၁၂.၂။ ခဏ်ဒုတိယ
၄၅၃။ ပ္ဍဲအခိၚ်ဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳဂှ် “ခမဳယသ ကောန်ဗဗၞးကာကဏ္ဍက မိက်ဂိုၚ်ကေတ် အဓိကိုရ်ဝွံတုဲ ဂၠာဲသ္ၚေဝ်ဒၟံၚ် ဗော်သွးရဂး၊ ဗော်သွးဂှ်လေဝ် ကလိဂွံရဂး” ရဴဝွံ ဂွံမိၚ်ကေတ်အိုတ်ရ။
ပ္ဍဲအခိၚ်ဂှ် “အဓိကိုရ်ဝွံ သကာတ်လေဝ်သကာတ်မြဟ်ရ၊ ဂံၚ်လေဝ်ဂံၚ်သကာရ၊ ပိုဲညးဂမၠိုၚ် မုရဴဗော်သွးမွဲ ကလိဂွံအိုတ်ရော? နကဵုဗော်သွးဂှ် ပ္ဍဲအဓိကိုရ်ဝွံ ပိုဲညးဂမၠိုၚ် မၞုံကဵုဇြဟတ်လောန်အိုတ်ရော?” ရဴဝွံ ကသပ်ဒှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ် ဝေသာလဳအိုတ်ရ။
ကြဴနူဂှ် “တဳလပိုဉ်ရေဝတဝွံ လၟိၚ်လညာတ်ဂၠိုၚ်တုဲ ဂွံပတိုန်လဝ်ပါၚ် ပါဠိသၟးဟွံက ဓမ္မဝိနယကေုာံမာတိကာလေဝ် ပကၚ်ရၚ်လဝ်ရ၊ ဍိုဟ်ကေက် စဳကၠးဆိုက်ဗ္ဒက် မၞုံကဵုဉာဏ်ပညာမဇြိုဟ်နက်ရ၊ လေပ်ဂွပါပ်ရ၊ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရ၊ မၞုံပၟိက်ကဵုဒ္ဂေတ်သိက္ခာရ။ ပိုဲညးဂမၠိုၚ် ကလိဂွံဗော်သွး တဳလပိုဉ်ရေဝတမ္ဂး နပွမကလိဂွံရဴဝွံ ပ္ဍဲအဓိကိုရ်ဝွံ ပိုဲညးဂမၠိုၚ် ကြက်ဒှ်ညးမၞုံကဵုဒြဟတ်လောန်အိုတ်ရ” ရဴဝွံ ကသပ်ဒှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳအိုတ်ရ။
ပ္ဍဲအခိၚ်ဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳဂှ် စဳရေၚ်တဴပရိက္ခရာ အရပ်အစပ်ခမဳ ဗွဲမဂၠိုၚ်မတွံဂး ဗဗေၚ် သ္ၚာ နိသဳဒိုန် ထကိုအ်တၞိၚ် ဇုက်ကာယဗန် ခ္ဍိုဟ်ဍာ် ယာတ်ခ္ဍိုဟ်ဍာ်ဓမၚ်ကရိုဏ်အိုတ်၊ ကြဴနူဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳဂှ်ဂိုၚ်ကေတ် ပရိက္ခရာအရပ်အစပ်ခမဳဂမၠိုၚ်တုဲ ဒစးတိုန်အာ ဍုၚ်သဟဇာတိ နကဵုဂၠုၚ်အိုတ်ရ၊ စှေ်နူဂၠုၚ်အိုတ်တုဲ ကဵုပိုဉ်ပ္ဍဲသၟဝ်တမ်ဆုမွဲအိုတ်ရ။
ပ္ဍဲအခိၚ်ဂှ် တဳလပိုဉ်သာဠ ပြာပ်အာဌာန်လ္ၚုသ္ၚိတ်ဇြတုဲ ဃောသတၚ်တန်တဴဒၟံၚ် ညးမွဲဓဝ်ဂှ် “မုရဴညးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ရော? ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ဟာ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ဟာ” ရဴဝွံ ကသပ်စိုတ်ဒှ်ရ။
ပ္ဍဲအခိၚ်ဂှ် ကုတဳလပိုဉ်သာဠ မဗ္စာရဏာတဴ ဓရ်ကီု ဝိနယ်ကီုဂှ် “ခမဳကောန်ပါစိနရးဂမၠိုၚ် ဒှ်ပူဂိုလ်အဓမ္မဝါဒဳဂမၠိုၚ်အိုတ်ရ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ရ” ရဴဝွံ ကသပ်ဒှ်ရ။
ပ္ဍဲအခိၚ် ဗြီုမွဲတၠ မပဒတဴပ္ဍဲဘုံသုဒ္ဓါဝါသဂှ် တီကေတ်ကသပ်စိုတ် တဳလပိုဉ်သာဠနကဵုစိုတ်ဇကုတုဲ တြုံမၞုံကဵုဒြဟတ်ဂှ် သ္ပါတဲမခ္ဍပ်လဝ်ဂှ် သၟဟ်ညံၚ်ရဴပၠးပတိတ်ကီု သ္ပတဲပၠးလဝ်ဂှ် သၟဟ်ညံၚ်ရဴ ခ္ဍပ်ပၠုပ်ကီု တုပ်သၟဟ်သာ်ဂှ်ဟေၚ် ကၠေံဗ္ဒန်အာ နူဘုံဗြီုသုဒ္ဓါဝါသတုဲ ကၠုၚ်ဒှ်ပြာကဋ် ပ္ဍဲဂတမုက် တဳလပိုဉ်သာဠ ရ။
ပ္ဍဲအခိၚ်ဂှ် ဗြီုဂှ်—
“ယွံတဳလပိုဉ်သာဠ အာတ်ပါန်အခေါၚ်ရ၊ ခမဳကောန်ပါစိနရးဂမၠိုၚ် ဒှ်ပူဂိုလ်အဓမ္မဝါဒဳဂမၠိုၚ်အိုတ်ရ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ရ။ ယွံတဳလပိုဉ်သာဠ ဟိုတ်ဂှ်ရ တဳလပိုဉ်ဩဝ်တန်တဴ အတိုၚ်ဓရ်ညိ” ရဴဝွံ ဂရၚ်ပတီ တဳလပိုဉ်သာဠ ရ။ ယွံဗြီု ပ္ဍဲအခိၚ်ကိုပ်ကၠာတေံကီု ပ္ဍဲအခိၚ်လၟုဟ်ကီု အဲတန်တဴ အတိုၚ်ဓရ်ရ။
