ—
“ယွံခမဳတအ် ပါဲကၠေံ လွဟ်လနက်တုဲ ကယျာဘဏ်ဗရိုတ်ပသဲအိုဿီုကီု ပါဲကၠေံဇံၚ်မၞုံကဵုဇိုၚ် မသၠုၚ်လတူဒ္စာံလပုဟ် ပလ္လၚ်မၞုံကဵုရုပ်သတ်ဒမြိုဟ်ပ္ဍဲဇိုၚ် ဗဗေၚ်ဆု ဒၞပ်ဆုတုဲ ကယျာဘဏ်ဆုအိုဿီုကီု ပါဲကၠေံ ပွေါတ်ဇိုၚ်မဂပ်ဝ်ခၞံလဝ် သဏ္ဌာန်ထိုက်ဒကှ် မၞုံကဵုဇၠဠတ်ကတဵု ကုဋဳတိကီုတုဲ ကယျာဘဏ်တိအိုဿီုကီု ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။
✵✵✵ခုဒ္ဒကဝတ္ထုက္ခန္ဓက တုဲရ။✵✵✵