ၜိုန်ဂှ်လေဝ် ဗွဲကိုပ်ကၠာ အဲဟွံသ္ပပြာကဋ်ကွေတ်ဏီရ၊ ပ္ဍဲအဓိကိုရ်ဝွံ သၟိတ်ပတိုန်အဲတန်ဒှ်ရ ရဴဝွံ (သ္ဂးရ)။
၄၅၄။ ပ္ဍဲအခိၚ်ဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳ ဂိုၚ်ကေတ်ပရိက္ခရာ အရပ်စပ်ခမဳဂမၠိုၚ်တုဲ ပြာပ်အာဇရေၚ် တဳလပိုဉ်ရေဝတတုဲပ္ဍဲကြဴ—
“ယွံတဳလပိုဉ် မှာထေရ်ဂှ် ဩဝ်ဒုၚ်ဂိုၚ် ပရိက္ခရာ အရပ်အစပ်ခမဳ ဗွဲမဂၠိုၚ်မတွံဂး ဗဗေၚ်သ္ၚာ နိသဳဒိုန် ထကိုအ်တၞိၚ် ဇုက်ကာယဗန် ခ္ဍိုဟ်ဍာ်ယာတ် ခ္ဍိုဟ်ဍာ်ဓမၚ်ကရိုဏ်ညိ” ရဴဝွံ ဂရၚ်ပတီအိုတ်ရ။
“ယွံကောန်တၠတအ် ဒေါံရ၊ ဗဗေၚ်တိစဳဝရိက် ဍိုက်ပေၚ်ဒၟံၚ် ကုအဲရ” ရဴဝွံ (သ္ဂးတုဲ) ဟွံမွဲပၟိက် တၞဟ်နဒုၚ်ဂိုၚ်ကေတ်ရ။
ပ္ဍဲအခိၚ်ဂှ် ခမဳမၞုံယၟုဥတ္တရ မၞုံဝှ်ၜါစှော်ဝှ်တုဲဂှ် ဒှ်ညးကၠောန်ၜိုတ် တဳလပိုဉ်ရေဝတရ။
ပ္ဍဲအခိၚ်ဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳ ပြာပ်အာဇရေၚ် တဳလပိုဉ်ဥတ္တရတုဲ “တဳလပိုဉ်ဥတ္တရ ဩဝ်ဒုၚ်ဂိုၚ်ကေတ် ပရိက္ခရာ အရပ်အစပ်ခမဳ ဗွဲမဂၠိုၚ်မတွံဂး ဗဗေၚ် သ္ၚာ နိသဳဒိုန် ထကိုအ်တၞိၚ် ဇုက်ကာယဗန် ခ္ဍိုဟ်ဍာ်ယာတ် ခ္ဍိုဟ်ဍာ်ဓမၚ်ကရိုဏ်ညိ” ရဴဝွံ ဂရၚ်ပတီအိုတ်ရ။
“ယွံကောန်တၠတအ် ဒေံါရ၊ ဗဗေၚ်တိစဳဝရိက် ဍိုက်ပေၚ်ဒၟံၚ် ကုအဲရ” ရဴဝွံ (သ္ဂးတုဲ) ဟွံမွဲပၟိက် တၞဟ်နဒုၚ်ဂိုၚ်ကေတ်ရ။
ယွံကောန်တၠဥတ္တရ မၞိဟ်ဂမၠိုၚ် ဗဂိန်ကဵုဒါန် ပရိက္ခရာ အရပ်အစပ်ခမဳ ကုတဳလမၞုံပိုဉ်ကျာ်တြဲအိုတ်ရ၊ တဳလမၞုံပိုဉ်ကျာ်တြဲ ဒုၚ်ဂိုၚ်ကေတ်မ္ဂး နပွမဒုၚ်ဂိုၚ်ကေတ်ဂှ် ဒှ်အိုဟ်တၟိုဟ်စိုတ်အိုတ်ရ၊ တဳလမၞုံပိုဉ်ကျာ်တြဲ ဟွံဒုၚ်ဂိုၚ်ကေတ်မ္ဂး “ယွံတဳလပိုဉ် မှာထေရ်ဂှ် သၟဟ်ညံၚ်ရဴတဳလမၞုံပိုဉ်ကျာ်တြဲ ဒုၚ်ဂိုၚ်ကေတ်ကီု ဩဝ်ဒုၚ်ဂိုၚ်ကေတ်ညိ၊ ပွမဒုၚ်ဂိုၚ်ကေတ် ဒှ်သၟဟ်ညံၚ်ရဴ တဳလမၞုံပိုဉ်ကျာ်တြဲ ဒုၚ်ဂိုၚ်ကေတ်ကီုရ” ရဴဝွံ ဗဂိုန်ကဵုဒါန် ကုတဳလပိုဉ်အာနန္ဒအိုတ်ရ။
တဳလပိုဉ်ဥတ္တရဂှ် သၟဟ်ညံၚ်ရဴတဳလပိုဉ်ရေဝတ ဒုၚ်ဂိုၚ်ကေတ်ကီု ဩဝ်ဒုၚ်ဂိုၚ်ကေတ်ပရိက္ခရာ အရပ်အစပ်ခမဳညိ၊ ပွမဒုၚ်ဂိုၚ်ကေတ်ဂှ် ဒှ်သၟဟ်ညံၚ်ရဴတဳလပိုဉ်ရေဝတ ဒုၚ်ဂိုၚ်ကေတ်ကီုရ ရဴဝွံ ဂရၚ်ပတီအိုတ်ရ။ ပ္ဍဲအခိၚ်ဂှ် တဳလပိုဉ်ဥတ္တရဂှ် ဟိုတ်နူခမဳကောန်ညးဝဇ္ဇဳရးဂမၠိုၚ်မပဒတဴ ပ္ဍဲဍုၚ်ဝေသာလဳ (ဟီုကရေပ်ဂရောတ်) ပ္ဍဵုပ္ဍိုက် (နကဵုဂလာန်) ဂှ်ရ ယွံကောန်တၠတအ် အရာနွံပၟိက်ဂှ် ဩဝ်ဟီုအိုတ်ညိ ရဴဝွံ သ္ဂးတုဲ ဒုၚ်ဂိုၚ်ကေတ် သ္ၚာမွဲဂတှ်ေရ။
တဳလပိုဉ်ဥတ္တရဂှ် “ယွံတဳလပိုဉ် ထေရ်ရေဝတဂှ် ကျာ်တြဲမပတၠပိုဉ်တြဴပြကာဂမၠိုၚ် ကတဵုဒှ်ကၠုၚ် ပ္ဍဲဇနပိုဒ်ဗၟံက်ဂမၠိုၚ်အိုတ်ရ၊ ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ရ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်အဓမ္မဝါဒဳဂမၠိုၚ်အိုတ်ရ” ရဴဝွံ ဂလာန်ဗၞတ်ဝွံဟေၚ် ဩဝ်ဟီု ပ္ဍဲလဒေါဝ်သၚ်ညိ ရဴဝွံ ဩဝ်ဂရၚ်ပတီညိ။
“ယွံကောန်တၠတအ် ခိုဟ်ရ” ရဴဝွံ တဳလပိုဉ်ဥတ္တရ ဒုၚ်ဝန် ကုခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳတုဲမ္ဂး ပြာပ်အာဇရေၚ် တဳလပိုဉ်ရေဝတတုဲပ္ဍဲကြဴ—
“ယွံတဳလပိုဉ် ကျာ်တြဲမပတၠပိုဉ်တြဲပြကာဂမၠိုၚ် ကတဵုဒှ်ကၠုၚ် ပ္ဍဲဇနပိုဒ်ဗၟံက်ဂမၠိုၚ်အိုတ်ရ၊ ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်အိုတ်ရ၊ ခမဳကောန်ပါဝါဂမၠိုၚ် ဒှ်ပူဂိုလ်အဓမ္မဝါဒဳဂမၠိုၚ်အိုတ်ရ ရဴဝွံ ထေရ်ရေဝတဂှ် ဂလာန်ဗၞတ်ဝွံဟေၚ် ဩဝ်ဟီုပ္ဍဲလဒေါဝ်သၚ်ညိ” ရဴဝွံ ဂရၚ်ပတီရ။
“ယွံခမဳ တၠအဲ ဗတိုက်ဖအောဝ်အဲ ပ္ဍဲမဟွံသေၚ်ကဵုဓရ်ရ” ရဴဝွံ ထေရ်ရေဝတဳဗက်ဗ္ဒဴထောံ တဳလပိုဉ်ဥတ္တရ ရ။
ပ္ဍဲအခိၚ်ဂှ် ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳဂှ် “ယွံကောန်တၠဥတ္တရ ထေရ်ဇၞော်ရေဝတ ပသာ်ဟီုသ္ဂးရော?” ရဴဝွံ သၟာန်သၟုက် တဳလပိုဉ်ဥတ္တရအိုတ်ရ။
ယွံကောန်တၠတအ် ပိုဲညးဂမၠိုၚ် သ္ပဒးပွမယုတ်သဝ်အိုတ်ရ၊ “ယွံခမဳ တၠအဲ ဗတိုက်ဖအောဝ် အဲ ပ္ဍဲမဟွံသေၚ်ကဵုဓရ်ရ” ရဴဝွံ ထေရ်ရေဝတ ဗက်ဗ္ဒဴထောံအဲရ ရဴဝွံ (သ္ဂးရ)။
ယွံကောန်တၠဥတ္တရ တၠအဲ မၞုံဝှ်ၜါစှော်တုဲ ဇၞော်ဒၟံၚ်ရဟွံသေၚ်ဟာ ရဴဝွံ (သၟာန်အိုတ်ရ)။
ယွံကောန်တၠတအ် ဍာံပြရ။
ၜိုန်ဂှ်လေဝ် အဲဍိက်တအ် ဒးဂိုၚ်ကေတ်ဒၟံၚ် အ္စာနိဿယဗွဲမအဲပရဲအိုတ်ဏီရ ရဴဝွံ (သ္ဂးရ)။
၄၅၅။ ပ္ဍဲအခိၚ်ဂှ် သၚ် ဟိုတ်မမိက်သ္ဂုတ်သွာတ် အဓိကိုရ်ဂှ်ရ ကောံဓရီုဒၟံၚ်ရ၊ ကြဴနူဂှ်တဳလပိုဉ်ရေဝတ ကဵုသၚ်တီရ။
“ယွံကောန်တၠတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပိုဲညးဂမၠိုၚ်ကဵုလလမ်ကၠေံ အဓိကိုရ်ဝွံ ပ္ဍဲဌာန်ဝွံအိုတ်မ္ဂး ခမဳဂမၠိုၚ် မဂိုၚ်ကေတ်အဓိကိုရ်တမ်ဂှ် ခ္ဍဟ်ကတဵုသွက်ဂွံသ္ပကမ် မွဲလှေ်ပၠန်အိုတ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး သၚ် ကဵုလလမ်ကၠေံ အဓိကိုရ်ဝွံ ပ္ဍဲဌာန်မဒှ်တမ်ဟေၚ်ရ” ရဴဝွံ (ကဵုတီရ)။
ကြဴနူဂှ် ခမဳထေရ်ဇၞော်ဂမၠိုၚ် မမိက်သ္ဂုတ်သွာတ် အဓိကိုရ်ဂှ်ဂမၠိုၚ်ဒှ်တုဲ က္ညအာဍုၚ်ဝေသာလဳအိုတ်ရ။
ပ္ဍဲအခိၚ်ဂှ် ကွးပဒတဴမွဲစွံ တဳလပိုဉ်အာနန္ဒ မၞုံယၟုသဗ္ဗကာမိ မဒှ်သံဃထေရ် အလုံဂၠးတိ သ္ပတမ်နူဒှ်ခမဳတုဲ မၞုံကဵုဝှ်ကၠံၜါစှော်ဝှ်ဂှ် ပဒတဴဒၟံၚ် ပ္ဍဲဍုၚ်ဝေသာလဳရ။
ပ္ဍဲအခိၚ်ဂှ် တဳလပိုဉ်ရေဝတဂှ်—
“ယွံကောန်တၠ အဲပြာပ်အာဘာ တဳလပိုဉ်သဗ္ဗကာမိ ပဒတဴရ၊ တၠအဲဂှ် ပြဟ်ပြဟ်ဟေၚ် ပြာပ်အာဇရေၚ် တဳလပိုဉ်သဗ္ဗကာမိတုဲ ဩဝ်ဂရၚ်ပတီသၟာန်လဝ် ဝတ္ထုဂမၠိုၚ်စှ်သာ်ဝွံညိ” ရဴဝွံ သ္ဂးကဵု တဳလပိုဉ်သမ္ဘူတ မပဒတဴပ္ဍဲဌာန်သာဏရ။
“ယွံတဳလပိုဉ် ခိုဟ်သန်ရ” ရဴဝွံ တဳလပိုဉ်သမ္ဘူတ မပဒတဴပ္ဍဲဌာန်သာဏ ဒုၚ်ဝန်ကုတဳလပိုဉ်ရေဝတရ။
ကြဴနူဂှ် တဳလပိုဉ်ရေဝတ ပြာပ်အာဘာ တဳလပိုဉ်သဗ္ဗကာမိ ပဒတဴရ၊ သၞာသတိက်သၞာဒၟံၚ် တဳလပိုဉ်သဗ္ဗကာမိဂှ် လးလဝ် ပ္ဍဲဂၠမ်ရ၊ သၞာသတိက်သၞာဒၟံၚ် တဳလပိုဉ်ရေဝတဂှ် လးလဝ်ပ္ဍဲပါၚ်ဂၠမ်ရ။
ပ္ဍဲအခိၚ်ဂှ် တဳလပိုဉ်ရေဝတဂှ် “မှာထေရ်ဝွံ ဇၞော်ကြံၚ်ဍုဟ်တုဲ ဟွံတိက်ဟွံဒလာဲရ” ရဴဝွံ (ပၠုပ်စိုတ်တုဲ) ဟွံတိက်ရ၊ တဳလပိုဉ်သဗ္ဗကာမိဂှ် “ခမဳအာဂန္တုကဝွံ ဍောၚ်ၜိုတ်တုဲ ဟွံတိက် ဟွံဒလာဲရ” ရဴဝွံ (ပၠုပ်စိုတ်တုဲ) ဟွံတိက်ရ။
ပ္ဍဲအခိၚ်ဂှ် တဳလပိုဉ်သဗ္ဗကာမိ ပ္ဍဲအခိၚ်ဖလာၚ်ဂယးဗတမ်ဂှ် ဒၠိုက်ကတဵုတုဲ “ယွံနာဲတၠအဲ လၟုဟ် မုရဴနပွမပဒတဴမွဲ ပဒတဴဒၟံၚ်ဗွဲမဂၠိုၚ်ရော?” ရဴဝွံ သၟာန်တဳလပိုဉ်ရေဝတရ။
ယွံတဳလပိုဉ် အဲဍိက် လၟုဟ် နမလုပ်စမေတ္တာၛာန်ဂှ် ပဒတဴဒၟံၚ်ဗွဲမဂၠိုၚ်ရ ရဴဝွံ (ဂရၚ်ပတီရ)။
ယွံနာဲ တၠအဲ လၟုဟ် နပွမပဒတဴမမံက်ဂတဝ် ပဒတဴဒၟံၚ်ဗွဲမဂၠိုၚ်ရ၊ ယွံနာဲ မေတ္တာၛာန်ဝွံတုန် ပွမပဒတဴမမံက်ဂတဝ်ရ ရဴဝွံ (သ္ဂးရ)။ ယွံတဳလပိုဉ် အဲဍိက် ဃောဒှ်ခရှ်တေံလေဝ် လ္ၚတ်ဒၟံၚ် မေတ္တာရ၊ ဟိုတ်ဂှ်ရ အဲဍိက် ပ္ဍဲအခိၚ်လၟုဟ်လေဝ် နမလုပ်စမေတ္တာၛာန်ဂှ် ပဒတဴဒၟံၚ်ဗွဲမဂၠိုၚ်ရ၊ ၜိုန်ဂှ်လေဝ် အဲဍိက် အာစိုပ်အရဟတ္တဖိုလ် ဗွဲမလအ်တုဲရ ရဴဝွံ (ဂရၚ်ပတီရ)။
ယွံတဳလပိုဉ် မှာထေရ်ဂှ် လၟုဟ် မုရဴနပွမပဒတဴမွဲ ပဒတဴဒၟံၚ်ဗွဲမဂၠိုၚ်ရော? ရဴဝွံ (ဂရၚ်ပတီ သၟာန်ရ)။ ယွံနာဲ အဲလၟုဟ် လုပ်စသုညတဖဵုတုဲ နပွမပဒတဴဂှ် ပဒတဴဒၟံၚ်ဗွဲမဂၠိုၚ်ရ ရဴဝွံ (သ္ဂးရ)။ ယွံတဳလပိုဉ် မှာထေရ်ဂှ် လၟုဟ် နပွမပဒတဴတြုံမပြဲဂမၠိုၚ် ပဒတဴဗွဲမဂၠိုၚ်ရ၊ ယွံတဳလပိုဉ် သုညတဖဵုဝွံ ပွမပဒတဴတြုံမပြဲဂမၠိုၚ်ရ ရဴဝွံ (ဂရၚ်ပတီရ)။
ယွံနာဲ အဲ ဃောဒှ်ခရှ်တေံလေဝ် လ္ၚတ်ဒၟံၚ်သုညတဖဵုရ၊ ဟိုတ်ဂှ်ရ အဲပ္ဍဲအခိၚ်လၟုဟ်လေဝ် လုပ်စသုညတဖဵုတုဲ နပွမပဒတဴဂှ် ပဒတဴဒၟံၚ်ဗွဲမဂၠိုၚ်ရ၊ ဗွဲစၟတ်လေဝ် အဲအာစိုပ် အရဟတ္တဖိုလ် ဗွဲမလအ်တုဲရ ရဴဝွံ (ဂရၚ်ပတီရ)။
ဣဝွံတုန် ဂလာန်အကြာ မဟွံပိုတ်ဏီ ခမဳထေရ်ဂမၠိုၚ်ရောၚ်။
ကိုပ်ကၠာဂလာန်ဟွံပိုတ်ဏီ တဳလပိုဉ်သမ္ဘူတ မပဒတဴဌာန်သာဏ စိုပ်ကၠုၚ်ဌာန်ဂှ်တုဲမ္ဂး ပြာပ်အာဇရေၚ် တဳလပိုဉ်သဗ္ဗကာမိတုဲ လ္ၚောဝ်သ္ပဝတ်တုဲမ္ဂး သီုမဂဇအ်ဒၟံၚ်ပ္ဍဲဒၞာဲမွဲဂှ်—
“ယွံတဳလပိုဉ် ပ္ဍဲဍုၚ်ဝေသာလဳ ခမဳကောန်ညးဝဇ္ဇဳရးဂမၠိုၚ် မပဒတဴ ပ္ဍဲဍုၚ်ဝေသာလဳ ထ္ၜးတဴဝတ္ထုဂမၠိုၚ်စှ်သာ်အိုတ်ရ၊ ‘သိၚ်္ဂဳလောဏကပ္ပဂှ် ဂပ်ဝ်ရ၊ ဒွၚ်္ဂုလကပ္ပဂှ် ဂပ်ဝ်ရ၊ ဂါမန္တရ ကပ္ပဂှ် ဂပ်ဝ်ရ၊ အာဝါသကပ္ပဂှ် ဂပ်ဝ်ရ၊ အနုမတိကပ္ပဂှ် ဂပ်ဝ်ရ၊ အာစိဏ္ဏကပ္ပဂှ် ဂပ်ဝ်ရ၊ အမထိတကပ္ပဂှ် ဂပ်ဝ်ရ၊ ပွမသုၚ် ဇဠောဂဳဂှ် ဂပ်ဝ်ရ၊ နိသဳဒိုန် မဟွံမွဲကဵုတသာဲဂှ် ဂပ်ဝ်ရ၊ ထဝ်သြန်ဂှ် ဂပ်ဝ်ရ” ရဴဝွံ (ထ္ၜးအိုတ်)။
ယွံတဳလပိုဉ် မှာထေရ်ဂှ် ဂိုၚ်ကတ်ကေတ် ဓမ္မကေုာံဝိနယ ပ္ဍဲတမ်ဇိုၚ်အ္စာဥပဇ္ၛာယ်ရ၊ ယွံတဳလပိုဉ် မှာထေရ် ဃောမဗ္စာရဏာတဴ ဓမ္မကေုာံဝိနယဂှ် ပသာ်ဒှ်ရော? “မုရဴညးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရော? ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ဟာ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ဟာ” ရဴဝွံ (ဂရၚ်ပတီရ)။
ယွံကောန်တၠ တၠအဲလေဝ် ဂိုၚ်ကတ်ကေတ် ဓမ္မကေုာံဝိနယ ပ္ဍဲတမ်ဇိုၚ်အ္စာဥပဇ္ၛာယ်ရ၊ ယွံကောန်တၠ တၠအဲ ဃောမဗ္စာဏာတဴ ဓမ္မကေုာံဝိနယဂှ် ပသာ်ဒှ်ရော? “မုရဴညးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရော? ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ဟာ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ဟာ” ရဴဝွံ (သၟာန်ရ)။
ယွံတဳလပိုဉ် အဲဍိက် ဃောမဗ္စာရဏာတဴ ဓမ္မကေုာံဝိနယဂှ် “ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရ” ရဴဝွံ ကသပ်ဒှ်ရ။ ၜိုန်ဂှ်လေဝ် ဗွဲကိုပ်ကၠာ အဲဍိက် ဟွံသ္ပပြာကိုဋ်ကွေတ်ဏီရ၊ ပ္ဍဲအဓိကိုရ်ဝွံ ဟိုတ်မသၟိတ်ပတိုန် အဲဍိက် တန်ဒှ်ရ ရဴဝွံ (ဂရၚ်ပတီရ)။
ယွံကောန်တၠ အဲလေဝ် ဃောမဗ္စာရဏာတဴ ဓမ္မကေုာံဝိနယဂှ် “ခမဳကောန်ပါစိနရးဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရ၊ ခမဳကောန်ဍုၚ်ပါဝါဂမၠိုၚ် ဒှ်ပူဂိုလ်ဓမ္မဝါဒဳဂမၠိုၚ်ရ” ရဴဝွံ ဒှ်ဗ္စာရဏာရ။ ၜိုန်ဂှ်လေဝ် ဗွဲကိုပ်ကၠာ အဲဟွံသ္ပပြာကဋ်ကွေတ်ဏီရ၊ ပ္ဍဲအဓိကိုရ်ဝွံ ဟိုတ်မသၟိတ် ပတိုန်အဲ တန်ဒှ်ရ ရဴဝွံ (သ္ဂးရ)။
၄၅၆။ ကြဴနူဂှ် သၚ် ဟိုတ်မမိက်သ္ဂုတ်သွာတ် အဓိကိုရ်ဂှ်ရ ကောံဓရီုဒၟံၚ်ရ။
သ္ဂုတ်သွာတ် အဓိကိုရ်ဂှ်မ္ဂး ဂလာန်ဂမၠိုၚ် မဟွံမွဲကဵုအပိုၚ်အခြာ ကတဵုဒှ်အိုတ်ရ၊ အရထဂလာန်မွဲလေဝ် ဟဂွံတီကေတ်ရ၊ ပ္ဍဲအခိၚ်ဂှ် တဳလပိုဉ်ရေဝတ ကဵုသၚ်တီရ။
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပိုဲဍိက်တအ်ညးဂမၠိုၚ် သ္ဂုတ်သွာတ် အဓိကိုရ်ဝွံမ္ဂး ဂလာန်ဂမၠိုၚ် မဟွံမွဲကဵုအပိုၚ်အခြာ ကတဵုဒှ်အိုတ်ရ၊ အရထဂလာန်မွဲလေဝ် ဟဂွံတီကေတ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ လလမ်ကၠေံ အဓိကိုရ်ဝွံ နကဵုဥဗ္ဗဟိကကမ္မဝါစ်ရ။ ရုဲစှ် ခမဳကောန်ပါစိနရးဂမၠိုၚ်ပန်ဇကုကီု ခမဳကောန်ဍုၚ်ပါဝေယျကဂမၠိုၚ် ပန်ဇကုကီုရ။ ပၞောဝ်ခမဳကောန်ပါစိနရးဂမၠိုၚ် ရုဲစှ် တဳလပိုဉ်သဗ္ဗကာမိကီု တဳလပိုဉ်သာဠ ကီု တဳလပိုဉ်ခုဇ္ဇသောဘိတကီု တဳလပိုဉ်ဝါသဘဂါမိကီုရ။ ပၞောဝ်ခမဳကောန်ဍုၚ်ပါဝါဂမၠိုၚ် ရုဲစှ် တဳလပိုဉ်ရေဝတကီု တဳလပိုဉ်သမ္ဘူတ မပဒတဴပ္ဍဲဌာန်သာဏကီု တဳလပိုဉ်ယသ မဒှ်ကောန်ဗဗၞးကာကဏ္ဍဏကီု တဳလပိုဉ်သုမနကီုရ” ရဴဝွံ (သ္ဒးကဵုတီရ)။
ကြဴနူဂှ် တဳလပိုဉ်ရေဝတ ကဵုသၚ်တီရ။
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပိုဲဍိက်တအ်ညးဂမၠိုၚ် သ္ဂုတ်သွာတ် အဓိကိုရ်ဝွံမ္ဂး ဂလာန်ဂမၠိုၚ် မဟွံမွဲကဵုအပိုၚ်အခြာ ကတဵုဒှ်အိုတ်ရ၊ အရထဂလာန်မွဲလေဝ် ဟဂွံတီကေတ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ်သၟိတ်ပတိုန် ခမဳကောန်ပါစိနရးဂမၠိုၚ်ပန်ဇကုကီု ခမဳကောန်ဍုၚ်ပါဝါဂမၠိုၚ်ပန်ဇကုကီု သွက်ဂွံလလမ်ကၠေံ အဓိကိုရ်ဝွံ နကဵုဥဗ္ဗဟိကကမ္မဝါစ်ရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ပိုဲဍိက်တအ်ညးဂမၠိုၚ် သ္ဂုတ်သွာတ် အဓိကိုရ်ဝွံမ္ဂး ဂလာန်ဂမၠိုၚ် မဟွံမွဲကဵုအပိုၚ်အခြာ ကတဵုဒှ်အိုတ်ရ၊ အရထဂလာန်မွဲလေဝ် ဟဂွံတီကေတ်ရ၊ သၚ် သၟိတ်ပတိုန် ခမဳကောန်ပါစိနရးဂမၠိုၚ်ပန်ဇကုကီု ခမဳကောန်ဍုၚ်ပါဝါဂမၠိုၚ်ပန်ဇကုကီု သွက်ဂွံလလမ်ကၠေံ အဓိကိုရ်ဝွံ နကဵုဥဗ္ဗဟိကကမ္မဝါစ်ရ။
ယြဴကုတဳလပိုဉ်မွဲ မၞုံကဵုပွမသ္ဍိုက်မၠိုက် ပွမသၟိတ်ပတိုန် ခမဳကောန်ပါစိနရးဂမၠိုၚ်ပန်ဇကုကီု ခမဳကောန်ဍုၚ်ပါဝါဂမၠိုၚ်ပန်ဇကုကီု သွက်ဂွံလလမ်ကၠေံ အဓိကိုရ်ဝွံ နကဵုဥဗ္ဗဟိကကမ္မဝါစ်ရ၊ တဳလပိုဉ်ဂှ် သ္ဒးသ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရတဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်ပတိုန် ခမဳကောန်ပါစိနရးဂမၠိုၚ်ပန်ဇကုကီု ခမဳကောန်ဍုၚ်ပါဝါဂမၠိုၚ်ပန်ဇကုကီု သွက်ဂွံလလမ်ကၠေံ အဓိကိုရ်ဝွံ နကဵုဥဗ္ဗဟိကကမ္မဝါစ်တုဲရ၊ သၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်သ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ပ္ဍဲအခိၚ်ဂှ် ခမဳမၞုံယၟုအဇိတ မဂွံစှ်ဝှ်ဂှ် ဒှ်ခမဳထ္ၜးပါတိမုက်သၚ်ရ။ ပ္ဍဲအခိၚ်ဂှ် တဳလပိုဉ်အဇိတ ဂှ်လေဝ် သၚ်သၟိတ်ပတိုန် ရဴဝွံမ္ဂး ညးလးသၞာခမဳထေရ်ဂမၠိုၚ်ရ။
ပ္ဍဲအခိၚ်ဂှ် “ပိုဲညးဂမၠိုၚ် မုရဴပ္ဍဲဌာန်မွဲ ဂွံကဵုလလမ်ကၠေံ အဓိကိုရ်ဝွံအိုတ်ရော?” ရဴဝွံကသပ်ဒှ် ကုခမဳထေရ်ဂမၠိုၚ်ရ။ ပ္ဍဲအခိၚ်ဂှ် “ဘာဝါလိကာရာမ်ဝွံ မၞုံကဵုအရာမိပ်လဟိၚ်ရ၊ ဗရုရမျာၚ်အောန်သာရ၊ ရမျာၚ်ထအဴကၠံၚ်ဍုၚ်ကွာန်အောန်ရ၊ ပိုဲညးဂမၠိုၚ် ဂွံကဵုလလမ်ကၠေံ အဓိကိုရ်ဝွံ ပ္ဍဲဘာဝါလိကာရာမ်မ္ဂး ခိုဟ်သန်ရ” ရဴဝွံ ကသပ်ဒှ် ကုခမဳထေရ်ဂမၠိုၚ်ရ။
၄၅၇။ ကြဴနူဂှ် ခမဳထေရ်ဂမၠိုၚ် မိက်သ္ဂုတ်သွာတ် အဓိကိုရ်ဂှ်ဂမၠိုၚ်ဒှ်တုဲ က္ညအာဘာဝါလိကာရာမ်အိုတ်ရ။
ကြဴနူဂှ် တဳလပိုဉ်ရေဝါတ ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ အဲဍိက် သၟာန်ဝိနယ် ကုထေရ်သဗ္ဗကာမိရ” ရဴဝွံ (ကဵုတီရ)။
တဳလပိုဉ်သဗ္ဗကာမိလေဝ် ကဵုသၚ်တီရ—
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ ရေဝတဂှ် သၟာန်ဝိနယ်မ္ဂး အဲသှ်ကဵုရ” ရဴဝွံ (ကဵုတီရ)။
ကြဴနူ တဳလပိုဉ်ရေဝတဂှ်—
“ယွံတဳလမၞုံပိုဉ် သၚ်္ဂဳလောဏကပ္ပဂှ် ဂပ်ဝ်ဟာ” ရဴဝွံ ဂရၚ်ပတီသၟာန်တိုန် တဳလပိုဉ်သဗ္ဗကာမိရ။
ယွံကောန်တၠ သိၚ်္ဂဳလောဏကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် “ပ္ဍဲဌာန်ဟွံမွဲကဵုၜဵု (ဘောဇိုန်ဟွံမွဲကဵုၜဵု) ဂှ် ကြက်ဂွံပြဘိုဂ်အိုတ်ရ” ရဴဝွံ သွက်ဂွံရေၚ်တၠုၚ်လဝ်ၜဵု နကဵုဍေၚ်ဒြၚ်သတ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်သာရဝှ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူသ္ပပွမတိုပ်ဒေပ်တုဲ သ္ပပြဘိုဂ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ် ဝတ္ထုမဒှ်ကိုပ်ကၠာဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မဒှ်ကိုပ်ကၠာဝွံရ။ (၁)
ယွံတဳလမၞုံပိုဉ် ဒွၚ်္ဂုလကပ္ပဂှ် ကပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဒွၚ်္ဂုလကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ပ္ဍဲအခိၚ်တ္ၚဲစေၚ်လောန်အာ သၞိၚ်ၜါလပုဟ်တဲတုဲဂှ် သွက်ဂွံပြဘိုဂ်ဘောဇိုန်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်ရာဇဂြိုဟ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမသ္ပပြဘိုဂ် ပ္ဍဲအခိၚ်တ္ၚဲစေၚ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္တုမရနုက်ကဵုၜါတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုၜါဝွံရ။ (၂) ယွံတဳလမၞုံပိုဉ် ဂါမန္တရကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဂါမန္တကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် “လၟုဟ် ကြက်အာကွာန်သအာၚ်ရ” ရဴဝွံ ခမဳမဒးပဝါရိတ် ဃောကဵုပိုဉ်ဂှ် သွက်ဂွံသ္ပပြဘိုဂ် ဘောဇိုန်မဟွံသ္ပအတိရိတ်ဝိနယ်ကမ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်သာရဝှ်ရ ရဴဝွံ (သ္ဂးရ)။
မုရဴ အာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမသ္ပပြဘိုဂ် သီုဟွံသ္ပအတိရိတ်ဝိနယ်ကမ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုပိဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုပိဝွံရ။ (၃)
ယွံတဳလမၞုံပိုဉ် အာဝါသကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အာဝါသကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ဘာဂမၠိုၚ်မဂၠိုၚ်ဂှ် ဒှ်မွဲသိမ်ဓဝ်အိုတ်ရ၊ သွက်ဂွံသ္ပဥပေါသ်တၞဟ်တၞဟ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲဥပေါသထက္ခန္ဓက အပ္ဍဲဍုၚ်ရာဇဂြိုဟ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ဒုက္ကဋ် (မဒး) ဟိုတ်နူပွကလိလောန် ဝိနယ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုပန်တုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ် ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုပန်ဝွံရ။ (၄)
ယွံတဳလမၞုံပိုဉ် အနုမတိကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အနုမတိကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် “ခမဳမကၠုၚ်ဂမၠိုၚ် ကြက်ကဵုသ္ပအခေါၚ်အိုတ်ရ” ရဴဝွံ သၚ်မဒှ်ဂပ်ဝ် သွက်ဂွံသ္ပကမ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ် ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲစမ္ပေယျက္ခန္ဓက ဝိနယဝတ္ထုရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ဒုက္ကဋ် (မဒး) ဟိုတ်နူပွမကလိလောန် ဝိနယ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုမသုန်တုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုမသုန်ဝွံရ။ (၅)
ယွံတဳလမၞုံပိုဉ် အာစိဏ္ဏကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အာစိဏ္ဏကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ပွဝွံ ဒှ်ဒ္ဂေတ်အလေံ အ္စာဥပဇ္ၛာယ်အဲရ၊ ပွဝွံ ဒှ်ဒ္ဂေတ်အလေံ အ္စာဥပဇ္ၛာယ် အဲရ ရဴဝွံ သွက်ဂွံဒ္ဂေတ်အလေံ ပွဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဒ္ဂေတ်အလေံလ္ၚဵုဂှ် ဂပ်ဝ်ရ၊ ဒ္ဂေတ်အလေံလ္ၚဵုဂှ် ဟွံဂပ်ဝ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုတြဴတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုတြဴဝွံရ။ (၆)
ယွံတဳလမၞုံပိုဉ် အမထိတကပ္ပဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ အမထိကကပ္ပမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် ဍာ်တှ် သဘဴဍာ်တှ်ပကတိလေဝ် သၠးကၠေံ၊ ဍာ်တှ်ထၟတ်လေဝ် ဟွံဒှ်ဏီဂှ် ခမဳဒးပဝါရိတ်ဃောကဵုပိုဉ်ဂှ် သီုဟွံသ္ပအတိရိတ်ဝိနယ်ကမ် သွက်ဂွံသုၚ်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်သာရဝှ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမသ္ပပြဘိုဂ် သီုဟွံသ္ပအတိရိတ်ဝိနယ်ကမ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုထပှ်ဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုထပှ်ဝွံရ။ (၇)
ယွံတဳလမၞုံပိုဉ် သွက်ဂွံသုၚ် ဇဠောဂဳဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဇဠောဂဳမ္ဂးဂှ် ညးဍေံရော? ရဴဝွံ (သၟာန်ရ)။
ယွံတဳလပိုဉ် သွက်ဂွံသုၚ် ဍာ်သိၜတ်ၜတ် မစဳရေၚ်လဝ် နကပေါတ်ကြိယာဗာအိုတ်သီုတုဲ မဟွံဒှ်ဍာ်သိအရက်ဏီဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်ကောသမ္ဗဳရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမသုၚ်သိအရက်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုဒ္စါံဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုဒ္စါံဝွံရ။ (၈)
ယွံတဳလမၞုံပိုဉ် နိသဳဒိုန်မဟွံမွဲကဵုတသာဲဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်သာရဝှ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော? ရဴဝွံ (ဂရၚ်ပတီရ)။
အာစိုပ်အာပတ်ဆေဒနကပါဲစိုတ်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုဒ္စိတ်ဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုဒ္စိတ်ဝွံရ။ (၉)
ယွံတဳလမၞုံပိုဉ် ထဝ်သြန်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်ရာဇဂြိုဟ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမုဒုၚ်ဂိုၚ်ကေတ်ထဝ်သြန်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုဒ္စိတ်ဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနးဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုဒ္စိတ်ဝွံရ။ (၉)
ယွံတဳလမၞုံပိုဉ် ထဝ်သြန်ဂှ် ဂပ်ဝ်ဟာ ရဴဝွံ (ဂရၚ်ပတီရ)။
ယွံကောန်တၠ ဟွံဂပ်ဝ်ရ ရဴဝွံ (သ္ဂးရ)။
မုရဴပ္ဍဲဌာန်မွဲ မုရဴပ္ဍဲသိက္ခာပိုဒ် ပါဲဒဝ်လဝ်ရော? ရဴဝွံ (ဂရၚ်ပတီရ)။
ပါဲဒဝ်လဝ် ပ္ဍဲပဒဘာဇနဳဒှ်အရာပါ်ပရအ် ပါတိမုက် အပ္ဍဲဍုၚ်ရာဇဂြိုဟ်ရ ရဴဝွံ (သ္ဂးရ)။
မုရဴအာပတ်မွဲ အာစိုပ်ရော ရဴဝွံ (ဂရၚ်ပတီရ)။
အာစိုပ်အာပတ်ပါဲစိုတ် (မဒး) ဟိုတ်နူပွမဒုၚ်ဂိုၚ်ကေတ်ထဝ်သြန်ရ ရဴဝွံ (သ္ဂးရ)။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သ္ဂုတ်သွာတ်ဝတ္ထု မရနုက်ကဵုစှ်ဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဝွံ ဓရ်ဟွံသေၚ်ရ၊ ဝိနယ်ဟွံသေၚ်ရ၊ စာ်စ္ဍးနူဒၠောံဗတောန်ကျာ်တြဲရ၊ ဖျေံဇြေဟ်လိက်မာဲ မရနုက်ကဵုစှ်ဝွံရ။ (၁၀)
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ်ဂပ်ဝ်သ္ဂုတ်သွာတ်ဝတ္ထုဂမၠိုၚ် စှ်သာ်ဝွံတုဲရ၊ ဟိုတ်နူဟိုတ်ဝွံလေဝ် ဝတ္ထုဂမၠိုၚ်ဝွံ ဓရ်ဟွံသေၚ်အိုတ်ရ၊ ဝိနယ်ဟွံသေၚ်အိုတ်ရ၊ စာ်စ္ဍးနူဒၠောံဗတောန်ကျာ်တြဲရ” ရဴဝွံ ကဵုတီရ။
၄၅၈။ ယွံကောန်တၠတအ် ဂပ်ဝ်နုက်ကၠေံ အဓိကိုရ်ဝွံတုဲရ၊ ဂပ်ဝ်ကဵုလလမ်တုဲရ၊ ဂပ်ဝ်ကဵု လလမ်ဗွဲတၟေၚ်တုဲရ၊ ဂပ်ဝ်ကဵုလလမ်ကၠေံ ဗွဲတၟေၚ်ဒးရးတုဲရ၊ ၜိုန်ဒှ်သာ်ဂှ်လေဝ် ယွံကောန်တၠ တၞဟ်နကဵုခမဳဂမၠိုၚ်ဂှ် တီကေတ် ပ္ဍဲလဒေါဝ်သၚ်လေဝ် တၠအဲ ဩဝ်ထပ်သၟာန်ဝတ္ထုဂမၠိုၚ်စှ်သာ်ဝွံညိ ရဴဝွံ သ္ဂးရ။ ပ္ဍဲအခိၚ်ဂှ် တဳလပိုဉ်ရေဝတဂှ် ပ္ဍဲလဒေါဝ်သၚ်လေဝ် ဂရၚ်ပတီသၟာန် တဳလပိုဉ်သဗ္ဗကာမိ ဝတ္ထုဂမၠိုၚ်စှ်သာ်ဝွံရ၊ ဇၟာပ်မသၟာန် ဇၟာပ်မသၟာန် တဳလပိုဉ်သဗ္ဗကာမိ သှ်ကဵုရ။ ပ္ဍဲအရာပတိုန် ဝိနယသၚ်္ဂါယနဝွံ ခမဳဂမၠိုၚ်ထပှ်ကၠံ မဟွံမွဲကဵုယုတ်,လောန်ဒှ်အိုတ်ရ၊ ဟိုတ်ဂှ်ရ ဝိနယသၚ်္ဂါယနဝွံ ကော်ခဴဂး “သတ္တသတိကသၚ်္ဂါယန” ရ။
သတ္တသတိကက္ခန္ဓကဒွါဒသမတုဲရ။
ပ္ဍဲခန္ဓကဝွံ ဝတ္ထုဂမၠိုၚ် ၜါဣသုန်ဂမၠိုၚ်ရ။
